Apocalipsis 20
20
Saua' mil 'uóidi
1Ca'li ỹim dójo', qana'chi sauaat'eguet so' namaxasec chiỹoqot'ot di' piỹem, lasóqot'a jaso' nasom ló'o ga' lapónaqa' na' napa'lpi qataxa so' necointáxanaxat let'ádaic laicaua. 2Jeso'me namaxasec, jeso'me ỹaconé'uo so' sega'me ñaxadiaq 'me 'uáichiiñi nanaic 'me naqaiso so' qadó'o paiỹac, lenaxat Satanás, qana'chi ỹicoñi' mil naua' 'uóidi. 3Qana'chi ỹasaxá'ña jega'me lapónaqa' na' napa'lpi. Qana'chi ỹapadíi'ña, qataxa ỹitouoxolégue jaso' l'anaxanaqte, da' qaidi sa 'te da' ỹitaxa ỹoqovin jen' ỹodapecachi siỹaxadipi, dito' 'chi ma'le ỹinoxodéegue gaua' mil 'uóidi. Qomle ma'le ỹinoxodéegue gaua' 'uóidi, qana'chi jeso'me cada'acolec da' qoỹisóiỹi.
4Ca'li ỹim, qana'chi selá'a jaso' nes'ónaxaquipi na' net'a. Jaso'me na'chi nétanỹi jeso'me qoỹanem da' nimit jen' nasouaxacpi. Nataq'en selá'a na' liqui'ipi jen'me qoỹicháxaỹi na' laqaic joca'li ỹasouaxat da' ỹ'axátetac da' l'aqtac ñi'me Dios 'me nedóiñi so' Jesús. Jeso'me naqaiso so' sa ỹi'ỹoxoden so' síiỹac qataxa jeso'me nadénaqtac liquí'i, qataxa sa nasenguet jaso' l'anaxanaqte da' qaidi qoỹ'an na' latap 'uootaxa na' louaq. Selá'a jeso'me da' ỹitaxa qonec'alaxatéegue, qana'chi lecochaxau'pi so' Cristo da' net'alpi gaua' mil 'uóidi. 5Naqaiso jeso'me 'uáichiiñi da' ỹitaxa qonec'alaxatéegue. Jeso'me laỹi napa'lpi, qaamaxa sa ỹitaxa qonec'alaxatéegue, dito' 'chi ỹinoxodéegue gaua' mil 'uóidi. 6¡Ỹátaqta mátac qataxa lalémaxasetpi qomle ñi' Dios jen'me huétaaue jen' 'uáichiiñi da' ỹitaxa qonec'alaxatéegue! Jega'me niỹaqa'aguet neleuaxa, qana'chi qaỹa 'te ga' 'éet'ec jen'me. Qá'a jen'me 'me letaxaỹáxanaxanecpi jen' lalémaxasetpi ñi' Dios qataxa so' Cristo. Huá'a, qana'chi lecochaxau'pi jeso'me da' net'a gaua' mil 'uóidi.
Noxonec so' paiỹac qadó'o Satanás
7Qomle ỹinoxodéegue gaua' mil 'uóidi, qana'chi so' Satanás 'me qadó'o ỹitaxa qoỹisóiỹi. 8Qana'chi nenoxooséguem da' ỹitaxa ỹoqovin ỹima jen'me ỹodapecachi siỹaxadipi 'me huetalégue jen' 'aléua. Qana'chi ỹic'áta da' ỹoqovin ñi' Gog qataxa ñi' Magog. Qana'chi ỹimata'a't jen' nesoxonaqapi jesaa'me, da' qaidi delóiqui'. Jen'me sa lec'óxotolec, 'ená'am jen' pogaxanaxa 'me huéta'ña na' loxogue jan' huaxai. 9Huá'a jeso'me, qana'chi ỹátaqta nalalégue jen' 'aléua. Qana'chi qocoleesop jeso'me lemacháqa' jen'me lalémaxasetpi ñi' Dios qataxa so' noic 'me lauotaxat jiñi'me. Qaláxasa ñi' Dios namaq so' dóle', chiỹoqo'ot di' piỹem, qana'chi ỹavíỹaxat ỹima jeso'me. 10Qana'chi jeso'me qadó'o Satanás 'me ỹoqovíitac jeso'me, qoỹasaxánỹi so' dóle' let'ádaic 'me huánỹi da' ỹavic jen' sega'me huosac l'atec, jeso'me huá'ña da' qoỹasaxá'ña joca'li so' síiỹac qataxa so' 'enapeela't l'aqtáxanaxanec ñi' Dios. Huánỹi so' dóle', qana'chi 'uo da' lachoxodec di' pí'ỹaq qataxa di' nolo', qaỹa 'te loiquiaqa'.
Da' naq'áita qomle qonimit jen' siỹaxadipi ga' p'áteegue nolo'
11Qana'chi selá'a jaso' s'ónaxaqui lat'édai pagaxai qataxa jeso'me nétanỹi jaso'me. Huá'a, qana'chi jen' 'aléua qataxa di' piỹem ỹátaqta nelágaxataac, ỹátaqta qaỹa 'te ga' ỹaqápega jen'me. 12Qana'chi jen' napa'lpi let'ádaicpi qataxa jen'me sa léca nichaatétañi dasot'ot ñi' Dios. Huá'a, qana'chi qoỹ'ouáchiilo saua' nedel qataxa jaso' nede laqáỹa 'me nedáxalate jen'me qonec'alaxatéegue. Qana'chi jen' napa'lpi qonimit ñi' 'oonolec jen' ỹí'etpi 'me qoỹidetalóo'te saua' nedel, da' qaidi qoỹiseeten. 13Qana'chi jaso' huaxai ỹaneuo jen' napa'lpi 'me huétanỹi. Qataxa so' neleuaxa qataxa so' lapónaqa' na' napa'lpi, jesaa'me ỹaadéuo jen'me huet'oto. Qana'chi ỹima jeso'me napa'lpi qonimit ñi' 'oonolec jen' l'onatacpi, da' qaidi qoỹiseeten. 14Ỹim, qana'chi so' neleuaxa qataxa jeso'me lapónaqa' jen' napa'lpi, jesaa'me qoỹasaxádinỹi so' dóle' let'ádaic. Jesójo' dóle' let'ádaic, jeso'me naqaiso so' niỹaqa'aguet neleuaxa. 15Qana'chi jeso'me qoỹasaxánỹi jen'me sa qoỹidé'uo jaso' nedáxalate jen' qonec'alaxatéegue.
Currently Selected:
Apocalipsis 20: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
