2 Timoteo 2
2
Ga' nesoxonec so' Jesucristo
1'Am ỹalec, 'auaconegueto' qomle da' n'añaxac 'me chiỹaqáaue da' niỹálaqtaxanaxac da'me qo'mi qoỹanema, qá'a soqotaqáta'uo so' Cristo Jesús. 2Qataxa ỹima da' 'anaquiáxanaxac 'me jaỹim 'auachiỹoxot'ot, nataq'en demachítapega na' jalcote siỹaxadipi, na'chína qomle na' 'apataxagueta gaa'me siỹaxa'u 'me ỹátaqta 'adpe'ete, qataxa nalóda'uo da' ỹapaxague'n ga' laqáỹa'.
3'Am ỹátaqta 'anapogáxadengueto' ỹima naua' 'queténaxaco, 'ona'amo' ga' nesoxonec láxadaic da' 'am nesoxonec so' Jesucristo. 4Qá'a qaỹa 'te nesoxonec da' táaue na' huataxanaq, qana'chi mai'chi ỹisómapiỹi ga' l'onataxanaxac, qá'a sóxote ỹimec da' lamaxasóxonaxac so' let'a na' huataxanaq. 5Qana'chi 'ená'am ga' siỹaxaua da' 'uootaxa tauó'o da' qomitaxac, qana'chi da' 'uootaxa sa ỹipaguelégue da' lasoxoc, qana'chi sa taỹot jaga' te'me neseeténaqte. 6Nataq'en ga' siỹaxaua da' huétai'ỹa ga' nanaxanqa' da' d'onataxáatac, ga'me 'me 'uáiñi ỹaconeguet da' jaláỹaxac da' l'onataxanaxac. 7'Aueenatelco' da'me senaac, qana'chi so' qadesaliaxanec 'am ỹanem qomle da' 'auaỹáten ỹima dójo'.
8'Ená'te 'apeteláq'ai so' Jesucristo 'me chiỹoxoguet so' net'a David. So'me Dios nec'alaxatéegue. Naq'áita da' n'aqtac 'me nec'alaxaqui 'me s'axátetapegueegue. 9Na'chida 'me 'uo da' ñi'queténaxac, cha ỹivíde'ta da' jaỹim qoỹicoñideta't, 'ená'am taa'le jaỹim 'itaxalóxoic. Qaláxasa da' l'aqtac ñi' Dios qaỹa 'te ỹicoñi'. 10Chan'eesa ñapogáxadeneguet ỹima jen' chaqáina, qá'a sétaaque da' na' Dios liquiỹacpi qaidi ỹivídai'ỹa da' nec'alaxa 'me p'asáiỹi da' lodiac qataxa sa 'te n'aidé'na. Dójo' nec'alaxa qo'mi taỹoto, qá'a sóxote soqotaqáta'uo so' Cristo Jesús.
11Dójo' n'aqtac ỹátaqta 'eesa:
Da' seleuaqá'ñi' so' Jesús, qana'chi qadec'alaxaua so'me;
12da' 'uo da' qane'queténaxac, qana'chi ñiuánaqa'uo qomle da' qoỹilo'ogue ỹimaquéna.
Qomle ñimánaxac so'me, qana'chi so'me na'chi 'ená'am qo'mi 'enapegalo sa ỹaateto'n.
13Da' sa sepagaxalégue ga' qad'aqtac, qaláxasa so'me sa 'te sa ỹipaiỹi ga' l'aqtac,
qá'a ñi' Dios sa nadálaxat, qataxa sa ỹoiquin ga' l'aqtac.
