पेरेरित 22
22
1पावल कहनें, “ए मोर दादाभइया आउर बाबाभर हो, तोइन आगे मोर अपना पछमे कहना बात अब सुनो।” 2जब ओइनें पावलकेहें हिब्‍रु भासामे मन्‍कत सुन्‍नें, तउ ओइनें सब जनें चुपइनें।
3तउके पावल ओइन कहनें, “मइ किलिकिया इलाकक् टारसस सहरमे जल्‍मल एकठोर यहुदि मनइ आहुँ, पर इ यरुसलेम सहरमे बारहल आहुँ आउर धरमगुरु गमलिएलति हम्‍मर पुरखातिति चल्‍ति आइल यहुदि बेबस्‍थक सिछ्‍छा बरहियस सिखले आहुँ। आज तोइनें परमेस्‍वरमे जत्‍ता उत्‍साहित बाटो, मइ फेक उत्‍ते उत्‍साहित रुहुँ।#पेरे ५:३४-३९ 4उहिकमारे मइ इ मुक्‍तिके डगरमे निंगइया मनइभरिन दुख दहनु आउर कत्‍ता जन्‍हिन मरनु फेक। तउके मइ लोग आउर मेहरुवाभरिन पकरके जेलमे डारदहनु। 5इ मोर कहल बात सहि आहे कहिके सबति बन्‍ना पुजारि आउर महासभक सब सदस्‍यभर फेक बताइ सिक्‍हें। ओइनेहें मोहके दमस्‍कस कहना सहरमे रहल यहुदि दादाभइयाभरिन पकरना अधिकार पत्‍र दहले रेहें। उ पत्‍रमे मोहके हुँवाँ रहल बिस्‍वास करइया मनइभरिन पकरेक मिल्‍ना अधिकार पइले रुहुँ। तउके मइ ओइन यरुसलेममे लाक दन्‍ड देहेक तहन दमस्‍कस सहरमे जाइत रुहुँ।#पेरे ८:३; २६:९-१० 6मइ लगभग दुपहरके समय दमस्‍कसके लिग्‍घे पुगनुत, बदरिमहति अरबरगि उजियर ज्‍योति मोर आँजर पाँजर चम्‍कल। 7मइ जइति-जाइत भुइंमे गिरनु आउर उहि बखत अइसे कहत एकठोर अबाज सुन्‍नु, ‘साउल, ए साउल, तुम मोहके काहिक सतइतो?’ 8तउ मइ पुछनु, ‘परभु, तुम कउन बाटो?’ उ कहनें, ‘मइ नासरतके येसु आहुँ, जेहके तुम सतइतो।’ 9हुँवाँ मोरसँघे जत्‍ता जनें मनइभर रेहें, ओइनें उजियर केल दिखनें, पर मोरसँघ मन्‍कइयक अबाज भर नाइसम्‍खनें। 10उहिकमारे मइ कहनु, ‘हे परभु, अब मइ का करुँ?’ उहिबखत परभु मोहके कहनें, ‘तुम उठके दमस्‍कस सहरमे जाउ, तउके तुम्‍हिन करेक परना काम मइ हुँये कहमुँ।’ 11उ तेज उजियरके मारे मइ कुछु फेक देखे नाइसिक्‍नु, तउ मोरसँघ रहबइयाभर मोर हाथ पकरके डुरेत दमस्‍कसमे लइगिनें।
12“हुँवाँ हननिया नाउँक एक जनें मनइ रेहें। उ मोसक बेबस्‍था पालन करइया मनइ रेहें आउर हुँका सब यहुदिभर उनका आदर करें। 13उ मोर तिरा अइनें आउर मोर पाँजर ठरहेक मोहके अइसे कहनें, ‘ए साउल भइया, तुम फेर दिखना हुइजाउ।’ उ अत्‍ता कहतिकेल मइ फेर दिखना हुइगिनु आउर उनके फेक दिखनु। 14तउ उ कहनें, ‘तुम हम्‍मर पुरखाभरिनके परमेस्‍वरके इच्‍छा जानेक तहन, परम धरमि सेबक येसुकेहें देखेक आउर उनका मुहति मन्‍कल बात सुनेक तहन तुम्‍हिन छँटले आहें, 15काहिक्‍कि जउन-जउन बात तुम सुनले आउर दिखले बाटो, उ सब बिसयमे तुम मनइभरिनके आगे उनका साछि हुइबो। 16उहिकमारे अब तुम काहिक देर करत बाटो? उठके बप्‍तिस्‍मा लेउ आउर येसुके नाउँमे अपना पापति सुद्‌ध होउ।’
