Apocalipsis 21
21
So' dálaxaic piỹem qataxa so' 'aléua dálaxaic
1Ỹim, qana'chi selá'a so' piỹem dálaxaic qataxa so' 'aléua dálaxaic, qá'a so' 'uáichiiñi piỹem qataxa so' 'uáichiiñi 'aléua sóxote ỹiméta. Qataxa jaso' huaxai nataq'en ỹiméta. 2Jaỹim Juan sela'aguet so' dálaxaic noic Jerusalén. Jeso'me ỹátaqta ỹoqovíta, chiỹaqséguem, chiỹoqo'ot ñi' Dios. Ma'le sóxote da' ỹima ỹiméta, 'ená'am da' n'étaxac jaga' q'añole da' ma'le sétaaque da' 'uoneguet ga' nauonaxaua. 3Qana'chi semachíỹa so' n'aqtac ỹátaqta ỹisam, chimaqpecot di' piỹem, 'enaac:
—Péga, ñi'me Dios nétanỹi naỹi na' siỹaxadipi, ỹátaqta 'en leseecpi. Jen'me ỹátaqta l'acháqa' lé'ecpi. Jiñi'me ỹaleeguet na' siỹaxadipi, naqaiñi ñi' netamnaxala' jen'me. 4Qana'chi jiñi'me ỹiỹoi' 'ena'uaque naua' láchi' jen'me. Huá'a, qana'chi sa ỹitaxa da' ỹileu ga' siỹaxaua, qataxa sa ỹitaxa noỹíitac 'uootaxa da' n'alqátañi, 'uootaxa da' 'uo da' laỹaliaxa. Qá'a ỹima jen' seloqótaỹi naỹi, ỹima ỹiméta.
5Qana'chi jeso'me nétanỹi jaso'me nes'ónaxaqui da' net'a 'enaac:
—Péga, naỹi jaỹim sadálaxat ỹimaquéna.
Nataq'en 'enaac:
—'Audíñi qomle ỹima jénjo', qá'a jen'me n'aqtacpi ỹátaqta 'eesa qataxa qoỹañoxot da' qop'iỹá'a.
6Qataxa jaỹim qoỹinapéga, qoỹinaac:
—Ma'le sóxote da' ỹim. Jaỹim 'me na'chaỹim se'uáichiiñi qataxa sep'áteegue, sená'am ga' 'uáichiiñi jen' leetrapi qataxa jega' p'áteegue. Jega'me ỹileem da' láquip lamaic, qaa'le sanem ga' noxop 'me chiỹaqaỹi da' nec'alaxa 'me chiỹaqánỹi jaga'me náatetaseguem na' lé'ec. Jega'me 'chi qoỹanem. 7Jega'me dauégaxan qomle, qana'chi qoỹanem ỹima jen'me, 'ená'am ga' laso'vi qoỹin. Qana'chi jega'me jaỹim netamnaxala', qataxa jega'me ỹalec. 8Jen'me siỹaxadipi 'me colánqaic qataxa jen'me sa d'amaqténataxan, qataxa jen'me naqaigaxatpi, laataxanaxaicpi, qataxa jen'me queséeguetaxaicpi, qataxa jen'me ỹidan ga' laqáỹa, qataxa jen'me netameetapecot ga' niquí'i, qataxa ỹima jen'me qovínaxanaxaicpi, ỹima qomle jen'me qoỹanem da' qoỹasaxánỹi ga' dóle' let'ádaic 'me huá'a da' ỹavic jen'me sega'me huosac l'atec. 'Me naqaiga ga' niỹaqa'aguet neleuaxa.
So' dálaxaic noic Jerusalén
9Qana'chi janac so' 'oonolec so' siete namaxa'spi 'me lasóqot'a jaso'me huétaỹi jeso'me p'áteegue ne'uáanaxanaxacpi. Qana'chi jaỹim 'enapéga, 'enaac:
—Péga, ỹa 'am saloxóna jañi'me nauonaxaua 'me sétaaque da' loua jiñi'me n'aanaxate c'óxot.
10Ca'li maliaxa souétaaue jeso' ỹiuoqtaxanaxac 'me jaỹim ỹaloxóna so' Espíritu Santo, qana'chi jeso'me namaxasec jaỹim ỹavíisee'ma so' soqoỹoqóchisee'mec qasoxonaxa. Qana'chi jaỹim ỹaloxóna so' noic let'ádaic Jerusalén, ỹátaqta ỹoqovíta. Jeso'me chiỹoqo'ot di' piỹem, chiỹoqot'ot ñi' Dios. 11Jesójo' noic huétaaue da' l'edáxa ñi' Dios. Jénjo' l'edáxa 'ená'am na' ỹátaqta 'ónaxaic qa' lenaxat jaspe 'me ỹátaqta ỹaqasélec qataxa chíchiiñi. 12Naua' lail jeso'me noic, qaa'le 'uo so' let'ádaic lequepaxanaxat ỹátaqta soqoỹoqóchisee'mec, qataxa ỹovi't doce naua' so'mi, qataxa 'oonolec ñi' namaxasec jen'me huetaa'uet na' sompi da' netela. Qataxa jen'me lenaxatpi so' doce lec'oqtepi so' Israel nedetalóo'te naua' so'mi. 13Tres saua' so'mi p'ategue da' ỹ'oxoñi, qataxa tres saua' p'ategue da' se'u, qataxa tres saua' p'ategue da' taỹíñi, qataxa tres saua' p'ategue da' jávit. 14Jeso'me lequepaxanaxat so' noic, qaa'le jeso'me qoỹ'oxoolóo'te qoỹin saua' doce qadi. Jesaa'me nedetalóo'te naua' lenaqa'te saua' doce lamaxa's so' n'aanaxate c'óxot.
