2 Sam 13
13
Amnõ ða maial kï kõnan'n Tamar
1Go nyagt'n non, nya'n ða nya i titbe: Absalom ngon Dabid aw kï konan'n kï mand ngãi, tøa i Tamar, na Amnõ ngon Dabid ndiga. 2Amnõ ða kamkil kïta kõnan'n Tamar, mbã ða mõi kïta i ngomand kï ta ngaw al þaitø, na Amnõ oo a an: Ngang ngãi kad n'ngaah. 3Amnõ aw kï namïn mad, tøa i Jonadab ngon Simea ngonkõ Dabid, i de kï ngekumtøg ngãi. 4Jonadab el Amnõ an: Î ngon ngar, kïtøði þai i nyemïn titbe kïndøgndøg a? Asï ke i ndig kelïm ale? Amnõ tur an: M'ndig Tamar kõnan Absalom kï ngon bøwïn. 5Na Jonadab el an: I to dø tïraþiit, i ða roi tit ngemõi be. Lon bøwi a ðe døit a ne, i køa kï ad kõnani Tamar ðe adi nyasa, kï ða nyasa ad oo, na a i sa jiat.
6Taa ne, Amnõ to ber ða ron tit ngemõi be. Ngar ðe døat, na Amnõ ndïje ngar kad ad kõnanïn Tamar ðe ða woina joo takumïnt kad'n taa jiat n'sa. 7Kamla Dabid la el Tamar kam kujt loa an: Aw tajigla kuju lo ngokõi Amnõ, i ða nyasa ada, 8Tamar aw kuju lo ngonkõn Amnõ. Amnõ to ber. Tamar un nduj, li, þa ðan woina takumat, 9got gog løi woina kam bait awïn nõ Amnõt, na Amnõ mbet sa. Amnõ el an: Ad deg tube teen gomt kø. Deg tube teen goat kø. 10Kamla Amnõ el Tamar an: I ðe kï nyasa kam kujbimt kad m'taa jiit m'sa. Tamar un woina kï ða nõ, na awïn ro kõnan'n Amnõt kam kujþiat.
11Lon la nyasa ada ye, Amnõ høa, na ela an: Kõnanïm, adïm to sei. 12Tamar tur an: Be al, ngokõm, ot ðam kï lo ngetøgt, kïta a ðan nya kï titbe kam Israelt al. Ot ða nya kïþood 'nten. 13Na mî m'a m'aw ðah kï rosøl lom a? Î tø, a î tit kïkïða ku kurdegt kam Israelt. Tajigla m'køi kï i el ngar, na ngar a øg al kad mî nëi. 14Na Amnõ ndïg koo dø ta lo Tamar al, tøia kï tøgïn, ða kï lo ngetøgt, na to sia.
15Got gog Amnõ tel øsa ta kï tøi ndigïn ndiga kete nõ ngãi, tøi ndig'n ndiga dasa. Amnõ ela an: I þai aw kø. 16Tamar tura an: I be al, kõnanïm, kïta lon i tuþam kø a ne, i ðagootal tøi majal kï i ða sem kete nõ. 17Be kaa, Amnõ ndïg koo dø ta loa al. Amnõ kun basan'n ða kïlaþer loa, ela an: I tuþa dekïdë'n ndïn romt kø, na ut tabit. 18Na Tamar aw kï kubji kïngal ront kïta i kub'n ngan ngar kïdëg a lan lon în ne ngan mandg kï taan ngaw al þaitø. Ngekïlaþer lo Amnõ øsa kïtïga, na ut tabit.
19Tamar øi buhoor kïdønt, hø kubji kïngal lon til, ü jin dønt, aw kï wi kïkud tant. 20Kõnana Absalom ela an: Kõnani Amnõ to sei a? Tajigla kõnanïm, i nya tai; i ngonkõi. Ot hø nya 'nten kamit. Na Tamar ndï kï ndo kïndïnga kam kujt lo kõnan Absalom. 21Lon ngar Dabid oo hoi nyag'n non tube ye, wong tøla søkïr. 22Absalom elta kïða kï Amnõ al kïta kam Absalom tuj dø Amnõt kïta yerr'n yerr kï kõnanïn Tamar.
Absalom tøl Amnõ kamla ãi
23Lon þal joo tøi woi ye, Absalom ndï Baal Hasor nderrbe kï Epraim nat kï ngéja bî batg lon, na Absalom kun ngan ngar tube lo mburnamt. 24Absalom aw ro ngart, ela an: Oo þer loi a kï ngéja bî batg nõ. Ngar, m'køi kad î kï ngékïlaþerg loi awïn nat sem, mî þer loi. 25Ngar el Absalom an: A a, ngonïm, j'a kï j'aw tube al, na þeta j'a kï tel nya kïkøi døit. Ke Absalom køa kï rotîn kaa ne, ngar ndig kaw al, na njang døa. 26Kamla Absalom el an: Îla i ndig kaw al a ne, i nya ngonkom Amnõ ad aw nat sej. Ngar tura an: Amnõ a aw nat sei kïtøði a? 27Na Absalom køa kïdøt døt mbã ad ngar nya Amnõ ad aw kï ngan ngar tube nat sia.
28Absalom ndamber ngékïlaþerg lon an: Oon maj. Lon kam Amnõ a ndan kï kasïnduu na a ða ronel a ne, m'a m'elsï; øsïn Amnõ i tølïna. Kamla i øsï tølïna, ot þoolïn. I mî la m'ndasï mbera ale? Iren kamsï, i ðan lo ðasï. 29Ngékïlaþerg lo Absalom ðan kï Amnõ tit'n Absalom ndadïn mber. Kamla ngan ngar tube þain, dekïðen dø korro rapait lon, na ãin.
30Lon în dø ðobo þaitø ye, hoia tee ro Dabidt, anan: Absalom tøl ngan ngar tube, kïkïða kï nãi goto 31Ngar þai dõ, hø kubg lon til, na to ber døningt. Ngékïlaþerg loa tube ðan døat kï kubg lod kï til ho. 32Jonadab ngon Simea ngonkõ Dabid un ta, ela an: Ot kad ngeem oo tit tølïn basag ngan ngar tube, na Amnõ kïðabe la oi ye. I nya'n Absalom ndah kamïnt kï n'ða maði ndøt'n Amnõ yerrïn kï kõnanïn Tamar. 33Tajigla ngar kï ngeem, ot hø taa kamit kan, ngan ngarg tube oin na i Amnõ kïðabe la oi ye. 34Taa ne, Absalom ãi. Basan ða ngon lo ye, un kumïn kïdõ, na oo Koosïdeg ndï ðen kï ðob kïgidat kokad mbalbot.
35Jonadab el ngar an: Oo, ngan ngar ndï ðen nõ tit'n ngekïlaþer loi elïn. 36Na lon nya takelta ye, ngan ngar ðen, na unïn ndid kïdõ nõ ne. Ngar kï þerg lon tube mbelïn nõ þitit.
37Absalom ãi aw ro Talmait ngon Amihud, ngar kï Gesur. Dabid nõ ngonïn kïndøg tube. 38Absalom ãi aw Gesur, ndït nu þal mïta. 39Kamla ngar Dabid nya ta tuþa go Absalom kïta kama tel søl dø koi Amnõt.
BIBLE MBAÏ © 1980 Alliance Biblique du Tchad.