Ɔkɔrɔti uwu kwonze 3
3
Ɛmɛgba Umba Ukpo
1Ɛmɛnɛ mi, kwuyengwu mi yi mbala yi awu, mi so yi iso kyamate mi so mbala enzu umba o yi Kwundu mo tayi; mi so yi iso kyamate mi so mbala enzu umba kwudu kwɔlɛ tayi, kyamate ɛmɛ umbelu Okrasi imbwaluma tayi. 2Mi shi yi kwɔmɛ moo mi shi yi kiya ingyi irimo ingyɛkɔ mo moo lu du kɔma mo. Kekelele lala lu du kɔma mo kpɔ, 3moo lu degbo luu wo kyamate enzu umba kwudu kwɔlɛ tayi. Lu degbo luu wo rise ingyi esu, luu tumo mbala esu kpɔ, ɛlɛ i zɔ gedegede te lu wo apula kyamate enzu umba kwudu kwɔlɛ o wo?
4Moo umbafo yi ɔ zɔ tee,<<Imi mi mbwalu Ɔpɔlu,>> umbafo ba ɔ zɔ tee, <<Imi mi mbwalu Apɔlɔsi>> - ɛlɛ i yi kyamate enzu umba kwudu kwɔlɛ o wo awu mo?
5Ishi Ɔpɔlu akwu uwe dɛɛ? Apɔlɔsi tete akwu uwe dɛɛ? Kinzu ki kwu ɛmɛgba umba Ukpo bi umba bɔkɔ lu zɛ mamba gba lu kwu idu lu fulo le. Uwewe nzu e wo ɛduma iyi bɔkɔ Ɔkwu e shi wu te le wo: 6Imi mi somo, Apɔlɔsi ba e kpo embyi akwɛyi Ukpo gba e shi apula i bulɔma le. 7Kwuwo kwɔngu, onzu u somo mbala u kpo embyi akwu kiya kinyinyi mo. Ukpo a ka mba ma wepepo mbo moo uwu gba e shi apula i bulɔma le. 8Onzu u somo mbala u kpo embyi, eyi ifulomo mbo akwu ikpɛnyi; Ukpo ee shi onzonzu rigbɛ ingyi ri fa la ɛduma iyi bɔkɔ e wo. 9Ki wo ɛduma la Ukpo ukpɛnyi; lunyi ba lu yi kyamate utu uwu Ukpo a lɔ nzu te la ki wo ɛduma mawu tayi. Lunyi lu kyo lu yi kyamate ugu uwu Ukpo tayi.
10Kwuwongwu esheshi iyi Ukpo e shi mi, Imi gba mi da yi la anu itama iyi Ɔzhizɔsi le kyamate onzu u mbo ugu ɔnyɛ bɔkɔ a ka kwosa ungwesheshi akwɛyi enzu umbafo ba o mbo mangwu tayi. Onzu u mbomo uwunawuna ba la ngbɛndu mu imbomo. 11Onzu uwunawuna la ka kwosa ungufo fo, moo kwosa kwu yi mɛzhi-e, ungwu gba akwu Ɔzhizɔsi Okrasi le. 12Onzu uwu e wo a ra laa egolu naa esiliva naa ekyi iyi abwa naa ɛwɛyi naa asɛ gba e mbo mu kwosa kwɔlɛ le, 13ɔnuwu bɔkɔ Okrasi a ba gbama awu ɛduma iyi uwewe o zɔ yi ma pepee moo o pwayi ma mu ɔyi kaa lɔ ma woshi umbwu ɛduma ɛnyi. 14Onzu uwu bɔkɔ ɛduma wu, ɔyi u pwu yi mo mo, de ba a fya rigbɛ. 15Onzu uwu bɔkɔ ɛduma wu i pwu mo mɔyi, de ba a fya kiya kinyinyi mo; tetete a fya isama ma, isama wu ba i yi kyamate onzu uwu a wɔ mu kwogba ungwu kwu yi mu ipwumo tayi.
16Lunyi lu yitu te lu kwu Ɔtɛpu uwu Ukpo mbaa bɔkɔ Kwundu uwu Ukpo e yi le mo? 17Gba onzu e tutu Ɔtɛpu uwu Ukpo mo, onzu awu a ma kwuwo ungwu Ukpo, moo Ɔtɛpu uwu Ukpo e yi kɛrikɛri, lunyi gba ba lu kwu Ɔtɛpu wu le.
18La lu kyoro ɛyi yi ma mo. Onzu uwu bɔkɔ enzu umba kwudu kwɔlɛ o to wu te e yi ilukwu, la gba la ɛwu kyamate orondo tayi akwɛyi akwu onzu uwu ilukwu shɛ. 19Moo ilukwu iyi kwudu kwɔlɛ akwu erendo meyi iyi Ukpo. Ɛlɛ i zɛ kya mbala iso iyi Ukpo e so mu kwokpo wu tee: <<Enzu umba bɔkɔ o to ɛmba te o yi amasa, kyo la amasa mba, Ukpo e yi yi mbo mo;>> 20iso ɛlɛ ɔ ka yi kpɔ mu kwokpo ungwu Ukpo tee, <<Ɔkwu e yitu tee egbo ibyima iyi onzu uwu ilukwu akwiyi umbwa.>> 21Kwuwo kwɔlɛ, la lu lafya laa ɛnwu ikwumo mu onzu, moo kiya ingyinangyina akwu ingya yi lunyi: 22Ɔpɔlu, la Apɔlɔsi, la Okefasi, la kwudu, la kwunyɔ la lukwu, la apula iyi kwushi kwɔlɛ la iyi keyi - lɛɛbi akwu iyayi, 23lunyi lu kwu umba Okrasi, Okrasi ba akwu uwu Ukpo.
Currently Selected:
Ɔkɔrɔti uwu kwonze 3: ETP
Highlight
Copy
Compare
Share
Want to have your highlights saved across all your devices? Sign up or sign in
The Word for the World International and The Word for the World Nigeria