17“जब मइ हुँवाँति यरुसलेम लउटके अइनु आउर मन्‍दिरमे पराथ्‍ना करेबखत धियान मग्‍न हुइनुँ, उहिबखत मइ एकठोर दरसन दिखनु। 18येसुन मोहके अइसे कहत दिखनु, ‘यरुसलेमति हालि-हालि निकरके जाउ, काहिक्‍कि मोर बारेम दहल तुम्‍हर गबाहि येने गरहन नाइकरतियाँ।’ 19पर मइ कहनु, ‘हे परभु, मइ सब यहुदिभरिनके बइठक घरमे जाक तुम्‍हरमे बिस्‍वास करइयाभरिन जेलमे थुनल आउर पिटल बात सबके पता आहे। 20तुम्‍हर साछि दहना इस्‍तिफनसकेहें मारे बखत, मइ अपनें लिग्‍घे ठरहेक उनका हत्‍यामे फेक सहमत रुहुँ आउर उनका हत्‍या करइयाभरिनके लत्‍ता रेखदेख करत रुहुँ।’#पेरे ७:५८ 21पर परभु मोहके कहनें, ‘जाउ काहिक्‍कि मइ तुम्‍हिन बहुत दुर-दुरतक अउरे जातके मनइभरिनतिरा पठइमु।’”
22मनइभर हिंयेंतक केल पावलके बात सुन्‍नें, आउर बन्‍ना अबाजमे चिल्‍लाक अइसे कहनें, “अइसन मनइकेहें मरहिक परि! इ जिति रहना लायकके नाइआहे।” 23ओइनें अपना-अपना लत्‍ता फारत आउर बदरिघइन धुर उरइति चिल्‍लाइ लगनें। 24इ देखके सेनापति कहनें, “पावलकेहें ब्‍यारेक भित्‍तर लाइजाक कोररालइक मारो।” अइसे कोररा लइके मरबोत पावल अपना करल अपराध सुइकार करहें आउर भिरके मनइभर काहिक दिक्‍कइनें कहिके पता लगाइ सिकजाइ कहिके उनका आसा रेहे। 25जब सिपाहिभर पावलकेहें कोररा लगाइक तहन बाँधत रेहें, तउ लिग्‍घे ठरहेल कप्‍तानकेहें पावल पुछनें, “का एकठोर रोमि नागरिककेहें दोसि नाइठहराक कोररा लगइना सहि आहे?”
26कप्‍तान इ बात सुनलपाछुक सेनापति तिरा जाक कहनें, “तुम का करे जाइत बाटो? इ मनइ ते रोमि नागरिक आहे!”
27उहिकमारे सेनापति पावल तिरा जाक पुछनें, “का तुम रोमि नागरिक बाटो?”
पावल कहनें, “हाँ, मइ रोमि नागरिक आहुँ।”
28इ बात सुनके सेनापति कहनें, “मइ ते ढेरे पइंसा तिरके रोमि नागरिक होइल आहुँ।”
पर पावल कहनें, “मइ ते जलमति रोमि नागरिक आहुँ।”
29इ सुनके पावलन सोधपुछ करेक तहन तयार होइल सिपाहिभर पाछे हटनें आउर सेनापति फेक डरइनें, काहिक्‍कि पावल एकठोर रोमि नागरिक रेहें आउर उ पावलकेहें बाँधेक लगइले रेहें।
पावल महासभक आगे
30अउरे रोज सेनापति खास पुजारिभरिन आउर महासभक सब सदस्‍यभरिन बइठकमे बुलइनें, काहिक्‍कि का कारनति मनइभर पावलकेहें दोस लगाइत आहें कहिके सेनापति पता लगाइक खोजत रेहें। उहिकमारे सेनापति पावलकेहें छोरदहनें आउर महासभक आगे लाक ठरहबादहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.