Dadatika Maxaafa 27
27
Yisaaqi Ya'iqoobii Eebbise
1Yisaaqi cime ille afa gophpha'n daggee wodda ifika angafa belto Eesawu'u ye'eexxi hiyyee qici, «Anke belto» hiyye ye'e; Eesawunna «Hee kunna kabanni hedhennen» hiyye.
2Yisaaqinna «Ta'a ani yoona cima'n dageennen; reyo barra kulda'n daggabaan, 3Tennexxee amo atika adamika miya gabetannaa mogido adhdhi, bada'a giddonna marte adande maala ani'a itonna'a iyyedagi. 4Reyebo'nongi atee eebbisonna'a ani eeyyannaxxa xe'maxxa ita giissite anee itis» hiyye.
5Ribiqa Yisaaqi belto ifike Eesuwu'n haaso'a'neechcho duuchcha laqqa'nemman. Tennexxee Eesawu adame iyyedago'aa adamokee badda'a me'e uduma, 6Ribiqa belto ifika Ya'iqoobi'i hittee qici, «Anni atiki dayyo atika Eesawu'u 7‹Reyebo'nongi itennexxi Duuchchi Woddike Gootti edo atee eebbisonnaa adamo adande xe'maxxa ita qixxeessi› hiyyaa'naa laqeennen. 8Ta'a yoona anke belto! Kulaannexxa laqi atee ajajennexxa assi. 9Kexxe hori giddi'a marte lame elolla re'etika buruusa ani'a iyyedagi; aninna anni atik eeyaaxxixxa ita isi'a qixxeessannon. 10Isinna reyebaa edi darre atee eebbiso'a aaxxe e'yitenaa ituun» hite.
11Ya'iqoobinna ifixxa ama Ribiqa'a, «Dayyo anke Eesawuk bisi ordatiken; anki bisi kinni orda afebaake shaqqaken; 12Akimagaada anni anki anee qaqqabeexxi isoo'o sobennexxa ege'naan; iitta kaddoole eebbatixxa bado badino ifitti adhdhanno hiyyoten» Hiyye.
13Amatinna isoo, «Anke belto atixxi badino ane ama atixxixxe kadduun; antinni calli ani hiyyaanneshsha martettexxi ookkone buruusuwwa ani'a iyyedagi» hite.
14Isinna mareexxi buruusuwwa ookkone ama ifixxee iyyedage; isenna anni isiki eeyyammaxxixxa xe'maxxa ita isi'a qixxeessite. 15Ookkoneechchi uduma Ribiqa mine uggitemmaxxa angafa ifike beltixxa Eesawuxxa bifaaxxa seemma aaxxeexxi shiixxoke ifike belto'n Ya'iqoobi'n oddeessite. 16Iittanni re'etika goga lamiinxe anga isixxe'ninaa gooba isike'n orda hexxebaaba shaqqaba oddeessite. 17Ookkoneechchi uduma eettene qixxeessitemmaxxa xe'maaka hamaranna ra'issiteeka waasa belto ifike Ya'iqoobi'n uute.
18Ya'iqoobinna ifike anniba mareexxi, «Annayyo» hiyye ye'e.
Isinna «Hee» hiyye ke'eexxi; «Anke belto ati ayyete?» Hiyye.
19Ya'iqoobinna «Ante angafa belto atike Eesawuten; hitetteshshanni asseennen, iima kexxettexxi adame iyyedagennekenaa'n itte anee eebbisi» hiyye.
20Yisaaqinna belto ifika, «Anke belto! Hitta rakke affette?» Hiyye.
Ya'iqoobinna «Duuchchi Woddik Gootti Mageni atik ani'a qixxi asse» hiyye.
21Yisaaqinna Ya'iqoobi «Ati anke belto Eesawute kaddettexxannaa kada gophphettexxa qaqqabe uudonna'a ani biri'a shikki hiyyi» hiyye. 22Ya'iqoobinna anna ifike Yisaaqi biri'a shikki hiyye; annikinna isoo angati qaqqaba'n, «Haaso'i giddo Ya'iqoobite; lamiinxi anga kinni Eessawuxxe anga» hiyye. 23Anga isixxi dayyo isike Eesawuxxishsha ordatixxe kaddemmaxxee Yisaaqi Ya'iqoobixxa ayyumma gargar hiisse ege'naa dandeebaan; tennexxe iso'o eebbise. 24Yisaaqinna, «Dhugaandinni ati aninge belto Eessawundee?» Hiyye laqe.
Ya'iqoobinna, «Eeti aniqqa atinge belton» hiyye hiisse haaso'e.
25Ookkoneechchi uduma Yisaaqinna, «Anke belto yoona atee eebbisonna'a adande iyyedaggetteka shiqishi ito» hiyye.
Ya'iqoobinna ita anna ifikee shiqishe'naa ite, woyinetixxa bookanna isi'a iyyedage'naa ha'we. 26Ookkoneechchi uduma anni isik Yisaaqi Ya'iqoobii, «Anke belto! Kaba shikki hite'e anee sunqedhi» hiyye.
