पेरेरित 27
27
रोमघइन पावलके यात्‍रा
1जब हमरे जहाज चरहके इटालिया देसमे जइना निरनय होइल, तउ पावल आउर आकुर कइदिभर युलियसके जुम्‍मा लगाइलगिनें। उ साहि पल्‍टनके कप्‍तान रेहें। 2हमरे एड्‌रामिटेनोस सहरति आइल एकठोर जहाजमे चरहलि। उ जहाज एसिया इलाकक् समुन्‍दरके टिकरामे रहल तमान सहर हुइति जबइया रेहे। हम्‍मरसँघ माकेडोनिया इलाकक् थेसलोनिके सहरति आइल अरिस्‍तारखस नाउँक एक जनें बिस्‍वासि फेक रेहें। 3अउरे रोज हमरे सिदोन सहरमे पुगलि। हुँवाँ कप्‍तान युलियस पावलकेहें दया करके उनका सँघरियाभरिनतिरा जाक चहना चिझ मदत लहना अनुमति दहनें। 4जब हुँवाँति हमरे फेर जहाजमे चरहके यात्‍रा सुरु करलि, तउ आँधि आइलकेमारे हमरे साइपरस टापुक उल्‍टार हुइति गिलि। 5तउके हमरे किलिकिया आउर पामफिलिया इलाकक् लिग्‍घे-लिग्‍घे जहाजमे यात्‍रा करत लुकिया इलाकामे रहल माइरा सहरमे पुगलि। 6हुँवाँ कप्‍तान युलियस अलेक्‍जेन्‍डिरिया सहरति इटालिया देसमे जइना एकठोर जहाज पइनें आउर उ हम्‍हिन उहि जहाजमे चरहादहनें।
7हमरे ढेरे रोजतक धिरे-धिरे करत कररासँघ क्‍निडस सहरके लिग्‍घे पुगलि आउर आँधि उल्‍टाघइनति चललकेमारे हमरे आगे जाइ नाइसिक्‍लि। उहिकमारे हमरे दक्‍खिनघइन गइलि आउर केरेट टापुक उल्‍टार, सालमोने कहना जगाके पाँजार-पाँजर गइलि। 8हमरे बहुत दुखति टापुक पाँजर-पाँजर होक लासिया सहरके लिग्‍घे सुरछित बन्‍दरगाह#२७:८ बन्‍दरगाह: बन्‍दरगाह कहलके पानिजहाज रुक्‍ना जगा या पानिजहाजके इस्‍टेसन आहे। कहना जगामे पुगलि।
9हम्‍हिन हुँवाँ पुगना ढेरे समय लागल रेहे आउर समुन्‍दरके यात्‍रा फेक डर लगतिक होइल रेहे। उहिबखत यहुदिभरिनके उपबास बइठना बखत फेक उरासिकल रेहे। तउ पावल ओइन अइसे कहिके चेताउनि दहनें, 10“देखो सँघरियो, मोहके अइसन लागत आहे कि, अगर हमरे हिंयाँति आकुर आगे जइबा कहलेति, जहाज आउर मालसमान केल नास नाइहोइ, पर हमरे फेक मरे सिक्‍बा।” 11पर कप्‍तान पावलन कहल बात नाइपतेक जहाज चलइया आउर जहाजके मालिकके बातमे ढेरे बिस्‍वास करनें। 12इ बन्‍दरगाहमे जारके बखत कटइना सुबिधाजनक नाइरेहे। उहिकमारे जइसे फेक फोनिक्‍समे पुगके हुँवाँ जारके बखत कटइना सल्‍लाह दहनें। फोनिक्‍स केरेटके एकठोर बन्‍दरगाह आहे, जउन दक्‍खिन-पाछे आउर उत्‍तर-पाछेघइन घुमल आहे।
समुन्‍दरमे आँधि आइल
