Matta 5
5
Aselmed deg udrar
(Lq 6.20-26)
1Mi iwala Yasuɛ annect-nni n lɣaci, yuli ɣer wedrar iqqim. Inelmaden-is qeṛṛben ɣuṛ-s, 2dɣa ibda isselmad-iten :
3D iseɛdiyen wid itteddun s neyya, axaṭer tagelda n igenwan d ayla-nsen !
4D iseɛdiyen wid ittrun, axaṭer ad ttwaṣebbren !
5D iseɛdiyen wid ḥninen, axaṭer ad weṛten tamurt !
6D iseɛdiyen wid illuẓen, iffuden lḥeqq, axaṭer ad ṛwun !
7D iseɛdiyen wid yesɛan ṛṛeḥma deg wulawen-nsen, axaṭer ad sen-d-tettunefk ṛṛeḥma !
8D iseɛdiyen wid iwumi yeṣfa wul, axaṭer ad walin Illu !
9D iseɛdiyen wid i d-isrusun talwit, ad ttusemmin d arraw n Yillu !
10D iseɛdiyen wid ittuqehṛen ɣef lḥeqq, axaṭer tagelda n igenwan d ayla-nsen !
11D iseɛdiyen ara tilim, mi ara kkun-regmen, mi ara tettwiqehṛem, mi ara xedmen deg-wen lbaṭel ɣef ddemma-w. 12Feṛḥet, ilit di lfeṛḥ, axaṭer ṛṛezq-nwen d ameqqran deg igenwan, akka i ttwaqehṛen lanbiya i kkun-izwaren.
Lmelḥ akked tafat n ddunit
(Mq 9.50; Lq 14.34-35)
13D kunwi i d lmelḥ n ddunit, lameɛna lmelḥ ma tṛuḥ-as temleḥ, s wacu ara as-d-nerr temleḥ-ines ? Ilha kan ma nḍegger-it ɣer beṛṛa ad t-rekkḍen yimdanen. 14D kunwi i d tafat n ddunit ; taddart yellan ɣef udrar ulamek ara teffer ! 15Akken daɣen, ur nceɛɛel ara taftilt i wakken ad tt-nɣumm s kra, meɛna ad tt-nessers ɣef lmeṣbeḥ, i wakken ad tfeǧǧeǧ i wid akk yellan deg wexxam. 16Akka i ilaq ad tecceɛceɛ tafat-nwen zdat n yimdanen, i wakken ad walin lecɣal-nwen ilhan, yerna ad ḥemden Baba-twen yellan deg igenwan.
Aselmed ɣef wayen iɛnan ṭawrat
17Ɣuṛ-wat ad tɣilem usiɣ-d ad rẓeɣ ṭawrat neɣ ayen i d-nnan lanbiya ! Ur d-usiɣ ara ad rẓeɣ, lameɛna usiɣ-d ad snekmaleɣ. 18Ad wen-iniɣ tidett : Skud mazal igenwan d lqaɛa, ula d yiwen wawal neɣ usekkil n ṭawrat ur imeḥḥu, alamma yeḍra kullec. 19Ihi win ara iɛaṣin ula d yiwen si lumuṛat-agi imecṭuḥen, yerna isselmad i wiyaḍ ad xedmen am netta, ad ittwiḥseb d amecṭuḥ akk di tgelda n igenwan. Ma win ara ten-iḍuɛen yerna isselmad i wiyaḍ ad xedmen akken, ad yili d ameqqran di tgelda n igenwan. 20Axaṭer ad wen-iniɣ, ma ur tuɣem ara awal i Yillu kteṛ n wakken i as-ttaɣen awal yimusnawen n ṭawrat d ifariziyen, ur tkeččmem ara tagelda n igenwan.
Imenɣi d wurrif
21Teslam daɣen s wayen nnan i lejdud-nneɣ : Ur tneqqeḍ ara timegṛeṭ, win ara yenɣen timegṛeṭ, ad iɛeddi di ccṛeɛ, ad ittwiḥkem fell-as. 22Ma d nekk ad wen-iniɣ : Kra n win ara izeɛfen ɣef gma-s, ad iɛeddi di ccṛeɛ. Win ara yinin i gma-s : Ay abuhal, ad ibedd zdat n useqqamu n ccṛeɛ. Win ara yinin i gma-s : Ay amehbul, yuklal ad ikcem ɣer ǧahennama. 23Mi ara tettedduḍ ad tefkeḍ lweɛda-inek ɣef udebder n iseflawen i Yillu, dɣa dinna temmektaḍ-d d akken gma-k iṭṭef-ak cceḥna, 24eǧǧ dinna lweɛda-inek, ṛuḥ uqbel ad temṣalaḥeḍ akked gma-k, imiren uɣal-d ad tefkeḍ lweɛda-k i Yillu. 25Ɣiwel msalaḥ d wexṣim-ik skud mazal-ik yid-s deg ubrid, ma ulac axṣim-ik ad ak-yawi ɣer lḥakem, lḥakem ad ak-ifk i uɛessas, dɣa ad tettuḍegreḍ ɣer lḥebs. 26Ad ak-iniɣ tidett : Ur d-tteffɣeḍ ara syenna alamma txellṣeḍ aṣurdi aneggaru n ṭṭlaba-inek.
