John 19
19
1ပြီးခါ ပိလတ်မင်းဟ ကိုယ်တော်ယေရှုကော် ခေါ်ထုတ်မောက် ကြိမ်ဒဏ်ခတ်မောက် အကြိမ်ကြိမ်ရိုက်နှက်စေဟယ်။ 2စစ်ဆားတေဟလဲ ဆူးခက်ဆူးကိုင်းတေကော် သရဖူသလဲ ရစ်ခွေမောက် ကိုယ်တော်ရဲ့ခေါင်းပေါ်မှာ ဆောင်းစေမောက် ခရမ်းရောင်ဝတ်ရုံကော် ဝတ်စေပြီးခါ 3ကိုယ်တော်နားကော် ကပ်မောက် "ဂျူးလူမျိုးတေရဲ့ဘုရင် ဘုန်းကြီးပါစေ" လောက် ဆိုကြမောက် ကိုယ်တော်ကော် ရိုက်နှက်ကြလေဟယ်။ 4ပိလတ်ဘုရင်ခံဟ နောက်တခါ ပ္လန်ထွက်လာမောက် "ကြည့်ကြပါ၊ အဲလူကော် အပြစ်တင်ဖော့ အပြစ်မရှိကြောင်းကော် သင်တော့ဆိစေဖော့ ဆူ့ကော် ခုနေရာကော် ငါခေါ်လာမဲင်" လောက် ဆိုလေဟယ်။ 5ဟဲင်းခါ ကိုယ်တော်ယေရှုဟ ဆူးခက်တေနလုပ်ဟားတဲ့ သရဖူန ခရမ်းရောင်ဝတ်ရုံကော် ဝတ်ဆင်မောက် အပြင်ကော် ထွက်လာဟယ်။ ပိလတ်ဘုရင်ခံဟလဲ "ကြည့်ပါ။ အဲလူပဲဖြစ်ဟယ်" လောက် ဆိုလေဟယ်။ 6ပုရောဟိတ်အကြီးအကဲတေန အစောင့်တပ်ဆားတေဟ ကိုယ်တော်ကော် မြင်ဟာနဲ့ "အဲလူကော် လက်ဝါးကပ်တိုင်ပေါ် တင်မောက် ဆတ်လိုက်ပါ" လောက် အော်ဟစ်ကြလေဟယ်။ ဟဲင်းခါ ပိလတ်ဘုရင်ခံဟ "ငါဟတော့ အဲလူမှာ ဖယ်ပြစ်မှုကော်မှ ရှာမတွေ့ပဲညောင်း သင်တော့ကိုယ်တိုင်ပဲ ဆူ့ကော် ခေါ်ဟားမောက် စီရင်ကြပါ" လောက် ဆိုလေဟယ်။ 7လူအုပ်ကူးဟလဲ ဆူ့ကော် "ငါတော့မှာ ပညတ်တရားရှိဟယ်။ ဟဲင်းပညတ်တရားတော်အရ အဲလူဟ ဘုရားရှင်ရဲ့ ဆားတော်ဖြစ်ဟာလောက် ပြောဆိုခဲ့ညောင်း ဆေသင့်ဟယ်" ဆိုမောက် ပြောဆိုကြလေဟယ်။ 8ပိလတ်ဘုရင်ခံဟလဲ ဟဲင်းစကားကော် ကြားရတဲ့အခါ အရင်ဟထက် ပိုမောက် ကြောက်ရွံ့ထိတ်လန့်ဟားလေဟယ်။ 9ပြီးခါ ဆူဟ ရုံးတော်ထဲကော် ပ္လန်ဝင်လာမောက် ကိုယ်တော်ယေရှုကော် "သင်ဟ ဖယ်အရပ်ဟနေ လာဟား" လောက် မေးလေဟယ်။ ဟဲင်းပေမဲ့ ကိုယ်တော်ယေရှုဟ ပ္လန်လည်ဖ္လေကြားခြင်းမရှိဘူး။ 10ဟဲင်းကြောင့် ပိလတ်မင်းဟ "သင်ဟ ငါ့ကော် စကားပ္လန်မပြောပဲနေမှာလား။ ငါဟ သင့်ကော် လွှတ်ပေးနိုင်တဲ့ အခွင့်အာဏာ ရှိသလဲ သင့်ကော် လက်ဝါးကပ်တိုင်ပေါ်တင်မောက် ဆတ်နိုင်တဲ့ အခွင့်အာဏာရှိဟာကော် သင်မဆိဘူးလား" လောက်ဆိုလေဟယ်။ 