Matayo 13
13
Omugani guyerekeere omuhinzi
Mariko 4.1-9; Luuka 8.4-8
1Mw'olo lusiku, Yeesu ahuluka omu nju, anagenda kuyikala aha burhambi bw'enyanja. 2Abantu banene bamuyegeera. Echo charhuma ashonera omu chombo n'okuyikala mo. Echigusho chooshi ch'abantu chayoorha chiyimangire emushengo.
3Yeesu abayigiriza myaazi minene kulengera emigani. Ababwira ntya: «Haliiri omuhinzi muguma wajaaga kubyaala. 4Abeere ali abyaala, embeke ziguma zarhogera aha burhambirhambi bw'enjira. Enyunyi zayinja n'okulya zo. 5Ezindi zarhogera omu lukalabuye, ahantu aharhali budaka bunene. Zamera juba kwenge obudaka bwabaaga bugeehere. 6Aliko ezuuba lyabeere lyakola, lyaziyoosa. Na kwenge zirhaligwerhe emizi minene, zayuuma. 7Ezindi zarhogera omu mishaaki. Eyo mishaaki yabeere yakula, yazifundeeza. 8Aliko ezindi mbeke zarhogera omu budaka bwinja. Zabeere zakula, zayeeza amalehe. Ziguma zayeeza amalehe egana, n'ezindi makumi gali ndarhu, n'ezindi makumi masharhu. 9Ola ogwerhe amarhwi ayunve!»
Egirhuma Yeesu ayigiriza omu migani
Mariko 4.10-12; Luuka 8.9-10
10Enyuma z'ebyo, abigirizwa ba Yeesu bamuyegeera n'okumubaza ntya: «Waliha! Gichi girhuma onaderha n'abantu omu migani?» 11Naye abashubiza ntya: «Mwabo mwabishuliirwe okumenya ehwe ly'oBwami bw'empingu. Aliko abandi boowe barhabishuliirwaga okulimenya. 12Kwenge omuntu ogwerhe akantu nj'ayushulirwa akandi, naye anagwarha bintu binene. Aliko omuntu orhagwerhe kantu, nj'anyegwa chiro na hila hityu akengerere oku agwerhe. 13Echo chogirhuma nderha nabo omu migani. Kwenge abo bantu banalola sy'aliko barhabona, banayunviiriza sy'aliko barhayunva changwa barhamenyerera. 14Leero, byayeneere oku bo ebi binwa omuleebi Isaya aderhaga ntya:
‹Okuyunva, mwayunva, aliko murhamenyerera.
Okulola, mwalola, aliko murhabona.
15Kwenge aba bantu bajirire emirhima yaabo kuba mizibu,
bafukire amarhwi maabo,
banazibize ameesho maabo,
yi barhabonaga, barhanayunvaga,
changwa barhampindamukiraga.
Kwenge akaba bankampindamukire, nakabafumize.›#13.15 Osome Isaya 6.9-10.
16«Aliko mwabo, mugishirwe bulaala ameesho menyu yi mabona na marhwi menyu yi mayunva! 17Okuli mbabwirire, baleebi banene n'abantu banene bakwaneene embere za Nnamahanga, baligifinjire kubona oku bimuli mwabona ko, aliko barhabibonaga ko. Banaligifinjire kuyunva oku bimuli mwayunva ko, aliko barhabiyunvaga ko.
Yeesu ahuguula omugani guyerekeere omuhinzi
Mariko 4.13-20; Luuka 8.11-15
18«Mujaage mwayunviriza ech'ogo mugani g'omuhinzi guderhere. 19Embeke zarhogeraga aha burhambirhambi bw'enjira, zishushanyizwe n'abantu banayunva eChinwa ch'oBwami bwa Nnamahanga, aliko barhachimenya. Oku buzinda, Shetaani anayinja n'okugikuula omu mirhima yaabo. 20Embeke zarhogeraga ahantu h'amabaale, zishushanyizwe n'abantu banayunva eChinwa cha Nnamahanga n'oguchiyankiriira n'obushagaluke bunene. 21Aliko, echo Chinwa girhaseera omu mirhima yaabo. Banajira nk'oku chiderhere omu bishanji bigeeke, amango amaganya changwa amalibuko mahikaga elugulu w'eChinwa cha Nnamahanga, ho n'aho banaleka obwemeezi bwabo. 22Ezindi mbeke zarhogeraga omu mishaaki, zishushanyizwe n'abantu bayunva eChinwa cha Nnamahanga, aliko amalibuko m'egulu n'enyifinjo zibi z'ebikulo, byanafundeeza cho omu mirhima yaabo, kwanarhuma echo Chinwa girhagwarha amalehe. 23Zila mbeke zarhogeraga omu budaka bwinja, zoowe zishushanyizwe n'abantu banayunva eChinwa cha Nnamahanga n'oguchimenya. Oku buzinda, echo Chinwa chanayeeza amalehe omu mirhima yaabo. Baguma banayeeza malehe egana, n'abandi makumi gali ndarhu n'abandi makumi masharhu.»
