Marko 7

Yesu gwîy lò ndruní bbúw dhí gwíydha ró

(Mat 15:1-9)

1Ddì ní, Farisayo ní kpa rò ndèymí Musa-ngá yǎdha mí li-gwíydha-djá shì Yerusalemu óddù. Ndrǔ njûw ì Yesu ròluw. 2Ndrǔ njà à kodjú kpa rò dêy nga nyǔ, ndèy tey nì ì dhokpa nà, nzá ì gbû ní.

3Yahuddi-ddúw ndèymí Farisayo ní kpa dêy ìdhí ndruní pbúw ó gwíydha cha ì chùw ì bbúw dèddù nì rónga pbǒ. Ndrǔ dêy ì dhokpa gbu lǎní děy nzá ì nyù nyû ní. 4Ndrǔ kàó li rò tdè ngǎ cha ndèy dêy sǒkò óddù ka dzz̀ nì ddiy nyǔ děy nzá ndrǔ gbû rǒnga ní. Ndrǔ dêy ddí ìdhí bíy ní ndruní pbúw ó gwíydha rónga pbǒ, gbè dda-dhíy rónga gbúdha, tděy, líybbíy ndèymí ra mà rónga gbúdha mà nà.

5Farisayo ní kpa ndèymí Musa-ngá yǎdha mí li-gwíydha-djá dhîy Yesu, “Ddudhò nyi kodjú kpa pbo ní màdhí ndruní pbúw ó gwíydha cha mà chùw mà bbúw dèddù nì rónga nzǐ? Ddudhò ndrǔ nyu ní ddiy nzá ì gbû ì dhokpa ní?”

6Yesu ngù lò ndrǔ dhò, “Ndruní nabi Isaya tdrà nyì ɦuwdjò déy nyì lò-shúwdha-djá. À ndîy ndèy,

“‘Ddrǒngóli tdra nì,

í bbalè má nì ma ì tsò nà chúddì,

chú, ndrǔ thíy nì ndì ma róddù.

7Ndrǔ nzz nì ma vúní,

ddiydhò ndrǔ gwíy nì bbalè dhí yǎdha gbè màtsá níchú.’#7:7 Isaya 29:13.”

8Yesu kâ tdrà, “Nyì bbà Ddrà mí yǎdha njèydha ndèymí nyì nì ngu bbalè dhí gwiydha njěy.”

9Yesu kâ tdrà ndrǔ dhò ddíyàchú, “Nyì nì Ddrà mí yǎdha gǔ nyǔꞌwiy mí tuw nà, ndaní nyì dyǒw nyìdhí pbúw ó gwíydha. 10Mà nì í ddiy tdrà, ddiydhò Musa jà tdè, ‘Njey djǎ-nyi ndèymí yâ-nyi dò,’#7:10 Ngbídha 20:12; Yǎdha 5:16. ndèymí ‘Ndèy wâ djǎnì ǐngí yânì nì li, ka à dhǐ.’#7:10 Ngbídha 21:17; Lawi 20:9. 11Chú nyì tdra nì bbalè dhò, à ùw ndèy ŋà ndeyli tdrǎ ndèymí gôw-djá dhò, ‘Ma dho nzǐ nyì tsotso kwo, ddiydhò cha ma kà ma bbú nyì dhò nì ddiy wá, ma bbû ŋà Ddrà dhò bbudha ní.’ 12Í tuw nà, nyì léy nì nzǐ ndrǔ njěy ddiy rò ìdhí gôw-djá dhò. 13Nyìdhí ndruní pbúw ó lò nà cha nyì nì gwiy nì, nyì nì Ddrǎ-ngá ndíydha-ní-lò ngǔ ngǎ nì ddiy ní. Ndèymí ddiy nì bíy cha nyì nì njěy í nì níchú nì.”

Ndèy téy nì bbalè ónga nì ddiy

(Mat 15:10-20)

14Yesu kâ bbalè mí njuw iy ddìngaó ddíyàchú ndèymí à kâ tdrà ndrǔ dhò, “Nyì wá nyì rr ma dè ndèymí nyì tsi manì tdrǎ nyì dho nì lò. 15Ddiy rò nì ngǎ cha ndèy tsuw nì bbalè ò ndèymí à téy nì bbalè ónga nì. Chú ndèy shi nì bbalè óddù nì ddiy téy nì ndey bbalè ónga. 16Cha ndèy nì ndèy gi nà nì li, bba à rř!”#7:16 Njàddí ndruní Ddrǎ-ngá ndíydha-ní-lò ó versi 16 nì nì ngǎ.

17Yesu mà ndèy kodjú kpa nà bbà tdè bbalè mí njuw ro, ndrǔ kâ rà dza ò. À kodjú kpa kâ à dhiy à kló fú lò-tey. 18Yesu tdrà, “Nyì ddí tsǐ děy nzá? Nyì tsǐ nzá nyû cha nyì léy nì nyì kuw ò nì, téy nì nyì ónga nzǐ? 19À ra nì ngǎ nyì thíy ò, chú nyì zz̀ ò ndèymí à da nì nyì óddù.” Í lò tdràdha nà, Yesu ngù nyû wánì thí.

