पेरेरित 14
14
पावल आउर बारनाबास आइकोनियम सहरमे
1पावल आउर बारनाबास आइकोनियम सहरमे फेक यहुदिभरिनके बइठक घरमे जाक परचार करनें। ओइन परचार अइसन सक्तिसालि रेहे, कि हुँवाँ रहल यहुदिभर आउर अउरे जातके मनइभर फेक येसुमे बिस्वास करनें। 2पर बिस्वास करेक नाइचहइया यहुदिभर अउरे जातके मनइभरिन उक्साक बिस्वास करइया दादाभइयाभरिनके बिरुधमे उठइनें। 3तभुफेक पावल आउर बारनाबास उ सहरमे ढेरे रोजतक बइठनें। ओइनें परभुके बारेम हिम्मतसँघ मन्कनें। परभु ओइन हाथति अचमके काम आउर चिन्हा करना सक्ति दइक ओइन परचार करल बचन सहिके आहे कहिके परमानित करदहनें। 4पर उ सहरके मनइभरिनके बिचमे फुट हुइगेल। कुइ यहुदिभरिनघइन लगनें आउर कुइ पेरेरितभरिनघइन लगनें।
5तउ कुछ अउरे जातके मनइभर आउर यहुदिभर अपना सासकभरिनसँघ मिलके, पावल आउर बारनाबासकेहें सताक आउर पथ्रालइक मारके मारेक खुजनें। 6जब पावल आउर बारनाबासकेहें येहका बारेम पता होइल, ओइनें लुकोनिया इलाकक् लुस्त्रा आउर डरबि सहर आउर अरोस-परोसके इलाकामे भाजके गिनें। 7ओइनें हुँवाँ फेक सुसमाचार परचार करतिरहनें।
लुस्त्रा आउर डरबि सहरमे पावल आउर बारनाबास
8जब एकदाउँ पावल आउर बारनाबास लुस्त्रा सहरमे परचार करत रेहें, हुँवाँ एक जनें टाङ्ग चलाइ नाइसिकइया मनइ बइठल रेहे। उ जलमजात नङ्गरा होइलके मारे कबु फेक निंङ्ग्ले नाइरेहे। 9उ मनइ पावलके बात धियान दइक सुनत रेहे। जब पावल ओहके एकटक लगाक दिखनें, तउके उ मनइकमे निक हुइना बिस्वास पावल दिखनें, 10पावल बन्ना अबाजमे चिल्लाक कहनें, “तुम अपना टाङ्गमे ठरहेउ!” तउ उ मनइ झराकति उठल आउर नेंगे लागल। 11जब पावलन करल काम भिरके मनइभर दिखनें, तउ ओइनें लुकोनिया भासामे बन्ना अबाजमे चिल्लाक अइसे केहे लगनें, “देबताभर मनइक रुप लइके हम्मरतिरा आइल आहें।” 12ओइनें बारनाबासकेहें जिउस देबता#१४:१२ जिउस देबता: गिरिकमे मनइभर जिउस देबताकेहें खास देबता मानें। आउर पावल खास परचारक होइलके मारे उनके हरमेस देबता#१४:१२ हरमेस देबता: गिरिकमे मनइभर हरमेस देबताकेहें अउरे देबताभरिनके खबर पुगइया मानें। कहनें। 13अब जिउस देबताके मन्दिर सहरके गेटके बाहिर रेहे। उहिकमारे उ मन्दिरके पुजारि मनइभरिनसँघ बरधाभरिन आउर फुलक माला लइके पावल आउर बारनाबासके आगे बलिदान चरहइना मन करके, सहरके गेटमे जमा हुइनें।
