Matayo 11
11
Yohaana Mubatiiza arhuma abigirizwa baage emwa Yeesu
Luuka 7.18-35
1Yeesu abeere amala gurhegeka bala bigirizwa baage ekumi na babiri, arhenga aho hantu aliiri, aja kuyigiriza n'okubala oMwazi Mwinja omu bishagala by'eGalilaaya.
2Amo mango Yohaana Mubatiiza abaaga ali omu munyororo, ayunva ebi Kirisitu aliiri ajira. Arhuma baguma omu bigirizwa baage, 3ababwira ntya: «Mugende kubaza Yeesu ntya: ‹Ka wooyo, w'olaala walikwaneene kuyinja, changwa rhulinge owindi?›» 4Yeesu abashubiza ntya: «Muje kubalira Yohaana ebi muli mwayunva ko n'ebi muli mwabona ko. 5Bulaala empumi yi zabona, abahunzize yi balambagira, ababenzibenzi yi bacheeswa, ebihuli yi byayunva, abafu yi bafuuka n'abakene yi babalirwa oMwazi Mwinja. 6Agishirwe omuntu olaala orhakaleka obwemeezi bwage oku nyoono!»
Yeesu aderha elugulu wa Yohaana Mubatiiza
7Abo bigirizwa ba Yohaana babeere bagaluka, Yeesu arhondera kubwira olubaga lw'abantu elugulu wa Yohaana ntya: «Bichi mwajaaga kulola omu mpinga? Ka lusheke lushaganyizwe n'omuyaga? Nangwa! 8Bichi mwajaaga kulola? Ka muntu oyambeere emyambalo ekwirire? Nangwa! Abayambeere emyambalo ekwirire balama omu nju z'abaami! 9Bichi si mwajaaga mwaja kulola? Ka muleebi? Neechi! Mbabwirire oku yeewe ali mukulu kulusha omuleebi. 10Kwenge oyo Yohaana y'olaala biyandikirwe elugulu waage ntya omu Mandiko Matagatiifu:
‹Tala! Ntumire entumwa yaani embere zaawe,
y'agurheganyize enjira.›#11.10 Osome Malaaki 3.1.
11«Okuli, mbabwirire oku omu gulu lyooshi, harhashubiraga kuba omuntu olushire Yohaana Mubatiiza. Aliko oli mugeeke omu Bwami bw'empingu, yeewe ye mukulu kumulusha. 12Gurhengera amango Yohaana Mubatiiza aliiri ayaamagaza eChinwa cha Nnamahanga guhika mu zino siku, abantu yi balwisa oBwami bw'empingu. Obo bwami, entwali zo ziri zashonda kuburhoola oku miisi. 13Ebyo binwa byooshi byaderhwaga n'abaleebi booshi, n'omu Rhegeko lya Muusa guhika omu gihe cha Yohaana. 14N'akaba mwakagala kuyemeera, mumenye oku omuleebi Eliya waderhwaga oku ayinja, ali Yohaana. 15Olaala ogwerhe amarhwi ayunve!»
16«Abantu b'echiila gisisi nakabashushanya na bichi? Bashushire n'abaana bayikeere embuga eyi bali bajirisana omugalyo omu kuderha ntya:
17‹Rhwabazihiire omulizi,
murhanazinire.
Rhwabayimpiire enyimpo z'emishiibo,
murhanalakire!›
18«Kwenge Yohaana abeere ayinja, aliiri achilahiza kulya n'okunywa. Abantu balema baderha ntya: ‹Azimuhirwe!› 19Mwene oMuntu ayinjire, ali alya n'okunywa. Abantu bali baderha ntya: ‹Tala! Oyu muntu ali mudambi na kandi ali mulalu! Anali mwira w'abafurhiisa b'amakooli n'abandi bantu banyabyaaha!› Na chiro ntyo, obwenge bunene bwa Nnamahanga buli bwachiyerekana kulengera ebijiro byaage.»
Ebishagala byalahira kuyemeera Yeesu
Matayo 10.15; Luuka 10.12-14
20Yeesu aja arhondera gukalihira ebishagala ajiraga mo ebisomereene binene, bulaala abantu b'eyo barhalishondere kuleka ebyaaha. Aderha ntya: 21«Buhanya oku wooyo gishagala ch'eKoraziini! Na buhanya oku wooyo gishagala ch'eBetesayida! Kwenge najirire ebisomereene emwenyu. Ebyo bisomereene, nka nabijiraga omu gishagala ch'eTiiro n'ech'eSidoona, beene ebyo bishagala bakayambeere ebigunira n'oku gishiga oluvu omu kuyerekana oku balekere ebyaaha byaabo. 22Cho girhumire, mbabwirire oku olusiku lw'ogucha olushinja, mwabo nji mwahanwa kulusha abantu b'egishagala ch'eTiiro n'aba ech'eSidoona.
23«Naawe gishagala ch'eGaperinaumu, okengerere oku wazamulwa guhika empingu? Nangwa! Kuyandagazwa ku wayandagazwa guhika ekuzimu. Kwenge ebisomereene byajirikeene omu mwawe, nka byajirikanaga omu gishagala ch'eSodoomo, echo gishagala chakabeere gichiri ho zeene. 24Cho girhumire, mbabwirire oku olusiku lw'ogucha olushinja, mwabo nji mwahanwa bweneene kulusha abantu b'egishagala ch'eSodoomo!»
Yeesu akuuza Nnamahanga
Luuka 10.21-22
25Mw'amoola mango, Yeesu aderha ntya: «Daarha wee! Wooyo we nyina empingu n'egulu, ngukuzize, bulaala ebi bintu wabibishire abanyabwenge bunene n'abasomi, aliko wabibishuulira abaana badoorho. 26Neechi Daarha, ebyoola bikulikirene n'obulonza bwawe.
27«Daarha ampeere byooshi, nta muntu oyinji oMugala nk'arhali Daarha. Kandi nta muntu oyinji Daarha nk'arhali oMugala, na ngasi yeeshi oMugala ashondere kumuyeereka.»
28«Mweshi mwe muli mwalibuka n'emizigo elemereere, muyinje emwani, naani nabahumuusa. 29Muleme mwankenga, munaleme mwakulikira enyigirizo zaani, kwenge nyoono ngwerhe omurhima mwirhonzi. Mukajira ntyo, mwahumuuka. 30Ogukulikira enyigirizo zaani kuyanguhire, n'omuzigo nabaheesa gurhalemereere.»
Currently Selected:
Matayo 11: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