20Yesu kâ tdrà, “Ndèy shi nì li-thíy óddù nì ddiy, téy nì li ndèy. 21Li-thíy óddù ngǎjìní lò shi nì cha ndèy mba nì bbalè bbǎlà njèydha dè, gbu, li hwìdha ndèymí ddùdha ngǎ nyìmí ków mí li nà, 22li-thíy léydha drǒ ddiy djú, ngǎjìní njèydha, mbwa, ngǎjìní mbeylèy, dyà, ngǎjìní lò tdràdha ndèy li ró, li tdúwdha ndèymí vǐy mí lò nà. 23Í ngǎjìní ddiy wá shi nì li-thíy óddù ndèymí ndrǔ téy nì li ónga.”

Ngǎ ndèy nì Yahuddi-ɦìytss ní nì li mí uwdha

(Mat 15:21-28)

24Yesu ngbî ndèy Galilaya mí ngòw óddù ndèymí à kâ rà Turo katéy nì ddrǒngó ní bba ò. Fulè à kâ rà dza ò, chú à jì tdè nzá bbalè tsǐ ya ney ndèy nì fungá ddiy. Chú à dho dey nzǐ rùdha ní. 25Ddì nì ɦìytss-ní-li cha ndèymí dhànì tdè che thíy nà nì rr̀ tdè Yesu ɦuwdjò ro, ndùw à rà Yesu dè ndèymí à kâ ndèy kwò à kotéy. 26Fú ɦìytss-ní-li tdè ngǎ Yahuddi síngba. Àmí gôw-djá tdè Foyiniki mí bba óddù, Shami mí ngòw ó nì li. À kwô Yesu tsò ró à dǐy che thíy gu, cha ndèy tdè dhànì ó nì. 27Chú, Yesu kâ tdrà à dhò, “Nji à jì ma bbú nyû màtsá nzòw Yahuddi-ddúw dhò. À nì ngǎ lǎní ka tdúw nzòw dhí nyû ka bbu tsǐ dhò.”

28Fú ɦìytss-ní-li ngù lò, “Ddrǒngóli, tsǐ ddí nyu nì nzòw tdîy mězà téy nì nyû gògò!” 29Yesu ngù lò, “Fú nì lǎní lò ngùdha. Nyi dho rà ndèymí che thíy bbà dhànyi ŋà.” 30Fú ɦìytss-ní-li shì bbakà ò ro, à chùw dhànì ɦîy ra djú ndèymí che thíy rà tdè ŋà à óddù.

Yesu djì nzǐ ndèy gi rr nì nga ndèymí nzǐ ndèy tdra nì lò nì li-rónga

31Yesu bbà tdè Turo mí ddrǒngó ní bba ndèymí à rà Sidoni òluw nì tuw nà, Galilaya mí ju-ddà tsò-rò luw Dekapoli mí ngòw ò. 32Njàddí bbalè mbà cha nzǐ ndèy gi tdè nga rř ndèymí lò tdràdha tdè klǒw ndèy dhò nì li, Yesu dè. Ndrǔ kwô à tsò ró à léy ndèy dhokpa fú kpatss̀ ró. 33Yesu mbà tdè fú kpatss̀ nga gidjò bbalè mí njuw kà óddù ro, à kâ ndèy dhotsò shùw fú kpatss̀ gi ò. À kâ sa hwì ndèy dhokpa ró ndèymí à kâ à dà rónga lòw ndanà. 34À kâ nga njà ru rakpa ò, ndèymí à zz̀ ndèy hì ddrǒngó ní zòw-lò nà, à kâ tdrà fú kpatss̀ dho, “Efata,”#7:34 Efata. Í lò nì Aramayika ló nà, à nì Yahuddi-ddúw dhí ngòw ó Yesu mí cho nà ka dêy těy nì lò-tsò. mí lò-tey nì, “Pu nyi!” 35Fú nga nà ndùw fú kpatss̀ gi pù ndèy, à dà tey klô ndèy ndèymí à lòw dey lò tèy lǎní.

36Yesu jà fú bbalè dhò, nzǐ ndrǔ tdrǎ áyì dhò kpe. Wánì nganà Yesu dêy tdrǎ ndrǔ dhò nzǐ ndrǔ tdrǎ fú lò, chú ndrǔ ngû tdrà dàní dà nga djòluw. 37Bbalè ónga ꞌwìy wá. Ndrǔ tdrà, “À njey nì wánì ddiy lǎní. À léy nì nzǐ ì nì nga rř nì ndrǔ rř nga, nzǐ ì nì lò těy nì ndrǔ ddí těy lò.”

Currently Selected:

Marko 7: NDRULO

Highlight

Copy