पेरेरित 17
17
पावल आउर सिलास थेसलोनिके सहरमे
1ओहकापाछुक पावल आउर सिलास अम्फिपोलिस आउर अपोल्लोनिया सहर हुइति थेसलोनिके सहरमे अइनें। हुँवाँ यहुदिभरिनके एकठोर बइठक घर रेहे। 2पावल अपना बान ढार लगातार तिन हप्तातक सहिंतइना रोजमे यहुदिभरिनके बइठक घरमे जाक धरमसास्त्रमहति ओइनसँघ तरकबितरक करनें। 3पावल हुँका मनइभरिन मुक्ति दिबइया खिरिस्टन दुख पइना आउर मरलमहति फेर जिति हुइना बात धरमसास्त्रमहति परमानित करदहनें। पावल ओइन कहनें, “मइ जउन येसुके बारेम परचार करत आहुँ, उहि मुक्ति दिबइया खिरिस्ट आहें।” 4ओइन कहल बातमे बिस्वास करके कुछ यहुदिभर पावल आउर सिलासके जइसन परभुके चेला हुइनें। अइसे परमेस्वरके डर मनइया गिरिक जातिक ढेरे मनइभर आउर नाउँ चलल मेहरुवाभर फेक ओइनसँघ लगनें।
5पर आकुर यहुदिभर हेंख करनें आउर बजारमे दादागिरि करइया मनइभरिन जमा करके सहरमे हुलदङ्गा करेक लगइनें। ओइनें पावल आउर सिलासकेहें मनइभरिनके भिरके आगे लाइक तहन यासोनके घरघइन दउरके गिनें। 6पर ओइनें पावल आउर सिलासकेहें हुँवाँ नाइपाइलके मारे यासोन आउर आकुर बिस्वासिभरिन घसिटत सहरके हाकिमभरिनतिरा लइगिनें आउर बन्ना अबाजमे चिल्लाक अइसे कहनें, “सारा सन्सारमे सान्ति भङ्ग करइयाभर येनहें आहें, आउर हम्मर सहरमे फेक आइल आहें। 7यासोन ओइन अपना घरमे धरले आहें। येने सब जनें रोमि महाराजाके हुकुम नाइमन्तियाँ आउर येसु नाउँक एकठोर अउरे राजा आहें कहिके कहतियाँ।” 8यि बात सुनके मनइभर आउर सहरके हाकिमभर अक्मका गिनें 9आखिरमे हाकिमभर यासोन आउर आकुर मनइभरिन धरउटि लइके छोरदहनें।
पावल आउर सिलास बेरिया सहरमे
10रात होइलपाछुक बिस्वासिभर पावल आउर सिलासकेहें बेरिया सहरमे पठादहनें। ओइनें हुँवाँ पुगके यहुदिभरिनके बइठक घरमे गिनें। 11हुँका मनइभर थेसलोनिके सहरके मनइभरिनतिति बरहिया बिचारके रेहें। काहिक्कि ओइनें पावलन कहल बात ढेरे खुसिसँघ गरहन करनें आउर उ बात सहि आहे कि नाइआहे कहिके रोज धरमसास्त्र पर्हके जाँचें। 12उहिकमारे ढेरे यहुदिभर परभुमे बिस्वास करनें। ओइनें केल नाइ पर नाउँ चलल घरानक गिरिक मेहरुवाभर आउर मनइभर फेक परभुमे बिस्वास करनें। 13पर जब पावल बेरिया सहरमे जाक परमेस्वरके बचन परचार करत आहें कहिके थेसलोनिकेक कुछ यहुदिभर पता पइनें, ओइनें हुँवाँ जाक मनइभरिन पावलके बिरुधमे उक्साक सहरमे हुलदङ्गा करेक लइगिनें। 14उहिकमारे हुँका बिस्वासिभर तुरन्ते पावलकेहें समुन्दरके टिकराघइन पठादहनें, पर सिलास आउर तिमोथि हुँयें रहनें। 15जउन मनइभर पावलकेहें पुगाइ गेल रेहें, ओइनें उनके एथेन्स सहरतक लइगिनें। ओइनें हुँवाँति लउटके अइनेंत पावल ओइन, “सिलास आउर तिमोथिकेहें हालि मोर तिरा पठादिहियो।” कहिके खबर दहनें आउर ओहकापाछुक ओइनें हुँवाँति पावलके उ खबर लइके बेरियामे लउटनें।
पावल एथेन्स सहरमे परचार करनें
16जब पावल, सिलास आउर तिमोथिकेहें एथेन्स सहरमे असरा लागल रेहें, तउ उ सहरमे ढेरे मुरतिभरिन देखके उ दुखि हुइनें। 17उहिकमारे उ यहुदिभरिनके बइठक घरमे जाक यहुदिभरिनसँघ आउर परमेस्वरके आराधना करइया गिरिक जातके मनइभरिनसँघ येसुके बारेम तरकबितरक करें। उ रोज बजारके खास चोकमे जाक हुँवाँ अबइया-जबइया मनइभरिनसँघ फेक तरकबितरक करें। 18उहिबखत इपिक्युरि आउर इस्तोइकि कहना फरक-फरक बिचारधारक बिद्वानभर पावलसँघ बादबिबाद करनें। पावल येसुके बारेम आउर मरलमहति जिति होक उठल बारेम परचार करल पाछुक ओइन महति कत्ता जनें अइसे कहनें, “इ बत्फल्सा का कहत आहे?” अउरे जनें कहनें, “इ ते कुइ बिदेसि देबताभरिनके बारेम परचार करत आहे।”
