पेरेरित 24
24
पावल बन्‍ना हाकिम फेलिक्‍सके आगे
1पाँच रोजपाछुक, सबति बन्‍ना पुजारि हननिया आउर कुछ यहुदि अगुवाभर, तरतुल्‍लस नाउँक एक जनें वकिलकेहें लइके कइसरियामे अइनें। ओइनें सब जनें पावलके बिरुधमे बन्‍ना हाकिमके आगे मुद्‌दा पेस करनें। 2जब पावलकेहें बन्‍ना हाकिमके आगे लाइलगेल, तउ तरतुल्‍लस पावलके बिरोधमे दोस लगइति अइसे केहे लगनें, “माननिय फेलिक्‍स जि, तुम्‍हर सासनमे हमरे यहुदिभर ढेरे सान्‍तिमे होइ आउर तुम हम्‍मर देसके तहन ढेरे सुधारके काम फेक करले बाटो। 3इ बात हमरे महसुस करले होइ आउर इ बातमे हमरे तुम्‍हर रिनि फेक होइ। 4पर तुम्‍हर ढेर बखत नाइलइके, दया करके हम्‍मर बात छोटकरिमे सुनदेउ कहिके मइ बिन्‍ति करत आहुँ। 5हमरे इ मनइकेहें जँहर-तँहर हुलदङ्‌गा करइया आउर सन्‍सारभरके सब यहुदिभरिनके बिचमे अन्‍दोलन करइया बिद्‌रोहि मनइ कहिके चिन्‍हले होइ। आउर नासरि दलके खास नेता फेक यिहि आहे। 6इ मनइ मन्‍दिरकेहें अपबित्‍र बनाइक खोजत रेहे, उहिकमारे हमरे येहके पकरलि। [हमरे अपना बेबस्‍था ढार येहके कारबाहि करना बिचार करले रिहि, 7पर सेनापति लुसियस हम्‍मर तिरा आक जबरजत्‍ति हम्‍मर हाथति येहके छिनके लइगिनें, 8आउर तुम्‍हर आगे मुद्‌दा करेक तहन आग्‍याँ दहनें।] अब तुम येहका छानबिन करके हम्‍मर करल मुद्‌दक बात सहि आहे कि, नाइआहे कहिके पता लगाइ सिक्‍बो।” 9तउ हुँवाँ रहल आकुर यहुदिभर फेक तरतुल्‍लसन कहल बात सहि आहे कहिके सहमत हुइनें
10तउ बन्‍ना हाकिम पावलकेहें मन्‍कना इसारा दहलपाछुक पावल अइसे कहनें, “तुम ढेरे बरसतिति यहुदि जातिभरिनके नियायधिसके रुपमे काम करत बाटो कहिके मोहके पता आहे। उहिकमारे मइ खुसिसँघ अपना बचाबमे बयान दहत आहुँ। 11मइ यरुसलेमके मन्‍दिरमे परमेस्‍वरके आराधना करे गेल बारा रोज ति ढेर नाइहोइल आहे। इ बात तुम पता लगाइ सिक्‍बो। 12मोहके दोस लगइयाभर ना ते, मोहके मन्‍दिरमे कुहिकसँघ बादबिबाद करत पइनें, ना यहुदिभरिनके बइठक घरमे या सहरमे मनइभरिन हुलदङ्‌गा करेक तहन फुलाइत पइनें। 13मोहके अब्‍भे लगाइल दोसके सबुत फेक येने देहे नाइसिक्‍हें। 14पर मइ इ बात तुम्‍हर आगे सुइकार करत आहुँ कि, येसुमे बिस्‍वास करलपाछुक मुक्‍ति मिल्‍ता कहना बातकेहें येने झुठा कहतियाँ, पर मइ उहि बातकेहें मानके अपना पुरखाभरिनके परमेस्‍वरके आराधना करतुँ। मइ यहुदि बेबस्‍था आउर अगम्‍जानिभरिनके किताबमे लिखल सब बातमे फेक बिस्‍वास करतुँ। 15मइ फेक येन ढार परमेस्‍वर धरमि आउर अधरमि सब मनइभरिन मरलमहति जिति करहें कहिके आसा करतुँ। 16उहिकमारे मइ परमेस्‍वर आउर मनइभरिनके नजरमे सुद्‌ध बिबेकति जिन्‍दगि बितइना कोसिस करतुँ।
