Matayo 24
24
Yeesu abala omwazi gw'ogushandwa kw'eNju ya Nnamahanga
Mariko 13.1-4; Luuka 21.5-7
1Yeesu abeere ali ahuluka omu Nju ya Nnamahanga, abigirizwa baage bamuhikira yi bamuyeereke gurhe eyo Nju eyumbakirwe. 2Aliko Yeesu abashubiza ntya: «Okuli mbabwirire oku ebyo byooshi mubwene hano, harhayoorha chiro ebaale oku lindi. Byooshi nji byashandwa!»
Ebi nji byahika omu siku z'obuzinda
Mariko 13.3-13; Luuka 21.7-19
3Yeesu abeere ayikeere yenyine oku musozi gw'eMizeyituuni, abigirizwa baage bamuhikira. Bamubaza ntya: «Rhubwirage mango machi ebyo nji byahikira n'echimenyeso gichi nji charhuyeereka amango m'okugaluka kwawe na ech'obuzinda bw'egulu!»
4Yeesu abashubiza ntya: «Mube hoobwe! Harhabaaga omuntu wabarhebeka, 5Kwenge bantu banene nji bayinja omu ziino lyaani. Abo bantu nji balema baderha ntya: ‹Nyoono nye Kirisitu!› Nji banarhebeka bantu banene. 6Mw'ezo siku, mwayunva abantu baderha elugulu w'ebiirha ngasi hooshi. Aliko murhayuubahaga, kwenge ebyo byooshi, bikwaneene guhika. Aliko ebyoola, birhaba byayerekeene okw'obuzinda bw'egulu bwahikire. 7Egihugo nji chalwisa echindi. N'obwami nji bwalwisa obwindi. N'omu bihugo binene nji mwaba enzara n'omusisi gw'edaho nji gwalema gwagera. 8Ebyo byooshi, biri nka murhondero gw'emikero.
9«Abantu nji balema babahaana yi mulibuzwe bweneene munayirhwe. N'abantu b'embaga zooshi nji babagaya elugulu waani. 10Mw'ezo siku, bantu banene nji baleka obwemeezi bwabo. Abantu bonyine oku bonyine nji balema balenganyana n'ogushombana. 11Baleebi banene b'obubeeshi nji baahulukira. Abo baleebi nji barhebeka bantu banene. 12N'elugulu w'okuluga kw'obubi, obuzigire bw'abantu banene nji bwageeha. 13Aliko omuntu nji wagihangaana guhika oku buzinda nj'achungulwa. 14N'ogu Mwazi Mwinja g'oBwime nji gwayamagazwa omu gulu lyooshi, kuba buhamiiriza oku bantu b'embaga zooshi. N'obuzinda bwanaja bwahika.»
Amalibuko makomeere
Mariko 13.14-23; Luuka 21.20-24
15«Mw'ezo siku, nji mwabona olaala oyirikwa ntya: "Bubi bw'ogushanda"#24.15 Osome Danyeeri 9.27; 11.31; 12.11. ola waderhagwa n'omuleebi Danyeeri ayimangire omu Nju ya Nnamahanga. Oli wasoma eyi myaazi, amenye bichi ederhere.
16«Leero, abantu nji baaba bali omu gihugo ch'eYudeeya balibirhire oku misozi. 17Akaba omuntu nj'aba ali oku nju elugulu, arhagishonookaga okw'aje gurhoola ebintu omu mwage. 18N'akaba omuntu nj'aba ali omu shwa, arhachigalukaga emwage okw'aje gurhoola efulema yaage.
19«Mw'ezo siku, nji bwaba buhanya bunene oku bakazi nji baaba bali bukule n'oku balaala nji baaba bali bayonsa! 20Oko kulibirha kwenyu, muheme Nnamahanga yi nji gurhabaaga amango m'emboho nene changwa olusiku lw'eSaabato. 21Kwenge ezo siku nji zaaba z'amalibuko makomeere marhashubiraga kuba gurhengera okulemwa kw'egulu guhika zeene. N'amalibuko mali nk'amo, marhakanachiba. 22Ezo siku, nka Nnamahanga arhazigeehyaga, nta muntu chiro n'omuguma wangachungwirwe. Aliko azigeehyeze elugulu w'abantu baage aligishogere.
23«Mw'ezo siku, nk'omuntu ababwirire ntya: ‹Lola, Kirisitu ali hano!› changwa ‹Ali haliira!› murhamuyemeeraga, 24kwenge nji harhengera abantu balema baderha obubeeshi oku boowe bo ‹Kirisitu›, haguma n'abaleebi b'obubeeshi. Abo booshi, nji balema bajira ebisomereene n'ebimenyeso y'akonva bigalikeene, barhebeke chiro n'abantu Nnamahanga abaaga agishogere. 25Mumenye! Mbabwirire eyi myaazi yooshi embere ehike.
26«Elugulu w'ebyoola, nk'abantu bababwirire ntya: ‹Mulole! Kirisitu y'oliira oli omu mpinga!›, murhajaga yo. Changwa akonva bababwirire ntya: ‹Yooyu achibishire omu busiika!›, murhabayemeeraga. 27Kwenge, okuyinja kwani nyoono Mwene oMuntu, nji kwaba nka kulaala omubaraganyo gumoleka omu chalege chooshi.
