Dadatika Maxaafa 28
28
1Yisaaqinna Ya'iqoobii ye'e eebbisee uduma hiyye isoo ajajee qici, «Feeteexxenna kaddoole Kenaanitotixxa dubarte aaxxoxxe, 2Ta'anni kexxe Mesipheexoomiya hedheeke atixxe amake anniba Baatu'eeliba me'i. Okko atike abbike Laabake dubarri giddii'ni mitte aadhi#28:2 Abbiinka dubarraOkkone baro'ni Ibritotik manni abbiinka dubarra aadha hexxeexxeman. 3Duuchchinxa dande'aak Mageni atee eebbisowwaal! Heddo gosa gosaxxe tuutake arda kaddato qico'n ilde hori horte atixxinna birasaxxowwaal. 4Mageni Abirihaami'a uwweemaka atinna keessummummat hexxaatteka konne boga atike geegoke asse uwwo'a Abirihaamii eebbisemmashsha ateennaa atixxa horte eebbisowwaali» hiyye ajaje.#Dada. 17:4-8.
5Yisaaqinna Ya'iqoobii me'ashhsa asse; Ya'iqoobinna Mesipheexoomiya Laababa me'e; Laaba Yisaaqikenna Eesawuxxe ama Ribiqak dayyomman; Laabaki anni Baatu'eelinna Sooriyaxxe gosake manjomman. 6Yisaaqi Ya'iqoobii eebbiseexxi aadhaaxxa are halso'a Mesipheexoomiya isoo eerexxa Eesawu ege'ne; Yisaaqi Ya'iqoobii eebbisee wodda «Kenaanito aaxxoxxe» hiyyeexxi isoo ajajeexxanna Eesawu laqe. 7Ya'iqoobinna ifike annikannaa ifixxe amaka hiyyichcho laqeexxi Mesipheexoomiya me'eexxanna ege'ne. 8Konnee qicinni Kenaanitotixxe dubarte anna ifike Yisaaqii'n hittee qico gibiseexxa Eesawu ege'ne. 9Tennexxe Abirihaamik belt Isima'eeli i'leexxa Neebayyoxxa dayyo Mahileetii edo aadhemmaxxe melaalle'n lebe aadhe.
Ya'iqoobi Beeteli'ni Oojjoteexxa Oojjo
10Ya'iqoobinna Bersaabehii'n ke'eexxi Kaarani'a me'e. 11Mitte bakkaba geyee wodda arishsho e'yiteemmaxxee okko gale; eettene bakka'n hexxeexxe kinonaa'n mitte kinjo adhdheexxi boraafate diiphe. 12Oojoti buttii'ni ke'e qacce iima geyeeke riqa'n Mageniinxi erganna okkone riqi iimi'a da'mitaa'naanna butti'a dirritaa'naa uude.#Yoh. 1:51. 13Duuchchi Woddik Goottinna ise hana uurreexxi: «Ani anna atike Abirihaamikennaa Yisaaqike Gootta Magenon. Ati konnee itti diiphpheetteka boga ati'aannaa atixxe horte'aa uwwannon.#Dada. 13:14-15. 14Horte atixxik laakkossi dandesisabake maanchishsha birasaxxaan; atinna dhidhimake'ni borote'n middake'ninnaa bita'ake'n ba'lattatton; buttatik ardi duuchchi atinninnaa atixxe horte darree'ni eebbiseemaan.#Dada. 12:3; 22:18. 15Kunnise ani atinni welt hedhennen; martetteba duuchcha atee heqqannon; konne bogibaanna atee ille iima hiissannon; ati'a uwwennexxa adde ati'a muuxannoo qico'n atee waalabo'non» hiyye.
16Ya'iqoobinna diiphokenaa'ni dammaqee wodda, «Duuchchi Woddik Gootti dhugaandinni tenne bakka'ni hedheen; ani kinni tennee ege'neennabaan» hiyye. 17Isinna soda'ati «Tinni hitta sodaachchisa'neexxe bakka! Kunni Mageniinke mine malee wele bakkabaan; tinni iimi'a e'yatixxe hulan» hiyye.
18Ya'iqoobinna gorsan ke'eexxi boraafate galemmaka kinjo aadheexxi sooddotishsha kaaseexxi Ejeersiinxa zayite qacce isixxe'n hana dune. 19Ya'iqoobinna eettene bakka «Beeti'el»#28:19 Beeti'el: Ibritotike laagadinni Beeti'eeli hiyya Mageniinke mine hiyyaten hiyye summa fulche. Edi wodda kinni ookkone qachchik summi Loozateman.
20Ookkoneechchi uduma Ya'iqoobi hiyya'n wereegee qici, «Mageni hedhoole, konne me'anneke ora'ninna anee heqqoole, itannoxxa ita ani'a uwwoole, oddo'wannoxxa oddoono ani'a uwwoole, 21anke annike miniba'anna nege'ik higonnole, Duuchchi Woddik Gootti anke Mageno kada. 22Konne sooddotishsha kaseennek kinji Magenik mine kada, ani'a uutaattechchi duuchchinaa'n tommitte anga ati'a uwwannon» hiyye.
Currently Selected:
Dadatika Maxaafa 28: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