Omugani guyerekeere ebirhi bibi
24Yeesu abachiira ogwindi mugani, aderha ntya: «Obwami bw'empingu bushushanyizwe na muntu muguma wabyaalaga emburho nyinja omu shwa lyaage. 25Aliko lusiku luguma obudufu, amango abantu booshi babaaga balyaamire, omushombanyi waage ayinja n'okubyaala ebirhi bibi omu ngano, anachigendera. 26Engano zabeere zamera n'okuyaasa, ebyo birhi bibi nabyo byabonekana.
27«Abaja ba nyina eshwa bayinja kumubwira ntya: ‹Waliha, k'arhali mburho nyinja wabyaalaga omu shwa lyaawe? Ngahe leero ebi birhi bibi birhengeere?› 28Naye abashubiza ntya: ‹Omushombanyi ye wajirire ntyo.› Abo baja baashuba kumubaza ntya: ‹K'oshondere rhuje kubishigulanga?› 29Aliko abashubiza ntya: ‹Nangwa! Hali okuntu mwakabishigula haguma n'engano. 30Mubileke bikulire byooshi haguma guhika amango m'ogushaluula. Amo mango nji nabwira abashaluuzi ntya: "Murhange mushigule ebirhi bibi munabigushe bilundo-bilundo n'okubichumika. N'oku buzinda mugushe engano omu nguli yaani."›»
Omugani guyerekeere ehibeke hye haradaali
Mariko 4.30-32; Luuka 13.18-21
31Yeesu abachiira guno gwindi mugani, aderha ntya: «oBwami bw'empingu bushushanyizwe n'ehibeke hye haradaali muntu muguma arhoolaga anahibyaala omu shwa lyaage. 32Ehyo hibeke hye hityu omu mburho zooshi. Aliko hyabeere hyamera, hyaaba murhi munene kulusha eyindi mirhi yooshi y'omu shwa, oku bulyo enyunyi zinayinja n'okuyumbaka enyoogo zaazo omu marhabi maago.»
Omugani guyerekeere echachu
Luuka 13.20-21
33Yeesu ashuba kubachiira ogwindi mugani omu kuderha ntya: «oBwami bw'empingu bushushanyizwe n'echachu mukazi muguma arhoolaga, ayihira omu milengo esharhu y'eshaano omu gukwiza emigati, yooshi yarhunda.»
Enyigirizo kulengera emigani
Mariko 4.33-34
34Eyi myaazi yooshi, Yeesu aliiri ayibwira echigusho ch'abantu omu migani. Nta mwazi aderhere nabo buzira gukoleesa emigani. 35Aliiri ajira ntyo yi bijirike ebinwa omuleebi aderhaga ntya:
«Nji nalema naderha nabo omu migani,
nji nababwira ebinwa byalibishirwe gurhengera okulemwa kw'egulu.»#13.35 Osome Nanga 78.2.
