Apocalipsis 22
22
1Qana'chi so' namaxasec jaỹim ỹaloxóna so' ñáchi 'me chiỹoqótapiinỹi da' nec'alaxa jen' lé'ec noxop. Jeso'me ỹátaqta chíchiiñi, ỹátaqta ỹ'aqáñi. Jeso'me chiỹoqótapee'uo ga' nes'ónaqa' ñi' Dios qataxa so' n'aanaxate c'óxot. 2Di' laiñi so' naq'aic 'me huánỹi laiñi so' noic, qana'chi náchiinỹi jeso' ñáchi. Naua' loxoguelo jeso'me ñáchi ỹátaqta 'equeelo jen' 'ipaq 'me chiỹaqapíỹi da' nec'alaxa. Jadójo' 'ipaqpi da' ỹinoxonéegue ñi' 'auóxoic, qataxa 'uo jan' jala. Doce da' v'iỹílaxalégue da' ỹitaxa 'uo jan' jala di' 'oonolec huó'e. Jan' laỹoqte jadójo' 'ipaq taiỹet da' natadénaqte na' ỹodapecachi siỹaxadipi. 3Huá'a jidi'me, qana'chi qaỹa 'te ga' qoỹa'uo ga' ne'uaxánaguec. Jaga' nes'ónaxaqui ñi' qan'étoqo't qataxa so' n'aanaxate c'óxot, qana'chi néta'ña jidi'me. Qana'chi jen'me lamaxa'spi ñi'me, qana'chi ỹi'ỹoxodéetac. 4Huá'a, qana'chi qonmá'i da' qonauá'ne' jiñi'me. Qana'chi naua' lata'pi jen'me, qana'chi nedetalóo'te ga' lenaxat jiñi'me. 5Huá'a, qana'chi qaỹa 'te pí'ỹaq. Jen'me néta'ña jidi'me sa 'te ỹiuen ga' l'edáxa jaga' coỹadáxanaqte qataxa jen' l'edáxa jaso' c'atena, qá'a jiñi'me qan'étoqo't 'me qadasoxola' ỹicoỹadetalégue. Qana'chi jen'me qaỹa 'te ga' loiquiaqa' naua' noloqo'te da' net'alpi.
Ga' l'iỹílaxasoxoc so' Jesucristo sóxote sa qaỹáaque
6Ỹim, qana'chi so' namaxasec jaỹim 'enapéga, 'enaac:
—Jénjo' n'aqtacpi ỹátaqta 'eesa, jen'me qoỹañoxot da' qop'iỹá'a. Ñi'me qadasoxola' 'me qan'étoqo't naqaiñi ñi' ỹ'añaqtet jen'me l'aqtáxanaxanecpi, ñi'me namaq na' lamaxasec, qaidi ỹaloxóna jen' d'onataxáatapecotpi jiñi'me jeda'me sa huaỹáloq da' di'ỹoq.
7Qana'chi so' Jesús 'enaac:
—¡Sa ñiỹáloxoden da' ñanac!
¡Ỹátaqta mátac qomle ga' ỹalaxalégue dójo' l'aqtaxanaxac ñi' qan'étoqo't 'me nedetalégue jánjo' nede!
8Jaỹim Juan ñaquiáxachiỹi qataxa sauáachiỹi ỹima jénjo'. Ca'li ỹim da' ñaquiáxachiỹi qataxa sauáachiỹi, qana'chi jaỹim sesocoto naua' ỹiliictel so' namaxasec piỹem lé'ec 'me jaỹim ỹaloxóotapega ỹima jénjo', da' sétaaque da' ñitamenot. 9Qaláxasa jeso'me jaỹim 'enapéga, 'enaac:
—Sa 'te da' na'chi 'auét'ec dójo', qá'a 'chi jaỹim lamaxasec ñi'me qan'étoqo't. 'Am sená'am qataxa jen'me 'adaỹi 'me l'aqtáxanaxanec ñi' qan'étoqo't, qataxa ỹima jen'me ỹátaqta ỹalaxalóo'te naua' nedetalóo'te jánjo' nede. Na'chiñíta ñi'me qan'étoqo't 'antamenot.
