At Ṛuma 10
10
Amek i aɣ-ittarra Ameɣlal d iḥeqqiyen
1Ay atmaten, ayen i ttmenniɣ deg ul-iw, d leslak n wat Isṛail meṛṛa, acḥal i ssutreɣ deg Illu ɣef ddemma-nsen i wakken ad ttusellken. 2Axaṭer zemreɣ ad cehdeɣ fell-asen d akken sɛan leḥṛara ɣer Yillu, bɣan ad as-ɛeǧben, meɛna txuṣṣ-iten tmusni. 3Imi ur ḥsiben ara lḥeqq i d-ittasen sɣuṛ Yillu yerna ttnadin ad sbedden lḥeqq-nsen iman-nsen, ur ḍuɛen ara lḥeqq i d-ittasen sɣuṛ Yillu ; 4axaṭer lmeqsud n ṭawrat d Lmasiḥ, i wakken kra n win yumnen ad yuɣal d aḥeqqi.
5Atah wayen yura Musa ɣef lḥeqq i d-ittekken si ṭawrat : Amdan ara ixedmen ayen i d-tenna ṭawrat, ad yidir yis#10.5 Walit At Lawi 18.5 ; Luqa 10.28.. 6Lameɛna atah wamek ittmeslay lḥeqq i d-ittasen si liman : Ur qqar ara deg ul-inek anwa ara yalin ɣer igenni ; am akken tebɣiḍ ad d-tesserseḍ Lmasiḥ syenna. 7Neɣ anwa ara iṣubben ɣer laxeṛt#10.7 Walit Asmekti 30.12-13. ? Am akken ur d-iḥyi ara Lmasiḥ si gar lmeyytin. 8D acu yuran ihi ? Awal n Tudert atan ɣuṛ-k, deg imi-k d wul-ik#10.8 Walit Asmekti 30.14.. Awal-agi d awal n liman, d awal i nettbecciṛ. 9Ma tcehdeḍ s yimi-k d akken Yasuɛ d Ssid, ma tumneḍ deg ul-ik d akken isseḥya-t-id Yillu si gar lmeyytin, atan ad tettusellkeḍ. 10Axaṭer ma tumneḍ seg ul, Illu ad ak-iḥseb d aḥeqqi ; ma tcehdeḍ s yimi-k ad tettusellkeḍ. 11Akken i t-id-nnant Tira Iqedsen : Kra win yumnen s yis werjin ad inneḥcim#10.11 Walit Ihellilen 25.3..
12Ihi ulac lxilaf gar wat Isṛail akked wid ur nelli ara n wat Isṛail ; yiwen n Ṛebbi akk i sɛan, netta i d-ittaken mebla ceḥḥa i wid akk ineddhen ɣuṛ-s. 13Axaṭer yura : Kra win ara yedɛun s yisem n Umeɣlal ad ittusellek#10.13 Walit Yuwil 3.5..
14Amek ara dɛun ɣuṛ-s ma ur uminen ara s yis ? Amek ara amnen ma ur slin ara s yis ? Amek daɣen ara slen s yis ma ulac win i sen-ihedṛen fell-as ? 15Amek ara yilin wid ara d-ihedṛen fell-as ma ur ttuceggɛen ara ? Akken yura di Tira Iqedsen :
Acḥal yelha mi ara nwali
teddun-d ɣuṛ-neɣ wid ittbecciṛen Lexbeṛ n Lxir # 10.15 Walit
Icaɛya 52.7. .
16Lameɛna ur qbilen ara meṛṛa Lexbeṛ-agi n Lxir. Nnbi Icaɛya yenna daɣen : Ay Ameɣlal, anwa i yumnen s wayen i nberreḥ#10.16 Walit Icaɛya 53.1. ? 17S wakka liman ittas-d seg wayen i nsell, ayen yeɛnan awal n Lmasiḥ.
18Lameɛna ad d-iniɣ : Ɛni ur slin ara ? Xaṭi slan ! Yura :
Ṣṣut-nsen inuda ddunit meṛṛa,
lehduṛ-nsen wwḍen ɣer yixfawen n ddunit.
19Meɛna ad d-iniɣ : Ɛni ur ẓrin ara wat Isṛail ? Lameɛna d Musa i d-ixebbṛen d amezwaru sɣuṛ Yillu mi d-yenna :
Ad wen-d-ssekreɣ tismin ɣef win ur nelli ara d agdud ;
ad kkun-id-yas wurrif ɣef wegdud ur nesɛi lefhama # 10.19 Walit
Asmekti 32.21. .
20Nnbi Icaɛya yessaweḍ armi yenna :
Ufan-iyi wid ur nennuda ara fell-i,
sbeggneɣ-d iman-iw i wid ur nqelleb ara ad iyi-issinen # 10.20 Walit
Icaɛya 65.1. .
21Meɛna ɣef wat Isṛail yenna :
Ḍelqeɣ ifassen-iw ṭul n wass,
ɣer wegdud i yi-ixulfen, i yi-iɛuṣan # 10.21 Walit
Icaɛya 65.2. .
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.