15Jeso'me namaxasec 'me jaỹim d'aqtaxáatapeguem, jeso'me lasóqot'a so' laloqtenaxanaxat 'me chiỹaqaỹi jan' oro, da' qaidi qonaloqten so' noic, qataxa naua' so'mi, qataxa jeso' lequepaxanaxat. 16Jeso'me noic, jeso'me cuatro naua' lail, di' jaloc qana'chi 'ená'am di' leca'ague. Qana'chi jeso'me namaxasec naloqten jeso'me noic, ỹidolégue jeso'me laloqtenaxanaxat, ỹóvi' dos mil doscientos kilómetros di' jaloc, qataxa di' leca'ague, qataxa di' jaloc jen' p'áseguem. 17Ỹim, qataxa naloqten so' lequepaxanaxat. Jeso'me ỹóvi' sesenta y cuatro metros di' jaloc na' p'áseguem. Di' ỹóvi', naqaidi di' laloqchiñisec jeso'me laloqtenaxanaxat na' siỹaxadipi 'me daloqtenaxáatapega so' namaxasec.
18Jeso'me nequepaqtaxanaxat, jeso'me l'oxonaxat na' qa' lenaxat jaspe. So' noic, qaa'le nedot'a't na' oro na' l'oxonaxat. Jen'me 'ená'am jen' chíchiiñi, ỹátaqta ỹ'aqáiỹi. 19Na' qa' 'me li'ỹoxodáxat jeso'me nequepaxanaxat, jen'me ỹátaqta ỹodapecachi na' l'óiỹaxac. So' 'uáichiiñi l'oxonaxat na' qa' lenaxat jaspe, qataxa so' l'oxonaxat laqáỹa na' zafiro, so' laqáỹa l'oxonaxat na' ágata, so' laqáỹa l'oxonaxat na' esmeralda, 20so' laqáỹa l'oxonaxat na' ónice, so' laqáỹa cornalina, so' laqáỹa crisólito, so' laqáỹa berilo, so' laqáỹa topacio, so' laqáỹa crisoprasa, so' laqáỹa jacinto, qataxa so' p'áteegue l'oxonaxat amatista. 21Saua' doce so'mi, qaa'le nedot'a't na' qa' perla. Ñi' 'oonolec som, na'chi qoỹin jaso' 'oonole perla. Jeso'me naq'aic 'me huánỹi laiñi, qaamaxa nedot'a't oro, 'ená'am na' chíchiiñi.
22Qaláxasa qaỹa 'te ga' selá'a tamnaxaqui jeso'me noic, qá'a ñi' qadasoxola' qan'étoqo't 'me qaỹa 'te ga' ỹaqalánaac, jiñi'me naqaiñi ñi' sega'me tamnaxaqui, nataq'en jeso'me n'aanaxate c'óxot. 23Jeso'me noic, jeso'me sa ỹiuen jaso' c'atena qataxa so' 'auóxoic, da' 'uootaxa ỹicoỹadetalégue. Qá'a mai'chi l'edáxa ñi'me qan'étoqo't qataxa so' n'aanaxate c'óxot mai'chi ỹicoỹadetralégue. 24Jen'me ỹodapecachi siỹaxadipi 'me qonec'alaxatéegue, qana'chi nichaatétaaue da' l'edáxa di' noic. Jen'me net'alpi 'me huetalégue jen' 'aléua, qana'chi nedótapega da' let'ádaic qataxa da' li'ỹoxodic jidi'me. 25Qataxa naua' so'mi jidi'me sa ỹapadíñiilo di' nolo', qataxa sa 'te da' 'uo da' pí'ỹaq. 26Qana'chi qondótapega jidi'me da' let'ádaic qataxa da' li'ỹoxodic jen'me ỹodapecachi siỹaxadipi. 27Qaláxasa sa ỹinoxoneuó'o jidi'me ga' paxáchiỹi, 'uootaxa ga' necocátapiilo naua' loico, 'uootaxa ga' qovínaxanaxaic, na'chigáta ga' qoỹidéta'uo ga' lenaxat jaso' lede so' n'aanaxate c'óxot 'me nedáxalate jen'me qaỹa 'te loiquiaqa' da' lec'alaxa.
Currently Selected:
Apocalipsis 21: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