28«Ahantu hooshi hali omurhumba, ho hagwirira banyunda.»
Okuyinja kwa Mwene oMuntu
Mariko 13.24-27; Luuka 21.25-28
29«Enyuma z'amalibuko m'ezo siku,
ezuuba nji lyahindamuka mwizimya,
n'omwezi nji gurhachimoleka,
enyenyeezi nazo, nji zarhoga gurhenga omu chaalege.
Na byooshi by'obuhashe omu mpingu, nji byashaganywa.#24.29 Osome Isaya 13.10; 34.4.
30«Oku buzinda, echimenyeso ch'okugaluka kwani nyoono Mwene oMuntu, nji chaboneka omu mpingu. N'abantu b'embaga zooshi z'omu gulu, nji baaba omu malibuko. Nji babona oku nyoono Mwene oMuntu, narhenga omu mpingu eyi ndi omu bichu n'obuhashe n'obukuuze bunene. 31Omushekera gunene, nji lyabandwa mo. Oku buzinda, nji narhuma bamalahika baani bagende omu nyunda zooshi z'egulu, kugusha abantu baani nagishogere.»
Omugani gw'omurhi gw'etiini
Mariko 13.28-32; Luuka 21.29-33
32«Muchiyigirize kulengera omugani gw'omurhi gw'etiini. Ogo murhi, egihe amarhabi maago mashogere, n'ebibaabi byaago byashishire, munaderha okw'echanda chiri hoofu. 33Leero, amango nji mwabona ebyo byooshi, mumenye oku nyoono Mwene oMuntu ndi hoofu na nkola ndi oku mulyango. 34Okuli, mbabwirire okw'abantu b'echi gisisi nji barhafa booshi embere ebyo byooshi bihike. 35Empingu n'egulu nji byagera, aliko ebinwa byaani byoowe, birhakagera chiro n'ehintyu.
Nnamahanga yenyine oyinji egihe ch'obuzinda
Mariko 13.32-37; Luuka 17.26-30,34-36
36«Aliko nta muntu yeeshi oyinji olo lusiku changwa ebishanji ebyo nji byajirika mo. Chiro n'abamalahika b'empingu, changwa naani Mwene oMuntu rhurhenji, Daarha yenyine ye yinji. 37Nk'oku byaliiri omu siku za Noowa, ntyo ku nji byaba amango nyoono Mwene oMuntu nji nagaluka. 38Kwenge embere w'ezo siku z'emisuuka minene, abantu baliiri kulya n'okunywa, baliiri gushaba n'ogushabwa, guhika olusiku Noowa ajaaga omu nkuge. 39Abo bantu, barhamenyaga ebyajirika guhika amango emisuuka minene ebaheeka booshi.
«Ntyo kunjibyaaba amango nyoono Mwene oMuntu nji nagaluka. 40Mw'amo mango, bantu babiri nji baaba bali omu shwa, muguma nj'aheekwa n'owindi nj'alekwa. 41Bakazi babiri nji baaba bali basha oku lusho luguma, muguma nj'aheekwa n'owindi nj'alekwa.
42«Boboola mutarame, kwenge murhamenyere olusiku Nnawenyu nj'agaluka mo. 43Muyinji bwinja, nyina enju nk'amenyaga ebishanji bihe by'obudufu egishambo chayinja mo kuzimba, ankataramiire n'okulanga enju yaage erhashandwaga. 44Cho girhumire, nenyu muyoorhe eyi mugirheganyize, kwenge nyoono Mwene oMuntu nji nagaluka omu bishanji murhamenyere.»
Omugani gw'omukozi muhemusi n'orhali muhemusi
Luuka 12.41-48
45«Nde oli mukozi orhali muhemusi onagwerhe obwenge? Omukozi oli nk'oyo, y'olaala nnahamwabo aheere obwimangizi bw'abandi bakozi baage y'abahe ebiryo oku bishanji bikwaneene. 46Agishwe oyo mukozi, akaba nnahamwabo akagaluka, anamushimaane achiri akola akoola kaasi. 47Okuli, mbabwirire okw'oyo nnahamwabo nj'amujira mwimangizi w'ebikulo byaage byooshi. 48Aliko akaba oyo mukozi ali muntu mubi, n'oguchiderhesa omu murhima gwage ntya: ‹Nnahamweerhu alegamire kugaluka.› 49Anaja arhondera kulema ashuurha abaabo bakozi na kulema alya n'okunywa haguma n'abarhamiizi. 50Leero, nnahamwabo nj'agaluka olusiku arhakengereere, n'oku bishanji arhamenyere. 51Elugulu w'ebyoola, nnahamwabo nj'amushuurha bweneene n'okumuhana kuguma na kulaala banahana endyaalya. N'oku buzinda, anamukabula ahantu nj'alakira n'okulibuka bweneene.»
Currently Selected:
Matayo 24: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
