पेरेरित 15
15
यरुसलेमके बइठक
1पावल आउर बारनाबास एन्‍टिओखिया सहरमे रेहेबखत, यहुदिया इलाकाति कुछ मनइभर आक हुँका बिस्‍वासिभरिन अइसे सिखाइ लगनें, “अगर तोइनें मोसाके बेबस्‍था ढार खतना नाइकरबो कहलेति, तोइनें मुक्‍ति पाइ नाइसिक्‍बो।”#लेबि १२:३ 2इ बातमे पावल आउर बारनाबासके ओइनसँघ बातिकबाता होइल। उहिकमारे हुँका बिस्‍वासिभर इ बिसयमे पेरेरितभरिनसँघ आउर एल्‍डर पदमे रहल आकुर मनइभरिनसँघ इ बातके फइसलक तहन पावल, बारनाबास आउर कुछ आकुर बिस्‍वासिभरिन यरुसलेममे पठइनें।
3तउ मन्‍डलिके सदस्‍यभर ओइन बिदा करके पठइनें। ओइनें फोनिके आउर सामरिया इलाका हुइति जाइ बखत हुँका बिस्‍वासिभर अउरे जातके मनइभर फेक परभु येसुमे बिस्‍वास करले आहें कहिके सुनइति गिनें। इ बात सुनके हुँका बिस्‍वासिभर ढेरे खुसि हुइनें। 4जब ओइनें यरुसलेममे पुगनें, तउ मन्‍डलिके सब सदस्‍यभर, पेरेरितभर आउर एल्‍डरभर ओइन स्‍वागत करनें। ओहकापाछुक, पावल आउर बारनाबास हुँवाँ जमा होइल सब जन्‍हिन परमेस्‍वर ओइन मारफत करल सब कामके बारेम बतादहनें। 5पर फरिसिभरिनके दलमहति आइल कुछ बिस्‍वासिभर ठरहेक अइसे कहनें, “अउरे जातके बिस्‍वासिभरिन फेक खतना करेक तहन आउर मोसाके पुरा बेबस्‍था पालन करेक तहन आग्‍याँ देहेकपरि।”
6उहिकमारे इ समस्‍याके समाधान करेक तहन पेरेरितभर आउर एल्‍डरभर जमा हुइनें। 7तउ ढेरे बातिकबाता होइलपाछुक, पत्‍रुस उठके ओइन कहनें, “देखो दादाभइयाभर, तोइन पते आहे, कि अउरे जातके मनइभर फेक मोहति सुसमाचार सुनें आउर बिस्‍वास करे सिकें कहिके परमेस्‍वर मोहके तोइन बिचमहति ढेरे रोज पहिलेतिति छँटले आहें।#पेरे १०:१-४३ 8परमेस्‍वर, जउन मनइक मनके बात जन्‍तियाँ, उ हम्‍हिन पबित्‍र आत्‍मा दहल ढार अउरे जातके मनइभरिन फेक पबित्‍र आत्‍मा दइक ओइन फेक गरहन करनें कहिके दिखइनें।#पेरे २:४; १०:४४ 9परमेस्‍वर हम्‍मर आउर ओइन बिचमे कुछ कानाउछि नाइकरनें, पर ओइनें बिस्‍वास करलकेमारे परमेस्‍वर ओइन मन सुद्‌ध परनें। 10धरमकरमके जुवा ना हम्‍मर पुरखाभर बोंके सिक्‍नें, ना हमरे सिक्‍लि। उहिकमारे इ जुवा अउरे जातके बिस्‍वासिभरिन बोंकेक लगाक काहिक परमेस्‍वरकेहें दिक लगबइतो? 11पर हमरे बिस्‍वास करति, कि हम्‍मर परभु येसुके अनुगरहलइक उद्‌धार पइले होइ, जस्‍ते ओइनें फेक पइले आहें।”
12इ सुनके बइठकमे रहल सब जनें चुपइनें। तउके बारनाबास आउर पावल परमेस्‍वर ओइन मारफत अउरे जातके मनइभरिनके बिचमे करल चिन्‍हा आउर अचम-अचमके कामके बारेम बताइल पाछुक बइठकके सब मनइभर धियान लगाक सुन्‍नें। 13ओइनें मनक सिकल‍पाछुक, याकुब कहनें, “देखो दादाभइयाभर, मोर बात सुनो, 14परमेस्‍वर कइसे अपना नाउँक तहन पहिले अउरे जातके मनइभरिनमहति अपना तहन एकठोर जाति छाँटल बात सिमोन पत्‍रुस बतइले आहें। 15इ बात अगम्‍जानिभरिन लिखल बचनभरिनसँघ फेक मिल्‍ता। जइसे लिखल आहे,
16‘ओहकापाछुक मइ लउटके अइमु,
आउर दाउदके भस्‍कल घर फेर बनइमु।
मइ उ भस्‍कल भागभरिन फेर जोरके
पहिलेक ढार बनादहमु,
17ताकि आकुर सब मनइभर आउर मोर नाउँमे बुलाइलगेल सब अउरे जातके मनइभर फेक मोहके खुजहें।
इ बात परमपरभु कहत आहें आउर
18जउन इ चिझ करतियाँ, परमपरभु इ बात ढेरे पहिलेतिति जनादहले आहें।’”#आमो ९:११-१२
19याकुब अइसे कहति गिनें, “अब मोर इ बिचार आहे, कि परमेस्‍वरतिरा अबइया अउरे जातके मनइभरिन हमरे दुख नाइदिहि। 20पर अउरे जातके मनइभरिन अइसन बात लिखके पठादेउ, ‘मुरतिकेहें चरहाइल खइना चिझ कुछु फेक नाइखइयो, बेभिचार नाइकरियो, घेंटा अमेठके मारल पसुके बुट्‌टि आउर रकत नाइखइयो।#पर्‌स ३४:१५-१७; लेबि १७:१०-१६; १८:६-२३ 21काहिक्‍कि मोसन दहल बेबस्‍था ते पुस्‍तउ-पुस्‍तातिति सब सहरमे परचार होइत आहे आउर सदा सहिंतइना रोजमे फेक यहुदि बइठक घरमे पर्‌हना काम हुइति आइत आहे।’”
