Matayo 27
27
Yeesu aheekwa embere za Pilaato
Mariko 15.1-2; Luuka 22.66; 23.1; Yohaana 18.28
1Bwabeere bwacha, abakulu b'abadaahwa booshi haguma n'abashamuka b'aBayaahudi, bajira akaligi kw'okuyirha Yeesu. 2Echo charhuma bamumina, bamuheeka baaja kumuhaana emw'omurhegesi w'aBarooma oyirikwa Pilaato.
Yuuda achiniga
Mariko 1.18-19
3Yuuda walenganyaga Yeesu, abeere abona oku Yeesu ahanirwe ogufa, ababala bweneene omu murhima. Arhoola bila bicheri makumi masharhu by'efuranga, aja kubigalulira abakulu b'abadaahwa n'abashamuka b'aBayaahudi. 4Ababwira ntya: «Najirire echaaha omu guhaana omuntu orhagwerhe bubi oku ayirhwe.» Nabo bamushubiza ntya: «Ebyo birhachirhuloleere, bikola byawe ebyo!»
5Yuuda akabula ebyo bicheri by'efuranga omu Nju ya Nnamahanga. Ava aja guchiniga.
6Abakulu b'abadaahwa barholagula ebyo bicheri by'efuranga, baderha ntya: «Gukulikirana n'eRhegeko lyeerhu, birhahemerwe kubiika ezi furanga omu sanduku y'eNju ya Nnamahanga, kwenge ziri ngulo yashesheere eshagama.»
7Elugulu w'echo, bayunviikana oku bazikolese omu kugula eshwa ly'omubumbi muguma, yi baleme bahamba mo abahiisi. 8Echo chogirhuma elyo shwa lihamagalwa «Shwa ly'eshagama» guhika zeene.
9Ntyo, ebinwa byayenera, eby'omuleebi Yeremiya aderhaga ntya: «Barhoolaga bicheri makumi masharhu by'efuranga, gukulikirana n'engulo abanyaIsraheeli bayunvikanaga elugulu w'erhwe lyaage. 10Bagula eshwa ly'omubumbi muguma nk'oku Nnaweerhu abaaga ambwirire.»#27.10 Osome Zakariya 11.12-13; Yeremiya 19.1-13, 32.6-9.
Pilaato aburanya Yeesu
Mariko 15.2-5; Luuka 23.2-5,9-10; Yohaana 18.29-38
11Omurhegesi Pilaato abeere ali aburanya Yeesu, amubaza ntya: «Nka wooyo we mwami w'aBayaahudi?» Yeesu amushubiza ntya: «Wooyo we waderhere ko!»
12Enyuma z'aho, abakulu b'abadaahwa n'abashamuka b'aBayaahudi, barhondera kulega Yeesu, aliko ntaacho ashubiize. 13Echo charhuma Pilaato ashuba kumubaza ntya: «Ebyo binwa byooshi bali bakulega ko, orhali wabiyunva?» 14Aliko mw'ebyo byooshi, ntaacho Yeesu amushubize. Oko kwarhuma, oyo murhegesi asoomerwa bweneene.
Yeesu ahanirwa ogufa
Mariko 15.6-14; Luuka 23.13-23; Yohaana 18.39-40
15Ngasi lusiku lukulu lw'ePaasaka, omurhegesi alemaga alikuulira olubaga muntu muguma lwaliiri lusiimire. 16Mw'ezo siku, haliiri muntu muguma oyirikwa Baraaba, abaaga ashwekerwe omu munyororo. Oyo Baraaba alimenyikeene bweneene elugulu w'obubi bwage.
17Abantu babeere bachigushire haguma, Pilaato ababaza ntya: «Nde mushondere mbashwekulire? Baraaba changwa Yeesu oyirikwa Kirisitu?» 18Abazaga ntyo, kwenge aliyinji oku bamulerhere Yeesu elugulu w'obongwa.
19Pilaato abeere amayikala oku ntebe yaage y'oguchira ko eshinja, mukaage amurhumira entumwa ederhere ntya: «Orhachihiraga omu myaazi y'oyu muntu okwaneene! Kwenge omu budufu bwa zeene, naloorhaga elugulu waage. Ebyo biloorho byali mbabeze bweneene!»
20Aliko abo bakulu b'abadaahwa n'abashamuka b'aBayaahudi bayoohya echigusho ch'abantu oku baheme Baraaba ashwekuulwe, na Yeesu ayirhwe.
