पेरेरित 28
28
पावल माल्टा टापुमे
1अइसे हमरे बरहियस बाँचके टिकरामे आइलपाछुक उ टापुक नाउँ माल्टा आहे कहना बात हमरे पता पइलि। 2उ जगामे बइठइया मनइभर हम्हिन ढेरे पिरेम दिखइनें। उहिबखत पानि आइत रेहे आउर जार बरहल रेहे, उहिकमारे ओइनें आगि सुलगाक हम्हिन तापेक बुलइनें। 3जब पावल एक बोझा झँखरा बिटोरके आगिमे डरनें, तउ आगिक रापकेमारे एकठोर साँप निकरल आउर उनका हाथमे बिरझ्गेल। 4तउ पावलके हाथमे साँप झुलल देखके उ जगक मनइभर एक-अउरेसँघ अइसे केहे लगनें, “इ मनइ पक्के फेक ज्यानमारा होइ। इ समुन्दरमहति ते बच्गेल, पर सहिके नियायति बचे नाइसिकल।” 5पर पावल उ साँपकेहें आगिमे झिटकार दहनें आउर उनके कुछु फेक नाइहोइल। 6पर उ जगक मनइभर, “पावल थोरिक देरमे बिसलइक सुजके मरजाइ” कहिके देखत रेहें। पर ढेरे देरतक पावलकेहें कुछु फेक नाइहोइल देखके अपना बिचार बदलके अइसे केहे लगनें, “इ मनइ ते सहिके देबता आहे।”
7पब्लियस नाउँक एक जनें मनइ उ टापुक परधान रेहें। हम्मर पुगल जगाके लिग्घे उनका जमिन रेहे। उ हम्हिन अपना घरमे स्वागत करनें आउर तिन रोजतक हम्मर बरहियस सेबा-सत्कार करनें। 8उहि बखत पब्लियसके बाबा जुरि आक आउर आउँ परके बिमार रेहें। तउ पावल उनका तिरा जाक अपना हाथ धरके पराथ्ना करदहनें आउर उ तुरन्ते निक हुइनें। 9इ देखके, उ टापुक आकुर बिमार मनइभर फेक अइनें आउर ओइनें निक हुइगिनें। 10उ जगक मनइभर हम्हिन ढेरे आदर करे लगनें आउर जब हमरे जहाजमे चरहके आइ लगलि, तउ ओइनें हम्हिन चहना सब चिझ दहनें।
पावल माल्टाति रोममे
11तिन महिना पाछुक, हमरे अलेक्जेन्डिरियक एकठोर जहाजमे चरहलि। उ जहाज जारके सिजनमे माल्टा टापुमे रेहे। उ जहाजके आगेघइन जुरहिया देबतक मुरतिके नाहा कारहल रेहे। 12हमरे सुराकुसाइ नाउँक सहरमे पुगलि आउर हुँवाँ तिन रोजतक बइठलि। 13ओहकापाछुक हुँवाँति हमरे चललि तउके रेगियन कहना सहरमे पुगलि। अउरे रोज दक्खिनघइनति बयार चलल आउर अइसे दुइ रोजपाछुक हमरे पटिओलि नाउँक सहरमे पुगलि। 14उ सहरमे हमरे कुछ बिस्वासिभरिन पइलि। ओइनें हम्हिन एक हप्तातक बइठो कहिके बिन्ति करनें। हमरे हुँवाँ एक हप्ता बइठके रोम सहरघइन गिलि। 15जब रोम सहरके बिस्वासिभर हम्मर बारेम सुन्नें। ओइन महति कत्ता जनें अप्पिया बजारतक अइनें आउर कत्ता जनें तिन-पाटि कहना जगातक भेंटे अइनें। ओइन देखके पावल हिम्मत पइनें आउर परमेस्वरकेहें धन्यबाद दहनें।
पावल रोम सहरमे परचार करनें
16जब हमरे रोम सहरमे पुगलि, तउ पावलकेहें एक जनें सिपाहिक रेखदेखमे एकठोर घरमे अक्केले रेहेक तहन अनुमति मिलल।
