पेरेरित 26
26
1ओहकापाछुक राजा अग्‍रिपास पावलकेहें कहनें, “अब तुम अपना पछमे मन्‍के सिक्‍बो।” उहिकमारे पावल हाथ फइलाक अपना बचाबमे अइसे कहनें:
2“राजा अग्‍रिपास, यहुदिभर मोर उप्‍पर लगाइल सब दोसके बचाबमे तुम्‍हर आगे बतइना मउका पाइलके मारे मइ खुसि आहुँ, 3काहिक्‍कि तुम्‍हिन यहुदिभरिनके चलुन आउर बिबादके बात बरहियस पता आहे। उहिकमारे मोर कहल बात बरहियस सुनदेउ कहिके तुम्‍हिन बिन्‍ति करत आहुँ।
4“सब यहुदिभर मोहके छोटेतिति चिन्‍हले आहें। मइ अपना देसमे आउर यरुसलेममे कइसन जिन्‍दगि जिउँ कहिके ओइन बरहियस पता आहे। 5पहिले मइ फरिसि कहना यहुदि धरमके एक कट्‌टर समुहक मनइ रुहुँ आउर ओहमे मइ कट्‌टर जिन्‍दगि बिताउ। अगर ओइनें चहिंहें कहले ति, अपनें फेक इ बातके साछि देहे सिक्‍हें।#पेरे २३:६; फिलि ३:५ 6परमेस्‍वर हम्‍मर पिता पुरखाभरिनसँघ करल बाचामे आसा करलकेमारे आज मोर मुद्‍दा हिंयाँ चलत आहे। 7उहि बाचाके आसामे हम्‍मर बारा कुल फेक दिन-रात परमेस्‍वरके सेबा करत आहें। हे राजा अग्‍रिपास, परमेस्‍वर इ बाचा येसुमे पुरा करसिक्‍ले आहें कहिके मइ बिस्‍वास करलकेमारे, यहुदिभर मोहके दोस लगाइत आहें। 8परमेस्‍वर मरल मनइभरिन फेर जिति परहें कहना बातमे तोइनें काहिक बिस्‍वास करे नाइसिक्‍तो?
9“हुइना ते, नासरत सहरके येसुमे बिस्‍वास करइया सबके बिरोध करेक परता कहिके मोहके फेक लागल रेहे। 10मइ यरुसलेममे फेक उस्‍ते करनु। खास पुजारिभरिनति अधिकार पाक परभु येसुमे बिस्‍वास करइया ढेरे मनइभरिन जेलमे थुनेक लगइनु आउर ओइन मिरतु दन्‍ड देहे बखत मइ फेक ओइन बिरुधमे अपना मत दहले रुहुँ। 11मइ ओइन ‘अबति मइ येसुमे बिस्‍वास नाइकरमुँ’ कहिके केहेक लगाइक तहन ढेरे दाउँ ठाउँ-ठाउँके यहुदिभरिनके बइठक घरमे सजाय देहेक लगइनु। मइ ओइनति दिक्‍काक अउरे देसके सहर-सहरमे जाक फेक ओइन सतइनु।#पेरे ८:३; २२:४-५
12“अइसे एक रोज मइ खास पुजारिभरिनके अधिकार आउर आग्‍याँ पाक दमस्‍कस सहरमे यिहि कामके तहन जाइत रुहुँ, 13हे राजा, उहि रोज दुपहरके बखत रेहे आउर स्‍वरगमहति घामति जेदा उजियर मोर आउर मोरसँघ यात्‍रा करइयाभरिनके चारोघइन चम्‍कल। 14तउके हमरे सब जनें जमिनमे गिरलि, तउ हिब्‍रु भासामे मइ अइसन कहल अबाज सुन्‍नु, ‘साउल, ए साउल, तुम मोहके काहिक सतइतो? तुम मोरसँघ लराइ करबो कहलेति तुम अपनेंकेहें दुख दहबो?’ 15तउ मइ पुछनु, ‘हे परभु, तुम कउन बाटो?’ परभु मोहके कहनें, ‘मइ येसु आहुँ, जेहके तुम सताइत बाटो। 16अब उठो आउर अपना गोरमे ठरहेउ! काहिक्‍कि मइ तुम्‍हिन मोर सेबक आउर मोर बारेम गबाहि दहना बनाइक तहन तुम्‍हरतिरा देखा परल आहुँ। उहिकमारे आज तुम्‍हर देखल बात आउर पाछुक मइ तुम्‍हिन दिखइना आकुर सब बात तुम मनइभरिन बताइक परि। 17मइ तुम्‍हिन तुम्‍हर अपनें यहुदि जाति आउर अउरे जातके मनइभरिन तिरा पठाइत आहुँ। मइ तुम्‍हिन ओइनति छुटकारा दहमु। 18तुम्‍हिन उ मनइभरिनके आँखि खोल देहेकपरि आउर ओइन अन्‍धियरमहति उजियर आउर सइतानके सक्‍तिमहति परमेस्‍वरघइन घुमाइकपरि। तउके परमेस्‍वर ओइन पाप मिटादिहें आउर ओइनें परमेस्‍वरमे बिस्‍वास करलकेमारे उनका छाँटल उनका मनइभरिनसँघ सँगतिमे बइठेक पइहें।’
