Dadatika Maxaafa 38
38
Yihudaannaa Ti'imaari'i
1Yanna eettenee Yihuda dayyuwwa ifikenaa'ni gargar higeexxi Adolomichcho Hiira hiyyemaake manjichchinni hedho'a adadde me'e. 2Ookkonna Yihuda Kenaanichcho Seewaanixxa belto afe; iseenna aadheexxi welt diiphe. 3Isenna siila'witeexxi labba belto ilde; Yihudanna beltiinka summa «Eeri» hiyye fulche. 4Higgeenna siila'wite labba belto ilde; summaknna «Awunaan» hite fulchite. 5Higgeenna labbeexxi labba belto ilde; summa isikanna Seeloomi hite fulchite; isenna iso'o ildaa wodda Yihuda Koozibi hiyyemaake booncho'n hedhemman.
6Yihuda angafa ifike belto Eeri'a Ti'imaar hiyyendaaxxa belto aadhise. 7Yihudak angaf belti Eeri kinn Duuchchi Woddike Gootti edo fuggichchakemman; tennexxee Duuchchi Woddik Gootti iso'o shiye. 8Yihudanna Awunaanii'i, «Herelchummati atike dayyixxa galchitee summi isik ba'abaashsha sanne sa'issi» hiyye. 9Awunaani kinni ilemaak finni isik summinni ye'emabaaxxa ege'nemmaxxee dayyiinxe arenni diipheexxa yanna duuchcha finnake kaddammaxxa sanne butta duna'n dayyinke summinni finni ilemabaashsha asse. 10Tinni asseexxi yaane Duuchchi Woddik Gootti edo fuggoxxe kaddeemmaxxee'e Duuchch Woddik Gootti isoo shiye. 11Ookkoneechchi uduma Yihuda ifike beltixxa are Ti'imaari, «Belt ank Seela aadha geyaa qico'ni atike anniba marte hiyyeetummati ofo'li» hiyye. Isinna tenne hiyyeechchi Seeloominna dayyuwwa isikishshanni reyaan hiyye sodaatemmaxxeeten. Tennexxe Ti'imaar me'iteexxi ifike annike mi'ne'n ofolde.
12Qeerraaxxe yanna Yihudaxxi are, Shu'axxi belto, rerte. Yihuda yaaddo dayyefatteechchi uduma gedhebo isika orda cira'nemmake manniba'a Adolomichcho Hiiranni welti Temina'a allale me'e. 13Mannikinna Ti'imaari'a, «Kunnise atike aro'ik anni ifike gedhebixxa orda cira'neeka manniba'a Temini'a me'a'neen» hiyyende kulnde. 14Ti'imaarinna hiyyeetummatixxa seemma fulchexxeexxi ayyumma isexxi ege'nendabaashsha alba ifika boondeti buqqexxeexxi Timini'a me'ammake ori qarqara hedheeke Enaayim hiyyemaake qachchixxe hula'n ofolde; tenneenna assiteechchi Seeloomi nophphe aadha geye'naan isee aadhaabaashsha hoyyemeexxa egendemmaxxeeten.
15Alba ifika boondeti buqexxee'naa Yihuda isee uudaa wodda yababulto manjichcho iso'n fakkaatte. 16Belto ifikixxe are kaddeexxa ege'na gopheemmaxxee'e ise hexxebaa oriinbaa shikki hiyyeexxi, «Ballo magane atinni diiphoo?» Hiyye. Isenna «Atinni diiphonnole maa ani'a uutatto?» Hite qorte.
17Isinna «Hori anki giddii'n mitte re'eti buruusa ati'a ergannon» hiyye. Isenna, «Re'etika buruusa ergittatto qico'n abidishsha maachcho ani'a uutatto» hite qorte.
18Isinna, «Maa abidishsha atiaa uwwanno?» Hiyye.
Isenna, «Tenne atixxa maxxansixxa qube ise usurnginni, iittanni tenne abixiteettexxa siqqichcho ani'a uwwi» hite.
Tennexxee qorteechcho duuchcha ise'a uwweexxi isenni diiphe; isenna siila'wite. 19Ookkoneechchi uduma buqexxemmaxxa boonde hoyyeexxeexxi hiyyeetummatixxa seemmanna haaroba oddo'wite.
20Yihudanna abidilshakee uwwemmachchuwwa manjichchotenaa'n aadhdho'a re'etika buruusa jaalo ifike Adolomichcho Hiira'ni erge; Hiiranna erganjo gophe. 21Manjichchikinna «Eenaamike qachchixxe hula'n oriin qarqara hexxemmaxxi itti yabaabulto manjichcho haba hexxe?» Hiyye manna qore.
Mannikinna, «Konne loola'n hara yabaabulto manjo hexxemmabaan» hine.
22Tennexxee manjichchi Yihudabaa illee iima higeexxi, «Ise gopheeneni ookkone olla'ik manninna ‹Konne loola'n Yabaabulto manjo hara hexxemmabaan› hiyye» ane'ni kule.
23Ookkoneechchi uduma Yihudanna, «Ise abidilsemalcho ookkonee adhdhiteeshshanni gatilsituun; iitta kada gophpheele oso'lemannan. Kaddo malee ani konne recco ise'a ergeennan; atinna hasse isee affebexxon» hiyye.
24Sakkake agenji uduma, «Atike beltixxi are yababuldee'en; tennenaa'n kexxeexxeninna siila'wite'een» hiyyende Yihuda'n kulende.
Yihudanna, «Ise'e gadhi'a fulche giirate'n gubenduun» hiyye.
25Iseenna abidendeexxi gadhi'a fuldee wodda, «Aniqqa siila'wennek konne miyike anni'aaten; tenne maxxansixxa qube ise usurendemmachchonna tinni siqichcho ayyixxe kaddeexxa egendoottole uudi» hita'n ifike aro'iinke anna'n ergite.
26Yihudanna, «Ookkonee mi'ya ege'neexxi ank belti Seeloome isee galchaashsha assa gophennaxxee ise ani erra dhugaatixxen» hiyye. Ookkoneechchi uduma isenni langaxxa diiphebaan.
27Ildaaxxi barra geltee wodda kunnise ise godobi giddo lakko hexxemman. 28Ildaammaa woddanna mitti anga gadhi'a fulche; hobbaassammaxxinna «Kunn edise fuleen hita'n» anga isixxe'n diimmoka shimala usurte. 29Yaane kinni anga ifixxa hiissedhee wodda dayyi isik luffi hiiyye fule; hobbaassammaxxi manjichchonna, «Hitta luffi hite fuldette?» Hite; tennexxe summa isika Faaresi#38:29 Faaresi Hiyya Ibrititotike laagadinni luffi hiyye fulate Hiyyaten. hiyyeme. 30Ookkoneechchi uduma anga isixxe'ni diimmok shimala usurreemmak isiki dayyi ileme; summi isikinna Zaarahi#38:30 ZaaraHitaaxxi hiyya Ibrititotike laagadinni Diimmoxxe Yookaan Boro haachchabbamma woddike ifa Hiyyatishaten. hiyyeme.
Currently Selected:
Dadatika Maxaafa 38: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
