Matayo 9
9
Yeesu afumya omuntu ohunzize
Mariko 2.1-12; Luuka 5.17-25
1Yeesu ashonera omu chombo, ayambuka enyanja n'okuja omu gishagala akuliraga mo. 2Abantu baguma bamuleerhera omuntu ohunzize walilyamire oku gipoyi. Yeesu abwene obwemeezi bwabo, abwira oyo muntu ohunzize ntya: «Mwana waani, gihangaana! Ebyaaha byawe byababalirwe!»
3Abigiriza b'amarhegeko baguma baliiri ahoola, barhondera guchiderhesa ntya: «Amagoma».
4Aliko okubona oku Yeesu aliiri ayinji enkengeero zaabo, ababaza ntya: «Girhumire mwakengera kubi ntyo omu mirhima yenyu? 5Bichi biyoolohere omu kubwira omuntu ntya: ‹Ebyaaha byaawe byababalirwe›, changwa omu kumubwira ntya: ‹Yimanga, olambagire!› 6Aliko nshondere mumenye oku Mwene oMuntu agwerhe obuhashe bw'okubabalira ebyaaha mu lino gulu.» Yeesu ava abwira ola muntu ohunzize ntya: «Yimanga, rhoola egipoyi chaawe onagaluke eka.» 7Oyo muntu ayimanga, anachigendera eka.
8Abantu babeere baabona ebyoola, bayuubaha bweneene. Bakuuza Nnamahanga waheere abantu obuhashe buli nk'obu.
Yeesu ahamagala Matayo
Mariko 2.13-17; Luuka 5.27-32
9Yeesu abeere ali arhenga ahoola, abona mufurhiisa muguma w'amakooli oyirikwa Matayo, eyi ayikeere ahantu bafurhiisiza amakooli. Amubwira ntya: «Nkulikira». Matayo ayimanga n'okumukulikira.
10Enyuma z'ahoola, Yeesu aja kulya omu nju ya Matayo. Mw'eyo nju, mwaja abandi bafurhiisa b'amakooli n'abandi banyabyaaha. Aboola booshi bayikala kulya ebiryo haguma na Yeesu n'abigirizwa baage.
11 aBafarisaayo babeere baabona ebyoola, babwira abigirizwa ba Yeesu ntya: «Girhumire omwigiriza wenyu y'aliira haguma n'abafurhiisa b'amakooli n'abandi banyabyaaha?»
12Yeesu abeere ayunva kw'ebyo, ababwira ntya: «Abagwerhe amagala menja arhali boowe bo banashonda omufumu, aliko abalwala bo banamushonda. 13Mugende murhange muchiyigirize eby'ama Mandiko Matagatiifu maderhere: ‹Ntashonda oku muntuulire entuulo, aliko nshondere muleme mwayunvirana obonjo›#9.13 Osome Oseya 6.6., kwenge ntayinjaga guhamagala abakwaneene, aliko nayinjire elugulu w'abanyabyaaha.»
Yeesu abazwa elugulu w'oguchilahiza kulya
Mariko 2.18-22; Luuka 5.33-39
14Abigirizwa ba Yohaana baaja emunda Yeesu ali n'okumubaza ntya: «Rhwabo n'aBafarisaayo, rhunalema rhwachilahiza kulya. Girhuma abigirizwa baawe boowe barhachilahiza kulya?»
15Yeesu abashubiza ntya: «Egihe abantu balalikirwe oku buhya, gurhe bakagala kuyerekana amaganya noobo bachiri haguma na muhya-mulume? Aliko omu siku zayinja, oyo muhya-mulume nj'akuulwa ahagarhi kaabo. Leero mw'ezoola siku yi nji balema baaja bachilahiza kulya.
16«Nta muntu ohangira echiraka gihyaahya oku fulema eshajire. Akaba akajira ntyo, echo chiraka chanabera eyo fulema eshajire. Oku buzinda, eyo fulema eshajire yanachiberekera bweneene.
17«Ko n'oko barhabika edivaayi y'omuhyo omu masupa m'oluhu lushajire#9.17 Amasupa m'oluhu: aBayaahudi baliiri bajira amasupa omu oluhu. Mw'amo masupa baliiri babika mo amenji, amarha, edivaayi n'amavurha. Amo masupa, amango malichiri mahyaahya, maliiri marhunda. Aliko amango mamarhondera gushaja, manakomera, elugulu w'oko marhagachirhunda.. Nka bajirire ntyo manabereka, n'edivaayi yanasheeshekala, n'amasupa manafa busha. Ahuubwe bahira edivaayi y'omuhyo omu masupa mahyaahya, ntyo edivaayi n'amasupa byanabiikwa bwinja.»
