पेरेरित 18
18
पावल कोरिन्थ सहरमे
1ओहकापाछुक पावल एथेन्सति कोरिन्थ सहरमे गिनें। 2हुँवाँ पावल पोन्टसमे जल्मल अकिलास नाउँक एक जनें यहुदि मनइकेहें भिटनें। उ अपना मेहरुवा पिरिस्किलासँघ भरखर इटालिति आइल रेहें, काहिक्कि रोमि महाराजा क्लउडियस सब यहुदिभरिन रोमति निकरके जइना हुकुम दहले रेहें। तउ पावल ओइन भेंटे गिनें, 3आउर पावल ओइनसँघ रहिके काम करनें, काहिक्कि ओइनें फेक पावल ढार तम्बु बनइना काम करें। 4पावल रोजे सहिंतइना रोजमे यहुदिभरिनके बइठक घरमे जाक यहुदि आउर गिरिक मनइभरिनसँघ बादबिबाद करें आउर येसुमे बिस्वास करेक तहन ओइन मनइना कोसिस करें।
5जब सिलास आउर तिमोथि माकेडोनिया इलाकाति अइनें, पावल भर परचारके काममे केल लगनें आउर येसुये मुक्ति दिबइया खिरिस्ट आहें कहिके यहुदिभरिन परचार करनें। 6पर जब ओइनें बिरोध करति पावलके अपमान करनें, तउ पावल अपना लत्तक धुर झरइति ओइन कहनें, “अगर तोइनें मुक्ति नाइचहतो कहलेति, तोइनिहिंन गल्ति रिहि, मइ सिकततक कोसिस करनु। अब मइ अउरे जातके मनइभरिनतिरा सुसमाचार परचार करे जइमु।” 7ओहकापाछुक पावल यहुदि बइठक घरमहति निकरके तितस युस्तस नाउँक मनइक घरमे गिनें। उनका घर यहुदि बइठक घरके लिग्घे रेहे। उ परमेस्वरके आराधना करइया अउरे जातके मनइ रेहें। 8किरिस्पस नाउँक यहुदि बइठक घरके अगुवा आउर उनका सब परिबार परभुमे बिस्वास करनें आउर कोरिन्थके ढेरे मनइभर पावलके परचार करल सुनके परभुमे बिस्वास करके बप्तिस्मा लहनें।
9एक रात परभु पावलकेहें दरसनमे कहनें, “कुहिकसँघ नाडराउ आउर चुप लागके नाबइठो, पर परचार करति जाउ। 10मइ तुम्हरसँघे आहुँ आउर कुइ फेक तुम्हर नुक्सान नाइकरि, काहिक्कि इ सहरमे मोर ढेरे मनइभर आहें।” 11उहिकमारे पावल एक बरस छे महिनातक कोरिन्थ सहरमे रहिके मनइभरिन परमेस्वरके बचन सिखइनें।
12जब गलियोन अखइया इलाकक् सासक रेहें, तउ सब यहुदिभर एकजुट होक पावलकेहें पकरनें आउर सासकके आगे अदालतमे लइगिनें। 13ओइनें पावलकेहें दोस लगइति अइसे कहनें, “इ ते हम्मर मनइभरिन अइसे गलत तरिकाति परमेस्वरके आराधना करेक सिखइता, जउन हम्मर यहुदि बेबस्थाके उल्टा आहे।”
14जब पावल मन्केये लागल रेहें, तउ गलियोन यहुदिभरिन कहनें, “ए यहुदिभर हो, अगर इ मनइक करल काम सहिके नाइबरहिया आउर बन्ना अपराधके बात होइल रहत ते, मइ तोइन बात सुनके नियाय करना सहि रहत। 15पर इ तोइन अपनें धरमके सब्दअरथ आउर नाउँसँघ सम्बन्धित सबाल होइलकेमारे तोइनें इ बात अपनें मिलाउ। मइ अइसन बातके नियाय नाइकरमु।” 16अत्ता कहिके गलियोन ओइन अदालतमहति निकार दहनें। 17तउ भिरके मनइभर यहुदिभरिनके बइठक घरके अगुवा सोस्थेनेसकेहें पकरके अदालतके आगे पिटनें। पर गलियोन इ बातके कुछु मतलब नाइकरनें।
