Esa 43
43
Bïraþe kïkïðanbe la i Ngebadø Israelag ye
1Î Jakob, tajigla,
kel Bïraþe ngendai
kï ngeþai, î Israel:
Ot þool, kïta m'badøi,
m'kuni kï tøi m'an: Î lom.
2Lon a ud man a ne,
m'a mî sei nat;
ke a i gang bah kaa
a tiw døi al,
ke a i ndia kam horrt kaa,
horr a õi al,
ndõhorr a ødi al tø.
3Kïtø mî, Bïraþe Luwah loi,
Ngekunjðang kï Nge Israel, Ngekaji.
M'ad Ejipt kad i nyabadøi,
Etiopi kï Seba ørrïn gooti.
4Kïtø î taa, gati i ngãi takummt,
in nya køsïgon, na m'tari.
Kïtø 'nten m'ad deg m'gan gooti,
girrdeg kïdangdang kïta kumkajir loi.
5Ot þool, kïta mî sei nat,
ko loþakàdt m'a m'ad koih tel kï þe,
kokudkàdt m'a m'kaw deg kï tit.
6M'a m'el lo kï døø m'an: Ad.
Na m'a m'el lo kï þodo m'an:
Ot køg død.
Ad nganïm kïdïngã ðen ko døningt kïsãi,
kï nganïm kïdë ko døngoi døningt tø.
7I ðen kï dekïðen'n kun tøm dønt,
deg tube'n m'ndad,
in m'þad, kïta køsïgon lom.
8Ad teen kï girrdeg kï mundo,
îgïn awïn kï kumd,
mbog, na awïn kï mbid.
9Kï girrdeg tube kawïn na kïnat.
Kï girrdeg kïdangdang mbõn na ho.
Nõ kudt asï kør hoi nyag n'tøi kete,
ke asï køj'j nyag kïmaði a?
Ad'd ðen kï ngémanajg lod
kad ørrïn ta dødt.
Ad anan: 'Nten i rota.
10In ngémanajg lom, kel Bïraþe,
in, þerg lom kï m'mbedsï,
kad i gerïn, na admïn kamsï,
kad i gerïn girra ad i Mî.
Kete nomt luwah mad kï þah goto,
ke gomt luwah mad kïðang goto tø.
11I mî, i mî la mî Bïraþe,
ngekaj kïðang goto, na mî tã.
12Mî la mî ngekelta kï ngekaj,
kï ngelamber,
lon yog goton ne dansït þaitø,
in ngémanajg lom, kel Bïraþe.
13Mî Luwah, Mî titbe,
na ngekugkørr jimt goto,
m'a m'ða kïla, nõ a øgïm dø a?
14Titbe kel Bïraþe,
Ngebadøsï, Ngekunjðang kïnge Israel:
I kïtatøsi la m'ndï m'la'n
madngeta kïdø Babilont ye.
M'a m'tuþa ngekãi tube kø,
ad i Kaldeag tube,
ngégaburo dø too kïbogt lod,
in awïn kamt.
15Mî Bïraþe Ngekunjðang losï,
Ngendah Israel, Ngar losï.
16Titbe kel Bïraþe,
ngetee ðob kam bahbot,
ngetee ðob dø mangt kïbobo,
17kï ngeþai kï pusïðøø kï sïndag,
koosï ngéðøøg, kï kïrãðøøg,
got gog son ber nat kïðabe,
a asï þain al,
oin tit horr kï mesï
lambat be,
18Ot gaan dø nyagt kï tøin kete.
Ot gan kamsï dø nyagt kï kaglot
kïmaði nu.
19Oon m'ndï m'ða nya kïkij.
Nya'n non ndï ða lo tee tajigla,
oon ale?
à m'a m'ða ðob kam dïlalot,
kï bahg kam lot kï mangah.
20Dãg kïmut a øsïn gonïm,
talbisïg kï bulumg tø
kïta m'ad man tee kam lot kï mangah,
kï bahg kam dïlalot
kad kïmbedg lom ãin.
21Deg'n m'þahd kïtam mî kïþe
a lan mber ndubïm
22Na î Jakob, i ko kïdømt al,
î Israel, roi oi siw romt.
23I ðe romt kï batg loi
kïta kadkari kïlahorrt al,
ke øsïgonïm kï kadkari kïjakø al.
M'ad i ða þer kï kadkari kïlakad al,
ke kad i ngah nya kïkootmbî al, m'ad roi oi siw.
24I ndugo nya kïkootmbî
kï nar loi adïm al,
ke ad kamm ndan
kï mbool kadkari kïjakø al.
Na adïm m'ða þer kï majalg loi,
i telïm þert.
25I mî, mî la m'børr tøidøtag loi kø,
kïtatøm mî kïþe,
m'ad kamm gah dø majalgt loi gog al.
26I tøsï hankalm i ndol døt,
ad j'aw nat lo gangtat.
Î kïdøi, elta ørrïn ta døit.
27Bøwi kïdasa ða majal,
ngémbeltag loi tøin dø ta lom,
28Kïtø 'nten m'ad kïbog kï lo
kïjaþat't telïn kïyerr,
na m'la Jakob kï nujkøt,
Israel tø kad i nya kïkid.
BIBLE MBAÏ © 1980 Alliance Biblique du Tchad.