Marko 9

1Yesu ndrr̂ ndèy í lò tdràdha nà, “Manì nyì dhò dìchú ní lò tdrǎ, njaddí ndrǔ cha ì dèy ingá nì rà dhì nzǐ nji nzá ì njà Ddrà mí pey-mí-nga shì klôw nà ddiy ò.”

Yesu jì lî ndèy

(Mat 17:1-13; Lwk 9:28-36)

2Ddu za nì dzzdjú, Yesu tdûw Petro, Yakobbo ndèymí Yohana, à ddà ndrǔ djùkpa ru pléy ní ngòw djò, cha ndrǔ tdè ìníddù mí nga ò. Fúlè à jì lî ndèy ndrǔ nyú djú. 3Àmí rù kâ ndèymí à ngû sárŕ gbrŕ tǐ. Ddiy rò tdè ngǎ í dziylíy djú cha ndèy dho ley à ngú sárŕ gbrŕ fǔchú nì. 4Ndruní nabi-kpà, Musa màgò Eliya#9:4 Musa màgò Eliya. Ndrǔ tdè ì ɦuwdjò nà tǔw ní ndruní nabi-kpà. Musa ddà Israeli mí nzòw djùkpa Misiri mí ngòw óddù Kanani mí ngòw ò. Ka ddêy Eliya ngû ví dziylíy djò děy nzá Masiya shì tdè ní. Nja Malaki 4:5. nà dhò ì chǔ ndèymí ndrǔ dêy lò těy Yesu nà.

5Petro tdrà Yesu dho, “Li-gwíydha-dja, à nì lǎní drǒ mà déy ingá. Mà rà rù-dzà ss̀ gbow, nyi dhò ddì, Musa dhò ddì, ndèymí Eliya dhò ddì.” 6Petro ndèymí njàddí ndrǔ nà tdè nyí nà, fúddiy dhò à tsì tdè nzá ddu ndèy tdrà tdè ddiy.

7Nduwnduw shì ndèymí à tss̀ ndrǔ rónga ndèy ndrrdjò nà, li chuw nduwnduw óddù nì kâ tdrà, “Í nì màtsá Ddùwnì drǒ ma jì nì, nyì rr̀ à!”

8Chǔ, ndrǔ njà nga gbrǔ ro, Musa màgò Eliya nà tdè ngǎ fungá ddíyàchú, ndèymí ndrǔ njà Yesu chúddì ì nà.

9Ndrǔ tdè ngu bbi ngòw djúddù ro, Yesu jà ndrǔ dhò, “Nzǐ nyì tdrà í nyì njà nì ddiy áyì dhò kpe, pbǔw ma Ndrǔ-Ddùw rà ngu djiy ní dhi óddù mí nga djò.” 10Ndrǔ pbò mí lò rónga ì dhò ìníddù, chú ndrǔ lòw dey mí lò tdrà ì kàòluw, “Í ‘ngúdha djiy ní dhi óddù’ mí lò-tey ní ddu?”

11Ndrǔ kâ Yesu dhiy, “Ddudhò Musa-ngá yǎdha mí li-gwíydha-djá tdra ní Eliya kà ndèy shǐ nji?”#9:11 Malaki 4:5-6.

12Yesu kâ lò ngù ndrǔ dhò, “Eliya rà shì dìchú nji, ndèymí à rà ddiy wánì ngù ndèy rr̀dja ò. Chú ddudhò à ndíy ndèy Ddrǎ-ngá ndíydha-ní-lò ó, Ndrǔ-Ddùw kà ndèy nzá ndèy drǒ ndèymí ka gǔ à? 13Ma nì tdrǎ nyì dhò, Eliya#9:13 Matayo 11:14. shì ŋà. Bbalè njèy à ró lò wá cha ì jì tdè ì njěy nì, gbè Ddrǎ-ngá ndíydha-ní-lò tdrà, à ró níchú.”

Yesu ddâ che thíy kpatss̀-ní-ngba óddù

(Mat 17:14-21; Lwk 9:37-43a)

14Yesu ndèy kodjú gbow nì kpa nà shì njàddí ndèy kodjú kpa dè ro, ndrǔ njà bíy ní bbalè mí njuw ì ròluw ndèymí njàddí Musa-ngá yǎdha mí li-gwíydha-djá nì lò pǎ ndrǔ nà. 15Bbalè njà tdè Yesu mí nga nà, ndrǔ ónga ꞌwìy wá ndèymí ndrǔ kòw à dè, ka à dhokpa lòw.

16Yesu dhîy ndèy kodjú kpa, “Nyì ní lò pǎ ndrǔ nà ddu ró?”