11ကိုယ်တော်ယေရှုဟ ပိလတ်ဘုရင်ခံကော် "အထက်ဟ ပေးအပ်ထားတော်မူခြင်းမရှိပဲခါ သင်ရဲ့အခွင့်အာဏာဟ ငါ့အပေါ်မှာ ဖယ်အကျိုးသက်ရောက်မှုမှ ရှိမှာမဟုတ်ဘူး။ ဟဲင်းကြောင့် ငါ့ကော် သင်ရဲ့လက်ထဲကော် အပ်နှံတဲ့လူမှာ ပိုမောက် ကြီးလေးတဲ့အပြစ်ရှိဟယ်" လောက် ပ္လန်မောက် မိန့်တော်မူဟယ်။ 12ကိုယ်တော်ယေရှုမိန့်တော်မူတဲ့အရာကော် ပိလတ်ဘုရင်ခံကြားတဲ့အခါ ဆူဟ ကိုယ်တော်ကော် လွှတ်ပေးချင်နေဟယ်။ ဟဲင်းပေမဲ့ ဂျူးလူမျိုးအကြီးအကဲတေဟ "အရှင်ဟ ဟဲင်းလူကော် လွှတ်ပေးလောက်ရှိခါ ဆီဇာဧကရာဇ်ရဲ့ ဘက်တော်ဆားမဟုတ်ဘူး။ ကိုယ့်ဟာကိုယ် ဘုရင်ဖြစ်ဟယ်လောက် ကြေညာတဲ့လူအကုန်ဟုန်းဟ ဆီဇာဧကရာဇ်ကော် ဆန့်ကျင်ပြောဆိုတဲ့လူပဲ" လောက် အော်ဟစ်ပြောဆိုကြလေဟယ်။ 13ဆူ့တော့ပြောဆိုနေကြတဲ့ စကားကော် ပိလတ်ဘုရင်ခံကြားတဲ့အခါ ကိုယ်တော်ယေရှုကော် အပြင်ကော် ခေါ်ထုတ်ဟားမောက် ဟေဘရူးဘာသာစကားန ဂဗ္ဗသ လောက်ခေါ်တဲ့ ကျောက်ခင်းဟားတဲ့ စင်မြင့်လောက် အဓိပ္ပာယ်ရတဲ့ နေရာမှာ တရားသူကြီးထိုင်တဲ့ ထိုင်ခုံမှာ ထိုင်နေခဲ့လေဟယ်။ 14ဟဲင်းနေ့ဟ ပသခါ ပွဲတော်အတွက် ပြင်ဆင်ရာနေ့ဖြစ်တဲ့ သောကြာနေ့မွန်းတည့်ချိန်ဖြစ်မောက် ပိလတ်ဘုရင်ဟ ဂျူးလူမျိုးတော့ကော် "ကြည့်ကြပါ။ ဟဲင်းအရပ်မှာ ရှိနေတဲ့လူဟ သင်တော့ရဲ့ ရှင်ဘုရင်ပဲ" လောက်ဆိုလေဟယ်။ 15ဟဲင်းခါ လူတေဟ "ဆူ့ကော် ဆတ်ပါ။ ဆူ့ကော် ဆတ်ပါ။ လက်ဝါးကပ်တိုင်ပေါ်ကော် တင်လိုက်ပါ" လောက် အော်ဟစ်ကြညောင်း ပိလတ်ဘုရင်ခံဟ "သင်တော့ရဲ့ ရှင်ဘုရင်ကော် လက်ဝါးကပ်တိုင်ပေါ်မှာ ငါတင်ရမလား" လောက်မေးလေဟယ်။ ပုရောဟိတ်အကြီးအကဲတေဟလဲ "ကျွန်ုပ်တော့မှာ ဆီဇာဧကရာဇ်မှ လွဲမောက် တခြားသောဘုရင်မရှိဘူး" လောက် လျှောက်တင်ကြလေဟယ်။ 16ဟဲင်းခါ ပိလတ်ဘုရင်ခံဟ ကိုယ်တော်ကော် လက်ဝါးကပ်တိုင်ပေါ်မှာ တင်စေဖော့ ဆူ့တော့လက်ကော် အပ်လိုက်ညောင်း ဆူ့တော့ဟ ကိုယ်တော်ကော် ခေါ်ဆောင်ဟားကြလေဟယ်။ 17ကိုယ်တော်ဟ လက်ဝါးကပ်တိုင်ကော် ကိုယ်တိုင်ထမ်းမောက် ဦးခေါင်းခွံအရပ်လောက် ခေါ်တဲ့နေရာကော် ထွက်ခွာတော်မူဟယ်။ ဟဲင်းအရပ်ကော် ဟေဘရူးဘာသာစကားန ဂေါလဂေါသလောက်ခေါ်ဟယ်။ 18ဆူ့တော့ဟ ဟဲင်းအရပ်မှာ ကိုယ်တော်ကော် တခြားလူနှေယောက်နအတူ လက်ဝါးကပ်တိုင်ပေါ်မှာ တင်ကြလေဟယ်။ ဟဲင်းလူနှေယောက်ဟ ကိုယ်တော်ရဲ့ တစ်ဖက်တစ်ချက်စီမှာ ရှိမောက် ကိုယ်တော်ဟ အလယ်မှာ ရှိလေဟယ်။ 19ပိလတ်ဘုရင်ခံဟ ကမ္ပည်းရေးထိုးမောက် ကိုယ်တော်ရဲ့လက်ဝါးကပ်တိုင်ပေါ်မှာ တပ်ထားလေဟယ်။ ဟဲင်းကမ္ပည်းမှာ "ဂျူးတေရဲ့ ဘုရင် နာဇရက်မြို့ဆားယေရှု" လောက် ရေးဆားထားလေဟယ်။ 20ကိုယ်တော်ယေရှုကော် လက်ဝါးကပ်တိုင်ပေါ်မှာ တင်ကြတဲ့အရပ်ဟ မြို့နနီးတဲ့အပြင် ကမ္ပည်းစာကော်လဲ ဟေဘရူးဘာသာ၊ လက်တင်ဘာသာ၊ ဂရိဘာသာတော့န ရေးထားဟာဖြစ်မောက် အကြီးကျယ်များတဲ့ ဂျူးလူမျိုးတေဟ ဟဲင်းဟာကော် ဖတ်ကြဟယ်။ 21ဟဲင်းကြောင့် ဂျူးပုရောဟိတ်အကြီးအကဲတေဟ ပိလတ်ဘုရင်ခံကော် "'ဂျူးတော့ရဲ့ဘုရင်' ဆိုမောက် မရေးပဲ အဲလူဟ 'ငါဟ ဂျူးတော့ရဲ့ ဘုရင်ဖြစ်ဟယ်' လောက်ဆိုဟာလောက်ရေးပါ" ဆိုမောက် တောင်းဆိုကြလေဟယ်။ 22ပိလတ်ဟလဲ "ငါရေးထားပြီးတဲ့အရာအတိုင်းပဲ ထားရှိမဲင်" လောက် ဆိုလေဟယ်။ 23တပ်ဆားတေဟ ကိုယ်တော်ကော် လက်ဝါးကပ်တိုင်ပေါ်တင်တဲ့အခါမှာ ကိုယ်တော်ရဲ့အဝတ်အစားတေကော် လေးပိုင်းပိုင်းမောက် တစ်ယောက်တစ်ပိုင်းစီယူကြဟယ်။ အတွင်းအဝတ်တော်ကော်လဲ ယူကြခါ ဟဲင်းအဝတ်ဟ ချုပ်ရိုးမရှိပဲ အထက်စွန်းမှ တစ်ထည်လုံးကော် တစ်ဆက်တည်းရက်လုပ်ထားတဲ့ အဝတ်ဖြစ်ညောင်း 24"ဟဲင်းအဝတ်ကော် မစုတ်ဖြဲပဲ မဆူ့ရသင့်ဟားဆိုဟာကော် မဲနှိုက်ကြရအောင်" လောက် အချင်းချင်းပြောဆိုကြဟယ်။ အဲဟာဟ "ဆူ့တော့ဟ ငါ့ရဲ့ဝတ်ရုံတေကော် ခွဲယူကြမောက် အဝတ်အစားအတွက် မဲနှိုက်ကြဟယ်" လောက်ဆိုတဲ့ ကျမ်းစာပါစာပိုဒ်ဟ ပ္လေ့စုံခြင်းကော် ရောက်လေဟယ်။ 25ဟဲင်းအချိန်မှာ ကိုယ်တော်ရဲ့လက်ဝါးကပ်တိုင်အနီးမှာ ကိုယ်တော်ရဲ့မယ်တော်၊ မယ်တော်ရဲ့ညီမ၊ ကလောဖရဲ့မိန်းမ မာရိန မာဂဒလမြို့ဆူ မာရိတော့ဟလဲ ရပ်နေကြဟယ်။ 26ကိုယ်တော်ဟ ဆူ့ရဲ့မယ်တော်န ဆူချစ်ခင်မြတ်နိုးတော်မူတဲ့ ဆူ့ရဲ့တပဲ့တော်ကော် မြင်တော်မူခါ မယ်တော်ကော် "အမျိုးဆမီး၊ ဆူဟ သင့်ရဲ့ဆားဖြစ်ဟယ်" လောက် မိန့်တော်မူဟယ်။ 27ပြီးခါ ကိုယ်တော်ဟ ဟဲင်းတပဲ့တော်ကော် "ဆူမဟ သင့်ရဲ့မိခင်ဖြစ်ဟယ်" လောက် မိန့်တော်မူဟယ်။ ဟဲင်းအချိန်မှစမောက် ဟဲင်းတပဲ့တော်ဟ ဆူမကော် ဆူ့ရဲ့အိမ်မှာ နေထိုင်ဖော့ ခေါ်ဆောင်ထားလေဟယ်။ 28ပြီးခါ အရာအကုန်ဟုန်းဟ ပြီးဆုံးမောက် ကျမ်းစာကော် ပ္လေ့စုံစေတော့မဲင်ကော် ဆိညောင်း "ငါရေငတ်ဟယ်" လောက်မိန့်တော်မူဟယ်။ 29ဟဲင်းနေရာမှာ ဝိုင်ချဉ်a အပ္လေ့ရှိတဲ့ အိုးတစ်လုံးကော် ထားဟားဖြစ်မောက် လူတေဟ ရေမြှပ်ကော် ဝိုင်ချဉ်ထဲမှာ စိမ်မောက် ဟဲင်းဟာကော် ကျူရိုးတံb အဖျားမှာ တပ်မောက် ကိုယ်တော်ရဲ့နှုတ်ခမ်းတော်နားကော် ကပ်ပေးကြဟယ်။ 30ကိုယ်တော်ယေရှုဟ ဟဲင်းဝိုင်ချဉ်တအုကော် စုပ်ယူဆောက်ပြီးခါ "ငါရဲ့အမှုကိစ္စပြီးမြောက်ဝေါက်" လောက်မိန့်တော်မူပြီးခါ ကိုယ်တော်ဟ ဆူ့ရဲ့ဦးခေါင်းတော်ကော် ငိုက်စိုက်က္လမောက် အဆက်တော်ကော် စွန့်တော်မူဟယ်။ 31ဟဲင်းနေ့ဟ ပြင်ဆင်ရာနေ့ဖြစ်တဲ့ ဥပုသ်အဖိတ်နေ့ဖြစ်ညောင်း ဂျူးလူမျိုးအကြီးအကဲတေဟ လက်ဝါးကပ်တိုင်ပေါ်မှာ အလောင်းကော် မရှိစေချင်ကြဘူး။ နောက်တနေ့ဟ ဥပုသ်နေ့န ပသခါပွဲတော်တစ်ထပ်တည်း က္လတဲ့ အကြီးကျယ်အရေးပါတဲ့နေ့ဖြစ်ညောင်း ဆူ့တော့ဟ ကွပ်မျက်ခံရတဲ့လူတေရဲ့ ခေထောက်တေကော် ချိုးမောက် ခန္ဓာကိုယ်တေကော် ဖယ်ရှားဖော့ ပိလတ်ဘုရင်ခံနားကော် တောင်းဆိုကြလေဟယ်။ 32ဟဲင်းကြောင့် စစ်ဆားတေဟ ကိုယ်တော်ယေရှုနအတူ ကွပ်မျက်ခြင်းခံရတဲ့ ပထမတစ်ယောက်ရဲ့ခေထောက်န နောက်တစ်ယောက်ရဲ့ခေထောက်ကော် လာရောက်ချိုးကြဟယ်။ 33ဟဲင်းပေမဲ့ စစ်ဆားတေဟ ကိုယ်တော်ယေရှုနားကော် လာတဲ့အခါ ကိုယ်တော်ဆေနေပြီဖြစ်ဟာကော် တွေ့ကြညောင်း ကိုယ်တော်ရဲ့ခေထောက်တေကော် မချိုးခဲ့ကြဘူး။ 34ဟဲင်းပေမဲ့ စစ်ဆားတစ်ယောက်ဟ ကိုယ်တော်ရဲ့နံကြားကော် လှံနထိုးခါ ဆွေးန ရေတော့ဟ တခါတည်းထွက်လာလေဟယ်။ 35အဲဟာကော် မြင်တဲ့လူတစ်ယောက်ဟ ဟဲင်းအကြောင်းအရာကော် ဆက်ဆေခံခဲ့ဟာဖြစ်ညောင်း