Matta 7
7
Ur ttḥasabet ara
(Lq 6.37-38, 41-42)
1Ur ttḥasabet ara i wakken ur tettuḥasabem ara. 2Akken i tettḥasabem ara tettwaḥasbem. Ad wen-d-ittwiktil s lkil s wayes i tettektilim. 3Acuɣer i tettmuquleḍ axeclaw yellan di tiṭ n gma-k, kečč ur nettwali ara tigejdit yellan di tiṭ-ik ? 4Amek ara tiniḍ i gma-k : Eǧǧ-iyi ad kkseɣ axeclaw-nni yellan di tiṭ-ik, kečč yesɛan tigejdit di tiṭ-ik ? 5A bu sin wudmawen ! Kkes uqbel tigejdit yellan di tiṭ-ik, imiren ad twaliḍ amek ara d-tekkseḍ axeclaw yellan di tiṭ n gma-k.
6Ur ttaket ara ayen iṣfan i yeqjan, ma ulac ad d-zzin fell-awen ad kkun-gezzren ; ur ḍeggiret ara tiɛeqcin ɣlayen zdat yilfan, ma ulac ad tent-rekḍen.
7Ssutret, ad wen-d-ittunefk ! Nadit, ad tafem ! Sqeṛbebet, ad wen-d-ldin ! 8Axaṭer kra n win ara issutren, ad as-d-ittunefk ! Win ittnadin, ad yaf ! Ad as-d-teldi tewwurt i win ara isṭebṭben. 9Anwa deg-wen ara yefken adɣaɣ i mmi-s ma yessuter-as-d aɣṛum ? 10Neɣ, anwa deg-wen ara yefken azrem i mmi-s ma yessuter-as-d aslem ? 11Ma yella kunwi yellan d imcumen tessnem ad tefkem ayen ilhan i warraw-nwen, amek Baba-twen yellan deg igenwan ur d-ittak ara ayen ilhan i wid ara as-t-issutren ?
12Ihi, xedmet i wiyaḍ ayen i tebɣam ad wen-t-xedmen i kunwi, axaṭer akka i aɣ-d-iweṣṣa usaḍuf akked idlisen n lanbiya.
Sin iberdan
(Lq 13.24)
13Kecmet si tewwurt iḍeyqen ! Axaṭer acḥal tewseɛ tewwurt, acḥal ishel webrid ittawin ɣer nnger, yerna aṭas i yettɛeddayen syenna. 14Meɛna acḥal teḍyeq tewwurt, acḥal iwɛeṛ webrid ittawin ɣer tudert yerna drus i yettɛeddayen syenna.
Ttejṛa tettwaɛqal s lfakya-s
(Lq 6.43-44)
15Ḥadret iman-nwen si lanbiya n lekdeb ! Ttasen-d ɣuṛ-wen am izamaren, nutni ɣer daxel d uccanen. 16Ad ten-tɛeqlem s lecɣal-nsen. Ur d-nttekkes ara tiẓurin seg inijjel, neɣ lexṛif seg isennanen. 17Ttejṛa yelhan, tettak-d lfakya yelhan, yir ttejṛa tettak-d lfakya n diri. 18Ttejṛa yelhan ur tezmir ara ad d-tefk yir lfakya, akken daɣen yir ttejṛa ur tezmir ara ad d-tefk lfakya yelhan. 19Yal ttejṛa ur d-nettak ara lfakya lɛali ad tettwigzem, ad tettwiḍegger ɣer tmes. 20S wakka, s lecɣal-nsen ara tɛeqlem lanbiya n lekdeb.
21Mačči d wid kan i yi-d-iqqaren : A sidi, a sidi ara ikecmen ɣer tgelda n igenwan, meɛna d wid ixeddmen lebɣi n Baba yellan deg igenwan. 22Aṭas ara iyi-d-yinin ass n lḥisab : A sidi a sidi, s yisem-ik i nbecceṛ imeslayen sɣuṛ Ṛebbi, s yisem-ik i nessufeɣ leǧnun, s yisem-ik i nexdem aṭas n lbeṛhanat ! 23Dɣa ad sen-d-rreɣ : Beɛdet akkin fell-i a wid ixeddmen cceṛ, ur kkun-ssineɣ ara !
Lebni iṣeḥḥan
(Lq 6.47-49)
24Akka, s kra n win ismeḥsisen i wawal-iw yerna ixeddem-it, ittemcabi ɣer wemdan aɛeqli yebnan lsas n wexxam-is ɣef weẓru. 25Ageffur (lehwa) iɣli-d, isaffen ḥemlen-d, aḍu ihubb-d ɣef wexxam-nni, meɛna ur iɣli ara, axaṭer lsas-is ires ɣef weẓru. 26Ma d win ismeḥsisen i wawal-iw, ur nxeddem ara ayen i d-qqareɣ, icuba ɣer wemdan ur nettxemmim ara, i yebnan axxam-is ɣef ṛṛmel ; 27iɣli-d ugeffur, ḥemlen-d isaffen, ihubb-d waḍu ɣef wexxam-nni, imiren iɣli. Lexṣara-s d tameqqrant !
28Mi ifukk Yasuɛ aselmed, lɣaci akk wehmen deg imeslayen-ines, 29axaṭer isselmad-iten s tissas, mačči am imusnawen-nsen.
Currently Selected:
Matta 7: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.