पेरेरित 16
16
पावल आउर सिलाससँघ तिमोथिके भेट
1ओहकापाछुक पावल डरबि आउर लुस्त्रा सहरमे फेक गिनें। हुँवाँ तिमोथि नाउँक एक जनें चेला रेहें। उनका दाइ यहुदि बिस्वासि रेहें, पर उनका बाबा गिरिक जातिके रेहें। 2लुस्त्रा आउर आइकोनियम सहरमे रहल बिस्वासिभर तिमोथिकेहें बरहिया मनइ आहें कहिके मानें। 3पावल तिमोथिकेहें अपनसँघ परचार यात्रामे लइजिना इच्छा करलकेमारे उनके खतना करेक लगइनें। काहिक्कि तिमोथिक बाबा गिरिक जातके रेहें कहिके उ इलाकक् सब यहुदिभरिन पता रेहे। 4ओहकापाछुक ओइनें सहर-सहरमे जाक बिस्वासिभरिन यरुसलेमके पेरेरितभर आउर एल्डरभर मिलके करल निरनय पालन करियो कहिके सुनादहनें। 5अइसे मन्डलिक बिस्वासिभरिनके बिस्वास बलगर हुइति गेल आउर दिनदिनें परभुमे बिस्वास करइया मनइभर ढेर हुइति गिनें।
पावलके माकेडोनियामे जइना दरसन
6तउ पावल, सिलास आउर तिमोथि फिरिगिया आउर गलातियाके इलाका हुइति गिनें, काहिक्कि पबित्र आत्मा ओइन एसिया इलाकामे बचन परचार करेक रुक्ले रेहें। 7तउके ओइनें माइसियाके इलाकक् सिमानामे पुगलपाछुक, बिथिनिया इलाकामे जइना बिचार करनें, पर येसुके आत्मा ओइन हुँवाँ जाइ नाइदहनें। 8उहिकमारे ओइनें माइसिया इलाका हुइति तोरोआस सहरमे गिनें। 9उहि रात पावल एकठोर दरसन दिखनें। उ दरसनमे माकेडोनियक एक जनें मनइ ठरहेक अइसे बिन्ति करत रेहे, “माकेडोनिया आउ आउर हम्हिन मदत करो।” 10पावल अइसन दरसन देखलपाछुक, हमरे तुरन्ते माकेडोनिया जाइक तहन तयार हुइलि, काहिक्कि उ जगाके मनइभरिन सुसमाचार परचार करेक तहन परमेस्वर हम्हिन बुलइले आहें कहिके हम्हिन पता होइल।
लिडिया येसुमे बिस्वास करनें
11तउ हमरे तोरोआसमहति जहाजमे चरहके सुधे अउरेपार सामोथ्राके कहना टापुघइन गिलि आउर अउरे रोज हमरे नियापोलिस सहरमे पुगलि। 12हुँवाँति हमरे फिलिप्पि सहरमे गिलि। उ सहर माकेडोनिया इलाकक् एकठोर खास सहर आउर रोमि सरकारके अधिनमे फेक रेहे। हमरे हुँवाँ कुछ रोजतक बइठलि। 13तउके सहिंतइना रोजमे हमरे सहरके गेटमहति बाहिर लदियक टिकरामे गिलि, काहिक्कि पराथ्ना करेक तहन जगा आहे कहिके हमरे सुच्लि। हमरे हुँवाँ बइठलि आउर हुँवाँ जमा होइल मेहरुवाभरिनसँघ बात करे लगलि। 14हम्मर बात सुनइयाभरिन महति लिडिया नाउँ रहल एक जनें मेहरुवा रेहें। उ थिआटिरा कहना सहरके रेहें, आउर फिलिप्पि सहरमे आक बइजनि रङ्गके लत्तक बेपार करें। लिडिया परमेस्वरके आराधना करइया अउरे जातके मेहरुवा रेहें। तउ लिडिया पावलके बात धियान लगाक सुनें कहिके परभु उनका मन खोलदहनें। 15जब उ आउर उनका घरका सब जनें बप्तिस्मा लहनें, तउ उ हम्हिन बिन्ति करके अइसे कहनें, “अगर तोइनें मोहके सहिके एकठोर परभुके बिस्वासि सम्झतो कहलेति, मोर घरमे आक बइठो।” अइसे उ हम्हिन अपना घरमे जाइक तहन मनबइनें।
पावल आउर सिलास जेलमे
16एक रोज हमरे पराथ्ना करना जगामे जइति बखत, दुस्ट आत्मा लागल एकठोर कमलहरि लउँरियासँघ भेट होइल। उ लउँरिया दुस्ट आत्मक सक्तिलइक भबिस्य बताक अपना किसनमक तहन ढेरे पइंसा कमाक देहें। 17उ कमलहरि लउँरिया पावल आउर हम्मर पाछे-पाछे आक चिल्लइति अइसे कहनें, “यि मनइभर सबति महान परमेस्वरके सेबकभर आहें। येने मुक्ति पइना बारेम तोइन परचार करतियाँ।” 18ढेरे रोजतक उ कमलहरि लउँरिया अस्ते कहति रहनें। तउ पावल परिसान होक उनकाघइन घुमनें आउर दुस्ट आत्माकेहें कहनें, “मइ येसु खिरिस्टके नाउँमे तोहके आग्याँ दहत आहुँ, तइं यिनकामहति निकरके जा।” अत्ता कहति केल उ दुस्ट आत्मा उनकामहति निकरके चलगेल। 