10Qataxa jaỹim 'enapéga, 'enaac:
—Sa 'te qomle da' 'auoxochiñi dójo' l'aqtaxanaxac ñi'me qan'étoqo't 'me nedetalégue jánjo' nede. Qá'a ma'le sa qaỹáaque di' lalóqo' da' ỹipaquichiilo naua' qoỹ'axátet'ape. 11Chan'eesa naỹi jega'me ỹ'étetac ga' sa nó'in, qaa'le qodemachí'ta da' ỹ'étetac. Qataxa jega'me paxáchiỹi da' l'óiỹaxac, qaa'le mai'chi nesepaxanaqtet. Jega'me ỹ'étetac ga' 'ónaxaic, qaa'le n'óota da' ỹí'et. Qataxa jega'me nañanguet da' quétapegue' ñi'me qan'étoqo't, qaa'le n'óota da' ỹátaqta 'equegue jiñi'me.
12Qana'chi so' Jesús 'enaac:
—Já'a, jaỹim sa ñiỹáloxoden da' ñanac. Ñachítac ga' ỹiseeténataxanaxat, da' qaidi seseeten ñi' 'oonolec ga' l'onataxanaxac. 13Jaỹim 'me na'chaỹim se'uáichiiñi, qataxa sep'áteegue, na'chaỹim lamo qataxa jaỹim loiquiaqa' ỹimaquéna, sená'am ga' 'uáichiiñi jena' leetrapi qataxa ga' p'áteegue.
14Ỹátaqta mátapiỹe't qomle ga' ỹiỹoi' gaua' louo, qaidi ỹañoxot da' neuána'uo jaga' 'ipaq 'me chiỹaqaỹi da' nec'alaxa, qataxa qaidi ỹañoxot da' ỹinoxonoo'uet ñi' som di' noic let'ádaic. 15Qaláxasa p'áiỹi qomle na' ỹ'étet'ape naua' sa n'oi'n, qataxa na' ỹ'étetac da' nedánaxanaxac, qataxa jen'me queséeguetaxaicpi, laataxanaxaicpi qataxa jen'me netameetapecot na' niqui'ipi, qataxa ỹima jen'me loqopitaxat da' ỹí'et da' loqovínaxanaxac.
16—Na'chaỹim Jesús 'me ñamaq so' ỹamaxasec, da' qaidi ỹ'axátem ỹima dójo' jen'me jaỹim ỹ'amaqten. Na'chaỹim 'me jaỹim chiỹoxoguet so' net'a David qataxa na'chi sachiỹoxoguet jeso'me. Qataxa jaỹim 'me na'chaỹim huaqchiñi ní'chise.
17Jeso'me Espíritu Santo qataxa jaso' sétaaque da' loua so' n'aanaxate c'óxot 'enaac:
—Ỹa 'auanac.
Jega'me demachíỹa dójo' n'aqtac nataq'en n'óota da' 'enaac:
—'Auanac.
Jega'me ỹileem da' láquip lamaic, qataxa sétaaque da' niỹom, n'óota da' janac, qana'chi niỹómỹi ga' noxop 'me chiỹaqaỹi da' nec'alaxa. Jega'me 'chi qoỹanem.
18Ỹima qomle na' demachíỹa dójo' l'aqtaxanaxac ñi' Dios 'me nedetalégue jánjo' nede, jaỹim saqáta jen'me, seet'oi: Da' 'uo ga' 'chi noqotetenéegue jen'me ga' sa lasoxoc, qana'chi jega'me ỹágueegue da' ỹi'uaxanque ñi' qan'étoqo't naua' napite'nádi 'me nedetalóo'te jánjo' nede. 19Qataxa da' 'uo ga' naqat ga' 'oonolec jen'me l'aqtaxanaxacpi ñi' qan'étoqo't 'me nedetalégue jánjo' nede, qana'chi jiñi'me naqatéegue jega'me ga' lenaxat jaso' nedáxalate jen'me qonec'alaxatéegue qataxa jidi'me noic 'me ỹátaqta ỹoqovíta, jen'me qoỹidetalégue jánjo' nede.
20Jeso'me 'me ỹ'axátetac dójo' 'enaac:
—Já'a, jaỹim sa ñiỹáloxoden da' ñanac.
Já'a, na'chi naq'áita dójo'. ¡Ỹa 'auanac, 'am qadesaliaxanec Jesús!
21Jeso'me qadesaliaxanec Jesucristo ỹanem qomle ỹima da' 'oñíita ga' 'anchoxodénataguiquii. Já'a, na'chi naq'áita dójo'.
Currently Selected:
Apocalipsis 22: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
