पेरेरित 23
23
1पावल महासभाघइन एकटक लगाक देखके अइसे कहनें, “देखो भइयो, आजुक रोजतक परमेस्‍वरके नजरमे मइ सुद्‍ध बिबेकति जिन्‍दगि बितइले आहुँ।” 2तउ इ सुनके सबति बन्‍ना पुजारि हननिया पावलके लिग्‍घे ठरहेक मनइभरिन उनका मुहमे मरना हुकुम दहनें। 3तउ पावल सबति बन्‍ना पुजारि हननियाकेहें कहनें, “ए कपटि! परमेस्‍वर फेक तुम्‍हिन दन्‍ड दिहें। तुम बेबस्‍था ढार मोर नियाय करेक बइठल बाटो, तभुफेक तुम बेबस्‍थक बिरुधमे जाक मोहके पिटना हुकुम दहतो?”#मत्‍ति २३:२७-२८
4पावलके लिग्‍घे ठरहेल मनइभर उनके कहनें, “का तइं परमेस्‍वरके सबति बन्‍ना पुजारिक अपमान करते?”
5पावल कहनें, “देखो भइयो, उ सबति बन्‍ना पुजारि आहें कहिके मोहके पता नाइरेहे, काहिक्‍कि धरमसास्‍त्‍रमे अइसे लिखल आहे, ‘तुम अपना सासकके बिरुधमे खराब बात नाइमन्‍कियो।’”#पर्‌स २२:२८
6जब उ महासभामे सदुकि आउर फरिसिभर फेक आहें कहिके पावल पता पइनें, तउ पावल बन्‍ना अबाजमे चिल्‍लाक कहनें, “देखो भइयो, मइ एकठोर फरिसि आहुँ आउर मोर पुरखाभर फेक फरिसि रेहें। मरल मनइ फेर जिति होइ कहिके आसा आउर बिस्‍वास करलकेमारे मोर मुद्‌दा चलत आहे।”#पेरे २६:५-६; फिलि ३:५
7पावल इ बात कहलपाछुक उ महासभामे रहल फरिसि आउर सदुकिभरिनके बिचमे बातिकबाता होइल आउर मनइभरिनके बिचमे फुट होइल। 8काहिक्‍कि सदुकिभर मनइ मरलपाछुक फेर जिति हुइतियाँ कहिके बिस्‍वास नाइकरतियाँ। ओइनें स्‍वरगदुत आउर आत्‍मा फेक नाइरहता कहिके कहतियाँ। पर फरिसिभर इ सबमे बिस्‍वास करतियाँ।#मत्‍ति २२:२३; मर्‌क १२:१८; लुका २०:२७ 9तउ उहि बातलइक महासभामे बन्‍ना हल्‍ला होइल। फरिसि दलके कुछ बेबस्‍थक गुरुभर ठरहेक सदुकिभरिनके घोर बिरोध करति अइसे कहे लगनें, “हमरे ते इ मनइकमे कुछु गल्‍ति नाइपइति। अगर कुइ आत्‍मा या स्‍वरगदुत येहकासँघ मन्‍कले आहें कहलेति का होइल ते?”
10जब बातिकबाता बरह्‌ति गेल, तउ भिरके मनइभर पावलकेहें नोंचके खन्‍डिखन्‍डा करडरहें कहिके सेनापति डरइनें। उहिकमारे सेनापति सिपाहिभरिन तरे जाक जबरजत्‍ति ओइन बिचमहति पावलकेहें ब्‍यारेकमे लाइक तहन हुकुम दहनें।
11उहि रात परभु पावलतिरा ठरहेक कहनें, “पावल, हिम्‍मत करो! जइसे तुम यरुसलेममे मोर बारेम साछि दहलो, उस्‍ते तुम्‍हिन रोममे फेक मोर बारेम साछि देहेक परि।”
पावलकेहें मारदहना योजना
12जब भिन्‍हिक होइल, तउ यहुदिभर पावलकेहें मारेक तहन योजना बनइनें। ओइनें “पावलकेहें नाइमारततक हमरे ना खइबा ना कुछ पिबा” कहिके किरिया खइनें। 13पावलकेहें मारेक तहन किरिया खबइयाभर चालिस जन्‍हिन ति फेक ढेर रेहें। 14ओहकापाछुक ओइनें खास पुजारि आउर अगुवाभरिन तिरा जाक कहनें, “हमरे पावलकेहें नाइमारततक ना खइबा ना कुछु पिबा कहिके किरिया खइले होइ। 15उहिकमारे अब, तोइनें महासभक सदस्‍यभर मिलके सेनापतिकेहें ‘हमरे पावलकेहें आकुर बरहियस सोधपुछ करेक खोजत होइ’ कहिके उनके महासभाति निकारके तरे लाइक बिन्‍ति करियो। तउ महासभामे अइतिआइत हमरे ओहके डगरमे मारडरबा।”
16पर पावलके भइनेंकेहें इ योजनक बारेम पता होइलपाछुक, उ ब्‍यारेक भित्‍तर जाक पावलकेहें इ सब बात सुनादहनें। 17तउ पावल तुरन्‍ते एक जनें कप्‍तानकेहें बुलाक कहनें, “इ जोंन लउँराकेहें सेनापति तिरा लइजाउ, काहिक्‍कि इ उनकासँघ कुछ बात करेक खोजत आहे।” 18उहिकमारे उ कप्‍तान पावलके भइनेंकेहें सेनापति तिरा पुगाक कहनें, “जेलमे परल पावल मोहके बुलाक इ जोंन लउँराकेहें तुम्‍हरसँघ कुछ बात कहना आहे कहनें। तभिकमारे मइ येहके तुम्‍हरतिरा लादहले आहुँ।”
19उहिबखत उ सेनापति पावलके भइनेंक हाथ पकरके एकघइन लइजाक पुछनें, “तइं मोहके का कहेक खोजत बाटे?”
