पेरेरित 19
19
पावल एफिसस सहरमे
1जब अपोल्‍लोस कोरिन्‍थ सहरमे रेहें, तउ पावल एसिया इलाकक् पहारके डगरमे निंगति एफिसस सहरमे पुगनें। हुँवाँ पावल कुछ बिस्‍वासिभरिन भिटनें। 2पावल ओइन पुछनें, “जब तोइनें परभुमे बिस्‍वास करलो, का तोइनें पबित्‍र आत्‍मा पइलो?”
ओइनें जबाफ दहनें, “पबित्‍र आत्‍मा आहें कहिके हमरे सुनले फेक नाइहोइ।”
3उहिकमारे पावल कहनें, “उइसन आहे कहलेति, तोइनें कइसन बप्‍तिस्‍मा लहलो ते?”
ओइनें कहनें, “बप्‍तिस्‍मा दहना युहन्‍नन् सिखाइल ढार हमरे बप्‍तिस्‍मा लहलि।”
4तउ पावल कहनें, “युहन्‍नन् दहल बप्‍तिस्‍मा ते अपना-अपना पापि मन बदलके परमेस्‍वरतिरा लउटना रेहे। युहन्‍ना अपनें ‘मोहति पाछुक अबइया उप्‍पर बिस्‍वास करो’ कहिके मनइभरिन बतइनें। युहन्‍नाति पाछुक अबइया येसुये रेहें।”#मत्‍ति ३:११; मर्‌क १:४,७-८; लुका ३:४,१६; युह १:२६-२७
5इ बात सुनके ओइनें परभु येसुके नाउँमे बप्‍तिस्‍मा लहनें। 6ओहकापाछुक, जब पावल ओइन उप्‍पर हाथ धरनें, तउ पबित्‍र आत्‍मा ओइनमे अइनें आउर ओइनें अउरे भासामे मन्‍कनें आउर अगम्‍बानि करे लगनें। 7हुँवाँ बारा जनें लक्‍का लोग रेहें।
8तउ पावल तिन महिनातक यहुदिभरिनके बइठक घरमे जाक हिम्‍मतसँघ परचार करनें। उ परमेस्‍वरके राज्‍यक बारेम तरकबितरक करति मनइभरिन बरहियस मनबइना कोसिस करनें। 9पर कुइ-कुइ मनइ कठोर होक बिस्‍वास नाइकरनें। उल्‍टा सब जन्‍हिन आगे परभुमे बिस्‍वास करके मुक्‍ति मिल्‍ता कहना बातके बदनाम करनें। उहिकमारे पावल ओइन यहुदि बइठक घरमे जइना छोरदहनें आउर बिस्‍वासिभरिन अपनसँघ लइगिनें। ओहकापाछुक पावल हर रोज टुरान्‍नस इस्‍कुलमे मनइभरिनसँघ बादबिबाद करनें। 10पावल हुँवाँ दुइ बरसतक सिखइनें आउर एसिया इलाकामे बइठइया सब यहुदि आउर अउरे जातके मनइभर परभुके बचन सुन्‍नें।
11परमेस्‍वर पावल मारफत अइसन अचम-अचमके काम करनें कि, 12जब मनइभर दस्‍ति आउर गम्‍छा पावलके देहिंम छुबाक बिमरहिया मनइभरिन तिरा लइजाक छुबादेहें, तउ ओइनें अपना-अपना रोगति निक होमें तउके ओइनमहति दुस्‍ट आत्‍माभर निकरके जामें। 13झारफुक करइया कत्‍ता जनें यहुदिभर फेक जगा-जगामे जाक परभु येसुके नाउँमे दुस्‍ट आत्‍मा निकारेक खुजनें। ओइनें दुस्‍ट आत्‍माकेहें अइसे केहें, “पावलन परचार करल येसुके नाउँमे मइ तोहके निकरके जइना आग्‍याँ दहतुँ।” 14हुँवाँ इस्‍केवास नाउँ रहल एक जनें खास पुजारिक सात जनें लउँराभर फेक उस्‍ते करें।
15पर एक रोज दुस्‍ट आत्‍मा ओइन कहल, “मइ येसुकेहें चिन्‍हतुँ आउर पावलकेहें फेक चिन्‍हतुँ, पर तोइनें कउन बाटो?”