21Pilaato ashuba kubabaza ntya: «Nde, mw'aba bantu babiri, mushondere mbashwekuulire?» Nabo bamushubiza ntya: «Baraaba.» 22Pilaato ashuba kubabaza ntya: «Gurhe njirage oyu Yeesu oyirikwa Kirisitu?» Booshi, oku chaligumiza bashubiza ntya: «Abambwe oku musalaaba!» 23Pilaato ashuba kubabaza ntya: «Bubi buchi ajirire?» Aliko bagendekera kuderha bweneene ntya: «Abambwe oku musalaaba!»
24Pilaato abeere abona oku nta chinwa chanka chiyunvikana gukulikirana n'okw'olwamo yilwaluga, arhoola amenji, akalaba efune zaage embere z'abantu, aderha ntya: «Eshagama y'oyu muntu erhabaga oku rhwe lyaani! Ebe oku rhwe lyenyu!»
25Abantu booshi bashubiza ntya: «Neechi, eshagama yaage ebe oku rhwe lyeerhu n'oku ly'abaana beerhu!»
26Pilaato ava abashwekuulira Baraaba anarhegeka oku Yeesu ashuurhwe enkoni. Oku buzinda, abaha ye y'abambwe oku musalaaba.
Abasoda bashekera Yeesu
Mariko 15.16-20; Luuka 23.11; Yohaana 19.2-3
27Enyuma z'ebyo, abasoda b'omurhegesi Pilaato, baheeka Yeesu omu kampi kaabo. Echigusho chooshi ch'abasoda, chaava chamugorha. 28Abo basoda bamuhogola emyambalo yaage banamuyambisa egishuuli ch'omuduku. 29Baluka echimene n'emirhabi y'emishaaki, bamuyambisa cho oku rhwe. Bamufumbanya olusheke omu fune y'okulyo. Baja balema bafukama embere zaage omu kumushekera ntya: «Mahyo, Mwami w'aBayaahudi!» 30Bamuchiira ko, baava barhoola lula lusheke n'ogurhondera kumushurha lo oku rhwe.
31Amango babaaga bamaamala kumushekera, bamuhogola chila gishuuli, bashuba kumuyambisa ela myambalo yaage. Oku buzinda, bamuheeka kumubamba oku musalaaba.
Yeesu abambwa oku musalaaba
Mariko 15.21-32; Luuka 23.26-43; Yohaana 19.16-24
32Abo basoda babeere bali barhenga omu gishagala, babuganana n'omuntu muguma w'omu gishagala ch'eKureene oyirikwa Simooni. Oyo Simooni bamurhegeka aheeke omusalaaba gwa Yeesu.
33Babeere bahika ahantu hayirikwa ''Goligoota'', kw'okuderha «Hantu h'empanga», 34baaha Yeesu edivaayi egwerhe endulo. Aliko abeere ayigonja ko, alahira kuyinywa.
35Abo basoda babeere bamala kumubamba oku musalaaba, bagabaana emyambalo yaage omu kuyiyeshera esimbi.#27.35 Osome Nanga 22.18. 36Oku buzinda, bayikala ahoola, balanga Yeesu.
37N'elugulu w'erhwe lyaage, bahira ho ehipaho hiyandikirwe ko ebinwa byarhumaga bamuhana. Ebyo binwa byaliiri biderhere ntya: «Oyu ye Yeesu, Mwami w'aBayaahudi.»
38Bishumuusi bibiri na byo byaliiri bibambirwe oku misalaaba haguma na Yeesu, muguma oku lunda lw'ekulyo n'owindi oku lunda lw'ekulembe.
39Abantu baliiri balenga aho, baliiri badukanga Yeesu, n'okuzunguza amarhwe maabo. 40Bali baderha ntya: «Wooyo, we washondaga gushanda eNju ya Nnamahanga, onashube kuyiyumbaka omu siku esharhu! Leero, akaba onali Mugala wa Nnamahanga, ogichungule wenyine, ochiyandagaze kw'ogu musalaaba!»
41Abakulu b'abadaahwa n'abigiriza b'amarhegeko haguma n'abashamuka b'aBayaahudi, nabo bamushekera ntya: 42«Aliiri achungula abandi bantu, aliko leero yeewe yenyine agambirwe guchichungula! K'arhali yeewe ye Mwami w'abanyaIsraheeli? Ajage achiyandagaza kw'ogu musalaaba, yi neerhu rhumuyemeere! 43Aliiri alangalira Nnamahanga, na kandi aliiri aderha oku ali Mugala waage. Leero akaba oyo Nnamahanga anamusiima, amuchungule!»
44Bila bishumuusi byaliiri bibambirwe oku misalaaba eburhambi bwa Yeesu, na byo byaliiri byamushekera.