17Bbalè mí njuw kàó ddì li ngù lò, “Li-gwíydha-dja, ma mbà màtsá ddùwnì nyi dè, ddiydhò à nì ndèy ó che thíy nà ndèymí à rr̂ à lò-tèydha róddù. 18Ya che thíy lòw à ro, à ngbo nì à dziylíy djò, ndèymí à léy nì pbiysá shi nì à kuw ó ndèymí à ká nì ndèy kuw ndèymí à bbú nì pbádha. Ma dhîy nyi kodjú kpa, ‘Ddá che thíy gu,’ chú à pà ndèy ndrǔ dhò nzá.”

19Yesu tdrà ndrǔ dhò, “Nyì nzá ì ùw Ddrà nì bbalè! Nyì nà à kà ná ma déy ddu thi nì dhò? Ddiy kà ná ma vǐ nyì tsò ddu thi nì dhò? Mba fú ngba ma dè.”

20Ndrǔ mbà ngba à dè. Che thíy njà Yesu mí nga nà, à jà fú ngba rí. À kâ chèy gudjò, à lòw dey ndèy nglùw gudjò luw, ndèy kuw ó pbiysá nà.

21Yesu dhîy ngba mí djǎnì, “Ŋàbùkà ní nga dhò í ngba déy ǐchú ní?”

À ngù lò, “À nga ndèy děy à tdè kàní ngba ní mí nga djúddù. 22Bíy ní nga dhò à jì tdè ndèy hwǐ à, à ngbòdha nà kàss ò ndèymí dda nà. Njey mà zòw ndèymí kwó mà tsotso, ya ney nyi dho njèy ro.”

23Yesu tdrà, “Ddudhò nyi ní tdrǎ, ‘Ya ney nyi dho njěy’? Ddiy wánì dho ndèy njèy cha ndèy nì ùwdha nà nì li dhò.” 24Fú nga nà, ndùw ngba mí djǎnì kâ swa, “Manì ney ùwdha nà, chú nzá à kâ. Kwó ma tsotso, ndaní ma déy ndèy kâ nì uwdha nà!”

25Yesu njà bíy ní bbalè mí njuw tdè ì ndrr ro, à kâ jà che thíy dhò, “Nyi nzǐ nyi nì nga rř ndèymí lò těy nì che thíy, ma nì jǎ nyi dhò, shi fú kpatss̀-ní-ngba óddù, ndèymí nzǐ tsuw à ò ddíyàchú.” 26À swâ ndèymí à jà fú ngba rí, pbǔw à bbà à ddiy ò. Che thíy shì fú ngba óddù mí nga nà, à lù gbè dhì ní ndèy dhì nì li níchú. Bbalè wánì ddí dêy tdrǎ ì kàòluw, “Ŋà à dhì.” 27Chú, Yesu kâ à tduw ru à dhokpa ró, à lêy à děy ndèy-koko djú.

28Yesu tsùw dzá mí nga dzzdjú, à kodjú kpa dhîy à mùw, “Ddudhò mà dhó fú che thíy dda nzǐ?” 29Yesu ngù lò, “Ddrà nzz̀dha nà#9:29 Ddrà nzz̀dha nà. Njàddí ndruní Ddrǎ-ngá ndíydha-ní-lò ó, Ddrà nzz̀dha ndèymí nyû bbàdha nà. chúddì ǐchú ní che thíy jì dho shì.”

Yesu tdrà ndèymí dhi mí lò ddíyàchú

(Mat 17:22,23; Lwk 9:43b-45)

30Yesu ndèy kodjú kpa nà bbà fú nga ndèymí ndrǔ rà Galilaya mí ngòw òluw. À jì nzá njàddí li rò tsǐ, 31ddiydhò à tdè ndèy kodjú kpa gwiy tdràdha nà, “Ma Ndrǔ-Ddùw ka rà ma dhotèy bbu cha ì rà ma hwì nì ndrǔ dè. Chú ddu gbow nì ó, ma rà ngu djiy ní dhi óddù.” 32Chú ndrǔ tsì nzá í gwíydha mí lò-tey nì ddu ddiy ndèymí ndrǔ tdè nyí nà à dhíydha dhò.

Áyì ní ndey ddrǒngó tǐ?

(Mat 18:1-5; Lwk 9:46-48)

33Yesu ndèy kodjú kpa nà shì Kapernawumu mí ddrǒngó ní bba ò, ndèymí ndrǔ tsùw dzá ddiy-dzzdjú, Yesu dhîy ndèy kodjú kpa, “Nyì tdě ddu mí lò pǎ tuw ó?”

