Matayo 12
12
Yeesu ye Nyina eSaabato
Mariko 2.23-28; Luuka 6.1-5
1Amo mango, lusiku luguma lw'eSaabato, Yeesu aliiri alenga omu mashwa m'engano. Abigirizwa baage baliiri nzara, echo charhuma balema bagenda eyi bali bayaagula emihuli y'engano n'okuyilya.
2 aBafarisaayo babeere babona ntyo, babwira Yeesu ntya: «Lola kw'ebiila abigirizwa baawe bali bajira, noobo eRhegeko lyeerhu lirharhuyemereere mpu rhuleme rhwabijira olusiku lw'eSaabato!»
3Yeesu abashubiza ntya: «Ka murhashubiraga gusoma ebi Daawudi ajiraga egihe ayunvaga enzara, yeewe haguma n'abaliiri naye? 4Ajaaga haguma nabo omu Nju ya Nnamahanga balya emigati ela abantu babaaga barhuliire Nnamahanga. Noobo, emigati eri nk'eyo barhaliyemereerwe kuyilya, olekere abadaahwa bonyine.#12.4 Osome 1Samweri 21.3-7; Balaawi 24.9.
5«Na kandi, ka murhashubiraga gusoma omu Rhegeko lya Muusa oku ngasi lusiku lw'eSaabato, abadaahwa banakola omu Nju ya Nnamahanga barhali bakenga eRhegeko liyerekere olo lusiku? Noobo barhali baganjwa oku bajiriire kubi. 6Aliko leero, mbabwirire oku hano, hali omukulu kulusha eNju ya Nnamahanga.
7«Nka mwamenyaga eby'echi chinwa chiderhere ntya: ‹Nshondere muyunvirane obonjo kulusha enterekeero zenyu.›#12.7 Osome Oseya 6.6. Murhakalemere mwahana abarhagwerhe bubi. 8Kwenge Mwene oMuntu ye Nyina eSaabato.»
Yeesu afumya omuntu ohunzize efune olusiku lw'eSaabato
Mariko 3.1-6; Luuka 6.6-11
9Yeesu arhenga ahoola, aja omu sinagoogi y'aBayaahudi. 10Mw'eyoola sinagoogi, mwaliiri omuntu walihunzize efune. Mwanaliiri abandi bantu bashondaga kugeregeza Yeesu. Baamubaza ntya: «K'eRhegeko lyeerhu liyemerere ogufumya omuntu olusiku lw'eSaabato?» Okumubaza ntyo, kwaliiri gushonda bamulege.
11Yeesu abashubiza ntya: «Nde mu mwabo nk'agwerhe ntaama nguma, n'eyo ntaama egarhogera omu kijokole olusiku lw'eSaabato, k'arhakayigwarha n'okuyikuula mo olo lusiku? 12Noobo omuntu ali w'akamaro kulusha entaama! Cho girhumire, biyemereerwe kujira amenja olusiku lw'eSaabato.» 13Yeesu aj'abwira ola muntu w'okuboko guhunzize ntya: «Lambuula efune yaawe.» Naye alambuula ela fune, nayo yashuba kuba ngumanguma nk'eyindi. 14aBafarisaayo baja barhenga ho, banagenda kujirira Yeesu akaligi k'okumuyirha.
Yeesu ye mukozi Nnamahanga agishogere
15Yeesu abeere akamenya ako kaligi k'aBafarisaayo, agirhengera mw'echo gishagala. Echigusho chinene ch'abantu bamukulikira. Afumya abalwala booshi. 16Aliko abarhegeka oku barhamumenyesaga oku bantu. 17Byabaaga ntyo, y'echo chinwa chijirike echi Nnamahanga aderhaga kugerera omuleebi Isaya ntya:
18«Mulole! Oyu ye mukozi waani nagishogere,
yeewe ye muzigirwa waani, eyi nsimiiswa naye!
Namuha oMuuka gwani,
nj'abalira abarhali Bayaahudi emyaazi y'okuli.
19Arhakajira buhaka na muntu, changwa kujira olwamo.
na nta muntu nji wayunva omulenge gwage embuga.
20Arhakavuna olusheke luchigonyere,
changwa arhakanazimya etara liri hoofu kuzima.
Arhajira ebyoola, guhika ayimanze ebinwa byooshi bikwaneene.
21N'eziino lyaage ly'abantu booshi nji balangalira.»#12.21 Osome Isaya 42.1-4.
Abantu baderha oku Yeesu ye Belizebuuli
Mariko 3.22-27; Luuka 11.14-23
22Enyuma z'ebyo, baleerhera Yeesu omuntu ofarhirwe n'omuzimu. Oyo muzimu abaga ajirire oyo muntu mpumi kandi nyamugama. Yeesu amufumya, anarhondera kuderha n'okubona. 23Eyo myaazi yasomeza echigusho chooshi ch'abantu. Barhondera kuderha ntya: «K'oyu muntu akaba mwene Daawudi?»
24Aliko aBafarisaayo babeere bayunva ntyo, baderha ntya: «Oyu muntu ali alibisya abazimu oku buhashe bw'omukulu w'abazimu oyirikwa Belizebuuli!»
25Okubona oku Yeesu aliiri amenyere enkengeero zaabo, ababwira ntya: «Akaba abantu ba bwami buguma bakalwisanya, obo bwami eyi bwamashandala. N'akaba abantu ba gishagala chiguma changwa ba mulala muguma nabo bakalwisanya, abo bantu nabo eyi bamashandala. 26N'akaba Shetaani agachilibisya yeewe yenyine, obwami bwage naye eyi bwamashandala. 27Mwabo muli mwaderha oku ndi nalibisya abazimu oku buhashe bwa Belizebuuli. Leero abantu b'echigusho chenyu nabo balibabalibisya oku buhashe bwa nde? Ntyo, abo bantu benyu bo bayerekana oku mwagirhebekere. 28Aliko nyoono ndinalibisya abazimu kugerera obuhashe bwa Muuka gwa Nnamahanga, n'echo cho chiyerekene okw'obwime bwa Nnamahanga bwahikiire ahagarhi kenyu.