Ogufa kwa Yeesu
Mariko 15.33-39; Luuka 23.44-48; Yohaana 19.28-30
45Enyuma z'ebyo, omwizimya gwaba oku gulu lyooshi, gurhengera midi guhika aha saa mwenda. 46Zabeere hoofu saa mwenda, Yeesu alika omulenge munene, aderha ntya: «Eloyi! Eloyi! Laama sabakatani!» Kw'okuderha ntya: «Nnamahanga waani! Nnamahanga waani! Girhumire wandekeerera?»
47Bantu baguma baliiri ahoola, babeere bayunva oko, baderha ntya: «Ali ahamagala Eliya.» 48Ho n'aho, muguma omu bo, alibirha kuja kuleerha echiraka, achivuvuliza omu divaayi y'enkala. Echo chiraka agishwekera oku lusheke, anachizamuulira Yeesu y'anywe. 49Aliko abandi baderha ntya: «Muleke, rhulole akaba Eliya ayinja kumuchungula!»
50Aliko Yeesu ashuba kulika omulenge munene, arhenga m'omuuka.
51Ho n'aho, omwenda g'olusika gwalimanikirwe omu Nju ya Nnamahanga, gwasharhuka mo bisharhe bibiri, gurhengera enyanya guhika eshiishi. Egihugo chagera m'omusisi, ebirimbi byabereka. 52Eshinda nazo zagichinguula, n'abakwaneene banene babaaga bafiire miira, bafuuka. 53Barhenga omu shinda, n'enyuma z'ogufuuka kwa Yeesu, abo bantu baaja omu gishagala gitagatiifu ch'eYerusaleema, n'abantu banene bababona ko.
54Omukulu w'abasoda haguma n'abasoda baage baliiri balanga Yeesu, babeere babona omusisi gwagera omu gihugo, na kw'ebyo bindi byooshi byahulukiraga, bayuubaha bweneene. Baja baderha ntya: «Okuli oyu muntu aliiri Mugala wa Nnamahanga!»
55Hale bugeeke n'ahoola, haliiri abakazi banene, baliiri balangiira ebyo byooshi. Abo bakazi bo balikulikire Yeesu gurhengera eGalilaaya, bo banaliiri bamukolera. 56Ahagarhi kaabo, haliiri Mariya w'eMagadala, Mariya nyina wa Yakobo na Yozefu haguma na nyina wa beene Zebedayo.
Yeesu ahambwa
Mariko 15.42-47; Luuka 23.50-56; Yohaana 19.38-42
57Lyabeere golo, hahulukira muntu muguma w'omuchire w'omu gishagala ch'eArimateeya, oyirikwa Yozefu. Oyo Yozefu, naye aliiri mwigirizwa wa Yeesu. 58Ahikira Pilaato y'amuheme omubiri gwa Yeesu. Pilaato ava arhegeka oku bamuhe go. 59Yozefu arhoola ogo mubiri, anaguzingira omu daraape lihyaahya 60Ahamba go omu shinda yaage mpyaahya. Eyo shinda, alibeere ayichire omu baale. Ahirikira ebaale linene oku mulyango gw'eyo shinda, oku buzinda achigendera. 61Mw'ebyo bishanji, Mariya w'eMagadala n'ola windi Mariya, baliiri bayikeere ahoola, embere z'eyo shinda.
Abasoda balanga eshinda ya Yeesu
62Olo lusiku lo lwaliiri lusiku l'oguchirheganya oku Saabato. Abakulu b'abadaahwa n'aBafarisaayo baaja emwa Pilaato, 63bamubwira ntya: «Waliha! Rhuyibukire oku ela ndyaalya y'omulume, egihe yalichiri ngumaguma, yaliderhere ntya: ‹Enyuma z'ogufa kwani, nafuuka oku lusiku lwa gasharhu.› 64Cho girhumire, orhegeke abasoda balange eshinda guhika ezo siku esharhu, y'abigirizwa baage barhayinjaga kuzimba omubiri gwage n'okubwira abantu oku afuukire gurhenga omu bafu. Na ntyo, obo bubeeshi bwanaba bubi kulusha obwambere.» 65Pilaato ababwira ntya: «Mugwerhe abasoda b'obulanzi! Mubaheeke ebwa shinda, yi baaje kuyilanga nk'oku mushondere.»
66Oku buzinda, barhenga ahoola, baaja ebwa shinda. Bahamika lila baale lifukire eshinda, banahira abalanzi ahoola b'okuyilanga.
Currently Selected:
Matayo 27: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
