Dadatika Maxaafa 37
37
Yooseefixxa Oojje
1Ya'iqoobi anni ifik keessummati hedha'nemmake kenaanike boga'n ofo'le. 2Ya'iqoobixxe hortexxi jirte konneechchinni butti'a hexxeexxen. Yooseefi tommenna torbaane woggake dargaggeessa kadeemma wodda isixxi langaxxa amuwwa Baalanna Zilifaan ildeemmake ifike dayyuwwinni anniinka gedhebonna re'e allalaamman. Kunni dayyuwwi ifik asseexxe yaanexxa elobaaxxa oddonna annake'n iyyedage.
3Ya'iqoobii Yooseefi cimo giddo i'lemmaxxee wele labbaxxi oose ifixxi irra eeyya'nemman. Tennexxee bifa bifake shimalinni seesendeexxa qeerraaxxa seemma isi'a gobe. 4Dayyuwwi isik anni insa'neek insa'ne erra isoo eeyya'neexxa uudeexxi Yoosefii jibbine; iso'n eloka afo'o midde haasonnebaan.
5Yooseefinna oojjo oojjote; ojjotanna dayyuwwa ifike'n haaso'ee wodda insa'nee edi erra isoo jibbin. 6Isinna dayyuwwa ifike'n «Oojjotennexxa oojjo haaso'aannen caqasse: 7No'o duuchchiingi fichchi giddo ladde usudhdhate'ni he'nee'naa dedhange'n anxi ladde kexxe toggi hite uurrite; ha'nooxxi ladduwwa anxe laddeke qarqara'n qoqqobbeexxi anxe ladde'a sagadde» hiyye.
8Dayyuwwikinna iso'ni «Ati no'o'ni moototta'a heddaatesi? Dhugaandinni ati no'o moote galchitottaande!» Hine. Oojjotemmaxxe oojjoxxenna haaso'eemmake haaso'ixxe edi erra isoo jibbine. 9Higgeenna Yoosef wele oojjo oojjote ifike dayyuwwa'n, «Ani higgeenna wele oojjo oojjotenne; kunnise arishsho, agenjikinnaa tommenna mitte urjuwwa ani'a kunbulli hitaa'naa» hiyye haaso'e.
10Tennenni oojjo anna ifike'ninna dayyuwwa ifike'n haaso'ee wodda anni, «Tinni atixxi oojjo maa oojjoxxe oojjo? Dhugaandinni ani, ama atixxinnaa dayyuwwi atik dangennexxi ati'a kunbulli hinonna'aate?» Hiyya'ni iso'o xixe. 11Dayyuwwi Yooseefik Yooseefii yo'oshsha hinaafe; yaane kinni anni tenne yaane godobange'ni abixxe.#Erga. Huj. 7:9.
Yooseefik Dayyuwwi Yooseefii Gurgure
12Yooseefik dayyuwwinnaa ifike anniinka gedhebonna re'e allalo'a Seekemi'a me'e. 13Isira'eelinna Yooseefii «Egendetteshshanni dayyuwwi atik hore Seekemike loola'n allala'neexxa egenedeetten; amo insa'neba atee ergo» hiyye.
Yooseefinna iso'ni «Kadduun marannon» hiyye.
14Ya'iqoobinna «Martettexxi atike dayyuwwinna hori nage'a hedheexxa uuddettexxi odo aaxxe dagi» hiyye. Koonne qicinni Isira'eeli Yooseefii Kebiroonixxe dhooqanaa'n erge. Yooseefinna Seekemi geye.
15Ookkonna diidi giddo elqe kayya jeekki hiyyaa'naa manjichchi mitti isoo afeexxi, «Maachcho hassaatte?» Hiyye qore.
16Yooseefinna «Dayyuwwa anke hasaannen; gedhebo re'e haba allalla'neexxa ballo ane'n kuli» hiyye.
17Manjichchikinna isoo, «Insa'ne kabaa'n me'ine'een; ‹Dootaniba me'inannon› hinaa'naa laqeennan» hiyye.
Tennexxee Yooseefi dayyuwwa ifika hordofe mare'e Doota'inike loola'n insa'nee afe.
