पेरेरित 25
25
फेस्तसके आगे पावल
1फेस्तस यहुदिया इलाकामे बन्ना हाकिम होक आइल तिन रोजपाछुक कइसरियाति यरुसलेम गिनें। 2हुँवाँ खास पुजारिभर आउर यहुदि अगुवाभर उनकासँघ भेट करनें आउर पावलके बिरुधमे अपना बात सुनइनें 3तउके ओइनें पावलकेहें यरुसलेममे पठादेउ कहिके फेस्तससँघ बिन्ति करनें, काहिक्कि ओइनें पावलकेहें डगरमे मारदहना बिचार करले रेहें। 4पर फेस्तस ओइन कहनें, “पावल ते कइसरियक जेलमे आहे आउर मइ फेक हुँवाँ हालिये जाइत आहुँ। 5उहिकमारे तोइनमहति कुइ अगुवाभर मोरसँघ जाइक चहतियाँ कहलेति पठादेउ। अगर पावल नाइबरहिया काम करले आहे कहलेति ओइनें हुँये मुद्दा डारे सिक्हें।”
6ओहकापाछुक फेस्तस लगभग आठ-दस रोजतक ओइनसँघ यरुसलेममे बइठके कइसरियामे लउटनें। ओहका कल्हिक रोज फेस्तस अदालतके नियाय-आसनमे बइठके पावलकेहें हुँवाँ लइना आग्याँ दहनें। 7जब पावल हुँवाँ अइनें, तउ यरुसलेमति आइल यहुदिभर पावलके चारोघइन ठरहेक उनका बिरुधमे ढेरे दोस लगइनें। पर ओइनें एकठोर फेक दोसके परमान देहे नाइसिक्नें। 8तउ पावल अपना पछमे मन्कति अइसे कहनें, “मइ ना ते यहुदिभरिनके बेबस्थक बिरुधमे ना मन्दिरके ना ते रोमि सरकारके बिरुधमे कुछ गल्ति करले आहुँ।”
9पर फेस्तस यहुदिभरिन खुसि पारेक तहन पावलकेहें कहनें, “मइ तुम्हिन यरुसलेम पठइमु, आउर तुम्हर मुद्दक फइसला मइ हुँये करदहमु। अइसन करलेस कइसन होइ?”
10तउ पावल कहनें, “मइ रोमि सरकारके अदालतके आगे ठरहेल आहुँ आउर हिंये मोर नियाय होइक परि। मइ यहुदिभरिनके बिरुधमे कुछु खराब काम नाइ करले आहुँ कहिके तुम्हिन फेक बरहियस पता आहे। 11अगर मइ मिरतु दन्ड पइना योग्यक कुछ काम करले आहुँ कहलेति, मइ मरेक तहन फेक तयार आहुँ। पर यहुदिभरिन लगाइल यि दोस झुठ आहें कहलेति, कुइ फेक मोहके ओइन हाथमे सउँपे नाइसिकि। मइ रोमि महाराजाकेहें मोर नियाय करदेउ कहिके बिन्ति करत आहुँ।”
12तउ फेस्तस अपना सल्लाह दिबइयाभरिनसँघ छलफल करके पावलकेहें कहनें, “तुम रोमि महाराजाके आगे बिन्ति करलकेमारे अब मइ तुम्हिन रोमि महाराजातिरा पठादहमु।”
फेस्तस राजा अग्रिपाससँघ सल्लाह लहनें