19“उहिकमारे, हे राजा अग्‍रिपास, मइ स्‍वरगति आइल दरसनके आग्‍याँकारि हुइनुँ आउर 20सबति पहिले दमस्‍कसमे, ओहकापाछुक यरुसलेममे, सब यहुदिया इलाकामे बइठइयाभरिन आउर अउरे जातके मनइभरिन फेक अपना पाप मानके परमेस्‍वरमे घुमो कहिके परचार करनु। तउके बरहिया काम करके अपना जिन्‍दगि बदलल बात दिखाउ कहिके फेक कहनु।#पेरे ९:२०,२८-२९ 21उहिकमारे यहुदिभर मोहके मन्‍दिरमे पकरके मारेक खोजत रेहें। 22पर आजुक रोजतक परमेस्‍वर मोहके मदत करले आहें। उहिकमारे मइ हिंयाँ जमा होइल सब मेलक मनइभरिनके आगे ठरहेक गबाहि दहत आहुँ। अगम्‍जानिभर आउर मोसन मन्‍कल बचन जरुर पुरा होइ कहिके बताइल बाहेक मइ आकुर ढेर कुछु फेक बचन परचार नाइकरले आहुँ। 23अइसे ‘मुक्‍ति दिबइया खिरिस्‍टकेहें दुख भोगेकपरि आउर उ मरलमहति फेर जिति होक उठइयाभरिनमे सब ति सुरुक हुइहें। तउके उ अपना यहुदि मनइभरिन आउर अउरे जातके मनइभरिन फेक मुक्‍ति पइना उजियरके बारेम बतइहें’ कहिके अगम्‍जानिभर कहले रेहें।”#यसइ ४२:६; ४९:६; १ कोर १५:२०
24पावलन मन्‍कतिमन्‍कत बिचमे फेस्‍तस चिल्‍लाक कहनें, “रे पावल, तइं बउराइ गेल बाटे! तोर ढेर गियान तोहके बउरबइले आहे!”
25पर पावल कहनें, “माननिय फेस्‍तस, मइ बउराइल नाइआहुँ, पर मइ सत्‍य-सत्‍य बात बतकाइत आहुँ। 26काहिक्‍कि इ सब बात राजा अग्‍रिपासकेहें पता आहे आउर उहिकमारे मइ उनका आगे नाइडराक बताइ सिक्‍मु। जात्‍तिक इ सब बात उ बरहियस पता पइले आहें काहिक्‍कि इ बात गुपचुपमे होइल नाइआहे। 27हे राजा अग्‍रिपास, का तुम अगम्‍जानिभरिनके मन्‍कल बात बिस्‍वास करतो? मोहके पता आहे कि, तुम बिस्‍वास करतो।”
28तउ राजा अग्‍रिपास पावलकेहें कहनें, “का तुम मोहके खिरिस्‍टियन होइक तहन अक्‍केघरिम मन्‍बाडरम कहिके सुचले बाटो?”
29तउ पावल राजा अग्‍रिपासकेहें जबाफ दइक कहनें, “चाहे अक्‍केघरिम होबे कि लम्‍बा बखतमे होबे, हे राजा, तुम केल नाइ, पर आज मोर कहल बात सुनइया सब मनइभर फेक मोर ढार बिस्‍वासि होमें कहिके परमेस्‍वरसँघ पराथ्‍ना करतुँ। पर मोर हाथमे लागल इ हथकडि भर तोइनमे नालागे।”
30तउ राजा अग्‍रिपास, बन्‍ना हाकिम फेस्‍तस, बरनिकि आउर ओइनसँघ बइठइया सब जनें उठनें। 31ओइनें हुँवाँति बाहिर जाक एक अउरेसँघ मन्‍कत अइसे केहे लगनें, “इ मनइ मिरतु दन्‍ड पइना या जेलमे जइना कुछु अपराध करले नाइआहे।” 32उहिबखत राजा अग्‍रिपास फेस्‍तसकेहें कहनें, “इ मनइ इ मुद्‌दक कारबाहिक तहन रोमि महाराजातिरा बिन्‍ति नाइकरतें कहलेति, यिनके छोरदहले ति फेक हुइजाइत।”
© 2024 (Active), Mother Tongue Translators Society and Wycliffe Bible Translators, Inc. All rights reserved.