13जब दक्‍खिनघइनति धिरे-धिरे बयार चले लागल, अब हम्‍मर योजना पुरा होइ कहिके सोंचके, ओइनें जहाजके लङ्‌गर#२७:१३ लङ्‌गर: चलत जहाजकेहें समुन्‍दरमे रोकेक तहन लस्‍रिलइक बाँधल पानिमे तरेतक डरना लोहक साधन हे। निकरनें आउर केरेट टापुक पाँजर-पाँजर होक जाइ लगनें। 14पर तुरन्‍ते टापुघइनति उत्‍तर-पुरबि कहना एकठोर बन्‍ना आँधि चलल। 15आँधि हम्‍मर जहाजकेहें तोपल आउर उ आँधिक आगे हम्‍मर कुछु सिप नाइलागल आउर हमरे जहाजकेहें आँधि जहाँ लइजाबे कहिके सुधारेक छोर दहलि। 16जब हमरे क्‍लउडा कहना एकठोर चुन्‍नि टापुक पाँजर होक गिलि तउ जहाज आँधिति थोरिक बचे सिकल। उहिकमारे जहाजके पाछेघइन बाँधल सुरछ्‍छा किस्‍तिकेहें मुस्‍किलति बचाइ सिक्‍लि। 17ओहकापाछुक किस्‍ति चलइयाभर किस्‍तिकेहें जबरजत्‍ति तानके जहाज उप्‍पर धरनें आउर जहाजकेहें ठुल्‍हा-ठुल्‍हा लस्‍रिलइक बलगरति बँधनें। अब जहाज सिरटिसके टिकराघइन कहुँ बारुमे धसजाइ कि कहिके ओइनें डरइनें। उहिकमारे ओइनें जहाजके पाल गिरादहनें आउर जहाजकेहें आँधिक भरोसामे छोरदहनें। 18दुसरा रोज बन्‍ना आँधिक कारन समुन्‍दर जोरति हल्‍कोरा मरति रहल, तउ ओइनें जहाजमे रहल मालसमान फकाइ लगनें, 19आउर तिसरा रोज, ओइनें अपना हाथति जहाज चलइना समानभरिन समुन्‍दरमे फकादहनें। 20ढेरे रोजतक हमरे ना घाम ना ते तारा देखेक पइलि। बन्‍ना आँधि चलत रेहे आउर आखिरमे हम्‍मर बचना आसा फेक हिराइल।
21ओइन खाना नाइखाइल ढेरे रोज हुइगेल रेहे। उहिकमारे पावल सब जन्‍हिन आगे ठरहेक अइसे कहनें, “देखो सँघरियो, तोइनें मोर बात मानके केरेटति जहाज नाइचलाइक परना रेहे। अगर तोइनें मोर सल्‍लाह मन्‍तो कहलेति, अइसन दुख आउर मालसमान नस्‍ट फेक नाइहोइत। 22पर अब मइ तोइन बिन्‍ति करत आहुँ तोइनें हरेस नाखाउ। जहाज नास होइत फेक, हमरे नाइमरबा। 23मइ परमेस्‍वरके मनइ आहुँ आउर उनका सेबा करतुँ। आज रात उनका एक जनें स्‍वरगदुत मोर तिरा ठरहेक अइसे कहनें, 24‘ए पावल, नाडराउ, तुम रोमि महाराजाके आगे ठरहिबो। देखो, परमेस्‍वर अपना दयालइक तुम्‍हरसँघ यात्‍रा करइया सब जन्‍हिन परान बचइहें।’ 25उहिकमारे सँघरियो हिम्‍मत करो, काहिक्‍कि परमेस्‍वरन कहल इ बात सहिके पुरा करहें कहिके मइ बिस्‍वास करले आहुँ। 26पर अब हमरे एकठोर टापुक टिकरामे लरबा।”
जहाज चकनाचुर होइल
27अइसे हमरे आँधिमे परके एड्‌रियास समुन्‍दरमे ढकेलल चउदा रोज होइल रेहे। तउ आधा रातघइन जहाज चलइयाभर, हमरे कुइ एकठोर जगाके टिकरामे पुगलि कहिके अनुमान करनें। 28उहिकमारे ओइनें कत्‍ता गहिंर पानि आहे कहिके लस्‍रिमे पथ्‍रा बाँधके पानिमे गिराके नापे लगनें। पानि नप्‍नेंत पानिक गहिंराइ सइतिस मिटर आहे कहिके पता होइल आउर एक घरिक पाछुक फेर नप्‍नेंत छब्‍बिस मिटर गहिंर होइल पइनें। 