Yeesu ahuguula omugani guyerekeere ebirhi bibi
36Yeesu abeere amaseezera echigusho ch'abantu, aja omu nju. Abigirizwa baage bamuyegeera n'okumubwira ntya: «Ogo mugani gw'ebirhi bibi byaliiri omu shwa, orhuhuguulire go.» 37Naye ababwira ntya: «Ola wabyaalaga emburho nyinja, ali Mwene oMuntu. 38Eshwa, liri gulu. Na zila mbeke zinja, zishushanyizwe n'abantu b'omu Bwami bwa Nnamahanga. Na bila birhi bibi, bishushanyizwe n'abantu ba Shetaani. 39N'omushombanyi wabyaalaga ebyo birhi bibi, ali Shetaani. N'eshaluulo, eshushanyizwe n'obuzinda bw'egulu. N'abogushaluula, bashushanyizwe na bamalahika. 40Nka kulaala ebirhi bibi binashiguulwa n'ogukabulwa omu muliro, ntyo ku nji byaaba oku buzinda bw'egulu. 41Kwenge Mwene oMuntu nj'arhuma bamalahika baage omu Bwami bwage, baje kugusha abantu booshi banarhuma abandi bajira ebyaaha, haguma n'abandi booshi bakola amabi. 42Abo bamalahika nji bakabula abo bantu booshi omu chibeeyi ch'omuliro, n'omoola nji balaka n'oguhekenya amenyo. 43Aliko abakwaneene nji babaraganya nka zuuba#13.43 Osome Danyeeri 12.3. omu Bwami bw'eShe waabo. Olaala ogwerhe amarhwi, ayunve!»
Omugani g'obuchire bwali bubishirwe
44«oBwami bw'empingu bushushanyiizwe n'obuchire bwabaga bubishirwe omu shwa. Obo buchire, muntu muguma abubona, anashuba kububisha. Oyo muntu ashagaluka bweneene anaja kuguza ebintu byaage byooshi, oku buzinda agula elyo shwa.
45«oBwami bw'empingu bushushanyiizwe kandi n'omurhimbuuzi muguma walishondeere kugula amagerha m'egichiiro. 46Abeere abona eyanga liguma lyagachiiro, aja kuguza ebintu byaage byooshi n'okuligula.»
Omugani guyerekeere omulaga
47«oBwami bw'empingu bushushanyiizwe kandi n'omulaga bahiraga omu nyanja, nago gwayirha ngasi buuko bw'efi. 48Omulaga gwabeere gwabumba efi, abashaana bagukuluulira emushengo. Oku buzinda, bayikala n'okulondoola efi. Ezikwiriire bazihira omu rhurhanda n'ezirhakwiriire bazikabula. 49Leero, nji byaaba ntyo oku buzinda bw'egulu. Bamalahika nji bayinja n'oguhira abantu babi olwabo lunda n'abakwaneene olwabo lunda. 50Nji bakabula abantu babi omu chibeeyi ch'omuliro, na m'ogoola muliro nji balaka n'oguhekenya amenyo.»
Omugani guyerekeere ebintu bihyaahya n'ebya miira
51Yeesu abaza abigirizwa baage ntya: «Ka mwayunviirhe ebi binwa byooshi?» Nabo bamushubiza ntya: «Neechi, rhwayunviirhe.»
52Oku buzinda, Yeesu abwira abigirizwa ntya: «Ngasi mwigiriza w'eRhegeko wayigirizwe elugulu w'oBwami bw'empingu, ashushanyiizwe na nyina enju oli wakuula omu buchire bwage ebintu bihyaahya n'ebya miira.»
Abantu b'eNazareeti balahira Yeesu
Mariko 6.1-6; Luuka 4.16-24
53Yeesu abeere amamala gucha eyi migani, arhenga ahoola. 54Agenda omu gishagala akuliraga mo. Ahikire mo, arhondera kuyigiriza abantu omu sinagoogi yaabo. Abantu basomerwa, barhondera guchibaza ntya: «Ngahe oyu muntu akuliire obwenge bunene nk'obu n'obuhashe b'okujira ebi bigiriginjo? 55Oyu k'arhali mugala w'ola mubeeji w'empaho? Nyina k'arhali ye Mariya? Na beene baabo ka barhali Yakobo, Yozefu, Simooni na Yuuda? 56Na baali baabo booshi ka rhurhalamire haguma nabo hano? Leero ngahe amakuula ebi byooshi?» 57Oko kw'arhuma barhamuyemeera.
Aliko Yeesu ababwira ntya: «Omuleebi anakengwa ahantu hooshi, aliko anabula olukengo omu gishagala chaage n'omu mulala gwage.»
58Yeesu arhajiraga ebisomereene binene eyo munda, kwenge abantu b'eNazareeti balilahire kuyemeera.
Currently Selected:
Matayo 13: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
