Matayo 10
10
Amaziino m'eNtumwa ekumi n'ebiri za Yeesu
Mariko 3.13-19; Luuka 6.12-16; 9.1-6
1Enyuma w'ebyoola, Yeesu ahamagala abigirizwa baage ekumi na babiri. Abaheereza obuhashe b'ogukuula abazimu n'ogufumya ngasi ndwala na ngasi buzamba. 2N'ama, mo maziino m'ezoola Ntumwa ekumi n'ebiri: omurhanzi ali Simooni oyirikwa Petero na Ndereya mwene waabo, Yakobo na mwene waabo Yohaana bagala ba Zebedayo, 3Firipo na Baritolomaayo, Tomaasi na Matayo mufurhiisa w'amakooli, Yakobo mwene Alufaayo na Tadeeyo, 4Simooni w'omu chigusho ch'aBazelooti na Yuuda Isikariyooti ola walenganyaga Yeesu.
Yeesu arhuma eNtumwa zaage ekumi n'ebiri omu kaasi
Mariko 6.7-13; Luuka 9.1-6
5Ezoola ntumwa ekumi n'ebiri, Yeesu azirhuma. Azirhegeka ntya: «Murhajaaga omu bihugo by'abarhali Bayaahudi, murhanajaga chiro n'omu gishagala chooshi ch'aBasamariya. 6Sy'aliko muleme mwagenda emwa Baisraheeli bonyine, kwenge bali nka ntaama zaherere. 7N'amango muli mwalenga yo, mubalire abantu ntya: ‹oBwime bw'empingu buli hoofu!› 8Muleme mwafumya abalwala, munaleme mwafuula abafu, n'ogucheesa ababenzibenzi, munaleme mwakuula abazimu. Oboola mwahabirwe oku busha, nenyu muleme mwahaana oku busha.
9«Murhaheekaga olufuranga chiro n'oluguma omu mifuko yenyu. 10Kandi, omu lugenzi lwenyu murhaheekaga eshaho changwa fulema ebiri, changwa ebindi biraato, changwa enkoni. Bulaala omukozi akwaneene omukamarho gwage.
11«Amango muli mwaja omu bishagala bineneneene changwa bigekegeeke, mushonde omuntu oyemeerere kubayankirira. Muhande omu mwage guhika amango mwarhenga mw'echo gishagala. 12Enju nji mwaba mwajire mo, mulamuse beene mo omu kuderha ntya: ‹Omurhuula gube haguma nenyu!› 13Akaba abantu ba mw'eyo nju babayankirire, mubalekere ogo murhuula. N'akaba balahire kubayankirira, mugalukane ogo murhuula gwenyu. 14N'akaba abantu ba nju ndebe changwa gishagala chilebe balahire kubayankirira n'okubayunviriza, muchirhengere mo. N'omu gurhenga mo, mukungurhe olujuchu luli oku magulu menyu.#10.14 Omu micho y'aBayaahudi, ogukunguurha olujuuchu lw'oku magulu kuli kuderha okw'abantu balekeene buzira kuyunvikana. Na kandi, kw'aliiri kuderha oku omuntu akalabire olaala arhumwaga ko. Osome Mariko 6.11. 15Okuli mbabwirire, oku amango olusiku lw'ogucha olushinja lwahika, beene echo gishagala nji bachirwa olushinja oku bulyo bukalihire bweneene kulusha beene egishagala ch'eSodoomo n'eche Gomoora.»
Abantu balibuzwa elugulu wa Yeesu
Mariko 13.9-13; Luuka 21.12-17
16«Muchilange! Mbarhumire nka ntaama ahagarhi ka banyambwe. Ntyo mube benge nka njoka, munachirhonde nka guuku. 17Muchilange kwenge abantu balema babaheeka omu kabuga. N'abazuuzi balema babashurhisa enkoni omu masinagoogi maabo. 18Ko n'oko balema babaheeka embere z'abarhegesi, n'embere z'abaami yi mube bahamiriza baani, embere zaabo n'embere z'abarhali Bayaahudi. 19Aliko amango nji baaba bali babaheeka embere z'abo bakulu, murhalemaga mwachibaza ntya: ‹Bichi rhwaderha, changwa gurhe rhwaderha.› Kwenge mw'ebyo bishanji bye n'ebyo mwahaabwa ebinwa mwaderha. 20Arhaali mwabo mwe mwaba muli mwaderha, sy'aliko Muuka gwa Yisho ye nji wabaderhera mo.