29उहिबखत ओइनें जहाज कुइ चट्‌टानमे ठुकि कि कहिके डरइनें। उहिकमारे ओइनें जहाजके पाछेक चारठोर लङ्‌गर तरे गिरादहनें आउर हालि-हालि भिन्‍हिक होबे कहिके पराथ्‍ना करे लगनें। 30उहिबखत, जहाज चलइयाभर भाजेक खोजत रेहें। उहिकमारे ओइन आगे लङ्‌गर गिराइ ढार बहाना करके सुरछछा किस्‍तिकेहें समुन्‍दरमे गिराइत रेहें। 31पर पावल कप्‍तान आउर सिपाहिभरिन कहनें, “अगर यि मनइभर जहाज छोरके भज्‍हें कहले ति, हमरे कुइ फेक नाइबचबा।” 32उहिकमारे इ बात सुनके सिपाहिभर जहाजमे बाँधल सुरछछा किस्‍तिक लस्‍रिभरिन काटके किस्‍तिकेहें बहेदहनें।
33भिन्‍हिक हुइनातिति पहिले पावल सब जन्‍हिन कुछ खाइक परता कहिके अइसे कहनें, “तोइनें चिन्‍ता करके कुछ नाइखाक बइठल चउदा रोज हुइगेल। 34उहिकमारे अब तोइनें कुछ खइना चिझ खाउ कहिके बिन्‍ति करत आहुँ। काहिक्‍कि बाँचेक तहन कुछ ना कुछ खइहिंकपरि। तोइनें नाडराउ, तोइन कुहिक मुरियक एकठोर बार फेक नस्‍ट नाइहोइ।” 35अत्‍ते कहिके उ रोटि लहनें आउर सबका आगे परमेस्‍वरकेहें धन्‍यबाद चरहाक खाइ लगनें। 36तउके आकुर जनें फेक हिम्‍मत पाक कुछ खइना चिझ खइनें। 37उ जहाजमे हमरे जम्‍मा दुइ सउ छेहतर जनें रिहि। 38ओइनें सब जनें अग्‍घाइततक खाइलपाछुक जहाज हलुक करेक तहन सब गेहुँ समुन्‍दरमे फकादहनें।
39उजियर होइलपाछुक बारु केल रहल जगा देखा परल, पर उ जगाकेहें ओइनें चिन्‍हें नाइसिक्‍नें। तउके ओइनें ओहका पाँजर जहाज चलाक लइजिना बिचार करनें। 40तउ ओइनें लङ्‌गरमे बाँधल लस्‍रिभरिन काटके लङ्‌गरकेहें फेक समुन्‍दरमेहें छोरदहनें। ओहकापाछुक ओइनें जहाज घुमइना बहनामे बाँधल लस्‍रि फेक छुरनें आउर जहाजके आगेक पाल उप्‍पर उठाक बयार चललघइन घुमइनें आउर जहाजकेहें समुन्‍दरके टिकराघइन लइगिनें। 41पर पानिमे रहल बारुक रासमे जहाज लरल आउर अगला भाग जमिनमे धसगेल आउर चले नाइसिकल। तउके पछला भाग पानिक हल्‍कोरक दुमलइक टुटे लागल।
42उहिबखत कइदिभर पउँरके भाज जिहें कहिके सिपाहिभर सुँच्‍नें आउर ओइन मरना बिचार करनें। 43पर कप्‍तान पावलकेहें बचइना बिचार करलकेमारे कुहिक फेक मारे नाइदहनें। बलकि पउँरे सिक्‍ना जत्‍ता पहिले पउँरके जइयो, 44आउर बाँकि रहबइयाभर जहाजके टुटल-टुटल फलियामे या जहाजके खन्‍डा पकरके जाउ कहिके आदेस दहनें। अइसे हमरे सब जनें सकुसल टिकरामे पुगलि।
© 2024 (Active), Mother Tongue Translators Society and Wycliffe Bible Translators, Inc. All rights reserved.