29«Ntaaye wakagala kuja omu nju y'owaabo ogwerhe emisi, mpu amunyege ebintu byaage, nk'arhaza kumushweka. Sy'aliko amango amamushweka, akagala kumunyega ebintu byaage byooshi.
30«Orhali haguma naani, eyi ali mushombanyi waani. N'orhali angwasa kugusha, eyi ali ashandaaza.»
Omuntu nj'achiirwa olushinja gukulikirana n'ebinwa byaage
Mariko 3.28-29; Luuka 12.10
31«Cho girhumire mbabwirire okw'abantu nji bababalirwa ebyaaha byaabo byooshi n'ebidusi byaabo byooshi. Aliko, olaala nji wadukanga Muuka-Mutagatiifu, yeewe arhakababalirwa. 32Na ngasi yeeshi nji waderha kubi elugulu wa Mwene oMuntu, nj'ababalirwa. Aliko olaala nji waderha kubi elugulu wa Muuka-Mutagatiifu, arhakababalirwa mu lino gulu changwa omu lyayinja.»
Omurhi n'amalehe maago
Matayo 7.16-20; Luuka 6.43-45
33«Akaba omurhi guli mwinja, amalehe maago namo mali menja. N'akaba omurhi gubihire, amalehe maago namo maaba mabihire. Kwenge omurhi gumenyikana kugerera amalehe maago. 34Mwe buuko bw'enjoka! Gurhe mwe muli babi mwakagala kuderha emyaazi minja? Kwenge obuunu buderha ebiyunjwire omu murhima. 35Omuntu mwinja akuula ebintu binja omu murhima gwage mwinja. N'omuntu mubi akuula ebintu bibi omu murhima gwage mubi. 36Mbabwirire okw'olusiku lw'ogucha olushinja, abantu nji baburana elugulu w'ebinwa byooshi bya bushaabusha baderhere. 37Kwenge kulengera ebinwa byaawe nji waganjwa mushinganyanya na kulengera ebinwa byaawe nji wahanwa.»
Abigiriza b'amarhegeko n'aBafarisaayo bahema Yeesu echimenyeeso
Matayo 16.1-4; Mariko 8.11-12; Luuka 11.16,29-32
38Abigiriza b'amarhegeko baguma n'aBafarisaayo baguma baaja babwira Yeesu ntya: «Mwigiriza, rhushondere orhuyereke echimenyeeso chiguma.»
39Yeesu abashubiza ntya: «Abantu b'echi gisisi bali babi na bahemusi embere za Nnamahanga. Bali bashonda echimenyeeso, si ntaacho babona girhali chimenyeeso ch'omuleebi Yoona. 40Kwenge nk'oku Yoona ajiraga siku esharhu ezuuba n'obudufu omu nda y'efi nene,#12.40 Osome Yoona 2.1. ntyo ku Mwene oMuntu naye amala siku esharhu, zuuba n'obudufu ali omu shinda. 41Olusiku lw'ogucha olushinja, abantu b'eNinaawi nji bayimanga embere z'abantu b'echi gisisi n'okubahaniisa, bulaala boowe balekere ebyaaha byaabo byooshi amango bayunvaga enyigirizo za Yoona. Bunoola, hano hali olushire Yoona! 42Kandi olusiku lw'ogucha olushinja, mwamikazi w'eGarhongo#12.42 Osome 1 Baami 10.1-10. nj'ayimanga embere z'abantu b'echi gisisi n'okubahaniisa, bulaala yeewe arhengaga omu gihugo cha hale bweneene y'ayinje kuyunviriza obwenge bunene bwa Solomoono. Bunoola, hano hali olushire Solomoono!
Okugaluka kw'omuzimu omu muntu
Luuka 11.24-26
43«Amango omuzimu arhengere omu muntu, anayereera omu mpinga omu gushonda ahantu agahumukira. Akabula ho, 44anachibwira ntya: ‹Nagaluka omu nju yaani narhengaga mo.› Hano aba amagaluka mo, anayibugana mwanjaale, ebizizwe enarheganyizwe bwinja. 45Oku buzinda, anajirhoola bandi bazimu mushanvu babi kumulusha, booshi banaja mw'eyo nju n'okuyikala mo. Oboorhere bw'oyo muntu bwanaba bubi bweneene kulusha obwambere. Ntyo ku nji byaaba oku bantu b'echi gisisi chibi.»
Nyina wa Yeesu na beene baabo Yeesu
Mariko 3.31-35; Luuka 8.19-21
46Yeesu abeere achiri ashambaala n'echigusho ch'abantu, nyina na beene baabo bahika. Bayimanga embuga, kwenge balishondere kuganiira naye. 47Muntu muguma aja abwira Yeesu ntya: [«Nyoko na beene benyu bayimangire embuga. Bali bashonda kuganiira naawe.»]
48Yeesu amushubiza ntya: «Nde ye nyaama? Na beene beerhu bo bande?» 49Oku buzinda alambuula efune emunda abigirizwa baage bali n'okuderha ntya: «Tala, aba bo beene beerhu na nyaama! 50Kwenge ngasi yeeshi ojira obulonza bwa Daarha oli empingu, oyo ye mwene weerhu, mwali weerhu na nyaama.»
Currently Selected:
Matayo 12: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