14पर जब बारनाबास आउर पावल यि बात सुन्नें, ओइनें ढेरे दुखि होक अपना-अपना लत्ता फरनें आउर दउरत मनइभरिनके भिरमे जाक बन्ना अबाजलइक चिल्लाक कहनें, 15“तोइनें इ का करत बाटो? हमरे फेक ते तोइन ढार दुख सुख सहना मनइ होइ। हमरे तोइन अइसन बेकार काममहति लउटाक जिति परमेस्वरतिरा लइजाइक तहन खुसिक सुसमाचार परचार करे आइल होइ। स्वरग, धरति, समुन्दर आउर ओहमे रहल सब चिझ बनइया उहि परमेस्वर आहें।#पर्स २०:११; भज १४६:६ 16बितल समयमे ते, परमेस्वर सब मनइभरिन अपना-अपना इच्छा ढार चलेक दहनें। 17तभुफेक परमेस्वर कबु फेक बरहिया काम करेक नाइछुरनें। उ तोइन दया करके बदरिमहति पानि बरसाक सहि बखतमे बालिनालि दहले आहें। उ तोइन तहन सब खइना चिझ जुटादहले आहें आउर तोइन मन आनन्दलइक भरदहले आहें।” 18इ सब बात कहिके बारनाबास आउर पावल मनइभरिन मुस्किलति बलिदान चरहाइक रुक्नें।
19ओहकापाछुक कत्ता जनें यहुदिभर एन्टिओखिया आउर आइकोनियम सहरमहति हुँवाँ अइनें आउर भिरके मनइभरिन उक्साक, पावलकेहें पथ्रालइक मरनें। ओइनें पावल मरगेल हुइहें कहिके सहरमहति बाहिर घसिटत लइगिनें। 20पर जब चेलाभर पावलके चारोघइन जमा हुइनें, पावल उठनें आउर उहि सहरमे पिल्नें। अउरे रोज पावल बारनाबाससँघ डरबि सहरमे गिनें।
पावल आउर बारनाबास सिरियाके एन्टिओखियामे लउटनें
21जब पावल आउर बारनाबास डरबि सहरमे सुसमाचार परचार करके ढेरे जन्हिन परभु येसुके चेला बनइनें, हुँवाँति लुस्त्रा आउर आइकोनियम हुइति ओइनें पिसिदिया इलाकक् एन्टिओखिया सहरमे लउटनें। 22ओइनें हुँवाँ रहल परभुके चेलाभरिन आत्मामे बलगर बनइनें आउर बिस्वासमे सदा अटल रेहेक तहन ओइन हिम्मत दइक, अइसे कहनें, “हमरे परमेस्वरके राज्यमे जाइक तहन ढेरे दुख कस्ट सहेक परता।” 23ओहकापाछुक पावल आउर बारनाबास सब मन्डलिमे एल्डर पदमे मनइभरिन छँटनें। पावल आउर बारनाबास सब जन्हिनसँघ मिलके उपबास बइठके आउर पराथ्ना करके ओइन बिस्वास करल, परभु येसुके हाथमे ओइन सँउपदहनें।
24ओहकापाछुक पावल आउर बारनाबास पिसिदिया इलाका हुइति पामफिलिया इलाकामे गिनें। 25ओइनें परगा सहरमे परमेस्वरके बचन परचार करसिकलपाछुक, अटालिया सहरमे गिनें। 26पावल आउर बारनाबास हुँवाँति जहाजमे चरहके सिरिया इलाकक् एन्टिओखिया सहरमे लउटनें। उहि सहरमे बिस्वासिभर पावल आउर बारनाबासकेहें परमेस्वरके अनुगरहमे सँउपके परचार करना काममे पठइले रेहें। तउके ओइनें उ काम पुरा करके उहि जगामे लउटनें।
27पावल आउर बारनाबास एन्टिओखिया सहरमे पुगके, हुँका मन्डलिके बिस्वासिभरिन जमा करनें। परमेस्वर कइसे ओइनमहति काम करनें आउर अउरे जातके मनइभरिनके तहन बिस्वास करेक तहन फेक डगर खोलदहनें, ओहका बारेम फेक सुनइनें। 28पावल आउर बारनाबास उ सहरमे बिस्वासिभरिनसँघ ढेरे रोजतक बइठनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.