Marko 8

Yesu bbû nyû bbalè lówfù tho nì dho

(Mat 15:32-39)

1Drá ní nga dzzdjú, njàddí bíy nì bbalè njûw ì ddìngaó. Ndrǔ tdè ngǎ ddiy rò ní cha ì kà ì nyǔ nì. Yesu kâ ndèy kodjú kpa iy ndèy dè ndèymí à kâ tdrà, 2“Ma nì zòw-lò nà í bbalè dhò. Ndrǔ tdè ma nà ddu gbow nì dhò, ndèymí ndrǔ nì ngǎ nyû ní cha ì kà ì nyǔ nì. 3Ya ma chô ndrǔ bbakà ò ɦùw nà, ndrǔdhí klôw rà shì ndèy si tuw ó, ddiydhò njàddí ndrǔ shì ndì ní nga óddù.”

4Yesu kodjú kpa kâ à dhiy, “Í ɦiy ní nga ó, mà dhó ndèy kâ nì nyû chùw ŋangá cha í bbalè wánì dho nyù nì?” 5Yesu dhîy, “Nyì ní mùkátì nà thi?” Ndrǔ ngù lò, “Mà nì mùkátì nà zarr̀gbòw.”

6À jà bbalè dhò, ndrǔ dǒw gudjò. À kâ mùkátì tduw ndèymí à kâ madha bbu Ddrà dhò, à pbrr̀ ǒnga ndèymí à kâ bbu ndèy kodjú kpa dè, ndrǔ ndǒ bbalè dhò. À kodjú kpa ddí kâ njèy fǔchú. 7Ndrǔ tdè ddí dùdú ní bbì nà. Yesu bbû madha Ddrà dhò djǒmá ndèymí à tdrà ndèy kodjú kpa dhò, ndrǔ bbú bbalè dhò ddí.

8Bbalè wánì nyù ndèymí ndrǔ zz̀ kì. À kodjú kpa njûw nyû gògò cha ndèy mà nì tdyǔ zarr̀gbòw věy-věy. 9Fú nga ó bbalè tdè chow-chow lówfù tho. Yesu kâ ndrǔ dha. 10Fu nga ddù Yesu mà ndèy kodjú kpa nà kâ djèy ngǒ ò ndèymí ndrǔ kâ dà ju-ddà djòluw Dalmanuta mí ngòw ò.

Farisayo ní kpa dhîy ɦiy Yesu dèddù

(Mat 16:1-4)

11Farisayo ní kpa rò shì tdè Yesu dè ndèymí ndrǔ lòw dey lò pà à nà. Ndrǔ jì tdè ì mbrř Yesu ónga. Fú ddiy dhò, ndrǔ kâ à dhiy, à njěy ì dho ɦiy, ndaní à dhǒ Ddrà chô fú li ndey. 12Yesu kâ zòw mí ndèy hì zz̀ ndèymí à kâ tdrà, “Ddudhò í cho mí bbalè ní ddùw mí ɦiy měy? Manì nyì dhò dìchú ní lò tdrǎ, ddùw mí ɦiy rò nì ngǎ cha ma rà bbu ndrǔ dho nì.” 13À kâ ndrǔ bbà ndèymí à kâ djèy ví ngǒ ò, ka dà ju-ddà djòluw dzisángó nga là djò.

Farisayo ní kpa ndèymí Herodde Antipas dhí njèydha nì gbè thiy níchú

(Mat 16:5-12)

14Yesu kodjú kpa djùkpa dzûw tdè ndèy ká ì nì mùkátì tdúwdha nà ndèymí ndrǔ tdûw tdè mùkátì nú ddì ì nà ngǒ ó. 15Yesu kâ ndrǔ nyú ddù, à kâ tdrà, “Nyì déy nyì nyú nà, Farisayo ní kpa mí thiy róddù ndèymí pey Herodde Antipas mí thiy#8:15 Matayo 16:12; Luwka 12:1. róddù.” 16À kodjú kpa lòw dey í lò djú lò tèy ì kàòluw, “À nì í lò tdrǎ nzá mà mbà mùkátì ddiy mí lò dhò.”

17Yesu tsì tdè cha ndrǔ nì tdrǎ nì lò, fúddiy dhò à dhîy ndrǔ, “Ddudhò nyì ní lò těy ngǎ nyì nì ndanà nì mùkátì djú? Nyì tsǐ děy nzá? Nyì thíy ní djǐ? 18Nyì nì nyì nyú nà chú nyì ní njǎ nzǐ ndèymí nyì nì nyì gi nà chú nyì ní rř nzǐ? Ndèymí nyì dhó ddey nzǐ? 19Ma pbrr̀ tdè mùkátì mbu bbalè lówfù mbu nì dho mí nga nà, nyì njúw tdè gògò tdyǔw thi?”

Ndrǔ ngù lò, “Dri ndèy djú rwo nì nà.”

20“Ndèymí ma pbrr̀ tdè mùkátì zarr̀gbòw bbalè lówfù tho nì dho mí nga nà, nyì njúw tdè gògò tdyǔw thi?”

Ndrǔ ngù lò, “Tdyǔ zarr̀gbòw.”

21Yesu tdrà ndrǔ dhò, “Nyì tsǐ děy nzá?”

