Matta 17
17
Tamanegt n Yasuɛ
(Mq 9.2-10; Lq 9.28-36)
1Mi ɛeddan setta wussan, Yasuɛ iwwi yid-s Buṭrus, Yaɛqub akked gma-s Yuḥenna, ulin ɣer wedrar ɛlayen, anda qqimen ḍerfen iman-nsen. 2Taswiɛt kan tenbeddal ṣṣifa-s zdat-sen, walan udem-is ittfeǧǧiǧ am yiṭij, llebsa-s tuɣal d tamellalt, tecceɛceɛ am tafat. 3Ha-ten-aya banen-asen-d Musa akked Iliya ttmeslayen d Yasuɛ. 4Buṭrus inṭeq yenna i Yasuɛ : A sidi, yelha ma neqqim dagi, ma tebɣiḍ ad sbeddeɣ tlata n iqiḍunen : Yiwen i kečč, yiwen i Musa, wayeḍ i Iliya. 5Mazal-it ittmeslay mi d-ters yiwet n tagut ittfeǧǧiǧen tɣumm-iten. Si tagut-nni tenṭeq-d yiwet n taɣect, tenna-d : Wagi d Mmi ɛzizen deg-s i yella lfeṛḥ-iw, smeḥsiset-as ! 6Mi slan i taɣect-nni, inelmaden ikcem-iten lxuf, ɣlin ɣef wudem. 7Yasuɛ issers afus-is fell-asen, yenna-yasen : Ur ttaggadet ara, kkret ! 8Mi refden allen-nsen, ur walan ula d yiwen nniḍen anagar Yasuɛ.
9Akken i d-ttadren seg wedrar, yumeṛ-iten Yasuɛ yenna-yasen : Ur qqaret i yiwen ayen akka i twalam alamma yeḥya-d Mmi-s n wemdan si gar lmeyytin.
Anwa-t nnbi Iliya ?
(Mq 9.11-13)
10Inelmaden steqsan Yasuɛ nnan-as : Iwacu imusnawen n ṭawrat qqaren-d : Ilaq ad d-yas nnbi Iliya d amezwaru ? 11Yerra-yasen : D tidett ilaq ad d-yas nnbi Iliya d amezwaru, i wakken ad iseggem kullec. 12Ma d nekk aql-i nniɣ-awen-d : Nnbi Iliya yusa-d yakan, lameɛna imdanen ur t-ɛqilen ara yerna xedmen deg-s akken i sen-ihwa. Akka daɣen ara inɛettab Mmi-s n wemdan gar ifassen-nsen ! 13Inelmaden fehmen imiren d akken ittmeslay-asen-d ɣef Yeḥya Aɣeṭṭas.
Ḥellu n weqcic iɣellin
(Mq 9.14-32; Lq 9.37-45)
14Mi wwḍen ɣer wanda llan lɣaci, yiwen wergaz iqeṛṛeb ɣer Yasuɛ, iɣli ɣef tgecrar zdat-s yenna-yas : 15A sidi, ḥun ɣef mmi ! Atan kkaten-t imsigman, inneɛtab aṭas ! Acḥal d abrid i yeɣli ɣer tmes neɣ ɣer waman, 16wwiɣ-t-id yakan i yinelmaden-ik, meɛna ur zmiren ara ad t-sseḥlun. 17Inṭeq Yasuɛ yenna-yasen : A lǧil ijehlen, iɛewjen ! Ar melmi ara yiliɣ yid-wen ? Ar melmi ara wen-ṣebreɣ ? Awit-iyi-d aqcic-agi ɣer dagi ! 18Yasuɛ iɛeggeḍ ɣef lǧen-nni, yumeṛ-as ad iffeɣ seg weqcic-nni. Imiren kan, aqcic-nni yeḥla.
19Mi llan inelmaden iman-nsen, qeṛṛben ɣer Yasuɛ nnan-as : Acuɣer nekni ur nezmir ara ad t-nessufeɣ ? 20Yasuɛ yerra-yasen : Axaṭer txuṣṣem di liman ! Aql-i nniɣ-awen, lemmer tesɛim liman annect n uɛeqqa n uxerdel, tili ad tinim i wedrar-agi, qleɛ iman-ik sya ɣer dihin ad iqleɛ. Ulac wayen iwumi ur tettizmirem ara. 21Ṣṣenf-agi n leǧnun tteffɣen anagar s tẓallit d uẓummu.
22Mi llan di tmurt n Jlili, Yasuɛ yenna-yasen : Mmi-s n wemdan ad ittusellem gar ifassen n yimdanen ; 23ad t-nɣen, meɛna ass wis tlata ad d-iḥyu si gar lmeyytin. Dɣa inelmaden ikcem-iten leḥzen d ameqqran.
Yasuɛ akked Buṭrus xellṣen tabzert
24Mi yewweḍ Yasuɛ akked inelmaden-is ɣer Kafernaḥum, imekkasen n tebzert n lǧameɛ qeṛṛben-d ɣer Buṭrus nnan-as : Ɛni Ssid-nwen ur ittxelliṣ ara tabzert n lǧameɛ ? 25Yerra-yasen Buṭrus : Ih, ad ixelleṣ ! Imiren kan mi yekcem Buṭrus ɣer wexxam, iluɛa-t Yasuɛ yenna-yas : D acu i twalaḍ a Buṭrus ? Anwa i ilaqen ad ixelleṣ tabzert i yigelliden n ddunit-a, d arraw-nsen neɣ d ibeṛṛaniyen ? 26Buṭrus yerra-yas : D ibeṛṛaniyen ! Dɣa yenna-yas Yasuɛ : Ihi arraw n tmurt ur ttxelliṣen ara ! 27Lameɛna i wakken ur ten-ittɣaḍ ara lḥal, ṛuḥ, ḍegger tasennaṛt ɣer yilel, aslem (aḥewtiw) amezwaru ara d-teṭṭfeḍ, ldi-yas imi, ad tafeḍ deg-s aṣurdi n lfeṭṭa, efk-asen-t d lexlaṣ n tebzert-nneɣ nekk yid-k.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.