1 Tesalonicenses 4
4
Da' lasoxoc da' n'óiỹaxac 'me ỹiỹamaxaden ñi' Dios
1Naỹi, 'ami qadaqáỹa', 'ami sedoxolóo'te da' lenaxat so' qadesaliaxanec Jesús da' 'ami saqataxalo da' 'oquiitelégue da' 'éeta da'me 'ami sapaxaguenaxaque n'óiỹaxac 'me ỹiỹamaxaden ñi' Dios. Naqaida qomle 'oquiit'ot da' 'anchíquiit'aguet.
2Qá'a 'ami sóxote da' 'auaỹáchiñii jen' naqátaxacpi 'me 'ami sanemáxama. Da'me sachiỹoxotoqot so' qadesaliaxanec Jesús. 3Qá'a da' 'éetapeec ñi'me Dios, sétaaque da' na'chiñíta ñi'me 'anañañiỹot. 'Ená'te da' 'uo ga' leuauátac jaga' sa loua da' 'oñíita. 4Ñi' 'oonolec siỹaxaua n'óota da' naỹáteetela't da' ỹa'uo jaga' ỹátaqta loua, qataxa netelela't, nataq'en netela jaga' loua. 5'Ená'te taa'le 'chi ỹiué'en jaga' ỹauo, ỹadénaxatetac jen'me siỹaxadipi 'me maliaxa sa ỹaateton ñi' Dios. 6'Ená'te da' 'uo ga' napacapeelégue qataxa ỹoqovínec ga' laqáỹa da'me dójo', qá'a so' qadesaliaxanec Jesús ỹátaqta sa nalóta qa'en da' ne'uaxánaguec ỹima jen' ỹ'étetac dójo'. Da'me sóxote da' 'ami sivitaxanaqátapeegueta. 7Qá'a ñi'me Dios qo'mi ỹiỹáxanalo da' ỹoqovíchiỹi qa'en da' qad'óiỹaxac. Chan'eesa 'ená'te da' qolaxague ga' ỹisepaxanaqtet da' qad'óiỹaxac. 8Chan'eesa ga' ỹ'otan dójo' napaxaguenataxanaxac, qana'chi ga'me sa ỹ'otan ga' 'chi siỹaxaua láso. Na'chidáta da' ỹ'otan ñi'me Dios, ñi'me qo'mi ỹanema so' Espíritu Santo.
9Da' lasoxoc da' qonsóxode'ne' ga' n'amaqténataxanaxaua, sa ỹiuen taa'le sidíñi, qá'a na'chiñi ñi' Dios 'me sóxote 'ami ỹapaxaguenque da' 'éeta qonsóxode'ne' ga' naqáỹa. 10Qá'a jalchi'ena da' 'ami 'adoqopichiiỹalo ỹima na' 'ad'amaqténataxanaxauaipi 'me néta'ña di' 'aléua Macedonia. Qaláxasa 'ami qadaqáỹa', 'ami ñachoxodénaqtoto da' 'oquiitelégue da'me da' 'anchíquiit'aguet. 11'Aupaquiỹápegue' da' qaỹa 'te 'uo da' 'oñíita. Ñi' 'oonolec mai'chi netelela't, qataxa mai'chi ỹacoolégue ga' l'onataxanaxac. Naqaida 'me saqátaqtapeelégue ca'li, 12qaidi na' te'me sa d'amaqténataxan, 'ónaxaic qa'en da' 'an'aqtaguiquii, qataxa qaidi qaỹa 'te ga' 'avíñiitaaque.
Da' l'iỹílaxasoxoc so' qadesaliaxanec Jesús
13'Ami qadaqáỹa', sa siỹamaxadénaq taa'le sa 'auaỹáchiñii ga' ladíquiaxac jen' sóxote qonmataxanéegue, qaidi qaỹa 'te ga' daquicótac, sa 'ená'am ga'me qaỹa 'te naquitaxac. 14Qá'a da' qo'mi sip'iỹáq'a so' Jesús da' ỹileu qataxa n'iỹílaxaseguem, qana'chi 'ena'ama qo'mi sip'iỹáq'a ñi' Dios da' nec'aliséguem qa'en jen' p'iỹá'a so' Jesús na' sóxote qonmataxanéegue da' qaidi napiỹasee'megue so'me.
15Chan'eesa dójo' s'axátaqtapeema 'ami, 'me l'aqtac so' qadesaliaxanec Jesús, da' qo'mi 'me maliaxa ñic'alaqátaiỹi qomle n'iỹílaq so'me, qana'chi sa 'te qo'mi dasolóo'te na' sóxote qonmataxanéegue. 16Qá'a 'eet'oi: So'me qadesaliaxanec Jesús qomle nenóchiiñi chiỹaqsée'ma di' piỹem, da' naquétaaue da' lichic ga' net'a, qataxa naquétaaue da' lesamaxa da' liỹáxanaxac ga' lasoxola' na' piỹem lé'ec Dios lamaxa'spi, qataxa jan' naseede qomle qodaseedaxalégue qa'en ñi' Dios. Qaama'le jen' ỹiléeta'ñi' da' l'amaqténataxanaxac so' Cristo, naqáina 'me 'uáiñi da' nec'aliséguem qomle. 17Ỹim, qaama'le qo'mi 'me maliaxa ñic'alaqátaiỹi, qo'mi qoỹacoosopa, qana'chi salegaxáaue jen'me, senotaxalégue ga' piỹem ló'oc da' qaidi ñauanáxai' so' qadesaliaxanec Jesús di' p'áseguem. Huá'a qomle, na'chi 'eeta't da' souqat'asop so'me. 18Chan'eesa ñi' 'oonolec da' 'oñíita lecochaxanaxanec ga' laqáỹa dójo' n'aqtac.
Currently Selected:
1 Tesalonicenses 4: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.