Matta 19
19
Aselmed ɣef berru
(Mq 10.1-12; Mt 5.31-32)
1Mi yekfa lewṣayat-agi, iṛuḥ Yasuɛ si tmurt n Jlili ɣer tmurt n Yahuda di lejwahi n wasif n Urdun. 2Aṭas n lɣaci i t-iḍefren ɣer dinna, dɣa isseḥla wid akk ihelken.
3Kra ifariziyen qeṛṛben ɣuṛ-s i wakken ad t-jeṛṛben, nnan-as : Ɛni yettusemmeḥ i wergaz ad ibru i tmeṭṭut-is ɣef yal sebba yellan ? 4Yerra-yasen : Ur teɣṛim ara ayen yellan di tira : Di tazwara, ixleq-d Yillu argaz d tmeṭṭut#19.4 Walit Amezruy n talsa1.27 ; 2.21-22., 5yenna-d : Argaz ad iǧǧ baba-s d yemma-s, i wakken ad iɛic netta d tmeṭṭut-is, dɣa di sin yid-sen, ad uɣalen d yiwen#19.5 Walit Amezruy n talsa2.24.. 6S wakka ur llin ara d sin, meɛna uɣalen d yiwen. Ur as-ilaq ara ihi i wemdan ad ifṛeq ayen isdukkel Yillu ! 7Nnan-as : Acuɣer ihi i aɣ-d-iǧǧa Musa lqanun i d-iqqaren : Mi ara yebru wergaz i tmeṭṭut-is, ad as-ifk leɛqed n berru#19.7 Walit Asmekti 24.1-4. ? 8Yasuɛ yerra-yasen : Ɣef ddemma n wulawen-nwen yeqquren i wen-iserreḥ nnbi Musa ad tebrum i tilawin-nwen. Meɛna di tazwara mačči akka i yella lḥal. 9Ma d nekk ad wen-d-iniɣ : Kra n win ara yebrun i tmeṭṭut-is yili ur tezni ara, i wakken ad yaɣ tayeḍ, d netta i yeznan !
10Inelmaden nnan-as : Ma yella akka i d lḥala n wergaz ɣer tmeṭṭut, ulac lfayda di zzwaǧ ! 11Yasuɛ yerra-yasen : Mačči imdanen meṛṛa i izemren ad qeblen aselmed-agi lameɛna anagar wid iwumi i d-ifka Yillu lefhama i izemren ad qeblen annect-agi. 12Aṭas n sebbat i iqeḍɛen zzwaǧ i wemdan. Llan wid i d-ilulen d imhalen#19.12 Walit 2 Igelliden 9.32 akked tezmilt. si tɛebbuṭ n yemma-tsen, wiyaḍ uɣalen d imhalen s ufus n imdanen, llan daɣen wid i yerran iman-nsen d imhalen ɣef ddemma n tgelda n igenwan. Win i izemren ad ifhem aselmed-agi ifhem-it !
Arrac imecṭuḥen
(Mq 10.13-16; Lq 18.15-17)
13Kra n imdanen ttawin-d i Yasuɛ arrac imecṭaḥ i wakken ad issers afus-is fell-asen ad ten-ibarek, meɛna inelmaden-is ttarran-ten. 14Yasuɛ yenna-yasen : Anfet-asen i warrac ad d-asen ɣuṛ-i, ur sen-qeṭṭɛet ara abrid, axaṭer tagelda n igenwan thegga i nutni akked wid yellan am nutni ! 15Issers afus-is fell-asen, iburek-iten, dɣa iṛuḥ syenna.
Ilemẓi ameṛkanti
(Mq 10.17-31; Lq 18.18-30)
16Imiren yiwen wergaz iqeṛṛeb ɣer Yasuɛ, yenna-yas : A sidi, d acu i yi-ilaqen ad t-xedmeɣ n wayen yelhan i wakken ad sɛuɣ tudert n dayem ? 17Yasuɛ yerra-yas : Acuɣer i yi-testeqsayeḍ ɣef wayen yelhan ? Anagar yiwen i yelhan ! Ma tebɣiḍ ad tesɛuḍ tudert-agi, ḥrez lumuṛat. Yerra-yas weqcic-nni : Anwi lumuṛat ? 18Yasuɛ yerra-yas : Ur tneqqeḍ ara tamgeṛṭ, ur tzennuḍ ara, ur tettcehhideḍ ara s ẓẓur, ur tettakreḍ ara, 19qadeṛ baba-k d yemma-k#19.19 Walit Tuffɣa 20.12-16 ; Asmekti 5.16-20 ; Matta5.27 ; At Ifasus6.2-3., ḥemmel lɣiṛ-ik am yiman-ik#19.19 Walit At Lawi 19.18 ; At Galasya5.14 ; Yaɛqub 2.8 ; Matta22.39. ! 20Aqcic-nni yerra-yas : Ayagi akk xedmeɣ-t, d acu i yi-ixuṣṣen ? 21Yasuɛ yenna-yas : Ma tebɣiḍ ihi ad tkemmleḍ, ṛuḥ, zzenz akk ayen i tesɛiḍ, tefkeḍ idrimen-nni i yimeɣban, s wakka ad tesɛuḍ agerruj deg igenwan ! Imiren as-d, ad tedduḍ yid-i. 22Mi yesla i yimeslayen-agi, ilemẓi-nni yeḥzen aṭas dɣa iṛuḥ, axaṭer d ameṛkanti ameqqran i yella.
23Yenna Yasuɛ i yinelmaden-is : Ad wen-iniɣ s tidett : Iwɛeṛ aṭas i umeṛkanti ad ikcem ɣer tgelda n igenwan ! 24Ad wen-iniɣ daɣen : Tif akken ishel i welɣem ad iɛeddi di tiṭ n tissegnit, wala i umeṛkanti ad ikcem ɣer tgelda n Yillu. 25Mi slan i yimeslayen-agi, inelmaden-is dehcen aṭas, nnan-as : Anwa i izemren ad ittusellek ihi ? 26Yasuɛ imuqel-iten, yenna : Imdanen s yiman-nsen ur zmiren ara, meɛna Illu yezmer i kullec.
27Buṭrus inṭeq, yenna-yas : Aql-aɣ nekni neǧǧa kullec i wakken ad ak-netbeɛ, d acu ara yeḍrun yid-neɣ ? 28Yasuɛ yerra-yasen : Ad wen-iniɣ s tidett, asmi ara yeqqim Mmi-s n wemdan ɣef ukersi-ines n tgeldit n tmanegt, mi ara yuɣal kullec d amaynut, ula d kunwi yeddan yid-i ad teqqimem di tnac yid-wen ɣef ikersiyen n tgeldit i wakken ad tḥasbem tnac n leɛṛac n wat Isṛail. 29Yerna, kra n win ara yeǧǧen axxam-is neɣ atmaten-is, issetma-s neɣ baba-s, yemma-s, arraw-is neɣ tiferkiwin-is ɣef ddemma n yisem-iw, ad as-d-ittunefk akteṛ n wayen iǧǧa, yerna ad t-d-tṣaḥ tudert n dayem. 30Aṭas seg wid yellan d imezwura ad uɣalen d ineggura, aṭas daɣen seg wid yellan d ineggura ad uɣalen d imezwura.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.