16तउ उ दुस्‍ट आत्‍मा लागल मनइ ओइन उप्‍पर कुदति आइल आउर सब जन्‍हिन अपना बसमे करके अदघटहा बनाइल। उहिकमारे ओइनें उ घरमहति अदघटहा होक नङ्‍गटे भज्‍नें। 17इ बात एफिससमे बइठइया यहुदि आउर अउरे जातके मनइभर सुनके सब जनें डरइनें आउर ओइनें परभु येसुके नाउँक परसन्‍सा करनें। 18उहिबखत परभुमे बिस्‍वास करल मनइभर ढेरे जनें आक अपना-अपना करल नाइबरहिया कामभरिन खुल्‍लम-खुल्‍ला सुइकार करनें। 19ओइनमहति ढेरे जनें जउन झारफुक करें, ओइनें मन्‍त्‍रतन्‍त्‍र लिखल अपना-अपना किताबभरिन जमा करके लाक सबका आगे जरादहनें। ओइन जराइल उ किताबके मोल करनेंत पचास हजार चाँदिक पइंसा बराबर होइल। 20अइसे परभुके बचन सक्‍तिसालि होक फइलति गेल।
21इ सब घटनापाछुक, पावल माकेडोनिया आउर अखइया इलाका हुइति यरुसलेम जइना निरनय करनें आउर “हुँवाँ पुगलपाछुक मइ रोम सहरमे फेक जइहिक परि” कहिके उ कहनें। 22उहिकमारे पावल अपना दुइ जनें मदत करइया, तिमोथि आउर इरास्‍तसकेहें माकेडोनियामे पठइनें, पर अपनें भर कुछ रोजतक एसिया इलाकामे बइठनें।
एफिसस सहरमे हुलदङ्‌गा
23उहिबखत, मुक्‍तिके डगरके बारेम परचार होइलके मारे एफिससमे बन्‍ना हल्‍ला होइल रेहे। 24हुँवाँ एक जनें डेमेतिरियस नाउँक सुनरा रेहें, उ आरतेमिस देबिक चाँदिक चुन्‍नि-चुन्‍नि मन्‍दिरभरिन बनामें। इ कामति उ आउर उनकासँघ काम करइयाभर ढेरे रुपइया पइंसा कमइले रेहें। 25एक रोज डेमेतिरियस अपना सुनराभरिन आउर उस्‍ते काम करइया आकुर सब जन्‍हिन जमा करके अइसे कहनें, “सँघरियो, तोइन पते आहे कि, यिहि बेपार करके हमरे ढेरे पइंसा कमइति। 26पर पावल जा करत आहें तोइनें अपनें देखत आउर सुनत बाटो। उ मनइ एफिससमे केल नाइ बलकि एसिया इलाकक् मनइभरिन ‘हाथलइक बनाइल देबता ते देबता नाइआहें’ कहिके भरकाइत आहें। 27अइसे हम्‍मर बेपार चउपट हुइना केल नाइ, पर महान देबि आरतेमिसके मन्‍दिरके फेक नाइबरहिया होइ आउर अइसे एसिया इलाका आउर सन्‍सारभरका मनइभरिन मानत आइल देबि आरतेमिसके पुजा फेक बन्‍द होइ।”
28इ बात सुनके हुँवाँ जमा होइल मनइभर दिक्‍के मारे चुर हुइनें, आउर “एफिससके देबि आरतेमिस महान आहें।” कहिके नारा लगाइ लगनें। 29तउ सारा सहरमे हुलदङ्‌गा होइलागल। मनइभर एक जुट होक पावलके सँघरियाभरिन माकेडोनियाति आइल गायस आउर अरिस्‍तारखसकेहें पकरके रङ्‌गसालामे घसिटत लइगिनें। 30उहिबखत पावल मनइभरिनके भिरके आगे जाइक खुजनें, पर बिस्‍वासिभर उनके जाइ नाइदहनें। 31एसियाके कत्‍ता जनें सरकारि हाकिमभर फेक पावलके सँघरिया रेहें। ओइनें पावलकेहें रङ्‌गसाला भित्‍तर नाजाउ कहिके बिन्‍ति करनें। 32उहिबखत रङ्‌गसालामे अत्‍ता हुलदङ्‌गा होइल कि, कुइ कुछ कहिके, कुइ कुछ कहिके चिल्‍लाइत रेहें। बहुत जन्‍हिन ते, ओइनें हुँवाँ काहिक जमा होइल आहें कहिके फेक पता नाइरेहे। 33हुँवाँ रहल यहुदिभर अलेक्‍जेन्‍डर नाउँक एक जनें मनइकेहें बात करेक तहन आगे सरनें। उहिबखत भिरके कत्‍ता जनें मनइभर इ घटनक बारेम कुछ कहेक तहन अलेक्‍जेन्‍डरकेहें कहनें। तउ उ मनइभरिन सान्‍त करेक तहन हाथके इसारा करनें आउर यहुदिभरिन बचाइक तहन मन्‍कना कोसिस करनें। 34पर जब भिरके मनइभर अलेक्‍जेन्‍डरकेहें यहुदि आहें कहिके चिन्‍हनें, तउ ओइनें सब जनें, “एफिससके देबि आरतेमिस महान आहें” कहिके दुइ घन्‍टातक नारा लगइनें।
35पर आखिरमे सहरके हाकिम भिरकेहें सान्‍त बनाक कहनें, “एफिससके मनइभर हो, इ सहरके महान देबि आरतेमिसके मन्‍दिर आउर स्‍वरगमहति झरल उनका मुरतिक रछक हमरे एफिसिभर होइ कहिके सब जनें जन्‍ले आहें। 36इ बात कुइ फेक इन्‍कार करे नाइसिकि। उहिकमारे तोइनें कुछ फेक मुरख काम नाइकरके सान्‍त होक बइठो। 37काहिक्‍कि तोइनें पकरके लाइल यि मनइ, न ते हम्‍मर मन्‍दिर लुटले आहें, न हम्‍मर देबिक अपमान करले आहें। 38अगर डेमेतिरियस आउर उनका सुनरा सँघरियाभरिन इ मनइभरिनके बिरुधमे कुछ बात आहे कहलेति, ओइनें अदालतमे जाक उजुर करे सिक्‍हें। ओइन तहन अदालत आहे आउर नियाय करइया नियायधिसभर फेक आहें। 39पर अगर तोइन येहति फेक ढेरे उजुर आहे कहलेति, ओहका बारेम बइठकमे छलफल करे सिकजाइ। 40काहिक्‍कि आज इ हुलदङ्‌गक दोस रोमि सरकार हम्‍मर उप्‍पर लगाइ सिकि। काहिक्‍कि हम्‍मरसँघ इ हुलदङ्‌गक कारन नाइआहे आउर रोमि सरकारकेहें देहेक तहन हम्‍मरसँघ कुछु जबाफ फेक नाइआहे।” 41अत्‍ता कहिके सहरके हाकिम भिरकेहें बिदा दहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.