17“मइ ढेरे बरस पाछुक अपना जातके मनइभरिन सहयोग भेटि देहे आउर परमेस्‍वरकेहें बलिदान चरहाइक तहन यरुसलेम आइल रुहुँ। 18जब येने मोहके मन्‍दिरमे पइनें, उहिबखत मइ सुद्‌ध हुइना बिधि पुरा करसिक्‍ले रुहुँ। हुँवाँ ना ते मनइभरिन भिर रेहे, ना हुलदङ्‌गा रेहे।#पेरे २१:१७-२८ 19पर हुँवाँ एसिया इलाकाति आइल कुछ यहुदिभर फेक रेहें। अगर मोर बिरुधमे ओइन कुछ बात रहत कहलेति, ओइनें तुम्‍हरतिरा आक मोर बिरुधमे मुद्‌दा डारे सिक्‍तें। 20कि ते यहुदिभरिनके महासभामे मोर का दोस पइले रेहें, हिंयाँ रहबइयाभर बतामें। 21ओइनें मोहके एकठोर बातमे केल दोस लगाइ सिक्‍हें, मइ बन्‍ना अबाजमे चिल्‍लाक कहले रुहुँ ‘मरल मनइ फेर जिति होक उठहें कहना बिस्‍वास करलकेमारे मोर मुद्‌दा चलत आहे।’”#पेरे २३:६
22बिस्‍वासिभर “येसुमे बिस्‍वास करलपाछुक मुक्‍ति मिल्‍ता” कहिके कहना बात फेलिक्‍सकेहें बरहियस पता रेहे। उहिकमारे उ बात सुनलपाछुक ओइन कहनें, “सेनापति लुसियस हिंयाँ आइलपाछुक मइ येहका फइसला करदहमु।” 23ओहकापाछुक फेलिक्‍स कप्‍तानकेहें अइसे हुकुम दहनें, “पावलकेहें बरहियस रेखदेख करियो आउर उनके कुछ छुट दियो, तउके उनके भेट करे अबइया आउर उनका तहन चहना चिझ लादिबइया सँघरियाभरिन नारुकियो।”
24ओहका कुछ रोज पाछुक फेलिक्‍स अपना मेहरुवा दुरसिल्‍लाकेहें लइके अइनें। उ यहुदि जातके रेहें। तउके उ पावलकेहें बुलइनें आउर खिरिस्‍ट येसुमे बिस्‍वास करना बारेम पावलति सुन्‍नें। 25जब पावल परमेस्‍वरके नजरमे सहि जिन्‍दगि बिताइक परता, अपना मनकेहें अधिनमे धरेक परता आउर परमेस्‍वरके नियाय करना रोज लिग्‍घे आइत आहे कहना बात करनें, तउ फेलिक्‍स डराक कहनें, “आजुक तहन हुइगेल, अब जाउ, मउका मिलित, मइ फेर तुम्‍हिन बुलइमु।” 26फेलिक्‍स पावलति घुस पाइजिमुँ कि कहना आसा करले रेहें। उहिकमारे उ पावलकेहें घरिघरि बुलाक बात करें।
27पर दुइ बरस बितलपाछुक, फेलिक्‍सके बदलामे परकिअस फेस्‍तस बन्‍ना हाकिम हुइनें। तउ फेलिक्‍स यहुदिभरिन खुसि पारेक तहन पावलकेहें जेलमे रेहे दहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.