Matta 18
18
Anwa i d ameqqran deg igenwan ?
(Mq 9.33-50; Lq 9.46-50)
1Di lweqt-nni, inelmaden n Yasuɛ qeṛṛben ɣuṛ-s nnan-as : Anwa i d ameqqran di tgelda n igenwan ? 2Yasuɛ issawel i yiwen weqcic isbedd-it di tlemmast-nsen, yenna : 3Ad wen-d-iniɣ tidett ; ma ur d-tuɣalem ara ɣer webrid, ma ur teqbilem ara ad tilim am arrac imecṭuḥen, ur tkeččmem ara ɣer tgelda n igenwan ! 4Daymi, win ara yessimẓin iman-is am weqcic-agi amecṭuḥ, d netta ara yilin d ameqqran di tgelda n igenwan. 5Kra win ara yestṛeḥben s weqcic am wagi ɣef ddemma n yisem-iw, yis-i i yesteṛḥeb. 6Win ara yesseɣlin di ddnub ula d yiwen seg imecṭuḥen-agi yumnen yis-i, axir-as ad as-cudden aɣaṛef n tsirt ɣer temgeṛṭ-is, ad t-ḍeggren ɣer yilel ad iɣṛeq.
7A tawaɣit n ddunit-a, imi qwant tsebbiwin n tuccḍa ! Axaṭer tisebbiwin n tuccḍa ulamek ur d-ttilint ara. Meɛna a nnger n win ara yilin d sebba-nsent. 8Ma yella d afus-ik neɣ d aḍar-ik ara ak-isseɣlin di ddnub, gzem-iten, ḍegger-iten akkin fell-ak, axir-ak ad tiliḍ di ddunit d aɛiban wala ad tesɛuḍ sin iḍarren neɣ sin ifassen, ad tettwiḍeggreḍ ɣer tmes ur nxessi. 9Ma yella daɣen d tiṭ-ik ara ak-yawin ɣer ddnub, qleɛ-itt ḍegger-itt akkin fell-ak ; axir-ik ad tiliḍ di ddunit s yiwet n tiṭ wala ad tesɛuḍ snat wallen, ad tettwiḍeggreḍ ɣer tmes n ǧahennama.
10Ɣuṛ-wat ad tḥeqṛem yiwen seg imecṭuḥen-agi axaṭer aql-i nniɣ-awen : Lmalayek-nsen deg igenwan, zgan daymen zdat n Baba yellan deg igenwan. 11[Axaṭer Mmi-s n wemdan yusa-d ad isellek wid iḍaɛen#18.11 Tira-agi xuṣṣent di kra n yeḍrisen iqdimen.!]
Tixsi iḍaɛen
(Lq 15.3-7)
12D acu twalam ? Ma yella win yesɛan meyya n wulli dɣa teɛṛeq-as yiwet deg-sent, ur ittaǧǧa ara ttesɛa uttesɛin-nni nniḍen di lexla i wakken ad d-inadi ɣef tin i as-iɛeṛqen ? 13Ad wen-iniɣ tidett : Ma yufa-tt, ad ifṛeḥ s yis akteṛ n ttesɛa uttesɛin-nni nniḍen ur neɛṛiq ara. 14Akken daɣen Baba-twen yellan deg igenwan, ur ibɣi ara ad as-iṛuḥ ula d yiwen seg imecṭuḥen-agi.
Err-d gma-k ɣer webrid
15Ma twalaḍ gma-k idneb, ṛuḥ ṭṭef-it weḥd-s, nhu-t. Ma yuɣ-ak awal, atan trebḥeḍ-d gma-k ! 16Meɛna ma igguma ad ak-d-isel, awi yiwen neɣ sin yimdanen yid-k, i wakken ad tefru temsalt ɣef cchada n sin neɣ tlata inagan#18.16 Walit Asmekti 19.15.. 17Ma yugi ad sen-isel, init i tmezdayt, ma ur iḥess ara ula i tmezdayt, ḥseb-it am akken d akafriw neɣ d amekkas n tebzert ! 18Ad wen-iniɣ tidett : Ayen akk ara teqqnem di lqaɛa ad ittwiqqen deg igenwan, ayen akk ara tserrḥem di lqaɛa ad ittwiserreḥ deg igenwan.
