Matayo 25
25
Omugani gwa banyere ekumi
1«Leero, oBwami b'empingu, nji bwashushanywa n'omugani gw'abanyere ekumi. Abo banyere, barhoolaga amatara maabo yi baaje kuyankirira muhya-mulume. 2Barhaano mubo baliiri bihwinja na bandi barhaano baligwerhe obwenge. 3Ebyo bihwinja barhoola amatara maabo, aliko barharhoolaga ebitorooli by'oguhira mo. 4Aliko abaligwerhe obwenge, barhoola amatara maabo haguma n'ebitorooli omu masupa. 5Okubona okw'oyo muhya-mulume alilegamire kuyinja, abo banyere ekumi booshi bahunira n'okuva balyaama.
6«Ahagarhi k'obudufu, omulenge gwayunviikana guderhere ntya: ‹Tala! Muhya-mulume ayinjire! Muhuluke kuja kumuyankirira!› 7Ho n'aho, abo banyere booshi bazuuka, barheganya amatara maabo.
8«Bila bihwinja byabwira abaligwerhe obwenge ntya: ‹Murhuhe oku bitorooli byenyu, bulaala amatara meerhu marhondere kuzima.› 9Aliko bala baligwerhe obwenge babashubiza ntya: ‹Nangwa! Ebi bitorooli rhugwerhe, birhangarhulumira rhweshi. Muje emw'abarhimbuuzi yi muchigulire ebyenyu.›
10«Ebyo bihwinja, byabeere byajire kugula ebitorooli, muhya-mulume ahika. Bala banyere barhaano baligirheganyize miira, baaja omu dinye ly'obuhya haguma naye. Oku buzinda, omulyango gwachingwa.
11«Enyuma z'aho, balaala bandi banyere bahika n'ogurhondera kuderha ntya: ‹Nnaweerhu! Nnaweerhu! Orhuchinguulire!› 12Aliko muhya-mulume abashubiza ntya: ‹Okuli mbabwirire, ntabamenyere!›»
13Oku buzinda, Yeesu ashuba kuderha ntya: «Leero mutarame, kwenge murhamenyere olusiku changwa ebishanji nji nagaluka.
Omugani gw'abakozi basharhu
Luuka 19.11-27
14«oBwami bw'empingu, rhwakabushushanya n'omugani gw'omuntu muguma washondaga kubalama. Oyo muntu ahamagala abakozi baage n'okubalekera ebikulo byaage yi babikolese. 15Aheereza mukozi muguma talanta erhaano#25.15 Osome 18.24., owindi talanta ebiri, n'owindi talanta nguma. Oyo muntu ajiraga ntyo gukulikirana n'obuhashe bwa ngasi mukozi. Oku buzinda abalama.
16«Ho n'aho, ola mukozi bahaaga talanta erhaano, aja kuzirhimbuula mo. Ayunguka zindi erhaano. 17N'olaala bahaaga talanta ebiri, naye aja kuzirhimbuula mo ayunguka zindi biri. 18Aliko, olaala bahaaga talanta nguma, yeewe aja kujokola edaho n'okubisha mo ela talanta ya nnahamwabo.
19«Enyuma w'esiku zinene, oyo nnahamwabo agaluka. Ahamagala abakozi baage yi bamubwire gurhe bakoleseze ebikulo byaage. 20Olaala mukozi bahaaga talanta erhaano, aleerha enyungu ya zindi erhaano. Aderha ntya: ‹Nnahamweerhu, wampaaga talanta erhaano, leero tala zindi erhaano ezi nayungukire.›
21«Nnahamwabo amubwira ntya: ‹Wajirire bwinja! Oli mukozi mwinja orhanali muhemusi. Okubona oku orhabeere muhemusi omu bikulo bigeeke, naaja nakujira mwimangizi w'ebikulo binene. Cho girhumire, oje wayinja oshagaluke haguma na nnahamwenyu!›
22«Olaala mukozi bahaaga talanta ebiri, naye ahika. Aderha ntya: ‹Nnahamweerhu! Wampaaga talanta ebiri, leero tala zindi talanta ebiri ezi nayungukire.›
23«Nnahamwabo amubwira ntya: ‹Wajirire bwinja! Oli mukozi mwinja orhanali muhemusi. Okubona oku orhabeere muhemusi omu bikulo bigeeke, naaja nakujira mwimangizi w'ebikulo binene. Cho girhumire, oje wayinja oshagaluke haguma na nnahamwenyu!›
24«Oku buzinda, ola mukozi bahaaga talanta nguma, naye ahika. Aderha ntya: ‹Nnahamweerhu, nyinji okw'oba muntu mudaarhi, wooyo onashaluula eby'orhabyaalaga, onagusha eby'orhashandaazaga. 25Elugulu w'oko, nayuubaha, naja nagenda kubisha etalanta yaawe omu daho. Leero, etalanta yaawe eyi, oyirhoole!›
