1 Tesalonicenses 3
3
1Chan'eesa ca'li sa qadalo'oguet da' qadidiáxa da' 'ami ñauanáxa'to, na'chi qadeenataxac da' ñidóqchiiñi da' sonaqá'ña di' noic Atenas. 2Qaama'le samaxasaxalo 'ami so' qadaqáỹa Timoteo. Qá'a so'me lamaxasec ñi' Dios qataxa qadecochaxaua da' s'axátaqtac da' 'ónaxaic qadipí'ic 'me ỹ'axat so' Cristo. Jeso'me ỹic'atalo 'ami da' qaidi 'ami neuaxaỹaxadíseguem qataxa ỹ'añaqtet da' 'adip'iỹáxaquii, 3qaidi qaỹa 'te ga' 'oonolec da' 'oñíita da' nacacáñi da' lip'iỹáxac ỹasouaxat da' 'queténaxac. Qá'a 'ami sóxote 'auaỹáchiñii da' na'chi qadadíquiaxac da' ñi'queténaxaỹi na'me 'queténaxacpi. 4Qá'a ca'li maliaxa 'ami souqátaavlo, qana'chi s'axátaqtapeema da' saxáaue ỹima jen' 'queténaxacpi. Chan'eesa ỹipaquíchiỹi ñauanáxai'. Da'me sóxote 'auaỹáchiñiitac. 5Chan'eesa jaỹim ca'li sa ñalo'oguet da' ỹeenataxac da' 'oñíita, qana'chi samaq so' Timoteo da' 'ami ỹachimaxatalo da' 'adip'iỹáxaquii. Qá'a sóxote 'uo da' ỹitelaxa da' 'uootaxa 'ami ỹoqovi'n so' piinaanataxanaxaic qadó'o, qana'chi qaỹa 'te náaue da' qad'onataxanaxac.
6Cana'le nóvi' so' Timoteo da' chiỹaqá'a di' Tesalónica, qana'chi qo'mi nividaxatalo da' 'ónaxaic qadipí'ic da' 'adip'iỹáxaquii qataxa da' 'adoqopi'chii. Qataxa qo'mi ỹ'axatema da' jalcote da' 'adeenataxaquii da' senqáta, qataxa 'uo da' 'adidiáxasoxoquii da' qo'mi 'anauañii'to. Qana'chi 'ená'am qo'mi nataq'en 'uo da' qadidiáxa da' 'ami ñauanáxa'to. 7Chan'eesa 'ami qadaqáỹa', temaqaidi da' qo'mi souqátanỹi ỹima jen' qadeuénaxanaxa qataxa na' qan'queténaxacpi, qaláxasa qo'mi máchidiñi canale saỹátenaq da' 'oñíita da' maliaxa 'oquiitalégue da' 'adip'iỹáxaquii. 8Qana'chi da'me 'ená'am da' ỹitaxa qo'mi nec'alaxatréegue canale saỹátenaq da' 'oñíita da' sa 'te 'axañíỹi so' qadesaliaxanec Jesús. 9Chan'eesa qaa'le, ¿jái'te 'éeta ga' senqát'ec da' sanemáxam ga' qantónaxac ñi'me souqat'ot qadet'a Dios ỹasouaxat da' 'oñíita, qataxa sa 'te lec'óxotolec da' ñitónaqtapeeque 'ami? 10Chan'eesa naua' noloqo'te qataxa naua' pi'ỹáxadi ñitamnaqatapecot ñi' Dios, qaidi qo'mi ỹanema da' 'ami ñauanáxa'to, qataxa 'ami ỹicocháxalo da' ỹátaqta nalóchiiñi da' 'adip'iỹáxaquii.
11Ñi' qadet'a Dios qataxa ñi' qadesaliaxanec Jesucristo 'ónaxaic da' mai'chi ỹoiquinaac ga' 'éeta da' qadadíquiaxac da' 'ami sec'ataxalo. 12Qataxa ñi'me qadesaliaxanec Jesús 'ónaxaic da' ñaxachiilo qataxa latet da' 'adoqopi'chii, qaidi 'ansóxodiñiỹa't qataxa 'avídaxachi'ỹa ỹima na' siỹaxadipi, 'ená'am qo'mi da' ỹátaqta 'ami qadoqopitalo. 13Qataxa 'ónaxaic da' 'ami lecochiỹalo ñi'me da' ỹ'añaqtet da' 'adeenataxaquii, qaidi 'anañañiỹot, qana'chi qaỹa 'te ga' 'adesamaxataxaquii huet'ot ñi' qadet'a Dios ga'me nolo' qomle n'iỹílaq so' qadesaliaxanec Jesús, da' náictapegue' ỹima na' lalémaxasetpi.
Currently Selected:
1 Tesalonicenses 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.