अउरे जातके बिस्‍वासिभरिनके तहन लिखल पत्‍र
22ओहकापाछुक पेरेरितभर आउर एल्‍डरभर सारा मन्‍डलिके सदस्‍यभरिनसँघ मिलके दुइ जनें अगुवा छँटनें आउर ओइन पावल आउर बारनाबाससँघ एन्‍टिओखिया सहरमे पठइना निरनय करनें। उ दुइ जनें बारसाबास कहना यहुदा आउर सिलास रेहें। 23ओइनें उ चार जन्‍हिन एकठोर अइसन पत्‍र दइक पठइनें:
“हमरे यरुसलेममे रहल पेरेरितभर, एल्‍डरभरिनति, तोइनें एन्‍टिओखिया, सिरिया आउर किलिकियामे रहल सब अउरे जातके बिस्‍वासिभरिन, दुवासलाम आहे।
24हम्‍मर नाइपठाइल कुछ मनइभर तोइनतिरा जाक गलत बात सिखाक तोइन दुख दइक तोइन मन दुखल बात हमरे सुन्‍लि। 25उहिकमारे हमरे, दुइ जनें अगुवाभरिन छाँटके हम्‍मर पिरिय सँघरियाभर बारनाबास आउर पावलसँघ ओइन तोइनतिरा पठाइक तहन सब जन्‍हिन सहमतिति निरनय करलि। 26इ दुइ मनइभर अइसन आहें, जउन हम्‍मर परभु येसुके नाउँक खातिर अपना परान देहेक तहन फेक तयार आहें। 27उहिकमारे हमरे, यहुदा आउर सिलासकेहें तोइनतिरा पठाइत होइ। ओइनें अपनें अपना मुहति इ बात तोइन बतइहें। 28काहिक्‍कि तोइन मानेक परना जरुरि बात बाहेक अउरे टन्‍टा तोइन नाइदहना पबित्‍र आत्‍मक आउर हम्‍मर इच्‍छा आहे। 29तभिकमारे तोइनें, मुरतिकेहें चरहाइल असुद्‌ध होइल चिझ नाइखइयो, घेंटा अमेठके मारल पसुक बुट्‌टि, रकत नाइखइयो आउर बेभिचार नाइकरियो। अगर तोइन येहति अपनकेहें दुर धरबो कहलेति, तोइन तहन बहुते बरहिया होइ। अब्‍भे लिखना बात अत्‍ते केल आहे, दुवासलाम।”
30ओहकापाछुक, ओइनें चार जनें पत्‍र लइके एन्‍टिओखिया सहरमे गिनें आउर मन्‍डलिक सदस्‍यभरिन एक जगामे जमा करके ओइन उ पत्‍र दहनें। 31जब ओइनें उ पत्‍र पर्‌हनें, तउ सब जनें उ पत्‍रमे लिखल बात सुनके हिम्‍मत पाक ढेरे खुसि हुइनें। 32तउ यहुदा आउर सिलास जउन अपनें अगम्‍जानि रेहें, ओइनें ढेरे बचन कहिके, बिस्‍वासिभरिन हिम्‍मत दहनें आउर ओइन बिस्‍वासकेहें बलगर बनइनें। 33ओइनें हुँवाँ कुछ रोज बइठलपाछुक बिस्‍वासिभर ओइन सान्‍तिति पठादहनें। हुँका बिस्‍वासिभरिनति बिदा होक, ओइन पठइयाभरिनतिरा लउटके गिनें। 34[पर सिलास हुँये बइठना मन करनें।]
35पावल आउर बारनाबास एन्‍टिओखियामे बइठनें। ओइनें आकुर ढेरे जन्‍हिन‌सँघ मिलके मनइभरिन सिछ्‍छा दहति परभुके बचन परचार करनें।
पावल आउर बारनाबास अल्‍गट हुइनें
36कुछ रोजपाछुक पावल बारनाबासकेहें कहनें, “हमरे जउन-जउन सहरमे परभु येसुके बारेम सुसमाचार परचार करले रिहि, चलो, उ सब सहरमे लउटके जाइ आउर बिस्‍वासिभरिनके हालखबर बुझि।” 37तउ बारनाबास मर्‌कुस कहना युहन्‍नाकेहें फेक सँघे लइजाइक खुजनें। 38पर मर्‌कुसकेहें सँघे लइजिना बात पावलकेहें सहि नाइलागल, काहिक्‍कि मर्‌कुस पामफिलिया इलाकामे ओइनति अल्‍गट होक गेल रेहें आउर ओइनसँघ परचारके काममे सहभागि होइ नाइगेल रेहें।#पेरे १३:१३ 39उहिकमारे इ बातमे पावल आउर बारनाबासके बिचमे जेदे ठकरपकर होइल आउर ओइनें एक-अउरेति अल्‍गट हुइनें। उहिकमारे बारनाबास मर्‌कुसकेहें सँघे लइके जहाजमे चरहके साइपरस टापुमे गिनें। 40पर पावल सिलासकेहें छँटनें आउर बिस्‍वासिभर ओइन परमेस्‍वरके अनुगरहमे अरपन करके हुँवाँति बिदा करनें। 41तउ पावल आउर सिलास मन्‍डलिभरिन बलगर बनइति सिरिया आउर किलिकिया इलाका हुइति गिनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.