21«Omuntu nj'ayirhiisa mwene waabo, n'eshe w'omwana nj'ayirhiisa omwana waage. Abaana nabo nji balwisa abazeere baabo n'okubayirhiisa. 22Abantu booshi nji babashomba elugulu w'eziino lyaani. Aliko olaala nji wagihangana guhika oku buzinda, nj'achungulwa. 23Amango nji baaba bali babalibuza omu gishagala chilebe, mwanashagira omu chindi. Okuli, mbabwirire oku murhakamala kuzungula omu bishagala byooshi by'eIsraheeli na Mwene oMuntu arhazigaluka.
24«Omwigirizwa arhakalusha omwigiriza waage, changwa omuja arhakalusha nnahamwabo. 25Aliko, biri binja omwigirizwa aleme aba nka mwigiriza waage. N'omuja naye, biri binja aleme aba nka nnahamwabo. Akaba nyina enju bakamuyirika Belizebuuli,#10.25 Belizebuuli kuli kuderha mukulu w'abazimu. ntyo ku nji bayirika abantu b'omu nju yaage oku maziino mabi!»
Nnamahanga ye kwaneene kuyubahwa
Luuka 12.2-7
26Yeesu ashuba kuderha ntya: «Murhayuubahaga abo bantu. Nta chintu chibishirwe girhakabishuulwa na ntaacho chiri omu bwibisho girhakamenyikana. 27Omwazi nababwirire omu mwizimya, muguderhe ezuuba likulu. N'omwazi gulaala bababoheerezaga muguyalagaze n'omulenge munene eyi muyumangire oku nju elugulu. 28Murhayuubahaga abantu bakayirha omubiri gonyine, barhakanagala kuyirha omurhima. Aliko muyuubahe Nnamahanga, bulaala yenyine yegwerhe obuhashe b'ogushereza omubiri n'omurhima omu muliro gw'esiku n'amango.»
29«Ka barhaguza ebishwa bibiri oku gicheri chiguma? Aliko, chiro nta chiguma omu byo chagarhibukira ahashi buzira bulonza bwa Yisho. 30Leero mwabo, chiro n'oluganjo lw'enviiri zenyu zooshi, Nnamahanga alumenyere. 31Cho girhumire murhalemaga mwayuubaha, mugwerhe akamaro kulusha ebishwa binene.»
Okuyemeera n'okulahira Kirisitu
Luuka 12.8-9
32«Ngasi muntu onyemereere embere z'abantu, naani nji namuyemeera embere za Daarha oli omu mpingu. 33Aliko ngasi muntu ondahire embere z'abantu, naani nji namulahira embere za Daarha oli omu mpingu.»
Yeesu ayinjaga kuleerha obushombanyi
Luuka 12.51-53; 14.26-27
34«Murhalemaga mwakengera oku nayinjaga kuleerha omurhuula omu gulu. Nyoono ntayinjaga kuleerha omurhuula, aliko nayinjaga kuleerha entambala. 35Kwenge nayinjaga gushombanya omwana n'eshe, omunyere na nyina, omwazaana na nazaala. 36Abashombanyi b'omuntu nji baaba bantu b'omu mwage.#10.36 Osome Miika 7.6.
37«Omuntu wagasiima eshe changwa nyina kundusha, oyo arhakwaneene kuba waani. N'ola wagasiima omugala changwa omwali kundusha, naye arhakwaneene kuba waani. 38Ola orhaheekere omusalaaba gwage n'okunkulikira, arhakwaneene kuba muntu waani.
39«N'ola nji washonda guchungula akalamo kaage nj'agaheza. Aliko olaala nji waaba ahezeze akalamo kaage elugulu waani, nj'ashuba gukabona.»
Oluhembo lw'abayankirira abigirizwa ba Yeesu
Mariko 9.37,41; Luuka 9.48; 10.16; Yohaana 13.20
40«Omuntu obayankirire, eyi ny'ayankirire. N'onyankiriire, eyi ayankiriire ola wantumaga. 41Oyankiriire omuleebi, bulaala ali muleebi, nj'ahembwa oluhembo lw'omuleebi. N'oyankiriire omuntu okwaneene, bulaala akwaneene, nj'ahembwa oluhembo lw'omuntu okwaneene.
42«Okuli mbabwirire oku ngasi yeeshi nji waha muguma mw'aba badoorho engumbu y'amenji maganyire, bulaala ali mwigirizwa waani, oyo muntu nj'ahaabwa oluhembo lwage.»
Currently Selected:
Matayo 10: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