27Ya'iqoobinna shikki hiyye isoo sunqedhe. Yisaaqinna Ya'iqoobixxe seemmaka foole ulateechchi uduma hiyyeexxi isoo eebbisee qici,
«Kunni anke beltik fooli,
Duuchchi Woddik Gootti isoo eebbisemmashshanni,
fishshaake fichchike foolishshaten.#Ibr. 11:20.
28Mageni iimii'n woja uwwowwaali,
bogi atikanna liishsho kadowwaal,
midhatinna woyine ati'a muldu hite missowwaal.
29Mootummuwwa duuchcha ati'a hirende galdowwaal
gosa gosak ardi duuchchi ati'a heeshshiqokki hiyyowwaal.
Dayyuwwa atike duuchchi'a goottake kadi;
atixxe gode godobixxi oose ati'a heeshshi qokki hitowwaal.
Ate badinaakir badinemowwaal;
ate eebbisaakiir eebbisemowwaal.»#Dada. 12:13.
30Yisaaqi Ya'iqoobii eebbise bireechchi uduma Ya'iqoobi anni biriin fulebaangi hirbange'n dayyi isik Eesawu adamokenaa'n dage. 31Isinna iittanni xe'maxxa ita qixxeesse annakee shiqisheexxi, «Annayyo! Anee eebbissota'a amo kexxe ofolde adamenneka iti» hiyye.
32Anni isiki Yisaaqinna, «Ati ayyete?» Hiyye isoo qore;
Isinna «Ante angafa belto atike Eesawuten» hiyye hiisse haaso'e.
33Yisaaqinna lumo qico culphisa'n, «Woldo ani'a adame iyyedagemmak Ayyetemata? Ati daggotta'a hexxee'naa ookkonee adameechcho ite isoo eebbisennen, isinna eebbisemeeke kadaan» hiyye.
34Eesawunna anni isiki hiyyeexxa laqeexxa hafuura gikki'asse hiiqqise oodha'n «Annayo! Anee eebbisi» hiyye.
35Yisaaqinna «Dayyi atiki dageexxi anee dedhise eebba atixxa adhdheen» hiyye.
36Eesawunna, «Summi isik Ya'iqoobi hiyyema dhugaaten; isi anee dedhisaa'naa tinni langaxxen, ediseexxi angafumma anxa adhdhe, kunnise ta'anna eebba anxa adhdhe» hiyye; lebeexxi isoo, «Anita gatissettexxi mitte eebbanna hexxebayyotee» hiyye qore.#Dada. 25:29-34.
37Yisaaqinna Eesawu'n «Kunnise isoo atike gootta asseenne; dayyuwwi isiki duuchchinna isike erganjuwwa kadaashsha asseenne; midhatinna woyinetixxi bookka iittanni wo'mitaashsh assannon; anke belto! Ati'a higge maa assanota?» Hiyye hisse haaso'e.
38Eesawunna anna ifika «Annayo! Eebba atixxi mitte callata? Annayyo aneenna eebbis» hiyya'n hiiqise oodhe.
39Anni isik Yisaaqinna iso'n hiisse haaso'ee qici,
«Kunnise galdumi atiki,
Liisho bogii'ni
iimike wojinaa'ni bayyatee'naa hexxatton.
40Atike wolaantichcho ate'e galchaan;
dayyo atikeenna ergatendatton.
Ati jinnite iso'n kexxatto wodda kinni
miiccama isikanna,
ifi iimii'ni fugussitatton» hiyye.
Ya'iqoobi Laababa'a Baaje
41Ya'iqoobik anni Yaa'iqobii eebbisemmaxxee Eesawu Ya'iqoobii ijje isixxa gibeexxi godobi giddo «Egedhdhi annayyo reyo sheqe'een, ookkoneechchi uduma dayyo anka Ya'iqoobi shiyannoni» hiyye hede.
42Ribiqa anqafi ifike belti Eesawuk hiyyichchi isebaa geye; isenna shiixoka ifika belto Ya'iqoobi'i shiixxoka ifika belto ye'isseexxi, «Dayyi atiki Eesawu atee shiyo'a yanna heqqedhate'n hedee'en; 43Ta'anna anke belto, ani hiyyaannoshsha assi; kexxettexxi Kaaranike boga'n hedheeke anka dayyo Laababaa'a baaji; 44Dayyi atikixxi mufe qiidda qico'n shiixxoxxa barra ookko hekki hiyyi; 45Yaane kinni mufe isinaa'n qiiddee'naa iso'n assitettexxa dedheechchi uduma ate'n ergee'naa higge daggatton; mayee ha'noo lamiinga mitte barra'n gophanno?» Hite. 46Ribiqanna Yisaaqii «Eesawu aadheexxe Heexxiitotixxa dubartexxe hedho anee gibise; Ya'iqoobi konne boginaa'n Keexiitotixxe dubartenaa'n aadha'neexxe kaddoole ani'a reyo woyya» hite.
Currently Selected:
Dadatika Maxaafa 27: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