Ɣef wayen yeɛnan zzna
27Teslam d akken qqaren-d : Ur xeddem ara asekkak yeɛni zzna. 28Lameɛna, nekkini ad wen-d-iniɣ : Win ara imuqlen tameṭṭut, imenna deg ul-is ad iznu yid-s, atan am akken izna yid-s. 29Daymi ma yella d tiṭ-ik tayeffust i ak-ittawin ɣer leḥṛam, qleɛ-itt, ḍegger-itt akkin fell-ak. Axaṭer axir-ak ad ak-iṛuḥ yiwen seg iselqam-ik wala ad tkecmeḍ s lekmal-ik ɣer ǧahennama. 30Ma yella s ufus-ik ayeffus i txeddmeḍ leḥṛam, gzem-it, tḍeggreḍ-t akkin fell-ak, axir-ak ad ak-ixaṣṣ ufus wala ma tkecmeḍ s lekmal-ik ɣer ǧahennama.
31Qqaren-d daɣen : Win ara yebrun i tmeṭṭut-is, ad as-ifk lkaɣeḍ n berru. 32Lameɛna nekkini ad wen-iniɣ : Win ara yebrun i tmeṭṭut-is, yili ur tezni ara, d netta i tt-iwellhen ɣer zzna ma tezweǧ d wayeḍ. Daɣen win yuɣen tameṭṭut innebran, ula d netta izna.
33Teslam daɣen s wayen i d-nnan i lejdud-nneɣ : Ur ḥennet ara, lameɛna ayen i tɛuhdeḍ s limin zdat n Umeɣlal, ilaq ad t-txedmeḍ. 34Meɛna nekk ad wen-iniɣ : Ur ttgallat ara maḍi ! Ur ttgallat s igenni, axaṭer d akersi n tgeldit n Yillu, 35ur ttgallat s lqaɛa axaṭer d takeddart n yiḍarren-is, neɣ s Urucalim imi d tamdint n ugellid ameqqran. 36Ur ttgallat ara daɣen s yixef-nwen axaṭer ur tezmirem ara ad terrem ula d yiwen wenẓad d aberkan neɣ d amellal. 37Init ih ma ilaq ad tinim ih, neɣ xaṭi ma ilaq ad tinim xaṭi ; ayen akk ara ternum d zzyada, sɣuṛ cciṭan i d-ittas.
Aselmed ɣef ttaṛ
(Lq 6.29-30)
38Teslam s wayen i d-qqaren : Tiṭ s tiṭ, tuɣmest s tuɣmest. 39Meɛna nekk ad wen-iniɣ : Ma yella win i wen-ixedmen cceṛ ur ttarrat ara ttaṛ. Ma iwwet-ik yiwen ɣer lḥenk ayeffus, sken-as lḥenk nniḍen. 40Ma yebɣa yiwen ad ak-issiweḍ ɣer ccṛeɛ i wakken ad ak-ikkes aqenduṛ-ik, rnu-yas ula d abeṛnus-ik. 41Ma iḥreṣ-ik walbaɛḍ ad as-tbibbeḍ taɛekkumt azgen webrid-is, kečč awi-yas-tt armi d axxam. 42Efk-as ayen iḥwaǧ i win i ak-d-issutren, ur reggel ara ɣef win ibɣan ad irḍel sɣuṛ-k.
Ḥemmel iɛdawen-ik
(Lq 6.27-28, 32-36)
43Teslam i wayen i d-qqaren : Ḥemmel ameddakel-ik, tkeṛheḍ aɛdaw ik#5.43 Walit At Lawi 19.18.. 44Nekk ad wen-iniɣ : Ḥemmlet iɛdawen-nwen i kkun-ittqehhiṛen. Barket wid i kkun-ineɛlen, xedmet lxir i wid i kkun-ikeṛhen, dɛut s lxir i wid i kkun-iḍelmen akked wid i kkun-ittqehhiṛen. 45S wakka ara d-tbanem d arraw n Baba-twen yellan deg igenwan, axaṭer netta icṛeq-d iṭij-is ama ɣef wid ilhan ama ɣef yemcumen, isseɣlay-d ageffur ama ɣef wid ixeddmen lxir neɣ ɣef wid ixeddmen cceṛ. 46Ma tḥemmlem kan wid i kkun-iḥemmlen, d acu n lfayda ara tesɛum ? Ula d imekkasen n tebzert xeddmen am kunwi. 47Ma yella ɣef watmaten-nwen kan i tettsellimem, d acu n lxir i txedmem ? Ula d imekkasen n tebzert xeddmen akken. 48Ṣfut ihi akken iṣfa Baba-twen n igenwan#5.48 Walit Asmekti 18.13..
Currently Selected:
Matta 5: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.