34Chú, ndrǔ ngù lò nzá, ddiydhò ndrǔ tdè lò pǎ ì kàó luw, áyì nì ndey ddrǒngó tǐ ddiy djú. 35Yesu dòw gudjò ndèymí à îy dri ndèy djú rwo nà nì ndèy kodjú kpa, ndèymí à tdrà ndrǔ dhò, “Cha ndèy nì jǐ ndèy déy nji nì li, à kà fú li ngǔ ndey luwtò ndèymí fú li déy wánì ndrǔ dhí nokpa ní.” 36À kâ drá ní ngba tduw ndèymí à lêy à dèy ndrǔ kàó. À mbû à ndèy thokpa nà ndèymí à tdrà ndrǔ dhò, 37“Ndèy kwô í dùdú ní nzòw kàó ddì li ma ró dho nà nì li, fúnì fú li kwô ma. Ndèymí ndèy kwô ma nì li, fúnì fú li kwô ngǎ ma chúddì, chú ndèy chô ma nì li ddí.”

Ngǎ ndèy nì Yesu tsò ró li ní nì li nì à mî

(Lwk 9:49,50)

38Yohana tdrà à dhò, “Li-gwíydha-dja, mà njà tdè ddì li cha ndèy tdè che thíy dda nyi ró dho ó nì, ndèymí mà tdrà fú li bbǎ, ddiydhò à nì ngǎ mà kàó li.”

39Yesu kâ lò tdrà ndrǔ dhò, “Nzǐ nyì cho à tsò, ddiydhò li rò nì ngǎ cha ndèy rà ddùw njèy ma ró dho ó, cha ndèy dhò ndùw ngǎjìní lò tdrà ma ró nì. 40Ndèy nì ngǎ mà tsò ró li ní nì li, nì mà dhî. 41Manì nyì dhò dìchú ní lò tdrǎ, ya li rò bbû dda nyì dhò nyì nì Masiya mî ddiydhò, rà ndèy kobì chùw dìchú.

Cherr mí mbudha

(Mat 18:6-9; Lwk 17:1,2)

42“Ndèy lêy cha ì ùw ma nì ndrǔ kàó ddì nì drá ní li chèy cherr ò, à rà dey lǎní fú li dhò ka chěy kyele ní djuw à chuwtéy, ka ngbǒ fú li ju-ddà ò. 43Fú ddiy dhò, ya nyi dhokpa ddì nì mbà nyi cherr ò, tdey à gu. À nì lǎní drǒ nyi tsǔw djiy ò ngǎ ddì nì nyi dhokpa ní, à da nyi déy rwo nì nyi dhokpa nà cha ndèy rà nyi mbà li sàdha mí kàss ò, cha nzǐ ndèy dhí nì ndèy nì. 44Fulè ‘ì a nì ndrǔ nì kǎkà dhi nì nzǐ, ndèymí ndèy béy nì ndrǔ nì kàss dhí nì ndèy nzǐ.’#9:44 Njàddí ndruní Ddrǎ-ngá ndíydha-ní-lò ó versi 44 nì nì ngǎ. 45Ya nyi-koko mbà nyi cherr ò, tdey à gu. À nì lǎní drǒ nyi tsǔw djiy ò ngǎ nyi-koko ddì nì ní, à da déydha nà nyi-koko rwo nì nà cha ka rà ngbò ndru-tey ró nì li sàdha mí kàss ò nì. 46Fulè ‘ì a nì ndrǔ nì kǎkà dhi nì nzǐ, ndèymí ndèy béy nì ndrǔ nì kàss dhí nì ndèy nzǐ.’#9:46 Njàddí ndruní Ddrǎ-ngá ndíydha-ní-lò ó versi 46 nì, nì ngǎ. 47Ya nyi nyú mbà nyi cherr ò, ddá à gu. À nì lǎní drǒ nyi tsǔw Ddrà mí pey-mí-nga ò nyi nyú nà ddì, à da déydha nà nyi nyú nà rwo, cha ka rà ngbò ndru-tey ró nì li sàdha mí kàss ò nì. 48Fulè ‘ì a nì ndrǔ nì kǎkà dhi nì nzǐ, ndèymí ndèy béy nì ndrǔ nì kàss dhí nì ndèy nzǐ.’#9:48 Isaya 66:24.

49“Wánì bbalè ka rà ngù thí kàss nà, gbè ka ngù Ddrà dhò nì bbudha thí ku nà níchú.#9:49 Lawi 2:13; Ezekel 43:24. 50Ku nì lǎní ddiy, chú, ya ku kuw thà, nyì rá kuw nì ngù ddu nà?

“Nyì déy lǎní ku níchú nyì kàó nyìníddù, ndèymí nyì déy shú ní thíy nà njàddí ndrǔ nà.”

Currently Selected:

Marko 9: NDRULO

Highlight

Copy