2 Timoteo 4
4
1Dójo' ỹaqátaxac 'am sanem naỹi qo'mi ỹátaqta ỹic'ateet'ape ñi'me Dios qataxa so' qadesaliaxanec Jesucristo 'me janac qomle da' naloxon da' net'a, qataxa nimit ñi' 'oonolec na' siỹaxadipi 'me maliaxa nec'alétaiỹi qataxa na' sóxote ỹileu. 'Am senapéga 2da' ỹátaqta 'au'axat da' n'aqtac, lamá'a da' 'uo ga' 'adedáqa', qataxa na'chi 'ená'am qomle qaỹa ga' 'adedáqa'. 'Auanómaxanaxan ga' siỹaxaua, 'aualoxóna ga' lesamaxataxac, 'auaqáta, ỹátaqta 'aneuálaxai'ne' da' 'auapaxaguen. 3Qá'a nóvi' qomle ga' nolo' da' na' siỹaxadipi sa naquiáxaneguet da' napaxaguenataxanaxac 'me 'eesa. Jaldáta da' naquiáxataaque ga' noqopita, qana'chi naquiáxana, qataxa mai'chi nimitá'ai jen' napaxaguenoqo'tpi ga' ỹaqá'a da' qoỹapaxaguenec ga'me mai'chi naquiáxataaque. 4Qataxa ỹapadíñiilo naua' lequetelalaaco, da' qaidi sa 'te demachíỹa da' 'eesa lasoxoc. Jaldáta da' naquiáxataaque jen' ỹodapecachi 'chi senaxacpi. 5Qaláxasa 'am ỹátaqta 'anloteego' qomle, qataxa 'anapogáxadeneguet da' 'an'queténaxac, 'ocot da' 'au'axat da' n'aqtac 'me chiỹaqaỹi da' nec'alaxa, 'apaquetelégue da' 'ad'onataxanaxac.
6Qalaqa'chi ma'le ỹinoxótaiỹi qa'en ñi' Dios da' ỹ'óiỹaxac sega'me jaga' netauo' da' qoỹicodelégue jaga' neco'ỹoxonaxalate. Qá'a sóxote ỹivíta da' secá'ai jen' 'aléua. 7Sóxote semat da' selóiquitapeelégue da' ỹ'onataxanaxac, qataxa semat da' ñaqalégoxosoxoc. Ỹátaqta souelégue da' qadip'iỹáxac. 8Chan'eesa naỹi jaỹim seuatet'aguet da' neseeténaguec da' ỹ'óiỹaxac ỹoqovíchiỹi. Da'me jaỹim ỹanem ga'me nolo' so' qadesaliaxanec Jesús 'me qaỹa 'te nepáten da' nimit ga' siỹaxaua. Qaláxasa sa na'chaỹiméta da' jaỹim ỹanem, nataq'en ỹima na' siỹaxadipi 'me ỹadiit'aguet ga' l'iỹílaxasoxoc.
Lalémaxaset naqátaguec so' Timoteo
9'Anequelólta qomle da' jaỹim 'anec'áta. 10Qá'a so' Demas jaỹim cá'ai, qá'a p'asáiỹi qa'en da' loqopi'chi naua' loico jen' 'aléua. Qana'chi nichíga di' Tesalónica. So' Crescente taiỹi di' 'aléua Galacia, qana'chi so' Tito taiỹi di' 'aléua Dalmacia. 11Jalñíta ñi' Lucas maliaxa jaỹim net'asop. Qomle 'anec'atequéna, qana'chi 'anepoda ga' Marcos da' 'aquiáxaua, qá'a ga'me 'me taiỹet da' jaỹim lecochiỹa da' qad'onataxanaxac. 12So' Tíquico samaxa di' noic Efeso. 13Qomle 'anec'atequéna, qana'chi 'anáchi ga' ỹapoto 'me sepotan'ot ga' Carpo 'me néta'ña di' Troas. Nataq'en 'anáchi' gaua' ỹidel, qaláxasa 'ená'te 'apetelaxaguet jaga' ỹidáxanaxalatelpi.
14So' ỹ'étac na' laicaua, lenaxat Alejandro, ỹátaqta jalcote na' sa nó'inpi 'me jaỹim ỹ'étec. So' qadesaliaxanec ỹiseeténec qomle ỹima na' ỹa'uopi. 15Ma'chaqo', 'avita'aguet qomle, qá'a so'me ỹátaqta nauténa da' s'axátaqtac.
16So'me nolo' ca'li ỹímta ỹapaxañi so' 'uáichiiñi ỹosáxac da' setaxaỹapégue' na' net'alpi, qaỹa 'te ga' huá'uoỹai da' jaỹim detaxalégue, ỹima da' jaỹim qo'etelégue. Qaláxasa n'óota qomle ñi' Dios da' sa ỹilótaỹi dójo'. 17Qaláxasa so' qadesaliaxanec Jesús ỹátaqta jaỹim lecochiỹa, qataxa jaỹim ỹanem da' ỹ'añaxac da' ỹipaquíchiỹi da' s'axat jen' n'aqtac 'me nec'alaxaqui, da' naquiáxana ỹima jen'me sa judiopi. Qana'chi naq'áita da'me so'me qadesaliaxanec da' jaỹim nec'alaxatee'guesop da' sega'me loxonaxanaxac ga' di'quiỹaac. 18Qana'chi taỹá'a da' jaỹim netelaqteneguet ỹima jen' sa nó'inpi, cha jaỹim ỹinoxonaqteneguet ga' l'onataxanaxac 'me huet'ague da' piỹem. Qaa'le so'me 'me huet'ot da' qadodiácnataxanaxac 'me sa n'aidé'na. Já'a, na'chi naq'áita dójo'.
Da' p'áteegue lip'iỹénataxanaxac so' Pablo
19Ỹip'iỹénataxanaxac jaga' Prisca qataxa ga' loua Aquila, qataxa ga' l'acháqa' lase' so' Onesíforo. 20So' Erasto qapiỹá'ña di' Corinto, qana'chi so' Trófimo sepotáa'ña di' Mileto, qá'a ỹilhuaac. 21'Am 'anquelóltac qomle, tamaliaxa sa naqaviaxa. 'Am ỹidénaqtena da' lip'iỹénataxanaxac ñi' Eubulo, Pudente, Lino, qataxa jañi' Claudia, qataxa ỹima na' qadaỹi.
22Ñi' qadesaliaxanec Jesucristo 'am huet'aguet qomle, qataxa ñi'me Dios 'ami ỹanema qomle ga' 'ónaxaic 'adadíquiaxaqui. Já'a, na'chi naq'áita dójo'.
Currently Selected:
2 Timoteo 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.