18Dayyuwwikinna Yoosefi'i bayyanni afeexxi insa'neeba mare geyebaangi shinno'a mari'ante. 19Insa'nenna weli'aani weli «Oojjaalli ikki dage» 20Amme iso'o shinne tenne baluwwanaa'n mittete'n hunno, ookkoneechchi uduma «Elobaak biniinchi isoo iteen hinannon. Oojjo isixxinna maa kaddaaxxa uundannon.»
21Roobelinna tenne laqeexxi insa'neexxe anganaa'n isoo gatiso'a «Amme isoo shiya waallo» 22«Munde dundinoqqe'e; tenne gammoojje'n hexxeexxe bale giddo iso'o darbe malee anga ha'noxxa iso'n hobbi hitinoqqe'e» Roobelinna iitta hiyyeechchi iso'o anga insa'neexxenaa'n gatiseexxi anna isikiba'a ille iima hiisso'aten 23Yooseefinna dayyuwwa ifikiba'a mare geyee wodda oddo'weemmaxxa bifa bifake shimalinni seesendeemmaxxa qeeraaxxa seemma isonaa'n fulchine. 24Yooseefinna aa'ne iyyemareexxi bale giddi'a darbine; balletinna wode'e affeemmabaaxxemman.
25Ookkoneechchi udumaa ita indo'a ofolle; tami assine uunda wodda Gele'adi'n dagga'neexxa Isima'eeltotixxa daddalto anfe; Isima'eelixxi daddaltonna gaaluwwa ifike'n fishshaxxa shitto, qurunfuuduwwa, belesaanenna karbe gaaluwwake'ni feenexxi Gibtse'aa me'itammaxxemman.
26Yihudanna dayyuwwa ifika hiyyee qici, «Dayyo no'oka shiyyatinna reyee qico sho'ati no'o maa la'o alfinanno? 27Tenne mannii'n amme isoo Isima'eelitotixxe daddalto'n gurgudhdhino malee anga no'oxxa abboo iso'n hobbi hinonnoqqe'e; isiqqa no'oxxe goden, no'oke maalan» hiyye. Dayyuwwikinna isike yaado'n weli'aage. 28Midiyaamitotixxi daddalto insa'ne biri'a shiqqe daggee wodda; Yooseefik dayyuwwi Yooseefii bale giddii'n fulcheexxi Isima'elitote'n lame tomme birretike sibljo'n gurgurte. Insa'nenna Yooseefii Gibtse'a adhdhine me'ine.
29Roobelinna baletibaa illee iima higeexxi Yoosefi ookko hedhebaaxxa uudeexxi yaadoti seemma ifixxa daree haaqqi asse. 30Dayyuwwa ifikiba'anna illee iima higeexxi, «Beltichiqqa ookko hedhebaa! Ani habaata me'anno?» Hiyye.
31Ookkoneechchi uduma labba recco dulleexxi Yooseefixxa qeerraaxxa seemma mundete'n gangalchine 32Eettene bifa bifake shimalinni seesendemmaxxa seemma ifike annibaa iyyemarreexxi, «Tenne ibbee'naa anfennen; tinni atike beltixxe qeerraaxxe seemma kaddeexxanna kaddebaaxxa hubatte uudi» hine.
33Isinna seemma ege'neexxi, «Tinni anke beltixxe seemman, belto anka biniinchake iteedheen; dhugaanden, Yooseefi kukkutemeedhen» hiyye. 34Ya'iqoobinna yaaddoti seemma ifixxa dare hidhake'ninna yaaddotixxa seemmanna usudhdheexxi belto ifike heddo barra oodhe. 35Labbaxxinna meyyaxxi isixxi oose duuchcha isoo dayyeessito'a dagge; kaddo malee isi dayya'a gophemmaxxee, «Oodhaa'ninni belto ankiba'a bale giddo e'yanno» hiyya'n belto ifike oodhe.
36Eettene yanna'n Midiyaamitotixxe daddalto Yooseefii Gibtse boga'n Feri'oonike ja'laaba heqqaluwwiinke ajajallo, Pheexxifaara'n gurgurte.
Currently Selected:
Dadatika Maxaafa 37: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