26«Nnahamwabo amushubiza ntya: ‹Oli mukozi mubi na mwolokazi! Waliyinji oku nanshaluula ebi ntabyaalaga n'okunangusha ebi ntashandaazaga! 27Leero, walikwaneene kubika ebikulo byaani omu banki, y'olusiku nji nagaluka, mbirhoolere mo haguma n'enyungu ya byo.› 28Oku buzinda, aj'aderha ntya: ‹Mumunyege eyo talanta, munayihe olaala ogwerhe talanta ekumi. 29Kwenge omuntu ogwerhe akantu ye nji wayushuulirwa akandi, anaja agwarha binene. Aliko omuntu orhagwerhe kantu, nj'anyegwa chiro na hilaala hityu agwerhe. 30Na kandi, oyo mukozi orhagwerhe kamaro mumukabule embuga omu mwizimya. Na mw'ogo mwizimya, abantu nji balira n'okulibuka bweneene.›»
Oguchirwa olushinja luzinda
31«Amango nyoono Mwene oMuntu nji nayinja omu bukuuze bwani haguma na bamalahika booshi, nji nayikala oku ntebe yaani y'echaami egwerhe obukuuze. 32Abantu b'embaga zooshi nji bashimaanana embere zaani, naani nji nabagusha omu bigusho bibiri nka kulaala omungere analema aberuula entaama n'empene. 33Nji nahira entaama oku lunda lwani lw'ekulyo n'empene oku lunda lwani lw'emalembe.
34«oMwami nj'aja abwira balaala bali oku lunda lwage lw'okulyo ntya: ‹Muyinje, mwe mwagishirwe na Daarha, muje omu Bwami ali abarheganyize gurhengera okulemwa kw'egulu. 35Kwenge amango naliiri nzara mwampa ebiryo, n'amango naliiri nyoorha, mwampa ech'okunywa, n'amango naliiri muhisi, mwanyankirira. 36N'amango nabaaga mbulire emyambalo, mwampa yo, n'amango naliiri mulwala, mwantabaala, n'amango naliiri omu munyororo, mwayinja kuntangula.›
37«Abo bakwaneene nji bamushubiza ntya: ‹Nnaweerhu, mango machi rhwakubonaga oli nzara, rhwaguha ebiryo, changwa mango machi rwakubonaga oli nyoorha, rhwaguha ech'okunywa? 38Na mango machi rhwakubonaga oli muhisi, rhwanakuyankirira? Changwa mango machi waliiri wabulire emyambalo, rhwaguha yo? 39Mango machi rhwakubonaga oli mulwala changwa oli omu munyororo, rhwaja kugurhangula?›
40«Oyo Mwami nj'abashubiza ntya: ‹Okuli mbabwirire oku ebyo byooshi, mwabeere muli mwabijirira oli mudoorho mw'aba beene beerhu, nyoono nye mwalemaga mwabijirira.›
41«Balaala nji baaba bali oku lunda lwani lw'amalembe, boowe nji nababwira ntya: ‹Murhenge eburhambi bwani, mwabo muvumirwe! Muje omu muliro ogurhakazima esiku n'amango. Ogo muliro gwarheganyizwe miira elugulu wa Shetaani na bamalahika baage! 42Kwenge naliiri nzara, nenyu murhampaga ebiryo, naliiri nyoorha, nenyu murhampaga ech'okunywa. 43Naliiri muhisi, nenyu murhanyankiriraga, nabaaga nabulire emyambalo, nenyu murhampaga yo. Naliiri mulwala na naliiri omu munyororo, nenyu murhayinjaga kuntangula.›
44«Abo nabo nji bamushubiza ntya: ‹Nnaweerhu! Mango machi rhwakubonaga oli nzara, changwa oli nyoorha, changwa oli muhisi, changwa wabulire emyambalo, changwa oli mulwala, changwa oli omu munyororo, neerhu rhwafundwa kugurhabaala?›
45«Mwami nj'abashubiza ntya: ‹Okuli mbabwirire, oku ebi byooshi amango mwabaga murhali mwabijirira oli mudoorho bweneene mw'aba beene beerhu, nyoono nye murhaliiri mwabijirira.›
46«Oku buzinda, abo bantu nji baaja ahantu ho buhane bw'esiku n'amango. Aliko abakwaneene boowe, nji baaja omu kalamo k'esiku n'amango.»
Currently Selected:
Matayo 25: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