19Ad wen-iniɣ daɣen s tidett : Ma yella sin seg-wen dduklen i wakken ad ssutren kra di tẓallit i Baba yellan deg igenwan, ad sen-t-id-ifk. 20Axaṭer anda ara dduklen sin neɣ tlata s yisem-iw, ad ḥeḍreɣ gar-asen !
21Imiren Buṭrus iqeṛṛeb ɣuṛ-s yenna-yas : A sidi, acḥal n tikkal i ilaq ad semmḥeɣ i gma ma yeḍlem-iyi, armi d sebɛa n tikkal ? Yasuɛ yerra-yas : 22Xaṭi ! Ur ak-d-nniɣ ara alamma d sebɛa n tikkal, meɛna alamma d sebɛin iberdan sebɛa n tikkal !
Sin iqeddacen yesɛan ṭṭlaba
23Daymi, tagelda n igenwan tettemcabi ɣer yiwen ugellid yebɣan ad imḥasab netta d iqeddacen-is. 24Akken yebda leḥsab, wwin-as-d yiwen uqeddac iwumi yettalas imelyunen. 25Imi ur isɛi ara s wacu ara ixelleṣ, agellid-nni ifka lameṛ ad ten-zzenzen d aklan s netta s tmeṭṭut-is, s warraw-is d wayen akk yesɛa, i wakken ad ixelleṣ ṭṭlaba-ines. 26Aqeddac-nni yeɣli ɣer iḍarren n ugellid, iḥellel-it yenna-yas : A sidi, ṣber kra wussan, ad uɣaleɣ ad ak-xellṣeɣ ayen akk i yi-tettalaseḍ. 27Imi i t-iɣaḍ aṭas, agellid-nni isumeḥ-as ṭṭlaba-ines iserreḥ-as ad iṛuḥ. 28Akken kan i d-iffeɣ uqeddac-nni immuger-d yiwen seg imeddukal-is ixeddmen yid-s, iwumi yettalas meyya n iṣurdiyen#18.28 Yiwen uṣurdi yella d lexlaṣ n yiwen wass n uxeddim n ufellaḥ di lawan n iṛumaniyen.. Ikker ɣuṛ-s iṭṭef-it si temgeṛṭ iqqar-as : Err-iyi-d ayen i ak-ttalaseɣ ! 29Ameddakel-is iɣli ɣer iḍarren-is iḥellel-it, yenna-yas : Ṣber kra n wussan, ad uɣaleɣ ad ak-xellṣeɣ ! 30Lameɛna ur iqbil ara ad iṣber, irra-t ɣer lḥebs, alamma tettwixelleṣ ṭṭlaba-ines. 31Iqeddacen nniḍen mi walan ayen yeḍran, iɣaḍ-iten lḥal, dɣa ṛuḥen ssawḍen lexbeṛ i ugellid. 32Agellid iceggeɛ ɣer uqeddac-nni akken ad d-yas, dɣa yenna-yas : A yir amdan ! Mi tettḥellileḍ deg-i, ɛni ur ak-sumḥeɣ ara akk ṭṭlaba-inek ? 33Acuɣer ihi ur as-tsumḥeḍ ara i umeddakel-ik akken i ak-sumḥeɣ nekkini ? 34Agellid-nni izɛef aṭas, yerra aqeddac-nni ɣer lḥebs, i wakken ad inɛettab alamma tettwaxelleṣ ṭṭlaba-ines. 35Akken daɣen ara wen-ixdem Baba yellan deg igenwan, ma ur tettsamaḥem ara i watmaten-nwen seg ul.
Currently Selected:
Matta 18: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.