पिरिस्किला, अकिलास आउर अपोल्लोस
18ओहकापाछुक पावल बिस्वासिभरिनसँघ ढेरे रोजतक कोरिन्थ सहरमे बइठनें। तउके पावल ओइनसँघ बिदा होक किन्किरया सहरमे पुगनें आउर पावल कुछ बखत पहिले बाचा करलकेमारे हुँवाँ उ अपना बार खउरनें। तउके जहाजमे चरहके पिरिस्किला आउर अकिलाससँघ सिरिया इलाकाघइन गिनें।#गन्ति ६:१८ 19जब ओइनें एफिसस सहरमे पुगनें, पावल पिरिस्किला आउर अकिलासकेहें उहि सहरमे छोरदहनें। तउके पावल यहुदिभरिनके बइठक घरमे जाक यहुदिभरिनसँघ बादबिबाद करे लगनें। 20जब यहुदिभर पावलकेहें ओइनसँघ कुछ रोजतक बइठो कहिके बिन्ति करनें, पर पावल नाइमन्नें। 21तउके पावल अइसे कहिके ओइनसँघे बिदा हुइनें, “अगर परमेस्वरके इच्छा होइ कहलेति मइ तोइनतिरा फेर लउटके अइमु।” तउ पावल जहाजमे चरहके एफिससति चलगिनें।
22जब पावल कइसरिया सहरमे पुगनें, हुँवाँति यरुसलेममे जाक बिस्वासिभरिनसँघ भेटघाट करके एन्टिओखिया सहरमे गिनें। 23पावल कुछ रोजतक हुँये बइठनें। ओहकापाछुक उ गलातिया आउर फिरिगिया इलाकक् ढेरे जगामे जाक बिस्वासिभरिन परभुमे बलगर बनइनें।
अपोल्लोस एफिसस सहरमे
24उहि बखतमे अलेक्जेन्डिरिया सहरमे जल्मल अपोल्लोस नाउँक एक जनें यहुदि मनइ एफिससमे अइनें। उ बहुत बरहियाति मन्के सिकें आउर धरमसास्त्रके बारेम उनके ढेरे गियान रेहे। 25उ मुक्ति दिबइया परभु येसुके बारेम सहि सिछ्छा पइले रेहें आउर बहुत जोसिलो होक येसुके बारेम बरहियस मनइभरिन सिखामें। पर उनके युहन्नाके बप्तिस्मक बारेम केल पता रेहे। 26उ यहुदिभरिनके बइठक घरमे जाक हिम्मत करके परचार करनें। तउ उनका परचार सुनके पिरिस्किला आउर अकिलास उनके अपना घरमे लइगिनें आउर ओइनें परमेस्वरके मुक्तिक उपायकेहें बरहियस बयान करके उनके बुझादहनें। 27ओहकापाछुक अपोल्लोस अखइया इलाकामे जइना बिचार करनें, तउ एफिससमे रहल बिस्वासिभर उनके हुँवाँ जाइक तहन उत्साह दहनें आउर उनके स्वागत करियो कहिके हुँका चेलाभरिन एकठोर पत्र फेक पठइनें। अपोल्लोस अखइया पुगलपाछुक परभुके अनुगरहति बिस्वासिभरिन ढेरे मदत करनें। 28काहिक्कि हुँका यहुदिभरिनसँघ मनइभरिनके आगे ढेरे बादबिबाद करके ओइन बिरोध करति उ धरमसास्त्रमहति येसुये मुक्ति दिबइया खिरिस्ट आहें कहिके ओइन परमान दइक दिखइनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.