19तउ ओइनें पावलकेहें अरियोपागसके#१७:१९ अरियोपागस: एरेस डिङ्गामे रहल खास बइठक घर। बइठकमे लइजाक पुछनें, “का तुम्हर परचार करल इ नम्मा सिछ्छक बारेम हमरे जानें सिक्बा? 20काहिक्कि तुम हम्हिन कबु नाइसुनल एकठोर अचमके बात सुनाइत बाटो। उहिकमारे येहका बारेम जन्ना खोजत होइ।” 21काहिक्कि एथेन्स सहरके मनइभर आउर हुँवाँ बइठइया सब बिदेसिभर आकुर काम ति फेक ढेरे बखत नम्मा-नम्मा बात कहना आउर सुन्नामे समय बितामें।
22तउ पावल अरियोपागस बइठकके बिचमे ठरहेक कहनें, “देखो एथेन्स सहरके मनइभर, तोइनें ढेरे पुजा-पाठ करतो कहिके मइ पता पइनु। 23काहिक्कि इ सहरमे घुमफिर करे बखत, मइ तोइन पुजा करना जगा फेक दिखनु। एकठोर बलि चरहइना बेदिमे ‘नाइचिन्हल देबतक तहन’ कहिके लिखल रेहे। तोइनें जेहके नाइचिन्हके पुजा करतो, मइ उनका बारेम आज तोइन आगे परचार करमु। 24जउन परमेस्वर इ सन्सार आउर ओहमे रहल सब चिझ बनइनें, उ स्वरग आउर धरतिक परभु आहें। उ मनइभरिनके हाथति बनाइल मन्दिरमे बास नाइकरतियाँ। 25उनके मनइभरिनति कुछु चिझ नाइचहता, काहिक्कि उनकातिरा सब चिझ आहे। बलकि उ मनइभरिन जिन्दगि, परान आउर चहना सब चिझ दहतियाँ।#१ राजा ८:२७; यसइ ४२:५; पेरे ७:४८ 26परमेस्वर एक जनें मनइति सन्सारमे बइठेक तहन जाति-जातिभरिन बनइनें आउर ओइन जिना बखत आउर बइठना जगा फेक पहिलेहेंति तुक्ले रेहें। 27मनइभर परमेस्वरकेहें खोजें आउर छामछुम करके पाइ सिकें कहिके उ अइसन करनें। तभुफेक परमेस्वर हम्हिनति दुर नाइआहें। 28काहिक्कि
‘उनकामे हमरे जिति, निङ्गति आउर हम्मर अस्तित्व फेक उनकामे आहे।’
तोइन अपनें कबिभर फेक अइसे कहले आहें,
‘हमरे फेक उनका सन्तान होइ।’
29हमरे परमेस्वरके सन्तान होइलके मारे, परमेस्वर मनइभरिनके कल्पना आउर हाथके कलालइक बनाइल, सोंन, चाँदि कि पथ्रक मुरति जइसन आहें कहिके नाइसोंचि। 30बितल समयमे, मनइभर अन्जानमे करल गल्तिकेहें परमेस्वर वास्ता नाइकरनें, पर अब उ सब जगाके मनइभरिन अपना-अपना पाप मानेक तहन आग्याँ दहले आहें। 31काहिक्कि सन्सारके सब मनइभरिनके नियाय करेक तहन परमेस्वर एक रोज तोकसिकले आहें आउर उ रोज उ अपना छाँटल एक जनेंति धारमिक्तामे नियाय करहें। परमेस्वर नियाय करना अधिकार उनके दहले आहें कहिके सब मनइभरिन परमान देहेक तहन परमेस्वर उनके मरलमहति फेर जिति परले आहें।”
32जब ओइनें मनइ फेर जिति हुइता कहिके पावलति सुन्नें, तउ कुछ मनइभर पावलके बात हँसिम उरादहनें। पर आकुर जनें कहनें, “येहका बारेम हमरे पाछुक फेर तुम्हरति सुन्बा।” 33ओहकापाछुक पावल ओइनति बिदा हुइनें। 34पर कुछ मनइभर पावलन कहल बात गरहन करके परभु येसुमे बिस्वास करनें। ओइनमहति अरियोपागसके बइठकके सदस्य डियनुसियस कहना मनइ आउर दामारिस नाउँक एक जनें मेहरुवा आउर आकुर ढेरे जनें फेक रेहें।
© 2024 (Active), Mother Tongue Translators Society and Wycliffe Bible Translators, Inc. All rights reserved.