19जब उनका किसनमाभरिन उ कमलहरि लउँरियाति पइंसा कमइना आसा हिराइल, तउ ओइनें पावल आउर सिलासकेहें पकरके सहरके चोकमे सासकभरिनतिरा घसिटत लइगिनें। 20ओइनें पावल आउर सिलासकेहें रोमि सरकारके हाकिमभरिनके आगे ठरहबाक कहनें, “यि यहुदि मनइभर हम्मर सहरमे हुलदङ्गा मचाइत आहें। 21येने अइसन रितिरिबाज सिखइतियाँ कि जउन हमरे रोमि मनइभरिन गरहन आउर पालन करना बरहिया नाइआहे।” 22तउ भिरके मनइभर मिलके पावल आउर सिलासकेहें पिटे अइनें। सहरके हाकिमभर ओइन लत्ता फारके लठ्ठिलइक पिटना आदेस दहनें।
23ओइनें पावल आउर सिलासकेहें बहुत जोरति पिटनें, ओहकापाछुक जेलमे डारदहनें आउर जेलके हाकिमकेहें बरहियसति पहरा दिहियो कहिके आग्याँ दहनें। 24अइसन आग्याँ पाइलके मारे उ हाकिम पावल आउर सिलासकेहें जेलके भित्रि कालकोठरिमे लइगिनें आउर ओइन टाङ्गमे ठिंगरा लगाक धरदहनें।
25आधा रातघइन पावल आउर सिलास पराथ्ना करति परमेस्वरके भजन गाइत रेहें आउर आकुर कइदिभर सुनत रेहें। 26उहिबखत अरबरगि डरलगतिक हालाचाला आइल आउर जेलके जग हलल। तउ जेलके सब दोर तुरन्ते खुलगेल आउर सब कइदिभरिन बाँधल सिंकरि फेक खुलगेल। 27जब जेलके हाकिम जगनें, हुँका सब दोर खुलल दिखनें। तउ सब कइदिभर भाज्गेल आहें कहिके अपनकेहें मरना बिचारलइक अपना तरबार निकरनें। 28पर पावल उ देखके जोरति चिल्लाक उनके अइसे कहनें, “हजुर, अइसन नाकरो, हमरे सब जनें हिंये होइ।”
29यि सुनके जेलके हाकिम दिया माँगके हालि-हालि भित्तर गिनें आउर डराक थरथरइत पावल आउर सिलासके आगे घुप्टे परनें। 30ओहकापाछुक पावल आउर सिलासकेहें बाहिर लइजाक पुछनें, “हजुर, उद्धार पाइक तहन मोहके का करेकपरि?”
31तउ ओइनें कहनें, “परभु येसु खिरिस्टमे बिस्वास करो, तउके तुम आउर तुम्हर घर परिबारके मनइभर फेक मुक्ति पइहें।” 32तउ पावल आउर सिलास हाकिम आउर उनका परिबार सबके परभुके बचन सुनइनें। 33ओहकापाछुक हाकिम पावल आउर सिलासकेहें लइजाक रातियें ओइन दखोन धोदहनें। तउके उ आउर उनका सब परिबार तुरन्ते बप्तिस्मा लहनें। 34तउ उ हाकिम ओइन अपना घरमे लइजाक खाना खबइनें। उ आउर उनका परिबार सब जनें परमेस्वरमे बिस्वास करलकेमारे बहुते खुसि हुइनें।
35जब भिन्हिक होइल, सहरके हाकिमभर जेलके हाकिमकेहें अइसे कहिके सिपाहिभरिन पठइनें, “उ मनइभरिन छोरदेउ।”
36तउ जेलके हाकिम पावलकेहें कहनें, “सहरके हाकिमभर तुम्हिन आउर सिलासकेहें छोरदहना कहिके हुकुम दहले आहें। अब तोइनें सान्तिसँघ जाउ।”
37पर पावल सिपाहिभरिन कहनें, “हमरे रोमि नागरिक होइ। तभुफेक ओइनें हम्मर दोस बिना पइले मनइभरिनके आगे पिटनें आउर जेलमे फेक डारदहनें। अब ओइनें हम्हिन चुप्पेस पठाइक खोजत आहें? इ ते हुइहि नाइसिकि। ओइनें अपनें आमें आउर हम्हिन निकारें।”
38तउ पावलन कहल इ बात सिपाहिभर जाक हाकिमभरिन सुनादहनें। जब पावल आउर सिलास रोमि नागरिक आहें कहिके सुन्नें, ओइनें डरइनें। 39उहिकमारे ओइनें पावल आउर सिलासतिरा जाक माफि मँगनें। ओहकापाछुक ओइनें पावल आउर सिलासकेहें जेलमहति निकारके हम्मर सहरमहति जाउ कहिके बिन्ति करनें। 40तउके पावल आउर सिलास जेलमहति निकरलपाछुक लिडियाके घरमे गिनें। हुँवाँ ओइनें बिस्वासिभरिन भिटनें आउर ओइन हिम्मत दहति हुँवाँति बिदा हुइनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.