Ga' n'onataxanaxanec ỹátaqta qoỹiỹamaxadéeta
14'Oquet'ot da' 'aueenataxanaxanec na' siỹaxadipi da'me dójo'. Naỹi 'am ỹic'atéetac ñi' qadasoxola' Dios da' 'auqáta jen'me da' qaidi sa 'te 'en ỹidoiỹa't jen'me l'aqtacpi. Qá'a da'me cotaxac qaỹa 'te ga' náaue. Jaldáta da' ỹisómaxanaqtet ga'me naquiáxatapega. 15Ỹátaqta 'an'añaxato' qomle da' 'analoxonot ñi' Dios, qaidi 'ona'amo' ga' n'onataxanaxanec 'me ỹátaqta niỹamaxadenatac, qataxa qaỹa 'te ga' nepecóqtaaque. Jaldáta da' 'aulot'eelo naua' lasoxoco 'me ỹiỹamadíchidiñi da'me n'aqtac 'me 'eesa lasoxoc. 16Qataxa 'au'oỹa'agueto' na' nosáxacpi 'me l'achaq'áina 'me qaỹa 'te ga' náaue. Qá'a naua' losáxaco náajo' na'chi tata'nquida, lamá'asa nichict'aguet jen' sa nó'inpi. 17Qataxa naa'me lapaxaguenataxanaxaco nichícrapegueegue, 'ená'am jaga' n'autaqte lat'e. Naqaida 'me 'éete' saa'me Himeneo qataxa so' Fileto. 18Saa'me ỹisamaxatráiỹi, quéd'ai da' 'eesa lasoxoc, 'éetrapega sóxote ỹim da'me n'iỹílaxaseguem jen' napa'lpi na' sóxote d'amaqténataxan. Naqaida 'me 'uo na' ỹisómaxanaqtet da' lip'iỹáxac. 19Qaláxasa ñi' Dios sóxote lapaxañi so' lamo da' l'onataxanaxac 'me qaỹa 'te ga' ỹidáxatac. So'me nedetalégue so' nidíisec, 'eet'oi: “Ñi'me qadasoxola' Dios ỹaateton ga' sóxote lalémaxaset;” nataq'en 'enaac: “Ỹima na' sóxote necosátapegue'gue da' lenaxat so' Cristo, ỹátaqta cá'ai qomle ỹima na' sa ỹiỹamaxañipi.”
20Ga' 'imec let'ádaic sa 'oonolec ga' lé'ec, 'me nó'in chiỹaqaỹi na' oro, 'uootaxa plata da' huétaaue. Nataq'en huétaaue na' 'epaq qataxa na' 'aléua ỹómaxaqui. Jénjo' neuoxosetpi 'uo na' taiỹet da' ni'ỹoxodic, qataxa 'uo na' taiỹet gamachaqaiga qoỹíit'ec. 21Da' 'uo ga' sétaaque da' sega'me noxoset 'me taiỹet da' ni'ỹoxodic, qataxa sétaaque da' ỹoqovíchiỹi, qataxa sétaaque da' l'onataxanaxanec so' qadesaliaxanec, ga'me niỹamaxatela't, ỹiỹo ỹima na' sa ỹiỹamaxañi, qana'chi leuóteta da' taiỹet gamachaqaiga n'onataxanaxac ỹiỹamqáchiiñi.
22'Auasoi'ỹimo' qomle naua' loqopichidíỹaxaco da' nenóidisec. 'Oquetelco' da' n'óiỹaxac ỹoqovíchiỹi, qataxa da' nepé'e, qataxa da'me nesóxodic. 'Anpogoxóinapegue' da' qaỹa 'te 'uo ỹima jen'me sóxote ỹoqovíchiỹi jan' liquidiaqte 'me liỹáxanaxat da' lenaxat so' qadesaliaxanec Jesús da' netamenot. 23Qataxa 'ená'te da' 'auqo'cho' na' cotaxacpi 'me 'chi huaỹoxonaxaicpi qataxa qaỹa 'te ga' náaue, qá'a sóxote da' 'auaỹáteetac jen'me da' nétaaue da' nelóiquiaxac. 24Qá'a ga' lalémaxaset so' qadesaliaxanec sa petaxaic. Jaldáta da' choxodénataxanaxaic, qataxa ỹaỹáten da' dapaxaguenataxan, qataxa 'uo da' napogáxadenaxac, 25qataxa huosóta da' lasoxoc da' ỹapaxaguen ga' nep'aguénoqo't. Qá'a 'uootaxa ñi' Dios ỹanem ga'me da' ỹaxadíñi qa'e'n naua' n'onatagueco, qataxa ỹanem da' ỹaỹáten da' 'eesa lasoxoc, 26qaidi ma'le netouen, qataxa cá'ai da' lapogoqtaxanaxac so' paiỹac qadó'o 'me lecoñitáisec da' ỹí'et gamachaqaiga 'éetapeec.
Currently Selected:
2 Timoteo 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.