Yesu djì nzǐ ndèy nyú tdè nga njǎ nì kpatss̀

22Yesu ndèy kodjú kpa nà rà Betsayidda mí bba ò. Njàddí bbalè mbà nzǐ ndèy nyú tdè nga njǎ nì kpatss̀ ndèymí ndrǔ kwô Yesu à lów à rónga. 23Yesu lòw fú kpatss̀ à dhokpa ró ndèymí à kâ à ddà nga gidjò fú bba óddù. À hwì sa fú kpatss̀ nyú ró, à kâ ndèy dhokpa ley à djú ndèymí à kâ à dhiy, “Nyi dho ney ddiy rò njà?”

24Fú kpatss̀ kâ nga njà gbrǔ, à kâ tdrà, “Òní, manì bbalè njǎ, chú ndrǔ nì ì njǎ gbè tsúw níchú cha ndèy nì bbiy nì.”

25Yesu kâ ndèy dhokpa ley fú kpatss̀ nyú ró ddíyàchú. Fú nganà, à nyú njà nga, àmí nga njàdha ngû ndèy rr̀dja ò ndèymí à njà wánì ddiy lǎní. 26Yesu kâ à cho bbakà ò lò jàdha nà, “Nzǐ ra í lò tdrà bba ó bbalè dhò.”

Petro kwô Yesu nì Masiya

(Mat 16:13-20; Lwk 9:18-21)

27Yesu mà ndèy kodjú kpa nà kâ rà bba òluw cha ndèy tdè chow Kayisariya Filipi nà nì ò. Ndrǔ tdè rǎ mí nga nà, Yesu kâ ndrǔ dhiy, “Nyì tdra ma dhò, bbalè tdra ní manì áyì?” 28Ndrǔ ngù lò, “Njàddí ndrǔ tdra nì nyi nì Yohana Bàtízò bbúdha-dja, njàddí ndrǔ tdra nì nyi nì nabi Eliya. Njàddí ndrǔ tdrà nì nyi nì njàddí nabi-kpà kàó ddì li.”

29Fú nga nà Yesu kâ dhiy, “Chú, nyì tdra ní manì áyì?” Petro ngù lò, “Nyi nì Masiya!”#8:29 Njàddí mí lò-tey nì Mesiya. “Kristo” Griki ndèymí “Masiya” (Ebreniya) rwo túw mí lò-tey nì “Vìydha ní li” verse 25 ó ddí. 30Yesu kâ jà ndèy kodjú kpa dhò, “Nzǐ nyì tdrǎ fú lò áyì dho ddí kpe.”

Yesu tdrà lò ndèymí dhi djú

(Mat 16:21-28; Lwk 9:22-27)

31Fú nga nà, Yesu lòw dey ndèy ró ndèy rà ndèy njèy nì lò-tey tdrà ndèy kodjú kpa dhò. Yesu kâ tdrà, “Drò-dró ní kpa, Ddrǎ-ngá dyǎ-djá djú kpa, ndèymí Musa-ngá yǎdha mí li-gwíydha-djá, rà ley ma Ndrǔ-Ddùw ka rà ma nza drǒ, ndèymí ndrǔ rà ma gù. Ka rà ma hwì, chú ddu gbow nì ó, ma rà ngu djiy ní dhi óddù.” 32À lêy í lò tsì ndèy ndrǔ dhò tende. Fú ddiy dhò, Petro îy à nga gidjò ndèymí à lòw dey à gù à bbǎ fǔchú ní nì lò-tdràdha. 33Chú Yesu lî ndèy nyú ndèy kodjú kpa dè mí nga nà, à kâ fú lò gù Petro dhò. À tdrà Petro dhò, “Setani, ddá nyi gu ma róddù. Nyìmí ddeydha shì ngǎ Ddrà dèddù, chú bbalè dèddù!”

34Yesu kâ bbalè mí njuw iy ndèymí ndèy kodjú kpa nà ndèy dè. À kâ tdrà ndrǔ dhò, “Ya nyì kàó li rò nì jǐ ndèy rǎ ma nà, à jì ndeyli bbǎ ndèy djò nga ddeydha ndèyníddù ndèymí à tdúw ndèymí musalabba, à dyǒw ma. 35Ndèy jì ndèy pá ndèymí djiy nì li rà à viy, chú ndèy vîy ndèymí djiy màtsá lò dhò ndèymí Hwî mí Lò-ɦéy dhò nì li, rà à pá. 36Bbalè rá ŋá lǎní ddiy chùw ya ì tdûw dziylíy dzò ì dhokpa ó, chú ya ì viy ì dhí djiy ro? 37Ǐngí bbalè dhó ná ddu bbu ì dzž ndanà ì dhí djiy? 38Ya do nì nyì njěy ma djúddù ndèymí màtsá gwíydha dhò, í cho mí ngǎ ì nì uwdha nà nì bbalè kàó, cha ì bbà Ddrà nì ndèymí ndrǔ nì cherr-djá, ma Ndrǔ-Ddùw ddí rà dey do nà nyì ró, ya ma shì màtsá Djǎnì mí ddrǒngó-ní-nga ó thí ní malayika-kpà nà ro.”

Currently Selected:

Marko 8: NDRULO

Highlight

Copy