Matayo 28
28
Ogufuuka kwa Yeesu
Mariko 16.1-8; Luuka 24.1-11; Yohaana 1.11-18
1Olusiku lw'eSaabato lwabeere lwagera, emiseke bucha eseezi ly'olusiku lurhanzi lw'eboso, Mariya w'eMagadala haguma n'ola windi Mariya, baaja gurhangula eshinda ya Yeesu. 2Ho n'aho haaba omusisi munene omu gihugo. Malahika muguma wa Nnaweerhu ayandagala gurhenga empingu, ayegeera eshinda. Ahirika lila baale eburhambi, anayikala oku lyo. 3Oyo malahika alibaraganyize nka mubaraganyo n'emyambalo yaage yali myeeru bweneene nka lubula. 4Abo balanzi b'eshinda babeere babona ebyo, bayuubaha bweneene. Bahinda emisisi guhika egihe baaba nka bafu.
5Oyo malahika abwira abo bakazi ntya: «Mwabo, murhayuubahaga, kwenge nyinji oku muli mwashonda Yeesu wabambwaga oku musalaaba. 6Arhachiri hano! Afuukire nk'oku abaaga aderhere. Muyinje, muchilolere aha baliiri bamulyamize. 7Leero, mugende jubaajuba kubwira abigirizwa baage oku afuukire, anabarhangire miira eGalilaaya. N'eyo munda yi mwamubonera ko. Ebi binalishondere kubabwira!»
8Abo bakazi baja barhenga ebwa shinda, eyi bagwerhe obuuba, aliko baliiri bashagalukire bweneene. Balibirha kuja kubwira abigirizwa ba Yeesu ogo mwazi.
9Ho n'aho, Yeesu ahulukira bala bakazi, anabalamusa ntya: «Mahyo!» Bamuyegeera, bamugwarha amagulu n'okumuharamya. 10Oku buzinda, Yeesu ababwira ntya: «Murhayuubahaga! Muje kubwira beene beerhu oku baaje eGalilaaya. N'eyo munda yi bambonera ko.»
Abalanzi b'eshinda babala elugulu y'obufuuke bwa Yeesu
11Abo bakazi babeere bachiri bagenda, basoda baguma omu baliiri kulanga eshinda, baaja omu gishagala kubalira abakulu b'abadaahwa emyaazi yooshi yabeere. 12Bala bakulu b'abadaahwa bachigusha haguma n'abashamuka b'aBayaahudi yi barhoole omugambi. Baheereza bala basoda efuranga zinene, 13bababwira ntya: «Mwabo mwalema mwaderha ntya: ‹Abigirizwa baage baliyinjire kumuzimba obudufu eyi rhulyaamire.› 14Nk'omurhegesi Pilaato ayunvire ogu mwazi, rhwabo rhwenyine rhwaganiira haguma naye n'okumuyemeeza byooshi byabeere yi ntaacho chibi chibahikirage.» 15Bala basoda barhoola ezo furanga, banajira nk'oku bababwiraga. N'ogu mwazi gwayandaala omu Bayaahudi guhika zeene.
Yeesu arhuma abigirizwa baage omu kaasi
Mariko 16.14-18; Luuka 24.36-49; Yohaana 20.19-23; Bijiro 1.6-8
16Enyuma z'ebyo, abigirizwa ekumi na muguma ba Yeesu, baaja eGalilaaya. Bazamukira oku gula musozi Yeesu abaaga abayerekere. 17Babeere bamubona, bamuharamya. Aliko baguma omu bo, baganganwa.
18Oku buzinda, Yeesu ayegeera hoofu nabo, ababwira ntya: «Nahabirwe obuhashe booshi omu mpingu n'omu gulu. 19Mugende, mujire abantu b'embaga zooshi bigirizwa, mubabatiize oku ziino lya Daarha, ely'oMugala n'elya Muuka-Mutagatiifu. 20Muleme mwabayigiriza gukenga ebinwa byooshi nabarhegekaga. Munamenye oku nyoono ndi haguma nenyu esiku zooshi guhika oku buzinda bw'egulu.»
Currently Selected:
Matayo 28: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
