Dadatika Maxaafa 29
29
Ya'iqoobi Mesipheexoomiya Geye
1Ya'iqoobinna me'ate'n ke'eexxi borotike ardika boga geye. 2Ookkonna mitte diida'n wodiinxa bale afe, tenne bale qarqaranna saseba gedhebi rubbi hiyye ciiseemman, buutotinna iikki gedhebi eettene balenaa'n wode'e ha'wa'nemmaxxeeten; eettene bale'ninna tuphemeemak lumok kinjomman. 3Gedhebi duuchchiingi baletiba'a bukki hiyyaa wodda allalisano kinjo baletinaa'n goggo'mishsheexxi gedhebo wode'e ha'wissa'nemman; ookkoneechchi udumanna ookkone kinjo wirri assiteexxi baletike afo'n hiissitaa'nemman.
4Ya'iqoobinna allalisano, «Koo dayyuwwa ha'no habaa'nite daggineek?» Hiyye qore.
Insa'nenna, «Kaaranii'ni dangennen» hine hiissine haasonne.
5Isinna, «Naakoorike beltika belto Laaba egendine'esi?» Hiyye.
Insa'nenna, «Eeti isoo egenneennen» hine hiissiene haasone.
6Ya'iqoobinna, «Meya isi nage'aangee?» Hiyye insa'nee qore.
Insa'nenna, «Ee isi nage'aangen, isixxi belto Raaheeli ta'a hore gande dagate'n hexxeen» hine.
7Ya'iqoobinna, «Yanna hedhenni hexxeen; hori aagaaxxi yannanna gelteebaan; konne hore wode'e ha'wissine baddatibaa adhdhitine me'we» hiyye.
8Insa'nenna, «Gedhebi duuchchi bukki hiyyee'naa kinjo baletike afo'onaa'n goggo'minshoole malee mittelchonna assa dandenabonno; ookkoneechchi uduma gedhebo wode'e ha'winsannon» hine hiissine haasone.
9Ya'iqoobi allalisanoti welt haso'anegge'n hedhee'na Raaheeli allalisanjote kaddemmashshanni ifike annika gedhebo gande dagge. 10Ya'iqoobi ifike abbika Laabaka gedhebo oofa'ni daggaa'naa Raaheeli afeexxi baletibaa me'e; baletiba mareexxi kinjo baletike afo'onaa'n goggo'mishshexxi ifike gedho ha'wisse. 11Ookkoneechchi uduma Ya'iqoobi Raaheelii sunqedhe; hafurakanna gikki asse oodhe. 12Ya'iqoobinna iseke annike firannaa Ribiqa ildeeke belto kadeexxa Raaheeli'ni kule; isenna gongite marteexxi tennee anni ifike'n haasotte. 13Laabanna isixxe dayyoki belti Ya'iqoobi dageexxa laqqeeshshanni qophedho'a gongee hiribbi hiyye isoo sunqedhe uduma ifike mine'n adhdhe me'e; Ya'iqoobinna kaddeexxa yaane duuchcha Laaba'n kule. 14Laabanna Ya'iqoobii «Ati aninni mitte mundenna mitte maalan» hiyye.
Ya'iqoobi Liyaannaa Raaheelii Aadhe Ya'iqoobinna mitte agenjo duuchcha insiba ofo'lechchi uduma,
15Laaba Ya'iqoobii'i «Fira anke kaddettexxee calli'a tola ani'a ergatemiyyo hasissabaan; rundi atik maachcho? Ane'ni kuli» hiyye. 16Laabanna lame dubarra afeemman; angafatik summi Liya, shiixxoxxi kinni Raaheelitemman. 17Liya julullitte illeexxemman, Raaheeli kinni dhagga bifaxxe lollobittemman.
