2 Timoteo 3
3
Da'me n'onataguec na' siỹaxadipi qomle ỹinoxótraiỹi naua' noloqo'te
1Nataq'en 'auaỹáteeta dójo' qomle ma'le ỹinoxotaiquéna, qana'chi nenoxodéuo gaua' noloqo'te 'me 'uo da' laqalai'j. 2Qá'a da' lasoxoc na' siỹaxadipi 'enaac: mai'chi noqopitela't, qataxa quétapegue' da' loqopi'chi jan' laicaua, qataxa ỹ'oxodénaxaic, qataxa 'otánaxanaxaic. Jen'me sa ỹa'uo ñi' Dios, qataxa sa 'te ỹoqocha'alo gaua' let'al, qataxa 'uagáqaic, qataxa qaỹa 'te ga' 'enec qa'en da' n'amaqténataxanaxac. 3Jen'me sa dechoxodénataxan, qataxa sa nisóxode'ne' ga' laqáỹa, qataxa n'aqtaqa ló'o', sa netelela't, qataxa qalhuaxaic, qataxa liquiỹáxat ỹima na' ỹiỹamqáchiiñi. 4Jen'me peláqtaxanaxaic, qataxa qaỹa 'te ỹitená'a, qataxa saqáchiỹi da' ni'ỹoxodénaxac, qataxa p'asáiỹi qa'en na' neuálaxaỹaxacpi, qana'chi sa ỹoqochi'iguet ñi' Dios. 5Jen'me ỹáateegue da' 'enapéga quet'egue da' tamnaxac, qaláxasa ỹoqoleguet da'me lañoqtaxanaxac da' tamnaxac.
Naqáina qomle 'me 'ená'te 'anaỹá'a. 6Qá'a jen'me 'uo na' sega'me ỹodíita'ualo naua' 'emáqa da' ỹisómaxanac jan' ỹauo 'me sa naỹáten, qataxa qapalt'oto naua' loico. Jan'me ỹauo 'me quétapee'to nepálaxachiiñi da' lamanaxanaxa, 7qataxa sétaaque da' 'uo ga' ỹaỹáten, qaláxasa sa ỹivideguet da' ỹaỹáten ga' ỹátaqta lasoxoc. 8Jen'me 'ena'ama saua' 'oiquiaxaiqa Janes qataxa so' Jambres 'me nautéeta josii'chi so' Moisés. Nataxa 'éeta jen'me siỹaxadipi ỹátaqta nauténa da' 'eesa lasoxoc. Jen'me sóxote sa nateneuo da' laatetonaxanaxac, qataxa nepáten da' ladic da' nepé'e. 9Qaláxasa jen'me sa qaỹa'ague qomle da' ladíquiaxac, qá'a ỹima jen' siỹaxadipi da' ỹaateton da' qaỹa 'te ga' ỹaỹátenaac. Qana'chi 'ena'ama da' qoỹiit'eque joca'li saua' dos siỹaxa'u 'me nautéeta so' Moisés.
So' p'áteegue laqátaxac so' Pablo 'me ỹanem so' Timoteo
10Qaláxasa sóxote 'auaỹáten da' ỹapaxaguenataxanaxac, qataxa da' ỹasoxoc ỹiỹamqáchiiñi, qataxa da' séetapeec, qataxa da' ỹip'iỹáxac, ñapogáxadenaxac, ỹisóxodic, qataxa da' ỹ'añaxac ỹima na' chaqáina, 11qataxa da' ñicanáguec, qataxa da' ñi'queténaxac. Qataxa sóxote 'auaỹáten ỹima na' jaỹim qoỹ'étec ca'li souét'a di' noic Antioquía, qataxa di' Iconio, qataxa di' Listra. Hues'a't ỹima na' ñicanáguecpi, qaláxasa so' qadesaliaxanec ỹima jaỹim nec'alaxatee'guesop. 12Ỹátaqta 'eesa da' ỹima na' sétaaque da' nañanguet da' 'equegue so' Cristo Jesús, nataq'en hualégue qomle da' necanáguec. 13Qaláxasa na' qalhuaxaicpi qataxa na' qovínaxanaxaicpi lamá'asa nichíctaiỹi ỹima na' sa ỹiỹamaxañipi. Jen'me doqovínaxaatac, qaláxasa na'chi 'ená'am noqovíñiisec.
14Qaláxasa 'am 'oqueteloo'to' na' 'anapaxaguenagueco 'me ỹátaqta 'eesoda. 'Am sóxote 'auaỹáten jen'me 'am ỹapaxaguenec da'me dójo', 15qá'a jalchi'ena da' 'anaquíchisee'me' da' 'auaateto'n naua' nidii's l'aqtaqa ñi' Dios 'me 'am 'en daỹátenataxan, qataxa ỹaqanate't da' ỹauec'aguet 'am da' nec'alaxa 'me chiỹaqaỹi da' qadip'iỹáxac so' Cristo Jesús. 16Qá'a ỹiméda naua' nidii's l'aqtaqa ñi' Dios, naa'me 'en ỹidídiñi josii'chi so' letaxaỹáxanaxanecpi. Jenaa'me ỹaqanate't da' qodapaxaguenataxanque, qataxa da' qodaloxónataxana da' ladic da' n'óiỹaxac ỹoqovíta, 17qaidi ga' lamaxasec ñi' Dios ỹátaqta nalóchiiñi ỹima na' leuénecpi, qataxa ỹaqanatet da' ỹí'et ga' gamachaqaiga n'onataxanaxac ỹiỹamqáchiiñi.
Currently Selected:
2 Timoteo 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.