13कुछ रोजपाछुक फेस्तसके दरसन करेक तहन राजा अग्रिपास आउर उनका बहिनि बरनिकि कइसरिया सहरमे अइनें। 14ओइनें दुनु जनें कुछ रोज कइसरियामे बइठनें आउर फेस्तस पावलकेहें दोस लगाइल बारेम राजा अग्रिपासकेहें अइसे बतइनें, “हिंयाँ फेलिक्सके थुनके धरल एक जनें कइदि आहे। 15जब मइ यरुसलेममे रुहुँ, उहिबखत खास पुजारिभर आउर यहुदि अगुवाभर ओहका बिरुधमे मुद्दा डरनें, आउर येहके दन्ड देहेक तहन मोहके बिन्ति करनें। 16पर मइ ओइन कहनु, ‘कुइ मनइकेहें दोस लगाइल बात नाइपाइततक रोमि सरकारके बेबस्थामे दन्ड दहना चलुन नाइआहे। आउर दोस लगाइल मनइ दोस लगइया मनइभरिनके आमने-सामने होक अपना पछमे सफाइ दहना मउका पाइक परता। 17उहिकमारे, जब दोस लगइयाभर हिंयाँ अइनें, तउ मइ देर नाइकरके कल्हिक रोज नियाय आसनमे बइठके पावलकेहें अदालतमे लइना हुकुम दहनु।’ 18तउके पावलकेहें बिरोध करइयाभर ठरहेक दोस लगाइ लगनें, पर मइ मोर सोंचल ढार ओइनें कुछु फेक नाइबरहिया बातके दोस लगाइ नाइसिक्नें। 19ओइन मुद्दा ते ओइन अपनें धरमके बारेम आउर येसु कहना एक जनें मरल मनइक बारेम रेहे। पर पावल उहि मरल येसु अभे फेक जिति आहें कहिके दाबि करत रेहें। 20इ सब बिसयक बारेम कइसे खानतलासि करे सिक्मु कहिके मइ अल्मलइनु। उहिकमारे मइ पावलकेहें पुछनु, ‘तुम्हर यि मुद्दक फइसला यरुसलेममे करलेस कइसन होइ?’ 21पर पावल रोमि महाराजाति इ मुद्दक फइसला होबे कहिके बिन्ति करलकेमारे महाराजा तिरा नाइपठाइततक ओहके जेलमे धरना हुकुम दहनु।”
22इ सुनके राजा अग्रिपास फेस्तसकेहें कहनें, “मइ इ मनइक बात अपनें सुनेक पइतुँत बरहिया रहत।”
तउ फेस्तस कहनें, “कल्हि तुम ओहका बात सुनियो।”
राजा अग्रिपासके आगे पावल
23ओहका अउरे रोज राजा अग्रिपास आउर बरनिकि धुमधामसँघ बइठक घरमे आक सेनापतिभर आउर सहरके खास मनइभरिनसँघ बइठनें। तउ फेस्तस हुकुम दहलपाछुक पावलकेहें बइठकमे लाइलगेल। 24ओहकापाछुक फेस्तस कहनें, “राजा अग्रिपास आउर हिंयाँ जमा होइल सब खास मनइभर, तोइनें सब जनें इ मनइकेहें देखत बाटो। यरुसलेम आउर हिंका सब यहुदिभर यिनके मारेक परि कहिके यिनका बिरुधमे मोर तिरा माँग करत आहें। 25पर इ मनइ मिरतु दन्ड पइना लायकके कुछु नाइबरहिया काम करल मइ नाइपइनु आउर इ अपनें रोमि महाराजाकेहें बिन्ति करलकेमारे मइ उनकातिरा पठइना निरनय करनु। 26पर इ मनइक बारेम महाराजाकेहें लिखके पठाइक तहन मोरतिरा कुछु बिसय फेक नाइआहे। उहिकमारे येहके जाँचके येहका बारेम लिखेक तहन कुछ बात पाइ सिकुँ कहिके मइ येहके तोइन आउर खास करके राजा अग्रिपासके आगे लइले आहुँ। 27काहिक्कि एकठोर कइदिक बिरुधमे कुछु दोस नाइदिखाइततक, उनके महाराजातिरा पठइना मोहके बरहिया नाइलागल।”
© 2024 (Active), Mother Tongue Translators Society and Wycliffe Bible Translators, Inc. All rights reserved.