18Ya'iqoobinna Raaheeli'i eeyyeexxi, «Shiixxoxxe atixxe dubbarrichchoxxee ati'a torbaane wogga ergatemannon» hiyye. 19Laabanna «Ise'e wele manji'a uwwennexxi mannii'ni ati'a isee uwwennexxa woyyan; kabban aninni hedhi» hiyye. 20Ya'iqoobinna Raaheelixxee torbaane wogga ergateme; isee eeyya'nemmaxxee tinni torbaane wogga iso'n heenoxxe barra kadde.
21Ookkoneechchi uduma Ya'iqoobi Laaba'a «Ergatemenexxi anxi yanna muuxendeeni aadhonna'a belto atixxa ani'a uwwi» hiyye. 22Laabanna jila jileexxi olla'iinka manna duuchchanna bukki asse itise ha'wise, 23Bogi galgalo'ee wodda kinni Laaba Raaheelixxa bakka Liya aadho'a Ya'iqoobi'a uwwe; Ya'iqoobinna isenni diiphe. 24Laabanna Zillfaan hiyyendaaxxa ifixxa erganjo Liya'a belto ifixxe ergatendo'a uwwe. 25Bogikinna soodee wodda kunnise isee Liyatemmani; tennexxee Ya'iqoobi Laaba'a, «Tinni ane'ni assitettexxi yaane maachcho? Ani ati'a ergatemeennaki Raaheelixxendemabaa? Mayee anee sobbette?» Hiyye.
26Laabanna, «Angafa hexxee'naa shiixxoxxa heerunsiisa no'oxxe aadabaan. 27Tennee heerumiinxa jilaxxa torba bidhdhi, ookkoneechchi udumi'a higgeenna torbaane wele wogga ani'a ergatendottole iseenna ati'a uunannon» hiyye.
28Ya'iqoobinna tenne yaane'n weli aage; isinna Liyaa aadhe mitte torba turee uduma Laaba belto ifixxa Raaheelii iso'n heerunssiise. 29Laaba meyyaxxa ifixxa erganjo Baalaani'i isexxe erganjo kaddo'a belto ifixxe Raaheeli'a uwwe. 30Ya'iqoobinna Raaheelii aadhe; Liya iimi darrenna isee eeyye. Ookkoneechchi uduma Raaheelixxenna hiyyeexxi wele torbaane wogga isi'a ergateme.
Ya'iqoobixxa Oose
31Liya jibbendeexxa Duuchchi Woddik Gootti uudeexxi ila ise'a uwwe; yaane kinni Raaheeli ila affeemmabaan. 32Liyanna siila'wite labba belto ilde; isonna, «Duuchchi Woddik Gootti rakko anxa uudemmaxxee telchinni edi'a aro'i anki ane eeyya eeyyaan» hita'ni summa isika Roobeeli hite fulchite#29:32 RoobeeliHittaaxxi hiyya Rakko anxa uudeen Hitaaxxa tika afe'eexxe Ibritotixxe tikanni welt weli aagake ye'injo affe'een. Isike Summixxi tika kinnUuda belto Hiyyaten. 33Higgeenna siila'wite labba belto ilde, isenna «Magen gibensha anixxa uudemmaxxee konne belto ani'a lebeen» hita'n summa isika Simoon#29:33 Simooni Hiyya Laqaake Hiyyate kada dandeetaan. Ibrititoke laagadinni Simon hiyya Laqeen hiyyate. hite fulchite. 34Higgeenna siila'wite labba belto ildeexxi, «Sase labbaxxa oose isi'a ilennaxxee telchinn edi'a aro'i anki aniba shikki hiyyaan» hita'n summa isika Leewwi#29:34: Leewwi Ibrititotikenni Leewwi hiyya Hanqalfaan hiyyate hite fulchite. 35Higgeenna siila'wite labbanga ilde «Ta'a yoona Duuchchi Woddika Gootta galateefatanon» hita'n summa isika Yihuda#29:35: Yihuda: Ibrititotikenni Yihuda hiyya «Galata» hiyyate. hite fulchite. Ookkoneechchi uduma ila uurrisse.
Currently Selected:
Dadatika Maxaafa 29: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
