Matta 6
6
Aselmed ɣef ssadaqa
1Ayen txeddmem i Yillu, ur t-id-sbegginet ara i wakken ad kkun-walin medden, ma ulac ur tseɛɛum ara lfayda ɣer Baba-twen yellan deg igenwan.
2Mi ara tseddqeḍ, ur ttberriḥ ara am akken xeddmen at sin wudmawen di leǧwameɛ neɣ deg iberdan, i wakken ad sɛun ccan ɣer yimdanen. Ad wen-iniɣ tidett : D ayagi kan i d lfayda-nsen. 3Ma d kečč mi ara tseddqeḍ, ilaq afus-ik ayeffus ur ittwali ara wayen ixeddem ufus-ik azelmaḍ, 4i wakken ssadaqa-inek ad teqqim di sser ; dɣa Baba-k yettwalin ayen txeddmeḍ di sser, ad ak-d-iqbel.
Aselmed ɣef tẓallit
(Lq 11.2-4)
5Mi ara tettẓallam, ur xeddmet ara am at sin wudmawen iḥemmlen ad ẓẓallen s ibeddi di leǧwameɛ neɣ deg iberdan i wakken ad ten-walin medden. Ad wen-iniɣ tidett : D ayagi kan i d lfayda-nsen. 6Ma d kečč mi ara tebɣuḍ ad teẓẓalleḍ, ṛuḥ kcem ɣer texxamt-ik, sekkeṛ tawwurt, tedɛuḍ di sser ɣer Baba-k, netta yettwalin ayen yellan di sser, ad ak-d-iqbel.
7Mi ara tettẓallam, ur sṭuqqutet ara lehduṛ am akken xeddmen leǧnas ur numin ara, ɣilen s lketṛa n imeslayen ara d-ttwiqeblen. 8Ur ten-ttɛanadet ara, axaṭer Baba-twen yeẓra d acu i teḥwaǧem uqbel ad as-t-tessutrem. 9Atah wamek ilaq ad tettẓallam :
A Baba-tneɣ yellan deg igenwan,
10ad ittwiqeddes yisem-ik,
ad d-tas tageldit-ik,
ad iḍru lebɣi-k di lqaɛa akken iḍra deg igenwan.
11Efk-aɣ-d mkul ass tamɛict-nneɣ.
12Semmeḥ-aɣ ddnubat-nneɣ akken i nettsamaḥ i wid i aɣ-iḍelmen.
13Ssebɛed fell-aɣ ajeṛṛeb, sellek-aɣ si tḥila n cciṭan.
Axaṭer ɣuṛ-k i tella tgeldit,
tazmert d tmanegt i dayem. Amin !
14Ma tettsamaḥem i yimdanen i wen-ixeddmen cceṛ, Baba-twen yellan deg igenwan ad wen-isameḥ ula i kunwi. 15Lameɛna ma yella kunwi ur tettsamaḥem ara i wiyaḍ, atan Baba-twen ur wen-ittsamaḥ ara ula i kunwi ddnubat-nwen.
Aselmed ɣef uẓummu
16Asmi ara tuẓamem, ur d-tesbegginet ara iman-nwen tḥeznem am at sin wudmawen issexsaṛen udmawen-nsen i wakken ad walin yimdanen d akken uẓamen. Ad wen-iniɣ tidett : D ayagi kan i d lfayda-nsen. 17Ma d kečč, mi ara tuẓumeḍ, ssired udem-ik, tdehneḍ aqerruy-ik s rriḥa, 18i wakken ur d-ttbeggineḍ ara i medden d akken tuẓameḍ, meɛna i Baba-k kan yellan di sser ; dɣa, Baba-k yettwalin ayen yellan d lbaḍna ad ak-d-iqbel.
Agerruj n ṣṣeḥ
(Lq 12.33-34)
19Ur ssexzanet ara igerrujen di ddunit anda ara ten-ičč ubeɛɛuc d ṣṣdid, anda ara ten-akren wid ifettken leḥyuḍ. 20Meɛna xeznet axir igerrujen deg igenwan anda ur llin ibeɛɛac d ṣṣdid isserkuyen, anda ur zmiren ara imakaren ad fetken neɣ ad akren. 21Axaṭer anda yella ugerruj-ik, dinna ara yili wul-ik.
22Allen, d tiftilin n tfekka, ma ṣeḥḥant wallen-ik, ad tiliḍ s lekmal-ik di tafat. 23Lameɛna, ma ur ṣeḥḥant ara wallen-ik, ad tiliḍ di ṭṭlam. Acḥal ihi berrik ṭṭlam i deg telliḍ ma yella tafat yellan deg-k d ṭṭlam. 24Ur izmir yiwen ad iqdec ɣef sin imɛellmen deg yiwet n tikkelt. Ma iḥemmel yiwen, ad ikṛeh wayeḍ ; ma yeṭṭef deg yiwen, ad iḥqeṛ wayeḍ. Ur tezmirem ara ihi ad tɛebdem Illu akked idrimen !
Anezgum
(Lq 12.22-31)
25Ɣef wayagi i wen-qqareɣ ur ttḥebbiṛet ara i tudert-nwen ɣef wayen ara teččem, la i tfekka-nwen ɣef wayen ara telsem ; ɛni tudert ur tif ara lqut, tafekka daɣen ur tif ara llebsa ? 26Walit ifṛax deg igenwan, ur zerrɛen, ur meggren, ur jemmɛen acemma ɣer ikufan, yerna Baba-twen n igenwan ittɛeggic-iten. Ɛni ur teswim ara akteṛ-nsen ? 27Anwa deg-wen i izemren s usnuzgem ad issiɣzef leɛmeṛ-is ula s yiwen n wass ? 28Ayɣer i tettḥebbiṛem ɣef llebsa ? Walit amek gemmun ijeǧǧigen n tmizar : Ur ttneɛtaben ur ẓeṭṭen ; 29meɛna ad wen-iniɣ : Ula d agellid Sliman s yiman-is di ccan-is, ur yelsi am yiwen deg-sen. 30Ma yella Illu islusuy akka leḥcic yellan ass-agi di tmizar, azekka ad ittuḍegger ɣer tmes, amek ur kkun-islusuy ara kunwi, ay imdanen ixuṣṣen di liman ? 31Ur snuzgumet ara ihi, ad teqqarem : Acu ara nečč ? Neɣ : Acu ara nsew ? Neɣ acu ara nels ? 32Axaṭer d leǧnas ur numin ara, i yettqelliben ɣef wayagi. Baba-twen n igenwan yeẓra d akken teḥwaǧem ayenni. 33Nadit uqbel tagelda-s d teɣdemt-is, ayagi akk ad wen-d-ittunefk d zzyada. 34Ur ttḥebbiṛet i uzekka axaṭer azekka ad isnuzgem ɣef yiman-is ; yal ass ddeqs-is leɛtab-is.
Currently Selected:
Matta 6: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.