2 Timoteo 1
1
So' Pablo ỹamaxa jaso' lidíise so' Timoteo
1Jaỹim Pablo, jaỹim ỹidéuo ñi' Dios da' jaỹim lamaxasec qa'en so' Jesucristo, da' s'axáteegue da' nec'alaxa 'me ỹaloxóotac josii'chi. Dójo' nec'alaxa taỹot gama'chi nesói'uo so' Cristo Jesús. 2'Am ỹauotaxat Timoteo, sega'me 'am ỹalec, 'am samaxa jan' ỹide, qá'a sétaaque da' 'auaconeguet da' 'aniỹálaqtaguec, nataq'en da' 'anchoxodénataguec, qataxa da' 'ad'emáxac 'me chiỹoqo'ot ñi' qadet'a Dios nataq'en so' qadesaliaxanec Jesucristo.
Qoỹ'axátetac so' Cristo
3Da' ñitaméetac di' nolo' qataxa di' pí'ỹaq, qana'chi táchiỹi ỹiuel 'am. Qataxa sanem da' ñitónaxac ñi' Dios 'me s'étet'ape naua' l'aqtaqa, qataxa ñitouéeta da' qaỹa 'te ga' huet'ot ỹavíỹaxaset. Da'me naqaida 'me 'éeta nataq'en so' huá'au ỹit'alpi. 4Nataq'en naale seenatét'a da' 'anoinaxac, qana'chi 'uo da' ỹidiáxa da' 'am ñauá'ne', qaidi jalcote da' ỹamaic. 5Qataxa naale seenata da'me 'adip'iỹáxac 'me ỹataqtelégue. Da'me ỹataqtelégue nip'iỹáxac 'me 'uauguet jaso' 'adcoméena' Loida qataxa jaso' 'adat'e Eunice. Naỹi saỹáteeta da' nataq'en 'am huet'ot dójo' nip'iỹáxac.
6Chan'eesa naỹi 'am saqáta da' 'au'edáxatooue ñi' 'aneme n'añaxac 'me 'am ỹanem ñi' Dios so'me nolo' ca'li 'am saselalégue. 7Qá'a ñi'me Dios sa ỹan ga' qolánqaic da' 'en neme ga' siỹaxaua. Na'chigáta ga' ỹí'et ga' n'añaxac, qataxa ga' lauo'chi, qataxa da' netelela't. 8Chan'eesa 'ená'te 'adepecoxolégue da' 'au'axáteegue so' qadesaliaxanec Jesús. Nataq'en 'ená'te da' 'uo da' 'adepecóxo da'me jaỹim necoñitáisec, sasoilégue so'me. Jaldáta da'me 'aneuána'uo da'me 'queténaxac ỹasouaxat da' n'aqtac 'me chiỹaqaỹi da' nec'alaxa, ñi'me Dios 'am lecochaxanaxanec qomle da' 'ad'añaxac. 9Ñi'me Dios 'me qo'mi lec'alaqtaqa, qataxa ỹiỹáxana da' qad'óiỹaxac, da' qaidi sanoqot. Dójo' qo'mi ỹ'eteque, da'me na'chi 'eeta't da' leenataxac. Sa 'te naquitá'a ga' qan'onataguec da' nó'in. 'Me ỹasouaxat da' qo'mi ỹauoteque, qá'a sóxote soqotaqáta'uo so' Cristo Jesús. Qataxa jalchi'ena da' qo'mi ỹauoteque joca'li maliaxa qaỹa jen' 'aléua. 10Qaláxasa ñi'me Dios naỹi 'en di'ỹoq da' liỹálaqtaxanaxac, 'me nachítac qa'en so' qadec'alaxaqui Jesucristo 'me doxotáxanec josii'chi da' l'añaxac da' neleuaxa, qataxa damaxasoxolégue da' qoỹ'axat da' n'aqtac 'me nec'alaxaqui. Naqaida 'me di'ỹoxom da' nec'alaxa 'me sa pal qoỹin.
11Ñi' Dios jaỹim ỹanaỹi da' l'aqtáxanaxanec da' s'axat da'me n'aqtac. Qataxa jaỹim ỹamaxalégue da' sapaxaguen na' sa judiopi. 12Chan'eesa 'uo da' ñi'queténaxac. Qaláxasa sa jaỹim 'te pecóxoic, qá'a jaỹim saỹáteeta so' huet'ot da'me ñaquitaxac. Qataxa saỹáteeta da' na'chiñi 'me ỹañoxot da' ỹilo'ogue qataxa netela da' jaỹim ỹipotan'ot, cha ỹivídaxat'a ga'me nolo' p'áteegue.
13'Oquetelco' da' ladic da' 'am sanem napaxaguenataxanaxac 'me 'eesa. Na'chi 'eeta't 'ouétaaue da' nip'iỹáxac qataxa da' nesóxodic 'me qo'mi qoỹanema, qá'a sóxote soqotaqáta'uo so' Cristo Jesús. 14'Antela'o' da' 'am ỹipotan'ot ñi' Dios da' 'aulo'ogue, 'am lecochiỹa so' Espíritu Santo 'me qo'mi huetaavlo.
15Sóxote da'me 'auaỹáteeta da' jaỹim cá'ai ỹima na' néta'ña di' 'aléua Asia, ỹalquéteuo so' Figelo qataxa so' Hermógenes. 16N'óota qomle ñi' Dios talégue qa'en da' lichoxodénataxanaxac na' l'acháqa' lé'ecpi so' Onesíforo, qá'a so'me qauáiỹaac da' jaỹim ỹ'añaqtet, qataxa sa jaỹim nepecoxolégue da' jaỹim qoỹicoñideta't. 17Jaldáta da' jaỹim nimitétaaque, cha ỹivíd'a da' jaỹim ỹisomalégue jénjo' Roma. 18N'óota qomle ñi'me qadesaliaxanec Dios lecochiỹa so'me ga'me nolo' p'áteegue, qataxa ỹaconeguet da' lichoxodénataxanaxac. 'Am sóxote 'auaỹáteeta so'me da' ỹátaqta jalcote da' lecochaxac, ca'li 'am ñáictapegue' na' Efeso.
Currently Selected:
2 Timoteo 1: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.