17तिन रोजपाछुक पावल हुँका यहुदि अगुवाभरिन बुलाइक पठइनें। जब ओइनें जमा हुइनें, उ कहनें, “ए दादाभइयाभर, मइ हम्मर जाति आउर पिता पुरखातिति चलत आइल रितिरिबाजके बिरुधमे कुछ फेक नाइकरले रुहुँ। पर यहुदि दादा भइयाभर मोहके यरुसलेममे पकरके रोमि सरकारके हाथमे सउँपदहनें। 18रोमि सरकार छानबिन करलपाछुक मोहके छोर देहेक खोजत रेहें, काहिक्कि ओइनें मोहके मिरतुदन्ड दहना योग्य कुछु फेक दोस नाइपइनें। 19पर यरुसलेमके यहुदि अगुवाभर मोर बिरोध करनें। तउके अपना यहुदि जातिनके बिरुधमे दोस लगइना मोर कुछु इच्छा नाइरेहे। तभु मोहके ‘रोमि महाराजा मोर नियाय करदिहें’ कहिके बिन्ति करना कर लागल।#पेरे २५:११ 20उहिकमारे तोइनसँघ भेट करेक तहन आउर बातचित करेक तहन तोइन हिंयाँ बुलइले आहुँ। काहिक्कि हम्मर इस्राइलि मनइभरिन आसा करल मुक्ति दिबइया खिरिस्टमे बिस्वास करलकेमारे मइ अइसे सिंकरिलइक बँधल गेल आहुँ।”
21तउ इ बात सुनके ओइनें पावलकेहें कहनें, “हमरे तुम्हर बारेम यहुदियाति ना कुछु पत्र पइले होइ, ना ते हम्मर कुइ मनइभर आक तुम्हर बिरुधमे हम्हिन कुछ नाइ बरहिया बात सुनइले आहें। 22पर हमरे ते तुम्हर बिचार सुनेक खोजत होइ, काहिक्कि हमरे तुम्हर इ नम्मा समुहक बिरुधमे मनइभरिन जँहर-तँहर मन्कत पता पइले होइ।”
23ओहकापाछुक ओइनें पावलके बात सुनेक तहन एक रोज तुक्नें। उ रोज ढेरे जनें पावलके डेरामे अइनें आउर भिन्हिकतिति साहिंजुनतक पावल परमेस्वरके राज्यक बारेम ओइन सिछ्छा दहनें। पावल मोसक बेबस्था आउर अगम्जानिभरिन लिखल किताबमहति येसुके बारेम बुझइति ओइन बिस्वासमे लइना कोसिस करनें। 24पावलके बात सुनके कुछ मनइभर बिस्वास करनें आउर कुछ मनइभर बिस्वास नाइकरनें। 25जब ओइन बिचमे बादबिबाद परलपाछुक, ओइन जइनाति अग्दे पावल ओइन कहनें, “पबित्र आत्मा तोइन पुरखाभरिन अपना अगम्जानि यसइयातिति कहल बात सहि आहे। काहिक्कि उ अइसे मन्कनें, 26‘इ मनइभरिन तिरा जाक अइसे कहो,
तोइनें मोर बचन सुन्ना ते सुन्तो,
पर नाइबुझ्तो।
दिखना ते दिखतो,
पर देख नाइपइतो!
27काहिक्कि यि मनइभरिनके मन कठोर आहे,
येन कान बहिरा होइल आहे।
येने अपना आँखि बन्द करले आहें,
नहित येने आँखिलइक दिखतें,
कानलइक सुन्तें,
मनलइक बुझ्तें।
तउके येने अपना मन मोरघइन घुमइतें
आउर मइ येन निक करतुँ।’#यसइ ६:९-१०
28“उहिकमारे तोइन इ पता होबे कि, परमेस्वर मुक्तिक सुसमाचार अउरे जातके मनइभरिनके तहन पठइले आहें आउर ओइनें उ सुन्हें।” 29[पावल इ बात कहिसिकलपाछुक यहुदिभर एक-अउरेसँघ बादबिबाद करति चलगिनें।]
30पावल दुइ बरसतक रोममे अपना लहल डेरामे बइठनें आउर उनके भेंटे अबइया सब जन्हिन स्वागत करें। 31पावल नाइडराक परमेस्वरके राज्यक बारेम परचार करति परभु येसु खिरिस्टके बारेम सिछ्छा देहें आउर कुइ फेक उनके नाइरोकें।
© 2024 (Active), Mother Tongue Translators Society and Wycliffe Bible Translators, Inc. All rights reserved.