သင်တော့ဟလဲ ယုံကြည်ကြလိမ့်မဲင်ဖြစ်ဟယ်။ ဆူ့ရဲ့ဆက်ဆေခံချက်ဟ မှန်ကန်မောက် ဆူဟ အမှန်တရားတေကော် ပြောဆိုဟာဖြစ်ကြောင်း ဆူကိုယ်တိုင်ဆိလေဟယ်။ 36ဟဲင်းသလဲ ဖြစ်ပျက်ခဲ့ဟာကြောင့် ကျမ်းစာမှာ ရေးဆားထားတဲ့ "ဆူ့ရဲ့ အရိုးတေတစ်ချောင်းတောင် အချိုးခံရလိမ့်မဲင်မဟုတ်" ဆိုတဲ့ကျမ်းချက်မှာ ပ္လေ့စုံမှန်ကန်ခဲ့လေဟယ်။ 37ပြီးခါ တခြားကျမ်းချက်တေမှာလဲ "ဆူ့တော့ဟ လှံန ထိုးဖောက်တဲ့လူကော် ကြည့်နေကြလိမ့်မဲင်" လောက် ဖော်ပြထားလေဟယ်။ 38ဟဲင်းသလဲဖြစ်ပြီးနောက်မှာ ဂျူးလူမျိုးအကြီးအကဲတေကော် ကြောက်ညောင်း ကိုယ်တော်ယေရှုရဲ့ တပဲ့တော်ဖြစ်ဟာကော် လျှို့ဝှက်ဟားတဲ့ အရိမဿဲမြို့မှ ယောသပ်ဆိုလူဟ ကိုယ်တော်ယေရှုရဲ့အလောင်းတော်ကော် ယူဆောင်ခွင့်ပြုဖော့ ပိလတ်ဘုရင်ခံနား တောင်းလျှောက်လေဟယ်။ ပိလတ်ဘုရင်ခံဟလဲ ခွင့်ပြုလိုက်ညောင်း ဆူဟ ကိုယ်တော်ရဲ့အလောင်းတော်ကော် လာရောက်မောက် ယူဆောင်ခဲ့လေဟယ်။ 39ကိုယ်တော်ယေရှုနားကော် ညအချိန်မှာ ပထမဆုံးလာရောက်ဖူးမျှော်ခဲ့တဲ့ နိကောဒင်ဟလဲ မုရန်cန အကျော်ရောနှောထားတဲ့အမွှေးအကြိုင်တေကော် ပိဆာနှေဆယ်လောက် ယူဆောင်လာလေဟယ်။ 40ဟဲင်းလူတေဟ ကိုယ်တော်ယေရှုရဲ့အလောင်းတော်ကော် ယူဆောင်လာကြမောက် ဂျူးလူမျိုးတော့ရဲ့ စဂြိုဟ်ခြင်း ဓလေ့ထုံးစံအရ အလောင်းတော်ကော် အမွှေးအကြိုင်တေနအတူ ပိတ်စအထေတေန ပတ်စည်းကြလေဟယ်။ 41ကိုယ်တော်ယေရှု ကွပ်မျက်ခြင်းခံရတဲ့အရပ်မှာ ဥယျာဉ်တစ်ခုရှိမောက် ဟဲင်းဥယျာဉ်မှာ မဆူ့မှ မစဂြိုဟ်ဖူးဆေးတဲ့ စုတ်စံဂူအဆစ်တစ်ခုရှိလေဟယ်။ 42ဟဲင်းနေ့ဟ ပြင်ဆင်ရာနေ့ဖြစ်တဲ့ ဥပုသ်အဖိတ်နေ့ဖြစ်မောက် စုတ်စံဂူဟလဲ အနီးအနားမှာ ရှိညောင်း ဆူ့တော့ဟ ကိုယ်တော်ယေရှုရဲ့အလောင်းတော်ကော် ဟဲင်းစုတ်စံဂူမှာ စဂြိုဟ်ခဲ့ကြလေဟယ်။
Currently Selected:
John 19: INT
Highlight
Share
Compare
Copy
Want to have your highlights saved across all your devices? Sign up or sign in
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