Yeesu afumya omukazi n'ogufuula omunyere
Mariko 5.21-43; Luuka 8.40-56
18Yeesu abeere achiri ababwira ebyoola binwa, omukulu muguma w'aBayaahudi ayinja. Afukama embere za Yeesu n'okumubwira ntya: «Mwali waani amafa bonabuno. Aliko chiro akaba amafa, oyinje omulambulire kw'efune, y'ashuba kuba mugumaguma.» 19Yeesu ayimanga, yeewe n'abigirizwa baage bakulikira oyo mukulu.
20Mw'ebyo bishanji, mukazi muguma waligwerhe myaaka ekumi n'ebiri alwere endwala y'okuva eshagama, ayegeera enyuma za Yeesu. Oyo mukazi ahuma oku mushoojo gw'efulema ya Yeesu, 21kwenge aliiri achiderhesa ntya: «Nka mpumire konyine oku fulema yaage, nafuma!» 22Yeesu ava ahindamuka, amubona n'okumubwira ntya: «Mwali waani, gihangaana! Obwemeezi bwawe bwagufumize.» Ho n'aho, oyo mukazi afuma.
23Yeesu abeere ahika emw'oyo mukulu w'aBayaahudi. Abugaana yo abantu banene bali bajira olwamo, n'abandi bali baziha emilizi n'okuyimpa enyimpo z'emishibo. N'abandi bantu banene bali balira. 24Yeesu ababwira ntya: «Murhenge hano, kwenge oyu munyere arhafiire, alyaamire.» Aliko aboola bantu bamushekera.
25Abantu babeere bahuluswa, Yeesu aja omu nju. Afarhira oyo munyere oku fune, ava ayimanga.
26Ogoola mwazi gwayandaala mw'echo gihugo chooshi.
Yeesu afumya mpumi ebiri
Matayo 20.29-34
27Yeesu abeere ali arhenga emw'oyo mukulu w'aBayaahudi, mpumi ebiri zamukulikira eri ziri zabanda enduulu ntya: «Waliha Mugala wa Daawudi! Orhubeere obonjo!»
28Agerere eka, ezoola mpumi zamuyegeera. Yeesu abaza zo ntya: «Ebyo mumpemere, ka mugwerhe obwemeezi oku nakabikola?» Zamushubiza ntya: «Neechi Nnaweerhu.»
29Yeesu azihuma oku meesho. Azibwira ntya: «Nk'oku obwemeezi bwenyu buli kubinabaage.» 30Ameesho maazo maava mazibuuka. Yeesu azirhegeka ntya: «Muchilange, ebyo binwa ntaaye mubibwirage.» 31Aliko zoowe, zagenda ziri zabalira abantu emyaazi ya Yeesu mw'echo gihugo chooshi.
Yeesu afumya egama
32Ezo mpumi ebiri zabeere ziri zarhenga ahoola, abantu baleerhera Yeesu omuntu muguma omuzimu ajirire gama. 33Yeesu ava akuula oyo muzimu. Elyo gama lyaava lyarhondera kuderha. Echigusho ch'abantu basoomerwa bweneene n'okuderha ntya: «Mu chino gihugo chooshi ch'eIsraheeli, murhashubiraga kubonekana echinwa chiri nk'echo chiro n'ehityu!»
34Aliko aBafarisaayo boowe baderha ntya: «Yeesu ali akuula abazimu oku buhashe bw'omukulu w'abazimu.»
Yeesu abaala oMwazi Mwinja omu bishagala
Mariko 6.6; Luuka 8.1
35Buzinda bwaho, Yeesu agendekera kugera omu bishagala byooshi ebineneenene n'ebigeekegeeke, eyi ali ayigiriza abantu omu masinagoogi. Aliiri abaala oMwazi Mwinja g'oBwime bw'empingu n'ogufumya endwala zooshi n'obulema booshi.
36Yeesu abeere abona abantu banene, abayunvira obonjo, kwenge baliiri baluhire eyi banalembere. Baliiri nka ntaama zirhagwerhe mungere. 37Aja abwira abigirizwa baage ntya: «Emyaaka y'ogushaluula elugire, aliko abakozi bagehere. 38Leero, muheme nyina emyaaka arhume abandi bakozi omu myaaka yaage.»
Currently Selected:
Matayo 9: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