20उ जोंन लउँरा कहनें, “कल्‍ह यहुदिभर पावलकेहें आकुर सोधपुछ करेक तहन महासभामे ला दियो कहिके तुम्‍हरसँघ बिन्‍ति करइये आहें। 21पर तुम ओइन कहल बात नाइमनियो, काहिक्‍कि चालिस जन्‍हिन ति फेक ढेरे जनें ‘पावलकेहें नाइमारततक हमरे ना खइबा ना ते कुछ पिबा’ कहिके किरिया खइले आहें। ओइनें पावलकेहें मारेक तहन लुकल आहें आउर तुम सहमति जनादहबो कहिके आसा करले आहें।”
22उहिकमारे सेनापति पावलके भइनेंकेहें, “तइं मोहके कहल इ खबर कुहिक फेक नाइसुनइये” कहिके कहनें आउर ओहके पठादहनें।
पावलकेहें बन्‍ना हाकिम फेलिक्‍सतिरा पठाइलगेल
23ओहकापाछुक उ सेनापति दुइ जनें कप्‍तानभरिन बुलाक कहनें, “आज रात नउ बजेघइन दुइ सउ जनें सिपाहि, सत्‍तर जनें घुरबा चरहइया आउर दुइ सउ जनें भाला बुक्‍ना सिपाहिभरिन, कइसरिया सहरमे जाइक‌तहन तयार पारो। 24तोइनें पावलके तहन घुरबा तयार पारो आउर उनके बरहियस बन्‍ना हाकिम फेलिक्‍सतिरा पुगाउ।” 25तउ सेनापति बन्‍ना हाकिम फेलिक्‍सकेहें अइसे कहिके एकठोर पत्‍र लिखनें:
26“माननिय बन्‍ना हाकिम फेलिक्‍स जि, मइ क्‍लउडियस लुसियसति दुवासलाम आहे।
27यहुदिभर पावलकेहें पकरके मारेक खोजत रेहें। पर इ मनइ ते रोमि नागरिक आहें कहिके मइ पता पाइलके मारे सिपाहिभरिन लइजाक ओइनति छुटाक लइनु। 28यहुदिभर यिनके का कारनति दोस लगाइत आहें कहिके बुझेक तहन मइ यिनके महासभामे लइगिनु। 29पर मइ यिनकामे ते मिरतु दन्‍ड पइना या जेलमे थुन्‍ना योग्‍यक कुछु फेक दोस नाइपइनु। इ मनइक बिरुधमे लगाइल दोस ओइन बेबस्‍थक बारेम केल आहे। 30जब यिनके यहुदिभर मारदहना योजना बनइले आहें कहिके मइ पता पइनु, तउ यिनके तुरन्‍ते तुम्‍हरतिरा पठइले आहुँ आउर यिनका बिरुधमे दोस लगइयाभरिन फेक तुम्‍हरतिरा उजुर दियो कहिके हुकुम दहले आहुँ।”
31उहिकमारे सिपाहिभर सेनापतिक हुकुम पाइलके मारे पावलकेहें राता रात एन्‍टिपाट्‌रिस सहरतक पुगादहनें, 32तउके अउरे रोज सिपाहिभर पावलकेहें घुरबा चरहइया सिपाहिभरिनके जुम्‍मा दइक ब्‍यारेकमे लउटनें। 33जब ओइनें कइसरियामे पुगनें, हुँवाँ सेनापतिन लिखल पत्‍र सहिंत पावलकेहें बन्‍ना हाकिम तिरा लइनें। 34पत्‍र पर्‌हसिकल पाछुक, बन्‍ना हाकिम पावलकेहें पुछनें, “तुम्‍हर घर कहाँ आहे?”
पावल कहनें, “मोर घर किलिकिया इलाकामे आहे।”
35तउ उ बन्‍ना हाकिम कहनें “अइसन आहे कहलेति, तुम्‍हिन दोस लगइयाभर हिंयाँ आइलपाछुक केल मइ तुम्‍हर मुद्‌दा दिखमु।” तउ बन्‍ना हाकिम पावलकेहें हेरोदके दरबारमे रहल जेलमे धरेक तहन हुकुम दहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.